LEVITIKU

1 Siovaa wali mohinge yomaliongiyo,+ aihana Mwisesi, emupopila ati: 2 “Popila ova Isilayeli* uti: ‘Ine umwe pwoonwe upola povipako viae aetela Siovaa otyiawa, otyipako otyo tyina okukala onthane, ongi, otyinkhombo.+

3 “‘Ine waava otyiawa tyokuyokwa, aave onthane, una okwaava onthwei ikahi nawa.+ Una okuyaavela Siovaa kokwahanda kwae,+ eyaavela kombundi yohinge yomaliongiyo. 4 Una okupaka okuvoko komutwe wotyipako, matyilingwa otyiawa tyokuyokwa. Huku metavela otyiawa otyo, aevela ononkhali mbae.

5 “‘Pahe onthane aiipawa otyo Siovaa atala. Ovana va Alau ovanakwa,+ avaave ohonde yatyo ku Huku, aveinyanya-nyanya kononthele ambuho mbomutala wovilikutila,+ ukahi komutwe wohinge yomaliongiyo. 6 Otyipako tyotyilikutila tyokuyokwa tyina okuyuwa, atyitetwa ovinthimbu-ovinthimbu.+ 7 Ovana va Alau ovanakwa vaete otupia komutala wovilikutila,+ avapake-ko ononkhwii. 8 Avapake potupia* ovinthimbu-ovinthimbu viotyiawa,+ nomutwe watyo, novilenga viatyo,* potupia tuli kombanda yomutala wovilikutila. 9 Omala maakohwa, novikalo viatyo avikohwa. Omunakwa mapake atyiho komutala wovilikutila, atyitwimina-ko, atyilingi otyilikutila tyokuyokwa. Otyo otyiawa tyokuyokwa tyomuniko omuwa,* tyilingilwa Siovaa.+

10 “‘Ine omunthu umwe waava otyilikutila tyokuyokwa, apolo povipako viae,+ tyilinge ondyona tyilinge otyikombo, una okwava otyitwei tyikahi nawa.+ 11 Otyipako tyina okwipaelwa ponthele pomutala okuyemba kombanda, Siovaa otyo atala. Ovana va Alau ovanakwa, avanyanya-nyanya ohonde kononthele ambuho mbomutala wovilikutila.+ 12 Omunakwa matete otyipako ovinthimbu-ovinthimbu, evipake potupia komutala wovilikutila, novilenga viatyo nomutwe watyo. 13 Omala maakohwa, novikalo viatyo avikohwa. Omunakwa mapake atyiho komutala wovilikutila, atyitwimina-ko, atyilingi otyilikutila tyokuyokwa. Otyo otyiawa tyokuyokwa tyomuniko omuwa tyilingilwa Siovaa.

14 “‘Ine omunthu umwe waavela Siovaa oviila vilingwe otyilikutila tyokuyokwa, una okwava omakuti, okuti hatyo, aave omailona onopomba.+ 15 Omunakwa una okuviavela aviho komutala wovilikutila. Matete pomunyino wotyiila noluhoka, etyipake potupia tyitwimine komutala wovilikutila. Ohonde yatyo eimomesila komutala wovilikutila nthele imwe. 16 Una okuvitunya, evipolo ovisuku-suku,* omainya atyo novisuku-suku ekeeyumba pomutala wovilikutila koutundilo, pana papakwa etwe.*+ 17 Eviikula mokati, mahi eheviyapula. Omunakwa evipake potupia komutala wovilikutila, vitwimine-ko. Otyo otyiawa tyokuyokwa tyomuniko omuwa tyilingilwa Siovaa.

2 “‘Ine pena umwe weetela* Siovaa otyilikutila tyovilia,+ ovilia viatyo vina okukunkhwa, ofinde yatyo ainyetuka umwe nawa, apake-ko omulela, nolimbanu.+ 2 Pahe etyitwala kovana va Alau ovanakwa, omunakwa ayoyo-mo enkhanya like liofinde yanyetuka yapakwa omulela nolimbanu. Etyipake potupia tyitwimine komutala wovilikutila, ngatyina otyiawa tyamundindi,+ otyiawa tyokuyokwa tyomuniko omuwa* tyilingilwa Siovaa. 3 Etyi tyahupa-po o tya Alau novana vae,+ otyo otyipuka tyikola+ tyatunda poviawa viokuyokwa vilingilwa Siovaa.

4 “‘Ine umwe weeta otyiawa tyovilia tyalingilwa mofolono, tyina okulingwa nofinde yanyetuka, otyiawa tyonombolo mbeliseta elola, mbapakwa omulela mbehena onkhiso, okuti hatyo mbelisipata mbapakwa omulela, mbehena onkhiso.+

5 “‘Ine otyiawa tyove otyovilia tyalingilwa posekeseke+ ovilia viatyo vina okukunkhwa avikala ofinde yehena onkhiso yanyetuka yahonyaikwa nomulela. 6 Onombolo ombo mbuna okuvembaulwa ovimbembu, ombutili omulela.+ Otyo otyiawa tyovilia.

7 “‘Ine otyiawa tyove wahanda okwava tyatelekwa mombiya, ofinde yatyo ina okunyetuka atyipakwa omulela. 8 Una okutwaila Siovaa otyiawa otyo tyovilia, tyalingwa novipuka ovio, tyina okupewa omunakwa, omunakwa etyitwala pomutala wovilikutila. 9 Omunakwa mapolo kapii kotyiawa oko tyovilia etyilingi ngatyina otyiawa tyamundindi,+ etyipake potupia tyitwimine komutala wovilikutila tyikale ngotyiawa tyokuyokwa tyomuniko omuwa tyilingilwa Siovaa.+ 10 Tyokwahupa-po tyikale tya Alau novana vae, otyo otyipuka tyikola tyatunda poviawa viokuyokwa vilingilwa Siovaa.+

11 “‘Petupu otyaawa natyike tyovilia mulingila Siovaa, tyipakwa onkhiso,+ mokonda omwihi wonkhiso nomwihi wowiki kaupondola okunkhinga motyaawa tyokuyokwa tyilingilwa Siovaa.

12 “‘Ovio mupondola okuvitwaila Siovaa avikala ngotyiawa tyovipuka vyo tete,+ mahi kavipondola okutwalwa komutala wovilikutila ngatyina otyiawa tyomuniko omuwa.

13 “‘Oviawa aviho ulinga viovilia una okuvihinga omongwa, wahakambese-mo omongwa motyiawa tyove tyovilia okuhinangelesa omphango ya Huku. Una okweta oviawa viove aviho nomongwa.+

14 “‘Tyina utwala otyiawa tyove tyovilia ku Siovaa viokwatetekela okuyela, una okweeta ovilia ovipe* viokwakangwa, ovilia ovipe viatyopwa olukale, atyilingi otyiawa tyovilia viove viokwatetekela okuyela.+ 15 Paka-ko omulela, nolimbanu. Otyo otyiawa tyovilia. 16 Omunakwa mapake potupia ovipuka matwimisa omwihi, olukale lumwe lwahonyaikwa nomulela, nolimbanu, vilinge otyiawa tyamundindi,+ otyiawa tyokuyokwa tyilingilwa Siovaa.

3 “‘Omunthu maave otyilikutila tyombembwa ongombe,+ tyilinge onthwei tyilinge ondema, aavele Siovaa ongombe ikahi nawa. 2 Apake okuvoko komutwe wotyinyama aava, atyiipaelwa kombundi yohinge yomaliongiyo. Ovana va Alau ovanakwa, avanyanya-nyanya ohonde yatyo kononthele ambuho mbomutala wovilikutila. 3 Apole kotyilikutila tyombembwa, alingila Siovaa+ tyokuyokwa: otyilenga+ tyokuhika komala, notyilenga atyiho tyomala, 4 nonoso mbatyo onombali, notyilenga tyambo, otyilenga tyo momalimba. Apole-ko otyilenga tyo kehuli etyihonyeka nonoso.+ 5 Ovana va Alau ovipuka ovio aviho mavevitwimisila komutala wovilikutila, kombanda yotyilikutila tyokuyokwa tyili kononkhwii,+ otyo otyilikutila tyokuyokwa tyomuniko omuwa* tyilingilwa Siovaa.+

6 “‘Ine omunthu umwe upola povingi viae, ine hamwe o povinkhombo viae ngatyo alingila Siovaa otyiawa tyombembwa, tyilinge otyitwei tyilinge otyindema,+ una okwava etyi tyikahi nawa. 7 Ine weeta ondyona opo alinge otyiawa tyae, una okuyaavela Siovaa. 8 Apake okuvoko komutwe wotyinyama aava, atyiipaelwa kombundi yohinge yomaliongiyo. Ovana va Alau avanyanya-nyanya ohonde yatyo kononthele ambuho mbomutala wovilikutila. 9 Aete otyilenga tyotyilikutila tyombembwa, tyilingwe otyiawa tyokuyokwa tya Siovaa.+ Apole-ko omutyila auho wotyilenga kombumbo, novilenga aviho viokuhika komala novilenga aviho viomala, 10 nonoso mbatyo onombali notyilenga tyambo, otyilenga tyo momalimba. Apole-ko otyilenga tyo kehuli etyihonyeka nonoso.+ 11 Omunakwa matwimisila ovipuka ovio aviho komutala wovilikutila, avikala okulia.* Otyo otyiawa tyokuyokwa tyilingilwa Siovaa.+

12 “‘Ine waava otyinkhombo una okutyeetela Siovaa. 13 Una okupaka okuvoko komutwe wotyinyama aeta, atyiipaelwa kombundi yohinge yomaliongiyo; ovana va Alau avanyanya-nyanya ohonde yatyo kononthele ambuho mbomutala wovilikutila. 14 Etyi mapolo-ko alingila Siovaa otyiawa tyokuyokwa otyilenga tyokuhika komala, notyilenga atyiho tyomala,+ 15 nonoso mbatyo onombali notyilenga tyambo, otyilenga tyo momalimba. Apole-ko otyilenga tyo kehuli etyihonyeka nonoso. 16 Omunakwa matwimisila ovipuka ovio aviho, komutala wovilikutila, avikala okulia, otyiawa tyokuyokwa tyomuniko omuwa. Ovilenga aviho ovia Siovaa.+

17 “‘Tyilinge onwe, tyilinge ovanthu mavakatuka-tuka mwoonwe, konomphangu ambuho mamwii nako muna okulandula otyitumino etyi: Mwahaliei ovilenga nii ohonde.’”+

4 Siovaa apopila Mwisesi okuti: 2 “Popila ova Isilayeli okuti: ‘Ine omunthu umwe* ulinga onkhali motyiponyo,+ alingi ovipuka Siovaa atile mwehevilingei, tyilingwe ñgaa:

3 “‘Ine omunakwa+ wokwalembulwa ulinga onkhali,+ ovanthu avavelwa onombei mokonda yonkhali alinga, una okweetela Siovaa onthane ikahi nawa, ikale otyiawa tyonkhali.+ 4 Una okweetela onthane Siovaa, eipake kombundi yohinge yomaliongiyo,+ ayambeka omavoko komutwe wayo, eiipaela Siovaa.+ 5 Pahe omunakwa+ walembulwa apolo kapii kohonde yonthane oyo, eitwala mokati, mohinge yomaliongiyo. 6 Omunakwa mayave omunwe mohonde, anyanye kapii pohi ohonde+ komutwe wotyinyanga tyo momphangu onthyukuki, awana-wana atee tyituuka epandu-vali,+ otyo Siovaa atala. 7 Omunakwa mapake kapii ohonde konombinga mbomutala wokuyokela ombao yokunika nawa,+ uli komutwe wa Siovaa mohinge yomaliongiyo, ohonde yokwahupa-po yonthane eitili ponthele pehina liomutala wovilikutila viokuyokwa+ uli kombundi yohinge yomaliongiyo.

