Wo Tete Wahonekelwa Ova Tesalonika

1 Ame Paulu, tuna ovo Silivanu*+ na Timotiu,+ wenda kewaneno lyo mo Tesalonika lili kumwe na Huku, Tate, na Tatekulu Sesusi Kilisitu:

Okankhenda okanene kakale noonwe, ombembwa ilinge yenyi.

2 Onthwe apeho nga twemusoka, tumutumbula amuho momalikwambelo etu+ atupandula Huku, 3 onthwe apeho tuhinangela ovilinga vienyi vituka keyumba-nthumbi, ononkhono mulinga monthyole yenyi, okukoleleya kwenyi tyokwapamena mweetyi mukevela+ mu Tatekulu yetu Sesusi Kilisitu kotyipala tya Huku yetu, Tate yetu. 4 Onthwe tutyii, vanthu vetu onwe Huku ehole, mwene oe wemuholovona, 5 mokonda oviwa ovipe onthwe tupopia, oko kavieile-ko vala monondaka, mahi tupu vieya nononkhono, vieya nomphepo ikola, vieya tyakululuka umwe nawa, onwe mutwii umwe oñgeni twakala noonwe oko pokulingila onwe. 6 Onwe mwalinga vokuhetekela onthwe,+ vokuhetekela Tatekulu,+ mokonda ondaka mweitavelela umwe mononkhumbi ononene,+ mweitavela tyahambukwa nomphepo ikola, 7 onwe mwalinga ovanthu vehiwa okuhetekelwa novataveli aveho vo mo Masendonia no vo mo Akaya.

8 Ngwe mwene tyili, handaka ya Siovaa* vala yatunda mwoonwe aikeivala mo Masendonia no mo Akaya, mahi okuyumba kwenyi onthumbi mu Huku kwahahana notyilongo,+ nokupopia vala tutupu-ale vali etyi tupopia. 9 Vana kavatalama-le kokupopia onthiki yotete twelivasile noonwe, otyipuka mwaanguluka no ku Huku amuyeke-po ovilolo vienyi,+ mulinge ovapika va Huku una omwenyo, Huku yotyotyili, 10 mukevele Omona wae utunda keulu,+ ou wapindulwa-po kovokwankhia, Sesusi, ou utuhukulula konyengo ili nokuya.+