Wo Tete Wahonekelwa Ova Kolindu
6 Onwe tyina pwoonwe pena ava vena onondaka,+ mulipela-tyi tyokwenda kombonge kovanthu vehe-vokuviukisa, amwahaende no kovasukuki? 2 Ine onwe kamutyii okuti ovasukuki ovo mavakoyo omphela youye?+ Opo pahe ine ouye onwe mamupopi omphela yao, okuliuungulula vala etyi tyonondaka mbenyi tyehena-le omphela onene, otyo mwehevili? 3 Kamutyii okuti onthwe matukakoya omphela yonoandyu?+ Opo movipuka vala evi tuna-vio, ovio mwehevili? 4 Pahe opo naina tyina muna onondaka movipuka vala evi viehevinene-ale+ omokonda yatyi mukaovolela ovalume vakoye omphela yenyi ngwe vomewaneno kavevetale-ale nomaiho omawa? 5 Ndyimupopia umwe mukunde. Onwe mwene po yenyi, petupu omulume omunandunge utyivila okuteta onomphela mba vakwavo? 6 Pahe soka, umwe utwala umwe mukwavo vafenda nae mombonge avai kovanthu vehevataveli!
7 Ngwe tyili tyina mulitwala na vakwenyi monombonge, opo tyakundisa-le kamwetyivilile. Oityi mwahatila tyina mwalingwa otyivi amuyekeko vala?+ Ha hahe vali mwahulile vala kokupombwa? 8 Noonwe mupengesa, mupomba, mahi ngwe o vakwenyi mufenda navo mutyilinga!
9 Ine onwe kamutyii okuti onondingavivi kavakatambula Ouhamba wa Huku?+ Mwahayondywei.* Ava velipaka mouhayo wokulihanda,*+ vokufenda ovilolo,+ vomaumbalehi,+ ovalume velipaka mokuhanda valume vakwavo,+ ovalume vakalela vala okulala na valume vakwavo,+ 10 ovimphulu, velungavi,+ vokunwa unene,+ vokuleva,* vokupunda vya vakwavo, aveho ovo kavakapiñgana Ouhamba wa Huku.+ 11 Na vamwe pwoonwe otyo vali otyo. Mahi pahe onwe mwakohwa;+ pahe mwasukulwa;+ mutiwa umwe munondingaviwa+ mu Tatekulu Sesusi Kilisitu, momphepo ya Huku yetu.
12 Ame ovipuka aviho neviyekelwa,* mahi ha aviho vieeta otyiwa.+ Ame ovipuka aviho, neviyekelwa, mahi ame himayeke natyike tyinthumine. 13 Okulia kwalingilwa meimo, eli eimo lialingilwa okulia, mahi Huku mevipolo-ko.+ Olutu kalwalingililwe tyouhayo wokulihanda,* mahi lwalingilwa Tatekulu,+ ou Tatekulu o tatekulu yolutu. 14 Mahi Huku wapindula-po Tatekulu,+ noonthwe meketupindula-po kovokwankhia+ kononkhono mbae.+
15 Kamutyii okuti omalutu enyi, eli kolutu lwa Kilisitu?+ Pahe opo ngaame ndyipondola, kolutu lwa Kilisitu andyipolo-ko, etyi napola-ko andyiketyipaka kekunga? Na katutu vala! 16 Kamutyii okuti ou ukelipaka mekunga, vakalinga olutu lwike nekunga? Mokonda “ovo vevali,” otyo atola wati, “vakakala ohitu ike.”+ 17 Mahi ou welipaka mu Tatekulu, pahe opo vasokela umwe kokulike nae.+ 18 Tilei ouhayo wokulihanda!*+ Ononkhali ambuho omunthu apondola okulinga, ombo o kondye yolutu, mahi ou ulipaka mouhayo wokulihanda, oo olutu lwae mwene anyona.+ 19 Onwe kamutyii okuti olutu lwenyi ondywo+ yomphepo ikola, omphepo ili mu onwe ei mwapewa na Huku?+ Onwe kamutei vali kwoonwe mwene,+ 20 onwe mwalandwa, mwafetelwa.+ Naina, nkhimanekei Huku+ nomalutu enyi.+