8 “‘Konthane yotyilikutila tyonkhali opolo-ko ovilenga aviho, novilenga viokuvanda komala, novilenga aviho viomala, 9 novilenga viambo vyo momalimba, notyilenga tyokehuli, etyihonyeka nonoso.+ 10 Mailingwa ngeetyi tyilingwa onthwei yotyilikutila tyombembwa.+ Omunakwa mapake potupia ovipuka ovio aviho, avitwimina komutala wovilikutila viokuyokwa.

11 “‘Mahi ombandwa yonthane, nohitu yatyo aiho, nomutwe watyo, novikalo viatyo, nomala atyo notyandya,+ 12 ovipuka ovio aviho viokwahupa-po, mevitwala kokule na apa vakala, pana pasukuka, pokuyumbwa etwe,* evipake potupia.+ Vina okuyokelwa apa payumbwa etwe.

13 “‘Ine ovanthu aveho ova Isilayeli vena etyi valinga tyapenga motyiponyo,+ aveho avehetyimono okuti etyi valinga Siovaa ketyihande,+ 14 ovanthu avetyiivi okuti valinga etyi tyapenga, aveho vena okwovola onthane aveilingi otyiawa tyonkhali, aveitwala kohinge yomaliongiyo. 15 Ovakulu vatyo aveho avayambeka omavoko komutwe wonthane oyo otyo Siovaa atala, avaipaela onthane komutwe wa Siovaa.

16 “‘Pahe omunakwa wokwalembulwa apolo kapii pohonde yonthane, atwala mokati kohinge yomaliongiyo. 17 Omunakwa mayave omunwe mohonde, anyanye kapii pohi komutwe wotyinyanga+ tyo momphangu onthyukuki, awana-wana atee tyituuka epandu-vali, otyo Siovaa atala. 18 Omunakwa mapake kapii ohonde konombinga mbomutala wovilikutila+ uli komutwe wa Siovaa, mohinge yomaliongiyo ponthele pehina liomutala woviawa viokuyokwa, uli kombundi yohinge yomaliongiyo.+ 19 Onthane oyo meipolo ovilenga aviho, eviyoko vitwimine komutala.+ 20 Onthane oyo ina okulingwa ngeetyi tyalingwa onthane yotyiawa tyonkhali, una okwilinga otyipuka tyike. Omunakwa masukukisa ovanthu kononkhali,+ avaevelwa ononkhali mbavo. 21 Onthane oyo, ina okutwalwa kokule na apa vakala, eiyoko ngeetyi ayoka onthane yo tete.+ Otyo otyiawa tyokuyovola ovanthu aveho mononkhali.+

22 “‘Tyina omunthu umwe ohongoi+ amalingi onkhali motyiponyo, alingi otyipuka Siovaa Huku yae ati katyilingwa, avelwa onombei, 23 ine hamwe etyimono okuti walinga onkhali, waliatela kotyitumino, una okwovola otyinkhombo tyikahi nawa, ngatyo alinga otyiawa. 24 Omunakwa mayambeka okuvoko komutwe wotyinkhombo, etyiipaela apa paipaelwa otyiawa tyokuyokwa, komutwe wa Siovaa.+ Otyo otyiawa tyonkhali. 25 Omunakwa mayave omunwe mohonde yotyiawa tyonkhali, eiwaveka konombinga+ mbomutala woviawa viokuyokwa, ohonde yokwahupa-po, eitili ponthele pehina liomutala wovilikutila viokuyokwa.+ 26 Otyilenga atyiho metyipake potupia, tyitwimine komutala wovilikutila ngeetyi tyilingwa otyilenga tyotyiawa tyombembwa.+ O ngootyo omunakwa masukukisa ohongoi konkhali alinga, onkhali yae eyeevelwa.

27 “‘Ine omunthu umwe motyilongo ulinga onkhali motyiponyo, avelwa onombei mokonda yokwalinga otyipuka Siovaa ati katyilingwa,+ 28 tupu ine utyimona okuti walinga onkhali, una okweeta otyinkhombo otyindema tyikahi nawa, tyilingwe otyiawa tyonkhali alinga. 29 Ayambeke omavoko komutwe wotyinyama malingi otyiawa tyonkhali, etyiipaela apa paipaelwa otyinyama tyotyilikutila tyokuyokwa.+ 30 Omunakwa mayave omunwe mohonde yatyo, awaveka katutu konombinga mbomutala wovilikutila viokuyokwa. Ohonde yokwahupa-po, eitili ponthele pehina liomutala wovilikutila.+ 31 Mapolo-ko otyilenga tyotyinyama ngeetyi tyilingwa otyilenga+ tyotyinyama tyotyilikutila tyombembwa,+ omunakwa atwimisila komutala wovilikutila otyilenga otyo, ngotyiawa tyomuniko omuwa tyilingilwa Siovaa. O ngootyo omunakwa masukukisa omunthu oo konkhali alinga. Onkhali yae eyeevelwa.

32 “‘Mahi ine uhanda okwaava ondyona alinge otyiawa tyonkhali, una okwaava ondema ikahi nawa. 33 Una okuyambeka okuvoko komutwe wotyinyama maave, alinge otyiawa tyonkhali, etyiipaela apa paipaelwa+ otyiawa tyokuyokwa, atyikala otyiawa tyonkhali. 34 Omunakwa mayave omunwe mohonde yotyinyama tyotyiawa tyonkhali, eiwaveka konombinga mbomutala woviawa viokuyokwa.+ Ohonde yokwahupa-po, eitili ponthele pehina liomutala wovilikutila. 35 Una okwipola otyilenga atyiho, ngeetyi tyilingwa ongi yotyilikutila tyombembwa, omunakwa evipake potupia+ komutala wovilikutila, vitwimine omwihi kombanda yoviawa viokuyokwa vilingilwa Siovaa. Ongootyo omunakwa masukukisa omunthu oo konkhali alinga, onkhali alinga eyeevelwa.+

5 “‘Ine omunthu umwe* umona mukwavo ulinga onkhali, ine hamwe wetyiiva vala, pahe eivi ovanthu vaovola onombangi vapopie+ onkhali oyo,* ngwe ahai-ko ekeipopie, nae walinga onkhali, mekeipulwa.

2 “‘Ine omunthu umwe* uyama kotyipuka tyimwe tyasila, tyilinge otyinyama tyasila tyohika tyankhia, tyilinge otyinyama tyasila tyokutekulwa tyankhia, tyilinge otyimwe pounyama oututu+ wasila uli* kombanda yeheke, omunthu oo makala tyasila avelwa onombei, namphila etyilinga tyihetyii. 3 Ine omunthu umwe uyama kotyipuka tyimwe tyisilisa tyihetyii,+ ehetyimono okuti wayama-ko, tyina ametyimono una okuvelwa onombei.

4 “‘Ine omunthu umwe upopia okuti malingi otyipuka tyimwe, tyilinge otyiwa tyilinge otyivi, aane tyahasokele, etyimono okuti waana tyahasokele, uvelwa onombei.*+

5 “‘Ine omunthu umwe una etyi alinga-po povipuka ovio, avelwa onombei, onkhali yae una okukeipopia.+ 6 Tupu, mokonda yonkhali alinga,+ aetele Siovaa otyiawa tyonkhali, aete otyipako otyindema, tyilinge ondyona, tyilinge otyinkhombo, atyilingwa otyiawa tyonkhali. Pahe, omunakwa emukoho konkhali yae.

7 “‘Mahi, ine utupu ongi maave, una okweetela Siovaa omakuti evali okuti hatyo omailona evali onopomba,+ eelingi otyiawa tyonkhali alinga. Otyiila tyimwe atyilingi otyiawa tyonkhali, otyiila otyikwavo atyilingi otyiawa tyokuyokwa.+ 8 Una okutyitwala komunakwa, omunakwa atetekela okwava otyiila tyotyiawa tyonkhali. Omunakwa matete noluhoka pomunyino wotyiila, mahi omutwe watyo eheutipula-ko. 9 Manyanye katutu ohonde yotyiawa tyonkhali mononthele mbomutala, mahi yokwahupa-po, eimomesila ponthele pehina liomutala.+ Otyo otyiawa tyonkhali. 10 Pahe, aave otyiila otyikwavo tyotyiawa tyokuyokwa ngeetyi tyilingwa.+ Ngootyo, omunakwa masukukisa omunthu oo konkhali alinga, onkhali yae eyeevelwa.+

11 “‘Ine ketyivili okweeta omakuti evali, okuti hatyo omailona evali onopomba, monkhali yae, aete omapati evali ohinde yanyetuka, ailingwa otyiawa tyonkhali.+ Kapondola okupaka-ko omulela, nii olimbanu, mokonda otyo, otyiawa tyonkhali. 12 Una okwitwala komunakwa, omunakwa ayoyo mohinde enkhanya like, eilingi ngatyina otyiawa atyiho, eipake potupia itwimine komutala kombanda yoviawa viokuyokwa vilingilwa Siovaa. Otyo otyiawa tyonkhali. 13 Omunakwa makoho omunthu wakwata onkhali mokwalinga tyimwe povipuka ovio, onkhali yae, ayeevelwa.+ Etyi tyahupa-po, tyikala tyomunakwa,+ ngeetyi tyilingwa otyiawa tyovilia.’”+

14 Siovaa atolela vali Mwisesi ati: 15 “Ine omunthu umwe ulinga etyi tyapenga, aliatela kovitumino vipopia ovipuka vikola vya Siovaa,+ una okweetela Siovaa ongi ikahi nawa, yotyiawa tyokwavelwa onombei.+ Onosikulu* mbopalata ongi oyo ifetelwa, mambweelekwa mosikulu yo momphangu ikola.*+ 16 Onkhali oyo alinga, yokuliatela kovitumino viovipuka vikola, una okwifeta ayawisa-ko vali.+ Konopalata ononthano afeta, uyawisa-ko ike. Etyi afeta etyiavela omunakwa memukoho konkhali+ nongi yotyiawa tyokwavelwa onombei, onkhali alinga eyeevelwa.+

17 “‘Ine omunthu umwe ulinga onkhali, mokulinga otyipuka tyimwe Siovaa ati katyilingwa, namphila ehetyii, una okuvelwa onombei, apulwa onkhali oyo.+ 18 Una okweeta komunakwa ongi ikahi nawa, yata motyifwe tyaitwa, ailingwa otyiawa tyokwavelwa onombei.+ Omunakwa akoho omulume oo konkhali alinga motyiponyo, alinga tyihetyii, onkhali yae eyeevelwa. 19 Otyo, otyiawa tyokwavelwa onombei. Mokonda walinga onkhali ku Siovaa.”

