Isekiyele
12 Ondaka ya Siovaa aindyendela vali aiti: 2 “Mona womulume, ove uli meumbo lionomphuki. Vena omaiho okutala, mahi kaveete-po, vena omakutwi okutehela mahi kaveivi-ko,+ mokonda eumbo-ale lionomphuki.+ 3 Ove mona womulume, longela ovityuma viove wende koukonde. Enda umwe komutenya otyo vekweete, wende koukonde. Tunda meumbo liove enda koukonde, enda no kokukwavo otyo vekutala. Hamwe vetyimona, namphila eumbo-ale lionomphuki. 4 Lupula ovityuma viove pondye komutenya wende koupika otyo vekweete, tyina pahe kunthikovela lupuka ngatyina ukahi nokutwalwa koukonde,+ otyo vekutala.
5 “Ngwe pokuli opo nokukutala, ove tiula emphana motyimato, nga-po upitisila ovityuma viove, ovitwala kondye.+ 6 Mokuli nokukutala, ove kwata ovityuma viove ovipake potyipepe, ovitwala kondye kounthiki. Lifika motyipala tyove, wahamone pohi, ndyikulinge otyilekesa tyeumbo lya Isilayeli.”+
7 Ame andyilingi umwe etyi natumwa. Andyilupula ovityuma viange pondye komutenya lwo ou wenda koukonde, tyina tyati kongulohi andyitiula emphana motyimato nomavoko. Pahe etyi kwanthikovela, andyityindi ovityuma viange potyipepe, andyivitwala kondye, otyo vatala.
8 Muhuka tyee, ondaka ya Siovaa aindyendela vali aiti: 9 “Mona womulume, veumbo lya Isilayeli kavekupulile, veumbo lionomphuki, kavapulile-ale okuti: ‘Etyi ulinga otyityi?’ 10 Vepopila uti: ‘Etyi otyo tyapopia Tatekulu Ohamba Onene Siovaa, wati: “Onondaka ombu, mbupopia ohongoi+ mo Selusalei, aveho veumbo lya Isilayeli veli mepunda-umbo.”’
11 “Uti: ‘Ame, ame tyilekesa tyenyi.+ Etyi nalinga, otyo mavakalingwa. Mavaende koukonde, avakalinga ononkhwatwa.+ 12 Ohongoi vena-yo pokati kavo, makatyinda ovityuma viae potyipepe, akatunda-mo kounthiki. Makatiula emphana motyimato, apitisila-po ovityuma viae, viende no kondye.+ Makahika otyipala tyae, ahamone pohi.’ 13 Mandyikemuyumba owanda wange, ankhi mowanda wange wokutela.+ Pahe ha andyimutwala ko Mbambilonia otyilongo tyova Kalindeya, mahi otyilongo otyo kameketyimona; oko makankhila.+ 14 Aveho veli ponthele yae, ovaundapi vae, novita viae, mandyiveyandyanesa;+ mandyinane-mo omutunga ndyivetaate.+ 15 Tyina nameveyandyanesa no movanthu vovilongo, avelityandyana novilongo, mavakankhola umwe okuti ame, ame Siovaa. 16 Mahi mandyikahupisa vamwe komutunga, no kondyala, no komukihi, veketyipopie-popie tyovituwa viavo aviho vitoyesa, veketyitole movanthu vovilongo oku mavaende nako; mavakankhola umwe okuti ame, ame Siovaa.”
17 Ondaka ya Siovaa aindyendela vali aiti: 18 “Mona womulume, ove una okulia ombolo yove tyateketa, onu omaande ove tyapaalala, tyalinga otyiho otyinene.+ 19 Popila ovanthu votyilongo uti: ‘Tatekulu Ohamba Onene Siovaa wapopila vokukala mo Selusalei, motyilongo tyo Isilayeli, wati: “Mavakalia ombolo yavo notyiho, mavakanwa omaande avo nowoma omunene, tyeetyi otyilongo atyiho matyikesala oluhandya,+ kombanda yovivi ovanthu vakala-mo valinga.+ 20 Omapunda-umbo maakahanywa-ko, otyilongo matyikalinga ekongola;+ onwe mamukankhola okuti ame, ame Siovaa.”’”+
21 Ondaka ya Siovaa aindyendela vali aiti: 22 “Mona womulume, omuhe una munao mo Isilayeli upopia-tyi-ale?+ Wokwati: ‘Ononthiki ombombo mbulamba, tyamwenwe movililenya tyitupu.’ 23 Vepopila uti: ‘Etyi otyo tyapopia Tatekulu Ohamba Onene Siovaa, wati: “Omuhe oo mandyiupolo-ko, nawike vali mo Isilayeli mekeupopia.”’ Mahi vepopila uti: ‘Ononthiki mbuli popepi,+ tyamoneka memonekelo atyiho matyilingwa.’ 24 Meumbo lya Isilayeli+ kamamukamonwa vali emonekelo liounkhembi, nii ovitapi viomatutu.* 25 ‘“Mokonda ame Siovaa mandyipopi. Ondaka ndyipopia, mailingi etyi yatolelwa tyahasete.+ Pononthiki mbenyi,+ onwe veumbo lionomphuki, ame mandyipopi ondaka, ailingwa,” otyo tyapopia Tatekulu Ohamba Onene Siovaa.’”
26 Ondaka ya Siovaa aindyendela vali aiti: 27 “Mona womulume, ovanthu va* Isilayeli veli nokuti: ‘Etyi amona movililenya, matyilingwa vala haa, uli nokuula etyi tyikalingwa vala haa, hapehepano.’+ 28 Vepopila uti: ‘Etyi, otyo tyapopia Tatekulu Ohamba Onene Siovaa, wati: “‘Naike ponondaka mbange maikaseta; atyiho ndyipopia matyikalingwa.’ O Tatekulu Ohamba Onene Siovaa wetyipopia.”’”