Wa Vali Wahonekelwa Ova Kolindu
13 Eli ñgaa o tatu ndyili nokuya oko kwoonwe. “Mokonda tyina otyipuka tyina onombangi vevali hamwe vetatu, tyiviuka.”+ 2 Namphila neheli oko, mahi ndyilinga ngatyina neya-le oko lya vali, tuna onwe, ava vokwalingaile ononkhali, novakwavo vali aveho ndyivelondole, ame ine ndyiya vali oko himeveevela, 3 mokonda naina onwe mwahanda mutale ine tyili Kilisitu upopila umwe mwaame, uti tyina ati pokumuviuka wapama kayengengele. 4 Tyili ngwe waipaelelwe momuti kombanda yokwahapamene, mahi pahe una omwenyo mokonda yononkhono mba Huku.+ Otyili, noonthwe twakala tyahapamene nae, mahi matukakala nae+ mokonda yononkhono ononene mba Huku mbuli mwoonwe.+
5 Litalei-talei nawa mutale ine mwapamena umwe monthumbi; Limakailei mulitale onwe muvanthu patyi.+ Ine onwe kamutyii okuti Sesusi Kilisitu uli peke noonwe? Kamukala vala peke nae tyina nkhwali mwehetavelelwe. 6 Ame ndyiyumba-ko onthumbi, onwe mutyii okuti onthwe twetavelwa.
7 Pahe tulikwambela vala ku Huku onwe mwahalinge etyi tyapenga, ha tyokuti opo onthwe tulinge vokwetavelwa, mahi onwe twahanda mulinge etyi tyaviuka, onthwe ngatulingi vala lwa ava vehetavelelwe. 8 Mokonda onthwe katupondola okulinga natyike tyinyona otyili, mahi otyili tutyiyakulila. 9 Onthwe mwene tyili apeho tuhambukilwa okwayengenga kwetu, onwe ngoonwe mupama. Onthwe tulikwambela twiita umwe onwe muviuke. 10 Aluho ame ndyimuhonekela ovipuka evi nkhele mokuli kokule, okwati opo tyina ndyiya oko andyilingila vala ovipuka omu natuminwa na Tatekulu anahalambesa,+ ndyitunge, nahahanye.
11 Mahi pahe vakulu vange, apeho hambukwei, liviukisei, pamekei,+ sokelei kokulike,+ lingei vombembwa;+ Huku wolwembia, wombembwa+ makala noonwe. 12 Likukunyei na vakwenyi nombesu yasukuka. 13 Ovasukuki aveho vemutyalungusa-po.
14 Okankhenda okanene ka Tatekulu Sesusi Kilisitu kakale noonwe amuho, atyiho nolwembia lwa Huku, noviwa viomphepo ikola.