6 Siovaa apopila Mwisesi okuti: 2 “Ine umwe* ulinga onkhali, ahakala omunthu wotyili ku Siovaa,+ aholeka otyipuka tyimwe mukwavo emupakesa+ ine hamwe asilwa opinyolo, etyivake, ine hamwe akembe mukwavo, 3 avasi otyipuka tyimwe tyavomba, akembe ati hetyimwene, una walinga ononkhali ombo,+ aane, ati hetyilingile, una okulinga ñgaa: 4 Ine walinga tyimwe povipuka ovio, avelwa onombei, una okukondola etyi apola, tyilinge wetyivaka, tyilinge wetyipola kononkhono, tyilinge wetyimonena mokukemba, tyilinge ankho wetyipakeswa, tyilinge ankho wetyivasa tyavomba, 5 ine wakemba vali tyimwe, aane, una okufeta, ayawisa-ko.+ Konopalata ononthano afeta, uyawisa-ko ike. Etyaavela hekulu monthiki tyamoneka okuti uvelwa onombei. 6 Matwala ongi ikahi nawa komunakwa, ailingilwa Siovaa otyiawa tyokwavelwa onombei. Ongi oyo, ina okuvasa motyifwe aitwa, ilingwe otyiawa tyokwavelwa onombei.+ 7 Omunakwa maave otyiawa otyo ku Siovaa opo tyikohe omunthu oo konkhali alinga, onkhali yokwemuvelesa onombei.”+

8 Siovaa apopila vali Mwisesi okuti: 9 “Popila Alau novana vae otyitumino etyi: ‘Otyiawa tyokuyokwa,+ tyina okulingwa ñgaa: Otyiawa tyokuyokwa matyikala potupia tuli komutala otyinthiki atyiho atee kutya, potupia twatyo pena okuhohiywa pahanyime. 10 Omunakwa mavale otyikutu tyae tyovilinga tyatungwa nomulinya,*+ avale ovikalasau viae viatungwa* nomulinya kolutu.*+ Apolo etwe*+ liotyiawa tyokuyokwa komutala, elipake ponthele pomutala. 11 Haa alulu-mo omivalo viae,+ avale omikwavo, atwala etwe apa pasukuka, kokule na apa vakala.+ 12 Otupia two komutala tuna okuhohiywa apeho-apeho na twahanyime. Apeho tuna okukala tyatema. Omunakwa una okupaka-po ononkhwii+ ononthiki ambuho komuhuka, apake-ko otyiawa tyokuyokwa, apake potupia ovilenga viovilikutila viombembwa, vitwimine-ko.+ 13 Otupia komutala tuna okuhohiywa apeho opo twahanyime. Tuna okukala vala tyatema.

14 “‘Etyi otyitumino tyotyiawa tyovilia:+ Ovana va Alau vena okutyitwala komutala wovilikutila komutwe wa Siovaa. 15 Umwe puvo, mapolo mohinde yanyetuka yotyiawa tyovilia enkhanya like, no momulela, apolo-po olimbanu yotyiawa tyovilia, apake potupia komutala, vitwimine-ko, vilinge otyiawa atyiho tyamundindi* tyomuniko omuwa* tyalingilwa Siovaa.+ 16 Alau novana vae mavali-po etyi tyahupa-po.+ Mavalingi nayo onombolo mbahaile onkhiso, avembulila pomphangu imwe yasukuka. Mavembulila mepata liohinge yomaliongiyo.+ 17 Kambupondola okulingwa nonkhiso.+ Otyo, otyo nevepolela poviawa nalingilwa viokuyokwa.+ Otyo otyipuka tyikola,+ tyikahi ngotyiawa tyonkhali, notyiawa tyokwavelwa onombei. 18 Ovakwendye aveho vatuka mu Alau, vena okulia-ko.+ Ovio, ovipuka vapewa, vapolelwa koviawa viokuyokwa vilingilwa Siovaa mavilingi viavo,+ navo novanthu mavakatuka-tuka muvo atee-tee. Atyiho tyiyama kuvio,* tyikala otyipuka tyikola.’”

19 Siovaa atolela vali Mwisesi okuti: 20 “Onthiki Alau malembulwa, nae novana vae, vena okweeta ku Siovaa otyiawa etyi:+ Omapati evali+ ofinde yanyetuka, ikale otyiawa tyovilia+ ngeetyi tyilingwa-lingwa-le, atepula pokati, tyimwe etyiave komuhuka, otyikwavo etyiave kongulohi. 21 Ina okukangelwa koseke-seke nomulela.+ Una okutyieta tyahonya nawa nomulela, tyikale otyiawa tyovilia tyayokwa tyavembaulwa tyina omuniko omuwa ku Siovaa. 22 Tyina umwe povana+ va Alau alembulwa opo emupinge kounakwa, nae una okulinga otyiawa otyo. Otyo otyitumino tyina okulandulwa apeho. Otyiawa atyiho tyamundindi tyina okuyokelwa Siovaa. 23 Otyiawa tyovilia tyilingilwa omunakwa, tyina okuyokwa atyiho. Katyipondola okuliwa.”

24 Siovaa atolela vali Mwisesi okuti: 25 “Tolela Alau novana vae okuti: ‘Etyi, otyitumino tyotyiawa tyonkhali:+ Apa paipaelwa otyiawa tyokuyokwa,+ opo mapaipaelwa otyiawa tyonkhali tyilingilwa Siovaa. Otyo, otyipuka tyikola. 26 Omunakwa wamaave otyiawa tyonkhali, mali-ko tyae.+ Tyina okulilwa pomphangu imwe yasukuka, mepata liohinge yomaliongiyo.+

27 “‘Atyiho tyiyama kohitu yotyiawa, matyikala otyipuka tyikola. Ine ohonde yotyiawa itiapinina kotyikutu tya umwe, otyikutu otyo tyikohela pomphangu imwe onthyukuki. 28 Ine ohitu oyo itelekwa mombiya yoluma, ombiya oyo ina okutyatyaulwa. Mahi ine itelekwa mombiya yotyitasu, ina okukweywa, aikohwa.

29 “‘Ovanakwa aveho vena okulia-ko.+ Otyo otyipuka tyikola.+ 30 Mahi, ine kohonde yotyiawa tyonkhali kwapolwa, aitwalwa mohinge yomaliongiyo ikohe momphangu ikola,+ opo katyipondola okuliwa. Tyina okuyokwa potupia.

7 “‘Etyi otyitumino tyotyiawa tyomunthu wavelwa onombei.+ Otyiawa otyo, tyikola. 2 Otyinyama tyotyiawa tyomunthu wavelwa onombei, tyina okwipaelwa apa paipaelwa ovinyama viotyiawa tyokuyokwa. Ohonde yatyo,+ ina okunyanywa kononthele ambuho mbomutala.+ 3 Una okweeta ovilenga viatyo aviho,+ nomutyila, novilenga viokwavanda komala, 4 nonoso, novilenga viatyo vyo momalimba. Tupu apole-ko otyilenga tyokehuli, etyihonyeka nonoso.+ 5 Omunakwa mapake ovipuka ovio potupia komutala, vitwimine-ko omwihi, vilinge otyiawa tyokuyokwa tyilingilwa Siovaa.+ Otyo otyiawa tyomunthu wavelwa onombei. 6 Ovanakwa aveho vena okulia-ko.+ Ina okulilwa pomphangu imwe ikola. Otyo, otyiawa tyikola.+ 7 Otyitumino tyotyiawa tyonkhali, tupu tyina okulandulwa potyiawa tyomunthu wavelwa onombei. Tyikala tyomunakwa wokukoha ononkhali.+

8 “‘Tyina omunakwa amalingila omunthu umwe otyiawa tyokuyokwa, ombandwa+ yotyinyama tyatyo una okusala nayo.

9 “‘Otyiawa tyovilia tyiyokwa mofolono, ine hamwe tyitelekwa mombiya, ine hamwe tyikangwa poseke-seke,+ tyikala tyomunakwa wetyiava. Otyiawa otyo, matyikala tyae.+ 10 Mahi otyiawa tyovilia, tyilinge tyapakwa omulela+ tyilinge tyakukuta,+ tyikala tyovana va Alau. Aveho vena okupewa otyilifwe.

11 “‘Otyo otyitumino tyotyilikutila tyombembwa,+ tyipondola okwavelwa Siovaa. 12 Ine umwe utyilingila okupandula,+ una okutyieta nonombolo mbeliseta elola mbapakwa omulela, mbehena onkhiso, nonombolo mbelisipata mbehena onkhiso mbapakwa omulela, nonombolo mbeliseta elola mbalingwa nofinde yanyetuka nawa yahonyekwa, mbatomphwa omulela. 13 Una okweeta otyiawa otyo nonombolo mbeliseta elola mbahapakelwe onkhiso, notyilikutila tyombembwa tyalingilwa okupandula. 14 Potyiawa otyo mapolo ike-ike ponombolo ambuho ambukala otyiawa tyikola ku Siovaa. Otyiawa otyo atyilingi tyomunakwa wanyanya ohonde yovilikutila viombembwa+ komutala. 15 Ohitu yotyilikutila tyombembwa yalingwa otyiawa tyokupandula, ina okuliwa monthiki omunthu etyiava. Kapondola okupola-ko alaleka.+

16 “‘Ine otyilikutila aava, wetyiava opo afwisepo tyimwe apopile,+ ine hamwe wetyiava kotyali tyae,+ ohitu yatyo ina okuliwa monthiki alinga otyilikutila, ei yahupa-po ailiwa muhuka lya mukwavo. 17 Ohitu yamahupu-po aivasi monthiki ya tatu, ina okupakwa motupia.+ 18 Ine ohitu yotyilikutila tyombembwa iliwa monthiki ya tatu, omunthu weyeeta kametavelwa. Otyilikutila tyae kamatyitavelwa. Omunthu* wamali-ko makapulwa onkhali oyo alinga.+ 19 Ohitu iyama kotyipuka tyasila kaipondola okuliwa. Ina okupakwa motupia aipila-mo. Ohitu yasukuka iliwa vala nomunthu wasukuka.

20 “‘Mahi omunthu* wasila ulia kohitu yotyilikutila tyombembwa, tyalingilwa Siovaa, pokati kovanthu vae+ una okwipawa-po. 21 Ine omunthu umwe uyama kotyipuka tyasila, tyilinge omunthu wasila+ tyilinge otyinyama tyasila,+ tyilinge otyipuka otyikwavo tyasila tyitoyesa,+ ali kohitu yotyilikutila tyombembwa, tyilingilwa Siovaa, pokati kovanthu vae una okwipawa-po.’”

22 Siovaa apopila vali Mwisesi okuti: 23 “Tolela ova Isilayeli okuti: ‘Onwe kamupondola okulia ovilenga+ viongombe onthwei, nii viondyona, nii viotyinkhombo. 24 Otyilenga tyotyinyama tyavasiwa tyankhia, notyilenga tyotyinyama tyaipawa notyinyama otyikwavo, vipondola okulingwa otyipuka otyikwavo, mahi kavipondola okuliwa.+ 25 Omunthu wamali kovilenga viotyinyama tyaawa atyilingwa otyilikutila tyokuyokwa tya Siovaa, pokati kovanthu vae una okwipawa-po.

26 “‘Konomphangu ambuho mwamakakala kamupondola okulia ohonde,+ tyilinge yotyiila tyilinge yotyinyama. 27 Una* wamali ohonde yotyinyama tyimwe, pokati kovanthu vae una okwipawa-po.’”+

28 Siovaa atolela vali Mwisesi okuti: 29 “Popila ova Isilayeli okuti: ‘Una wamaetela Siovaa otyilikutila tyombembwa, atepule-ko, alingile-ko Siovaa+ otyiawa. 30 Una okutyinda peke liae mwene ovilenga,+ nolukolo, evieta, evilingila Siovaa otyiawa tyokuyokwa. Etyiendaisa no komutwe no konyima, atyikala otyiawa+ tyokwendaiswa tya Siovaa. 31 Omunakwa mapake potupia ovilenga, avitwimina komutala,+ mahi olukolo alulingi lwa Alau novana vae.+

32 “‘Onwe muna okwavela omunakwa otyikalo tyo kokulio, tyikale otyipuka tyikola tyovilikutila vienyi viombembwa.+ 33 Omona wa Alau wamaeta ohonde yovilikutila viombembwa, novilenga viatyo, mapewa otyikalo tyo kokulio atyilingi tyae.+ 34 Povilikutila viombembwa vilingwa nova Isilayeli, ndyipola-po olukolo lwalingwa otyiawa tyokwendaiswa, notyikalo tyalingwa otyiawa tyikola, andyiviavela Alau omunakwa novana vae. Otyo otyitumino ova Isilayeli+ vena okulandula atee-tee.

35 “‘Poviawa viokuyokwa vilingilwa Siovaa, otyo, otyo ovanakwa vapola-po, Alau novana vae, okutuka monthiki valingwa ovanakwa opo vaundapele Siovaa.+ 36 Monthiki Siovaa evelembula, opo atuma ova Isilayeli veveavaile otyiawa otyo monthiki vanakwa.+ Otyo otyitumino vena okulandula apeho, navo novanthu mavakatuka-tuka muvo.’”

37 Otyo otyitumino tyipopia oviawa viokuyokwa,+ notyiawa tyovilia,+ notyiawa tyonkhali,+ notyiawa tyomunthu wavelwa onombei,+ notyilikutila tyokwava ovilinga,+ novilikutila viombembwa,+ 38 ngeetyi Siovaa atumine Mwisesi komphunda Sinai,+ monthiki atuma ova Isilayeli vaete oviawa viavo ku Siovaa moluhandya lwo Sinai.+

8 Siovaa apopila vali Mwisesi okuti: 2 “Eta Alau novana vae,+ nomivalo,+ nomulela wokulembula,+ nongombe onthwei yotyiawa tyonkhali, nonongi onombali, nosesu yonombolo mbahaile onkhiso,+ 3 ongiya ova Isilayeli aveho kombundi yohinge yomaliongiyo.”

4 Mwisesi alingi ngeetyi Siovaa emutuma, ova Isilayeli aveho aveliongiya kombundi yohinge yomaliongiyo. 5 Mwisesi apopila ovanthu aveho okuti: “Siovaa wetutuma tulinge ñgaa.” 6 Mwisesi afwenaika-ko Alau novana vae, evekoho nomaande.+ 7 Pahe avaleka Alau omuvalo omulale,+ emukutu otyinyanga+ tyo peimo,* emuvaleka esanya liehena omavoko.+ Kombanda apake-ko otyikutu tyounakwa,+ etyikutu nawa notyinyanga tyo peimo+ tyaunda-unda.* 8 Pahe emupake otyinyanga tyo ponthulo,+ apake-ko o Ulii no Tumii.+ 9 Emupake ombuya komutwe,+ komutwe watyo apake-ko omulami woolu, otyilimbo tyikola tyokwelipakula,*+ ngeetyi Siovaa atuma Mwisesi.

10 Mwisesi akwate omulela wokulembula, alembula ekaka liefendelo novipuka aviho vili-mo,+ evisukukisa. 11 Pahe anyanye kapii komutala wovilikutila omulela, awana-wana atee tyituuka epandu-vali, eulembula, nao novityuma viao aviho, nombasiya nokamutala kayo, evisukukisa. 12 Atili kapii Alau momutwe omulela wokulembula, emulembula opo emusukukise.+

13 Mwisesi afwenaika popepi ovana va Alau, evevaleka omivalo omile, evekutu ovinyanga vyo peimo, evekutu* onombuya komutwe+ ngeetyi Siovaa emutumine.

14 Aeta onthwei yotyiawa tyonkhali, Alau novana vae avayambeka omavoko komutwe wonthwei oyo yotyiawa tyonkhali.+ 15 Mwisesi aipaa onthwei oyo, ayave omunwe mohonde,+ eiwaveka konombinga mbomutala, eusukukisa konkhali. Ohonde yokwahupa-po eitili pehina liomutala, opo eusukukise, utavele okulinga ovilikutila viokusukukisa ononkhali. 16 Mwisesi akwate ovilenga aviho viokwavanda komala, novilenga viokehuli, nonoso novilenga viatyo, evipake potupia komutala,+ vitwimine-ko. 17 Yokwahupa-po, ombandwa, nohitu, notyandya, avipakwa motupia kokule na apa vakala+ ngeetyi Siovaa atumine Mwisesi.

18 Pahe aeta ongi yokulinga otyiawa tyokuyokwa, Alau novana vae avapake omavoko komutwe wayo.+ 19 Mwisesi eiipaa, ohonde yatyo einyanye kononthele ambuho mbomutala. 20 Mwisesi ongi oyo eityoka-tyoka, omutwe watyo, novinthuli viatyo, novilenga,* evipake potupia komutala vitwimine-ko. 21 Mwisesi omala eekoho, novikalo viatyo, ongi aiho eipake potupia komutala itwimine-ko. Otyo otyiawa tyokuyokwa tyomuniko omuwa.* Otyiawa tyayokelwa Siovaa, ngeetyi Siovaa atumine Mwisesi.

22 Pahe aeta ongi ya vali, ongi yokwaavela ovilinga omunakwa,+ Alau novana vae avayambeka omavoko komutwe wayo.+ 23 Mwisesi eiipaa, apolo kapii pohonde, eiwaveka kokutwi kwa Alau kwo kokulio, no komutundanu* kokuvoko kwo kokulio, no komutundanu womphai yo kokulio. 24 Pahe Mwisesi afwenaika-ko ovana va Alau, evepake kapii ohonde komakutwi o kokulio, no komitundanu viomavoko o kokulio, no komitundanu vionomphai mbo kokulio. Ohonde yokwahupa-po einyanye kononthele ambuho mbomutala.+

25 Apolo-po ovilenga, nomutyila, novilenga aviho vyo komala, novilenga vyo kehuli, nonoso, novilenga viatyo, notyikalo tyo kokulio.+ 26 Mosesu yonombolo mbahaile onkhiso ankho ili komutwe wa Siovaa, apolo-mo ombolo ike yeliseta elola yahaile onkhiso,+ nombolo ike yeliseta elola yalingwa nomulela,+ nombolo ike yelisipata. Embupake kombanda yovinthuli viovilenga, no kotyikalo tyo kokulio. 27 Pahe apake ovipuka ovio aviho pomavoko a Alau, no ovana vae, ahimbika okweendaisa, no komutwe no konyima, atyikala otyiawa tyaendaiswa tya Siovaa. 28 Mwisesi evepolo-vio pomavoko, evipake potupia komutala vitwimine-ko, kombanda yotyiawa tyokuyokwa. Otyo otyilikutila tyokwavela omunakwa ovilinga, tyomuniko omuwa.* Otyiawa tyayokelwa Siovaa.

29 Mwisesi apolo olukolo lwongi, elwendaisa no komutwe no konyima, alukala otyiawa tyokwendaiswa tya Siovaa.+ Olukolo olo lwongi yotyiawa tyokwavela ovilinga omunakwa, alulingi lwa Mwisesi, ngeetyi Siovaa emutumine.+

30 Mwisesi apolo kapii omulela wokulembula,+ apolo vali kapii kohonde ankho ili komutala, anyanye ku Alau no komivalo viae, no kovana vae+ ankho ena-vo, no komivalo viavo. Ngootyo asukukisa Alau nomivalo viae, novana vae nomivalo viavo.+

31 Mwisesi atolela Alau novana vae okuti: “Telekelei+ ohitu kombundi yohinge yomaliongiyo, ngako mwilila nonombolo mbuli mosesu yokwavela omunakwa ovilinga ngeetyi natumwa okuti: ‘Alau novana vae ovo mavali.’+ 32 Ohitu yahupa-po muna okwiyumba motupia,+ nombolo yahupa-po ngatyo mwilinga. 33 Mwahahondovokei kombundi yohinge yomaliongiyo mononthiki epandu-vali, atee ononthiki mbokumwavela otyilinga tyounakwa mbupwa, mokonda okumwavela otyilinga tyounakwa* matyikala ononthiki epandu-vali.+ 34 Etyi twalinga hono otyo Siovaa atuma, opo musukukiswe kononkhali mbenyi.+ 35 Onwe mamukala kombundi yohinge yomaliongiyo tyitenya na tyinthiki ononthiki epandu-vali,+ amulingi etyi Siovaa emutuma,+ opo mwahankhie, mokonda otyo natumwa.”

36 Alau novana vae avalingi atyiho Siovaa atuma, Mwisesi apopia.

9 Monthiki ya tyinana,+ Mwisesi aihana Alau novana vae, novakulu ova Isilayeli. 2 Atolela Alau ati: “Pola povipako onthane ikahi nawa yotyiawa tyonkhali,+ nongi ikahi nawa yotyiawa tyokuyokwa, ovieta ku Siovaa. 3 Ova Isilayeli ovepopila okuti: ‘Etei otyinkhombo otyitwei* tyilingwe otyiawa tyonkhali, nonthane ikahi nawa ina enima like, notyiketa tyongi tyikahi nawa tyina enima like, ovipako ovio vilingwe otyiawa tyokuyokwa. 4 Amweeta onthwei yotyilikutila tyombembwa,+ nongi yatyo onthwei, vilingilwe Siovaa otyilikutila, notyiawa tyovilia+ tyahonyekwa nomulela, mokonda hono Siovaa melilekesa kwoonwe.’”+

5 Avatwala kohinge yomaliongiyo etyi Mwisesi evetuma. Ova Isilayeli aveho aveya, avatalama komutwe wa Siovaa. 6 Mwisesi ati: “Otyo, otyo Siovaa emutuma mulinge, opo omunkhima wa Siovaa umoneke kwoonwe.”+ 7 Mwisesi apopila Alau, ati: “Fwenaina komutala wovilikutila, oave otyiawa tyove tyonkhali,+ notyiawa tyove tyokuyokwa, ukohe ononkhali mbove,+ nombo veumbo liove. Haa olingi otyiawa tyovanthu aveho,+ ovekoho kononkhali mbavo,+ ngeetyi Siovaa atuma.”

8 Alau tyiivee, afwenaina pomutala, aipaa onthane yotyiawa tyononkhali mbae mwene.+ 9 Pahe ovana va Alau, avemweetela ohonde yatyo.+ Alau ayave-mo omunwe, awaeka konombinga mbomutala, ohonde yokwahupa-po eitili ponthele pehina liomutala.+ 10 Apolo ovilenga viotyinyama tyokwalingwa otyilikutila tyonkhali, nonoso mbatyo, notyilenga tyokehuli, evipake komutala vitwimine-ko omwihi ngeetyi Siovaa atuma Mwisesi.+ 11 Ohitu yatyo, nombandwa yatyo, evipake motupia kokule naapa vakala,+ avipi.

12 Alau aipaa otyinyama tyotyilikutila tyokuyokwa, ovana vae avemutambeka ohonde yatyo, einyanye mononthele ambuho mbomutala.+ 13 Avemutambeka ovinthuli viotyiawa tyokuyokwa, nomutwe watyo, evipake potupia komutala, vitwimine-ko. 14 Tupu, akoho omala, novikalo viatyo, evipake potupia komutala kombanda yotyilikutila tyokuyokwa, vitwimine-ko.

15 Alau pahe alingi otyiawa tyovanthu aveho. Apolo otyinkhombo tyotyiawa tyononkhali mbovanthu etyiipaa, etyilingi otyiawa tyononkhali, ngeetyi alinga otyinyama tyo tete. 16 Etyi amana, pahe aave otyiawa tyokuyokwa, etyilingi ngeetyi tyilingwa.+

17 Alandulisa-ko otyiawa tyovilia,+ apolo potyiawa otyo eyulisa peke, etyipake potupia komutala tyitwimine-ko, okuyawisa kotyiawa tyokuyokwa tyalingwa-le komuhuka.+

18 Pahe aipaa onthwei yotyilikutila tyombembwa tyovanthu aveho, nongi yatyo. Ovana vae avemutambeka ohonde yatyo, einyanye mononthele ambuho mbomutala.+ 19 Mahi ovilenga vionthwei,+ nomutyila wongi, notyilenga tyokuvanda kovipuka viomokati, onoso notyilenga tyokehuli,+ 20 ovilenga ovio avevipake kombanda yolukolo lwonthwei no lwongi. Pahe avapake ovilenga potupia komutala, vitwimine-ko.+ 21 Mahi Alau apolo olukolo lwonthwei, no lwongi, novikalo viatyo viokokulio, evieendaisa no komutwe no konyima, vilinge otyiawa tyokweendaiswa tya Siovaa, ngeetyi Mwisesi atuminwe.+

22 Etyi Alau amana okulinga otyiawa tyonkhali, notyiawa tyokuyokwa, novilikutila viombembwa, ayelulila ovanthu omavoko, evelembula,+ atuluka komutala. 23 Pahe, Mwisesi na Alau, avanyingila mohinge yomaliongiyo, avalupuka-mo, avalembula ovanthu aveho.+

Omunkhima wa Siovaa, aumoneka kovanthu aveho.+ 24 Ku Siovaa akutundu otupia,+ atuhimbika okuyoka-ko otyiawa tyokuyokwa tyili komutala, novilenga. Etyi ovanthu aveho vetyimona, avahuvu, avahimbika okukwilila, avaikila konongolo, avelipupika-po.+

10 Etyi pakala, Nandambe na Ambiyuu+ ovana va Alau avakwate ovilindo viavo viokuyokela ombao+ avapake-mo omakala otupia, komakala oko avapake-ko ombao. Avahimbika okulingila otyiawa Siovaa notupia twahaviukile,*+ ngwe kavetyituminwe. 2 Ku Siovaa akutundu otupia atuveyoko,+ atuveipaela komutwe wa Siovaa.+ 3 Mwisesi apopila Alau ati: “Siovaa wati: ‘Vana veli popepi naame+ vena okunoñgonoka okuti ame ndyikola, tupu ndyina okunkhimanekwa pokati kovanthu aveho.’” Alau ahapopi natyike.

4 Mwisesi aihana Misaeli na Elisafaa, ovana va Usiyeli, Usiyeli+ he yomona ya Alau, evepopila ati: “Endywei kuno, polei-po ovana venyi ponthele pomphangu ikola, vetwalei kondye yonthanda.” 5 Avevepolo-po nkhele tyavala omivalo viavo omile, avevetwala kondye yonthanda, ngeetyi Mwisesi evetuma.

6 Mwisesi atolela Alau novana vae ovakwavo Eliyasale na Itamale ati: “Onohuki mbenyi mwehembuyekei vala ngootyo tyehembulingi nawa. Novikutu vienyi mwehevitandulei+ opo mwahankhie, Huku ahanumanene ovanthu aveho. Vakwenyi, ova Isilayeli aveho, mavalingi omutambo wa vana Siovaa aipaa notupia. 7 Mwahahondovokei kombundi yohinge yomaliongiyo na mwahankhie, mokonda omulela wa Siovaa wokulembula uli kombanda yenyi.”+ Avalingi etyi Mwisesi atuma.

8 Siovaa apopila Alau okuti: 9 “Noove novana vove mwahanwei ovinyu nii ovikunwa ovikwavo vikoleswa tyina mwenda mohinge yomaliongiyo+ na mwahankhie. Otyo otyitumino muna okulandula apeho, noonwe novanthu mavakatuka-tuka mwoonwe. 10 Otyo muna okutyilinga opo etyi tyikola tyipunguluke kweetyi tyitoyesa, etyi tyasila atyipunguluka kweetyi tyasukuka,+ 11 opo mulongese ova Isilayeli ovitumino aviho Siovaa apopia etyi atuma Mwisesi.”+

12 Mwisesi apopila Alau novana vae vahupa-po, ovo Eliyasale na Itamale okuti: “Poviawa viokuyokwa vialingilwa Siovaa, polei oviawa viovilia viahupa-po, amuvilingi onombolo mbehena onkhiso, amumbulila pomutala+ mokonda otyo otyipuka tyikola.+ 13 Onwe novana venyi muna okumbulila pomphangu imwe ikola,+ mokonda otyo mwapolelwa poviawa viokuyokwa vilingilwa Siovaa, otyo natumwa. 14 Onwe novana venyi ovakwendye novakainthu tupu mamulila pomphangu imwe ikola olukolo lwalingwa otyiawa tyokwendaiswa, notyikalo tyalingwa otyiawa tyikola,+ mokonda ombo ononthele mbovilikutila viombembwa viova Isilayeli onwe novana venyi mwapewa.+ 15 Mavaeta otyikalo tyotyiawa tyikola, nolukolo lwalingwa otyiawa tyokwendaiswa, noviawa viovilenga viayokwa opo otyiawa tyokwendaiswa tyiendaiswe no komutwe no konyima kotyipala tya Siovaa. Otyo onwe novana venyi+ mamupewa apeho-apeho ngeetyi Siovaa atuma.”

16 Mwisesi aovola otyinkhombo tyotyiawa tyonkhali,+ tyina etyivasa tyayokwa. Mwisesi anumana unene neetyi tyalinga Eliyasale na Itamale ovana va Alau vahupapo, ati: 17 “Omokonda yatyi mwahalilile otyiawa tyonkhali pomphangu ikola,+ ngwe otyo otyiawa tyikola? Kamwetyaavelelwe opo mupole ova Isilayeli aveho monkhali, amuvekohela Siovaa? 18 Talei! Ohonde yotyiawa kayatwailwe momphangu ikola. Etyi ñgeno mutyilila momphangu ikola+ ngeetyi natumwa.” 19 Alau atolela Mwisesi ati: “Ovanthu valinga otyiawa tyavo tyonkhali notyiawa tyokuyokelwa Siovaa,+ mahi ame ohitu yoviawa ovio heilile. Ovihuna namona hono, ove uvii. Ine nalile kotyiawa tyonkhali okuti ñgeno otyo tyahambukiswa Siovaa?” 20 Mwisesi okwiiva otyo, omutima aukululuka.

11 Siovaa atolela Mwisesi na Alau okuti: 2 “Popilei ova Isilayeli okuti: ‘Povinyama vili kombanda yeheke evi muna okulia ovievi:+ 3 Ovinyama aviho vina ekondyo liaikuka lielitepuka evali, vina vivoyolola vipondola okuliwa.

4 “‘Mahi povinyama vina vivoyololola, vina ekondyo liaikuka viahaliwa ovievi: ekamelu, mokonda namphila livoyolola litupu ekondyo lielitepuka evali. Liasila kamupondola okulilia.+ 5 Nekopo,+ mokonda namphila livoyolola litupu ekondyo lielitepuka evali. Liasila kamupondola okulilia. 6 Notyindimba, mokonda namphila tyivoyolola, tyitupu ekondyo lielitepuka evali. Tyasila kamupondola okutyilia. 7 Notyingulu,+ mokonda namphila tyina ekondyo lielitepuka evali, mahi katyivoyolola. Tyasila kamupondola okutyilia. 8 Mwahaliei kohitu yovinyama ovio, nii na tyina viankhia mweheviyamei. Viasila kamupondola okuvilia.+

9 “‘Mu atyiho tyili momaande etyi mupondola okulia otyetyi: atyiho tyina omapapatelo, nomapeta, tyilinge tyokuli momalunga, tyilinge tyokuli monondongi tyiliwa.+ 10 Mahi atyiho tyina omwenyo tyili* momalunga novinyama ovitutu vili* momaande no monondongi viehena omapapatelo nomapeta muna okuvitoya, kaviliwa. 11 Ovio vina okukala ovipuka vimutoyesa; kamupondola okulia ohitu yavio.+ Nomandindi avio tyina viankhia muna okweetoya. 12 Atyiho tyina omwenyo tyo momeva tyehena omapapatelo nomapeta, tyitoyei.

13 “‘Evi oviokunthanana muna okutoya; kavipondola okuliwa, vitoyesa. Onkhombe,+ onkhalukuvo, onkhuvi,+ 14 omakateve, nomandundukoi atyo aeho omu elikalaila, 15 nomakwaila atyo aeho omu elikalaila, 16 nompho, nondyimbi, nekeli-keli, nomalukoi atyo aeho omu elikalaila, 17 notyikulu, nepato lyo momeva, nekulu liomakutwi omalaale, 18 nehasa, nepato lyo melunga, nelungungwa, 19 nonkhumbi-nkhumbi, nomakaluhane aeho omu elikalaila, notyikapumphu, notyisiki-siki. 20 Tupu muna okutoya aviho vili kombanda yeheke, viovikalo vikwana.

21 “‘Evi viokunthanana vili kombanda yeheke vieendela kovikalo vikwana, muna okulia-po vala evi viokuna ovikalo vivali ovilaale vali kovikwavo, evi vilombaukila kovikalo vivali. 22 Evi muna okulia ovievi: ovimphunia-mphunia vielikalaila viokwilauka, novimphunia-mphunia ovikwavo+ viliwa, notyenye, novimphunia-mphunia ovikwavo viokulombauka. 23 Muna okutoya ovikwavo aviho viokunthanana vili kombanda yeheke vina ovikalo vikwana. 24 Ovipuka ovio vipondola okumusilisa, una uyama ku tyimwe puvio tyankhia, makala tyasila atee kokangulohi.+ 25 Una utyinda tyimwe povipuka ovio tyankhia una okukoha ovikutu viae;+ akala tyasila atee kokangulohi.

26 “‘Ovinyama aviho vina vala ekondyo like, viahavoyolola kamupondola okuvilia, viasila. Omunthu uyama kovinyama ovio nae ukala tyasila.+ 27 Ovinyama aviho viendela kovikalo vikwana viehena omakondyo, viasila, kamupondola okuvilia. Una uyama ku tyimwe puvio tyankhia makala tyasila atee kokangulohi. 28 Una utyinda tyimwe povinyama ovio tyankhia una okukoha ovikutu viae,+ akala tyasila atee kokangulohi.+ Ovinyama ovio viasila kamupondola okuvilia.

29 “‘Ovinyama vili kombanda yohi, viasila mwahapondola okulia ovievi: etende-puku, ovimphuku,+ omakangalala, 30 notyikunkhululu, nekakala,* novikokololo, neluhengi, nehimbi. 31 Ovio ovinyama viasila, vili kombanda yohi mwahapondola okulia.+ Una wamayame ku tyimwe puvio tyankhia, makala tyasila atee kokangulohi.+

32 “‘Tyimwe povinyama ovio okunkhia atyitokela kotyipuka tyimwe, otyipuka otyo tyina okukala tyasila, tyilinge otyikwatelo tyalingwa nomiti, tyilinge otyikutu, tyilinge ombandwa,* tyilinge osaku. Katyesukisile otyikwatelo tyatyi, tyina okupakwa momaande atyikala-mo tyasila atee kokangulohi; pahe atyikala tyasukuka. 33 Ine tyitokela kombiya yoluma una okwityatyaula, atyiho ankho tyili-mo atyikala tyasila.+ 34 Okulia akuho kwamayamwa nomaande atunda mombiya omo, kwasila. Tupu atyiho tyinuwa tyavasiwa mombiya omo, tyikala tyasila. 35 Kotyipuka kwamatokela otyinyama otyo tyankhia tyikala tyasila; tyilinge oku tyatokela o kofolono, tyilinge o komanthia tyina okuhanywa-po. Muna okutyitala okuti tyasila, atyikala ngootyo apeho. 36 Ine tyitokela monyombo, ine hamwe ometangi liomaande, omaande oo atwalako tyasukuka, mahi omunthu uyama kotyinyama otyo tyankhia makala tyasila. 37 Ine otyinyama tyankhia tyitokela kombuto, ombuto oyo itwalako tyasukuka. 38 Mahi ine ombuto oyo ankho yayavekwa, otyinyama tyankhia nthele-imwe atyiwili kombuto oyo, ombuto oyo ina okukala tyasila.

39 “‘Mahi ine otyinyama tyimwe tyiliwa tyinkhia, omunthu uyama-ko una okukala tyasila atee kokangulohi.+ 40 Una wamali ohitu yotyinyama tyankhia una okukoha ovikutu viae, akala tyasila atee kokangulohi.+ Wamatyindi otyinyama tyankhia, una okukoha ovikutu viae, nae akala tyasila atee kokangulohi. 41 Aviho vili kombanda yohi viokutoyesa,+ kaviliwa. 42 Mwahaliei otyipuka natyike tyeendela keimo nii etyi tyeendela kovikalo vikwana, nii etyi tyili kombanda yohi tyina ovikalo ovinyingi, mwahaliei ovipuka ovio, vitoyesa.+ 43 Mwahakwatei* kovipuka ovio vili kombanda yeheke, amukala ovanthu vatoyesa. Tupu mwehelisilisei navio+ amukala tyasila. 44 Mokonda ame, ame Siovaa Huku yenyi,+ muna okusukuka amulingi ovanthu vakola,+ mokonda ame ndyikola.+ Ngootyo mwehelisilisei novipuka ovio vili kombanda yeheke, nii evi vienda-enda kombanda yalio. 45 Tyeetyi ame, ame Siovaa, nemupola kotyilongo tyo Isitu, na ndyikale Huku yenyi,+ lingei ovanthu vakola+ ngeetyi ame ndyikola.+

46 “‘Otyo, otyo otyitumino mulandula tyipopia ovinyama, aviho neevi vinthanana, neevi vieenda-enda momaande aviho, neevi vili kombanda yeheke aviho, 47 opo tyimoneke nawa okuti tyasukuka tyelikalela neetyi tyasila, ovinyama viliwa ovievi, viahaliwa ovievi.’”+

12 Siovaa atolela Mwisesi okuti: 2 “Popila ova Isilayeli okuti: ‘Ine omukai umwe ukala omulemi* akutula omona omukwendye, makala tyasila ononthiki epandu-vali, ngononthiki akala tyasila tyina alinga tyo konohanyi.+ 3 Monthiki ya tyinana omona oo una okupitiswa ekwendye.+ 4 Atwalako okulisukula vali atee atuula ononthiki 33, mokonda yokwatunda olukula.* Kapondola okuyama kotyipuka natyike tyikola, nii kapondola okunyingila momphangu ikola atee ononthiki mbae mbokulisukula mbupwa.

5 “‘Ine omona akutula omukainthu, una okukala tyasila ononthiki 14, ngeetyi akala tyina alinga tyo konohanyi. Una okutwalako okulisukula atee atuula ononthiki 66, mokonda yokwatunda olukula. 6 Tyina ononthiki mbokulisukula mbamapu, una okutwaila omunakwa kombundi yohinge yomaliongiyo ondyona yenima like ilingwe otyiawa tyokuyokwa,+ neilona liopomba ine hamwe ekuti, lilingwe otyiawa tyonkhali. 7 Omunakwa meviave ku Siovaa, makoho omukai oo, asukuka kolukula atunda. Otyo otyitumino omukai ena okulandula tyina amakutula omona, tyilinge omukwendye, tyilinge omukainthu. 8 Ine utupu ongi, una okwaava omakuti evali, okuti hatyo omailona evali onopomba,+ limwe o liotyiawa tyokuyokwa, ekwavo o liotyiawa tyonkhali. Omunakwa emukoho, ngwe asukuka.’”

13 Siovaa apopila vali Mwisesi na Alau ati: 2 “Ine omunthu umwe ukala novimita molutu,* ine hamwe ovipute ine ovihengu, vilinga ngatyina ena otyilunda* molutu,+ una okutwalwa ku Alau omunakwa, ine hamwe o komunakwa omukwavo,+ umwe povana va Alau. 3 Omunakwa matale otyipute otyo tyatumba etyi tyikahi. Ine oluvi luli ponthele potyipute opo lwatwelela, otyipute tyatyo tyalinga ngoti tyaya kohi, opo otyilunda. Omunakwa metyitale, apopi okuti omunthu oo wasila. 4 Mahi ine ovihengu vili kolutu vitwela, vitupu ovipute viaya kohi, omainya eli-po kaatwelele, omunakwa mapolo omunthu oo wokwavela, emupake aike mononthiki epandu-vali.+ 5 Pahe monthiki ya pandu-vali, omunakwa emutale vali. Ine ovipute ovio vitwalako vala, mahi kaviayandyanene kolutu aluho, omunakwa memupake vali aike, akala vali ononthiki epandu-vali.

6 “Monthiki ya pandu-vali omunakwa emutale vali. Ine ovipute ovio uvitala vikahi nokuveluka, kaviayandyanene kolutu aluho, omunakwa una okupopia okuti, wasukuka.+ Vina ovipute vala. Omunthu oo makoho ovikutu viae, akala tyasukuka. 7 Mahi tyina amekelilekesa komunakwa opo apopiwe okuti wasukuka, atyimoneka nawa okuti ovipute* vieliyandyana kolutu, opo una okuya okulilekesa vali* komunakwa onthiki onkhwavo. 8 Omunakwa matale ovipute ovio, ine vieliyandyana kolutu, omunakwa memupopi okuti wasila, una otyilunda.+

9 “Ine omunthu umwe ukala nouvela ulinga ngoti otyilunda, una okutwalwa komunakwa. 10 Omunakwa memutale.+ Ine una otyimita kolutu tyitwela, tupu atyitwelesa oluvi, otyimita otyo atyituyuka,+ 11 otyo otyilunda, ouvela omunene. Omunakwa memupopi okuti wasila. Kesukisa vali okumupaka aike,+ mokonda wasila. 12 Ine otyilunda tyilinga olutu aluho, omunakwa atale okuti okuhimbikila komutwe atee konomphai, apa eete pena otyilunda, 13 omunakwa emutale, etyimono okuti otyilunda tyeyula olutu aluho, memupopi okuti wasukuka. Mokonda olutu aluho lwatwela, omunthu oo wasukuka.* 14 Mahi tyina amakala novipute, makala tyasila. 15 Tyina omunakwa amemumono okuti una ovipute, memupopi okuti wasila.+ Mokonda yovipute, opo ngootyo una otyilunda.+ 16 Mahi ine otyinthimba otyo tyatuyuka atyiveluka, omuvei oo una okukelilekesa komunakwa. 17 Omunakwa memutale.+ Ine omunakwa utala ñgaa ovipute ovio viatwela, mapopi okuti omuvei wasukuka.

18 “Ine omunthu umwe ukala notyinthimba kolutu, atyiveluka, 19 mahi apa pali otyinthimba apalingi otyimita, ine hamwe ovihengu ovinthwelu vikuhukila, una okukelilekesa komunakwa. 20 Omunakwa matale otyipute tyae otyo.+ Ine tyaya kohi, oluvi luli-po lutwela, omunakwa memupopi okuti wasila, otyo tyeya-po otyilunda. 21 Mahi omunakwa pokutala otyipute otyo, ine umona okuti petupu oluvi lutwela, tupu katyaile kohi, tyikahi-ale nokuvanda, omunakwa mapolo omunthu oo emupake aike, mononthiki epandu-vali.+ 22 Ine tyimoneka nawa okuti tyeliyandyana kolutu, omunakwa mapopi omunthu oo okuti wasila, otyo ouvela omuvi. 23 Mahi ine tyili vala mphangwa ike, katyeliyandyanene, opo otyinthimba vala tyamitisa-po, omunakwa memupopi okuti wasukuka.+

24 “Ine omunthu umwe upia, akala nomayiya omanthwelu akuhukila, ine hamwe omanthwelu vala, 25 omunakwa memutale. Ine oluvi luli-po lutwela, ngwe otyipute otyo tyaya kohi, opo mwaendelela otyilunda. Omunakwa mapopi okuti omunthu oo wasila, una otyilunda. 26 Mahi ine omunakwa utala-po tyina ati ñgaa, oluvi luli-po kalwatwelele, tupu katyaile kohi, tyikahi-ale nokuvanda, omunakwa memupake aike mononthiki epandu-vali.+ 27 Omunakwa memutale monthiki ya pandu-vali. Ine ovihengu vimoneka nawa okuti vieliyandyana kolutu, omunakwa memupopi okuti wasila. Otyo otyilunda. 28 Mahi ine ovihengu kavieliyawisile, kavieliyandyanene kolutu, vikahi-ale nokuvanda, opo wamita vala mokonda yokwapia. Omunakwa memupopi okuti wasukuka, mokonda, tyemumitisa okwapia vala.

29 “Ine omunthu umwe ukala novimbolo-mbolo momutwe ine hamwe okotyiyeli, tyilinge omulume tyilinge omukai, 30 omunakwa una okuvitala.+ Ine ovimbolo-mbolo ovio vilinga ngoti vianyingila kohi, onohuki mbuli-po mbalinga onondumbu, ambupwenyunuka, omunakwa mapopi okuti omunthu oo wasila. Ovio ovimbolo-mbolo viotyikova tyomutwe, no tyotyiyeli, otyilunda. 31 Mahi ine omunakwa utala ovimbolo-mbolo ovio, tyina akati ñgaa kaviaile kohi, onohuki mbuli-po kambanthikovelele, mapolo omuvei oo, emupake aike mononthiki epandu-vali.+ 32 Monthiki ya pandu-vali, omunakwa mevitale vali. Ine kaviahandukile momutwe auho, onohuki mbuli-po kambakalele onondumbu, tupu kaviaile kohi, 33 opo omunthu oo una okukulula-ko onohuki ambuho, nonondyeli, povimbolo-mbolo viatyo ahakulula-po. Omunakwa emupake aike mononthiki epandu-vali.

34 “Monthiki ya pandu-vali, omunakwa matale vali ovimbolo-mbolo viae. Ine ovimbolo-mbolo momutwe ine hamwe okotyiyeli kaviahandukile, tupu kaviaile kohi, omunakwa mapopi omunthu oo okuti wasukuka. Omuvei akohe ovikutu viae, akala tyasukuka. 35 Mahi ine tyimoneka nawa okuti otyimbolo-mbolo tyikahi nokuhanduka nomutwe auho, hamwe okotyiyeli* atyiho ngwe omunthu wapopiwa-le okuti wasukuka, 36 omunakwa matale nawa omunthu oo. Ine ovimbolo-mbolo vikahi nokuhanduka nomutwe auho, hamwe onotyiyeli atyiho, omunakwa kesukisa vali okutala onohuki ine onondumbu, omunthu oo wasila. 37 Mahi ine pokumutala, omunakwa utyimona okuti ovimbolo-mbolo kaviahandukile, tupu onohuki mbuli-po mbanthikovela, opo omunthu oo waveluka. Omunthu oo wasukuka. Omunakwa una okumupopia okuti wasukuka.+

38 “Ine omunthu umwe ukala novihengu molutu,* tyilinge omulume tyilinge omukai, ovihengu viatyo avitwele, 39 omunakwa una okuvitala.+ Ine ovihengu ovio vitwela, opo hauvela-ko, omawalakaha vala, omunthu oo wasukuka.

40 “Ine omulume umwe ukulumuka onohuki momutwe, akala nepela, wasukuka, kavelele. 41 Ine onohuki mbatunda momutwe wae, ombo kotyipala, akala nepela, wasukuka. 42 Mahi ine ukala notyipute pepela kotyikova tyonohuki, tyati otyo tyitwela otyo tyakuhukila, ine hamwe atyikalela kotyipala, opo otyilunda. Otyilunda otyo tyikalela pombalanganga pamwe atyikala kotyipala. 43 Omunakwa matale nawa omulume oo. Ine omunakwa utala otyipute tyili pepela pombalanganga ine hamwe okotyipala, tyati otyo tyitwela otyo tyikuhukila, tyafwa otyilunda tyo kolutu, 44 opo otyo ena-tyo, otyilunda. Wasila, omunakwa una okumupopia okuti wasila, kombanda youvela oo ena-o momutwe. 45 Ovikutu viomuvei oo wotyilunda vina okutandaulwa, onohuki mbae ambunkhindala vala, elihiki komulungu otyo ati: ‘Nasila! Nasila!’ 46 Tyina nkhele ena ouvela oo, ononthiki ambuho makala tyasila. Mokonda yokwasila, una okukala aike, okukala kokule na vakwavo.+

47 “Ine otyilunda tyisilisa otyikutu, tyilinge otyikutu tyalingwa nomainya ongi tyilinge otyikutu tyomulinya, 48 tyilinge tyayama komulinya wokwaenda olulaale, tyilinge tyayama komulinya wokwatyika ine hamwe omulinya womainya ongi, tyilinge okombandwa ine hamwe okotyipuka tyimwe tyalingwa noseta, 49 tupu hamwe omatulwa atyo alinga omandumbu ine hamwe akuhukila, aayame kotyikutu ine hamwe okombandwa ine hamwe okomulinya wokwaenda olulaale, ine hamwe okomulinya wokwatyika, ine okotyipuka otyikwavo tyalingwa noseta, opo otyilunda. Tyina okukalekeswa komunakwa. 50 Omunakwa una okutala nawa omatulwa oo. Kotyipuka avasiwa, atyiholekwa atyikala ononthiki epandu-vali tyahakwatwa,+ mokonda yotyipuka otyo tyilinga ngoti otyilunda. 51 Monthiki ya pandu-vali omunakwa matale nawa otulwa oto. Ine utala tweliyandyana kotyikutu ine hamwe okomulinya wokwaenda olulaale, ine hamwe o wokwatyika, ine hamwe okombandwa, otulwa oto o twotyilunda, ouvela omuvi. Otyipuka otyo tyasila.+ 52 Omunakwa una okuyoka otyipuka otyo, tyilinge otyikutu, tyilinge omulinya wokwaenda olulaale, ine hamwe o wokwatyika, ine hamwe otyipuka otyikwavo tyombandwa* kwatokela otulwa, oo ouvela omuvi, otyilunda. Tyina okuyumbwa motupia.

53 “Mahi tyina omunakwa amatale nawa, ine utyimona okuti onkhako yatokela kotyipuka otyo, tyilinge o kotyikutu tyilinge o komulinya wokwaenda olulaale, tyilinge oko wokwatyika, tyilinge o kotyipuka otyikwavo tyombandwa, 54 omunakwa matumu otyipuka otyo tyayamwa nouvela tyikohwe, etyipake atyike, atyikala ononthiki epandu-vali tyahakwatwa. 55 Tyina otyipuka otyo tyayamwa nouvela tyamakohwa, omunakwa metyitale. Ine apa ouvela wayama kapasukukile, namphila weheliyandyanene notyipuka atyiho, mahi tyasila. Una okutyipaka motupia, atyipi, mokonda tyatyopolwa no mokati no kondye.

56 “Mahi ine omunakwa wetyitala, etyimono tyikahi nokusukuka etyi tyakohwa nawa, una vala okutandula apa pokwayama ouvela, tyilinge o kotyikutu tyilinge okombandwa tyilinge okomulinya wokwaenda olulaale ine hamwe oko wokwatyika. 57 Mahi ine onkhako youvela oo imonekela vali popakwavo, tyilinge o kotyikutu tyilinge o komulinya wokwaenda olulaale tyilinge oko wokwatyika, ine hamwe o kotyipuka otyikwavo tyombandwa, opo una nokuliyandyana, otyipuka otyo tyina okuyokwa+ mokonda tyina ouvela. 58 Mahi ine onkhako youvela oo isukuka-ko kotyikutu ine hamwe o komulinya wokwaenda olulaale ine hamwe oko wokwatyika, ine hamwe o kotyipuka otyikwavo tyombandwa tyakohwa, opo etyi tyina onkhako oyo tyina okukohwa vali, atyikala tyasukuka.

59 “Etyi otyitumino tyipopia otyipuka tyina otyilunda, tyilinge otyikutu tyomainya ongi tyilinge otyikutu tyomulinya, tyilinge omulinya wokwaenda olulaale tyilinge o wokwatyika, tyilinge otyipuka otyikwavo tyoseta, opo tyitalwe ine tyipopiwa okuti tyasukuka ine tyitiwa tyasila.”

14 Siovaa tupu atolela Mwisesi ati: 2 “Etyi otyitumino tyina okulandulwa monthiki omunthu ankho una otyilunda amatwalwa komunakwa opo apopiwe okuti wasukuka.+ 3 Omunakwa matundu monthanda ekemutala. Ine omuvei wotyilunda waveluka, 4 omunakwa matumu omunthu oo aete oviila vivali vina omwenyo, viokwasukuka, nomavai omusendulu, notyinyanga tyakuhuka, noisopu, opo akohwe.+ 5 Omunakwa matumu vaipae otyiila tyimwe, mahi tyiipaelwe kombanda yombiya yoluma ina omaande o pondyivi-ndyivi yomaande aenda. 6 Apolo otyiila otyikwavo tyokwahupa-po, tyokuna omwenyo, nomavai omusendulu, notyinyanga tyakuhuka, no isopu, eviyave pohonde yotyiila tyaipaelwa kombanda yombiya yokuna omaande o pondyivi-ndyivi. 7 Omunakwa manyanye ohonde ku una ukahi nokukohwa kotyilunda, awana-wana atee tyivasa pepandu-vali, pahe emuti wasukuka. Tyina amamane, otyiila tyokuna omwenyo etyiyeke tyende nohika.+

8 “Una uli nokukohwa kouvela, una okukoha ovikutu viae, elikulula oluvi aluho molutu, elikoho, akala tyasukuka. Haa pahe, upondola okunyingila monthanda, mahi akala ononthiki epandu-vali tyahanyingila mohinge yae. 9 Monthiki ya pandu-vali, una okukulula onohuki ambuho momutwe, no mbo kotyiyeli, no mbo kovihokopia. Tyina amelikulula onohuki ambuho molutu, una okukoha ovikutu viae, nae mwene elikoho, asukuka.

10 “Monthiki ya tyinana, una okupola oviketa vivali viongi ovitwei vikahi nawa, notyiketa tyongi otyindema+ tyikahi nawa tyina enima like, nomapati epandu nomeya ohinde yanyetuka yahonya nomulela ilingwe otyiawa tyovilia,+ nokapumu* komulela.+ 11 Omunakwa memuti wasukuka, mapolo omulume oo ukahi nokukohwa kouvela, emutwala ku Siovaa kombundi yohinge yomaliongiyo, noviawa ovio. 12 Omunakwa mapolo-po otyiketa tyimwe tyongi, nokapumu komulela, alingi otyiawa tyokwavelwa onombei,+ etyeendaisa no komutwe no konyima, tyikale otyiawa tyokwaendaiswa* tya Siovaa.+ 13 Pahe, apolo otyiketa tyongi etyiipaela pomphangu ikola, apa paipaelwa-le+ otyiawa tyonkhali, notyiawa tyokuyokwa. Mokonda ngeetyi otyiawa tyonkhali o tyomunakwa,+ notyiawa tyokuvelwa onombei o tyomunakwa, otyipuka tyikola.+

14 “Omunakwa apolo kapii pohonde yotyiawa tyokwavelwa onombei, apake kokutwi kwo kokulio, kwa una ukahi nokukohwa, no komutundanu* wokuvoko kwae kwokulio, no ko womphai yae yo kokulio. 15 Omunakwa apolo kapii omulela+ mokapumu, elitili peke liae liokumbili, 16 ayave omunwe wae wenkhanya liokulio pomulela uli peke liae kokumbili, anyanye pohi nomunwe wae, awana-wana atee tyivasa pepandu-vali, otyo Siovaa atala. 17 Omunakwa mapolo kapii pomulela wokwahupa peke liae, apake kokutwi kwo kokulio kwa una ukahi nokukohwa, no komutundanu wokuvoko kwae kwokulio, no ko womphai yae yo kokulio, apa apaka-le ohonde yotyiawa tyonkhali. 18 Apolo omulela wahupa peke liae eutili momutwe wa una ukahi nokukohwa. Omunakwa matwala omunthu komutwe wa Siovaa,+ ngako emukohela ononkhali.

19 “Omunakwa malingi otyiawa tyonkhali,+ asukukisa una ukahi nokukohwa osilo yae. Pahe aipaa otyiawa tyokuyokwa. 20 Omunakwa alingi otyiawa tyokuyokwa, notyiawa tyovilia komutala,+ akoho omunthu oo,+ asukuka kononkhali.+

21 “Mahi ine omunthu wahepa, etyi ena-tyo katyituuka, aete otyiketa tyongi tyilinge otyiawa tyokwavelwa onombei, notyiawa tyokweendaiswa, opo akohwe ononkhali mbae. Tupu aete omapati evali ofinde yanyetuka yahonya nomulela ilinge otyiawa tyovilia, nokapumu komulela, 22 nomakuti evali okuti hatyo omailona evali onopomba. Aete etyi ena-tyo. Otyiila tyimwe matyilingwa otyiawa tyonkhali, otyikwavo atyilingwa otyiawa tyokuyokwa.+ 23 Tyina tyiti monthiki ya tyinana+ una okutwala ovipuka ovio komunakwa opo akapopilwe komutwe wa Siovaa+ kombundi yohinge yomaliongiyo okuti wasukuka.

24 “Omunakwa apolo otyiketa tyongi tyotyiawa tyokwavelwa onombei,+ nokapumu komulela, evieendaisa no komutwe no konyima vikale otyiawa tyokweendaiswa komutwe wa Siovaa.+ 25 Aipaa otyiketa tyongi tyotyiawa tyokwavelwa onombei, apolo kapii pohonde yotyiawa tyokwavelwa onombei, apake kokutwi kwo kokulio kwa una ukahi nokukohwa, no komutundanu wokuvoko kwae kwokulio, no ko womphai yae yo kokulio.+ 26 Omunakwa atili kapii omulela peke liae liokumbili.+ 27 Pahe apolo kapii nomunwe wenkhanya liae liokulio pomulela uli peke liae liokumbili, anyanye pohi komutwe wa Siovaa, awana-wana atee tyivasa pepandu-vali. 28 Omunakwa mapolo kapii pomulela uli peke liae apake kokutwi kwo kokulio kwa una ukahi nokukohwa, no komutundunu wokuvoko kwae kwokulio, no ko womphai yae yo kokulio, apa apaka-le ohonde yotyiawa tyonkhali. 29 Omulela wamahupu peke liomunakwa, meutili momutwe wa una ukahi nokukohwa. Omunakwa makohela omunthu ononkhali komutwe wa Siovaa.

30 “Omunthu makohwa maeta etyi ena-tyo,+ maeta omakuti evali ine hamwe omailona evali onopomba. 31 Oviila vivali amamono, tyimwe tyilingwa otyiawa tyonkhali otyikwavo atyilingwa otyiawa tyokuyokwa,+ omunakwa asukukisila Siovaa+ omunthu una nokukohwa.

32 “Otyo otyitumino tyipopia omunthu wali notyilunda mahi etyi ena-tyo katyituuka alinge otyiawa apopiwe okuti wasukuka.”

33 Pahe Siovaa apopila Mwisesi na Alau okuti: 34 “Tyina mwamanyingila motyilongo tyo Kanaa,+ otyilongo ndyikahi nokumwavela tyikale tyenyi,+ mondywo imwe amukala otyilunda,+ ame andyityiyeke, 35 hekulu yondywo oyo una okwenda komunakwa emupopila okuti: ‘Ondywo yange yatambula ouvela.’ 36 Omunakwa matumu vapole ovityuma aviho mondywo omo tyina nkhele ehenetale ouvela oo opo ovityuma aviho vili-mo ehevitie viasila. Pahe omunakwa anyingila-mo atale ouvela ondywo yatambula. 37 Matale apa pena ouvela oo. Ine motyimato tyatyo mwapelauka, muna-ana ovika ovindumbu ine hamwe viakuhukila, avimoneka ngoti vianyingila kohi motyimato, 38 omunakwa malupuka mondywo oyo, akwate kombundi, ondywo oyo ayahanyingilwa mononthiki epandu-vali.+

39 “Omunakwa makondoka mondywo omo monthiki ya pandu-vali, eitale nawa. Ine ouvela oo welityandyana motyimato atyiho tyondywo, 40 omunakwa matumu ovanthu vatungulule-po omamanya aeho ayambula ouvela oo, aakayumbwahi kondye yepunda-umbo, apa pasila. 41 Una okutuma ovanthu vapele ondywo oyo aiho mokati, eheke liatyo lina okukayumbwahi kondye yepunda-umbo apa pasila, nomankhelele atyo ngapo akayumbwa. 42 Pahe pomamanya okwapolwa-po avapingiya-po omamanya omakwavo, ondywo oyo aihotwa vali nonthata onkhwavo.

43 “Ine mondywo omo muya vali ouvela oo, ngwe ankho omamanya atyo apolwa-mo-ale, tupu ankho mwapelwa-le amuhotwa otyivali, 44 omunakwa manyingila mondywo omo, atale-mo. Ine ouvela weliyandyana mondywo omo, opo otyilunda,+ ouvela omuvi, ondywo oyo yasila. 45 Matumu ovanthu vahanye ondywo oyo. Omamanya atyo, nomavai atyo, neheke liatyo, nomankhelele atyo, evitwala kondye yepunda-umbo, apa pasila.+ 46 Mahi una wanyingila mondywo omo ankho mwahanyingilwa,+ makala tyasila atee kokangulohi.+ 47 Una walala-mo una okukoha ovikutu viae. Una walila-mo okulia nae una okukoha ovikutu viae.

48 “Ine omunakwa utala ondywo oyo yahotwa otyivali, amono okuti ouvela kaweliyandyanene, mapopi okuti ondywo oyo yasukuka, mokonda ouvela itupu-o vali. 49 Ovipuka makoho navio esilo yondywo oyo, oviila vivali, nomavai omusendulu, notyinyanga tyakuhuka, no isopu.+ 50 Maipaela otyiila tyimwe kombanda yombiya yoluma ina omaande o pondyivi-ndyivi yomaande aenda. 51 Pahe apolo omavai omusendulu, no isopu, notyinyanga tyakuhuka, notyiila tyokuna omwenyo, eviyave pohonde yotyiila tyokwaipaelwa komaande o pondyivi-ndyivi yomaande aenda, ohonde oyo einyanye pohi, otyo apilukila kondywo, awana-wana atee tyivasa pepandu-vali.+ 52 Makoho osilo yondywo oyo nohonde yotyiila, nomaande o pondyivi-ndyivi, notyiila tyokuna omwenyo, nomavai omusendulu, no isopu, notyinyanga tyakuhuka. 53 Otyiila tyokuna omwenyo aende natyo kondye yepunda-umbo etyiyeke tyende nohika, akoho ondywo oyo, pahe aisukuka.

54 “Otyo otyitumino tyipopia etyi tyina okulingwa otyipuka tyina otyilunda, nouvela wo momutwe ine hamwe o wo kotyiyeli,+ 55 notyilunda kotyikutu,+ notyilunda mondywo.+ 56 Tupu tyipopia ovimita, novipute, novihengu,+ 57 opo tyipunguluke nawa onalupi otyipuka tyimwe tyasila, onalupi otyipuka tyimwe tyasukuka.+ Otyo otyitumino tyipopia otyilunda.”+

15 Siovaa atolela vali Mwisesi na Alau, ati: 2 “Popilei ova Isilayeli muti: ‘Ine omulume umwe utunda oluvinga-honde kounthu wae,* ukala tyasila.+ 3 Ukala tyasila mokonda yoluvinga-honde atunda, tyilinge utwalako okutunda oluvinga-honde olo kounthu wae tyilinge lwemuhitika ehetyivili okutalamena-ko, omulume oo wasila.

4 “‘Koula omunthu oo una nokutunda oluvinga-honde* amalangala, kukala tyasila, notyipuka oku amapumphama, tyikala tyasila. 5 Una uyama koula wae, una okukoha ovikutu viae, elikoho olutu aluho nomaande, akala tyasila atee kokangulohi.+ 6 Una wamapumphama kotyipundi ankho kwapumphama ou watunda oluvinga-honde una okukoha ovikutu viae, elikoho olutu aluho nomaande, akala tyasila atee kokangulohi. 7 Una wamayame kolutu lwa una utunda oluvinga-honde, una okukoha ovikutu viae, elikoho olutu aluho nomaande, akala tyasila atee kokangulohi. 8 Ine omunthu umwe uli nokutunda oluvinga-honde unthila omate komunthu wasukuka, oo wokwanthilwa omate una okukoha ovikutu viae, elikoho olutu aluho nomaande, akala tyasila atee kokangulohi. 9 Tyina omunthu oo una nokutunda oluvinga-honde amapumphama komutumba, omutumba oo ukala tyasila. 10 Una wamayame kotyipuka omunthu oo apumphama, una okukala tyasila atee kokangulohi. Una wamatyindi otyipuka otyo, una okukoha ovikutu viae, elikoho nomaande olutu aluho, akala tyasila atee kokangulohi. 11 Ine omunthu uli nokutunda oluvinga-honde+ uyama komunthu umwe tyehelikohele peke, omunthu oo una okukoha ovikutu viae, elikoho nomaande olutu aluho, akala tyasila atee kokangulohi. 12 Ine omunthu una nokutunda oluvinga-honde uyama kombiya yoluma, ombiya oyo ina okutyatyaulwa, ine uyama komaholo, ena okukohwa nomaande.+

13 “‘Tyina oluvinga-honde lwomunthu oo lwamatalama, apakala ononthiki epandu-vali otyo lweheya vali, una okukoha ovikutu viae, elikoho olutu aluho nomaande aenda, akala tyasukuka.+ 14 Monthiki ya tyinana apolo omakuti evali, okuti hatyo omailona evali onopomba,+ aende ku Siovaa, kombundi yohinge yomaliongiyo, oviila ovio eviavela omunakwa. 15 Omunakwa mevilingi oviawa. Tyimwe otyiawa tyonkhali, otyikwavo otyiawa tyokuyokwa. Omunakwa memukohela komutwe wa Siovaa, asukuka koluvinga-honde atunda.

16 “‘Ine omulume umwe watunda ehu, una okulikoha olutu aluho, akala tyasila atee kokangulohi.+ 17 Una okukoha ovikutu viae nomaande. Ine ehu liae liatokela kotyipuka tyimwe tyoseta,* natyo una okutyikoha, ovipuka ovio avikala tyasila atee kokangulohi.

18 “‘Ine omulume umwe ulala nomukai atundu ehu, aveho vena okulikoha, avakala tyasila atee kokangulohi.+

19 “‘Ine omukai umwe utunda unene ohonde tyina eli konohanyi, makala tyasila ononthiki epandu-vali.+ Una umuyama, makala tyasila atee kokangulohi.+ 20 Oula amalangala tyina eli konohanyi, ukala tyasila, notyipuka amapumphama natyo tyikala tyasila.+ 21 Una uyama koula wae, una okukoha ovikutu viae, elikoho nomaande olutu aluho, akala tyasila atee kongulohi. 22 Una uyama kotyipuka tyimwe ankho apumphama, una okukoha ovikutu viae, elikoho olutu aluho, akala tyasila atee kokangulohi. 23 Ine wapumphamene koula ine hamwe o kotyipuka otyikwavo, una wamayame-ko ukala tyasila atee kokangulohi.+ 24 Ine omulume umwe uliyama nae kolutu, ngwe nkhele uli konohanyi, makala tyasila ononthiki epandu-vali.+ Koula omulume oo amalangala nao ukala tyasila.

25 “‘Ine omukai umwe utunda unene ohonde mononthiki mbehe mbo tyo konohanyi,+ ine hamwe walinga tyo konohanyi atyilambe mononthiki mbae, makala tyasila ononthiki ambuho atunda ohonde ngeetyi akala tyasila tyina alinga tyo konohanyi.+ 26 Koula amalangala pononthiki eli nokutunda ohonde kukala tyasila ngeetyi kukala tyina kwamalangala ou walinga tyo konohanyi.+ Otyipuka amapumphama tyina okukala tyasila ngeetyi tyikala tyina kwamapumphama ou walinga tyo konohanyi. 27 Una wamayame kovipuka asilisa una okukala tyasila, akoho ovikutu viae, elikoho olutu aluho, akala tyasila atee kokangulohi.+

28 “‘Mahi ine ohonde yae yatalama, una okukala ononthiki epandu-vali, pahe akala tyasukuka.+ 29 Monthiki ya tyinana una okupola omakuti evali, okuti hatyo omailona evali onopomba,+ atwala oviila ovio komunakwa, kombundi yohinge yomaliongiyo.+ 30 Omunakwa mapolo otyiila tyimwe etyilingi otyiawa tyonkhali, otyiila otyikwavo etyilingi otyiawa tyokuyokwa. Omunakwa memukohela komutwe wa Siovaa, asukuka kohonde atunda.+

31 “‘Okulinga ngootyo, mamukwatesako ova Isilayeli vakale tyasukuka, opo vehelisilise avasilisa ekaka liange lili pokati kavo,+ otyo atyiveipaesa.

32 “‘Otyo otyitumino tyipopia omulume wokwatunda oluvinga-honde, nomulume ukala tyasila mokonda yokwatunda ehu,+ 33 nomukai wakala tyasila mokonda yokwalinga tyo konohanyi,+ nomulume ine hamwe omukai watunda ohonde,+ nomulume wamalala nomukai wasila.’”

16 Etyi ovana vevali va Alau vanyima mokonda yokwafwena pu Siovaa, Siovaa apopi na Mwisesi.+ 2 Siovaa atolela Mwisesi ati: “Popila omukulu wove Alau uti, momphangu ikola+ ahanyingile-mo vala tyina ahanda, alambe otyinyanga,+ aviuku kotyipato tyotyikasa.+ Ahaye-mo mankhi,+ mokonda ame mandyiya mekaka+ kotyipato oko.

3 “Tyina Alau amanyingila momphangu ikola, una okulinga ñgaa: Aete ondume-tane ilingwe otyiawa tyonkhali,+ nongi onthwei ilingwe otyiawa tyokuyokwa.+ 4 Una okuvala omuvalo ukola omulaale womulinya,+ novikalasau ovisupi* viomulinya+ omapenge ae ahamoneke.* Una okulikuta otyinyanga tyomulinya peimo,*+ elipake ombuya komutwe.+ Ovipuka ovio mavale, vikola.+ Ngwe una okulikoha olutu aluho nomaande,+ pahe evivale.

5 “Una okupola kotyikumba tyova Isilayeli aveho+ ovinkhombo vivali ovitwei vilingwe otyiawa tyonkhali, nongi ike onthwei ilingwe otyiawa tyokuyokwa.

6 “Alau pahe apolo ondume-tane, alingi otyiawa tyononkhali mbae mwene, akoho ononkhali, no mbae+ no mbo veumbo liae.

7 “Pahe akwate ovinkhombo vivali evieeta komutwe wa Siovaa, kombundi yohinge yomaliongiyo. 8 Alau nkhele matalesa pokukoya ovikombo ovio vivali, tyimwe atyihulu ku Siovaa, otyikwavo atyihulu ku Asaseli.* 9 Alau maeta otyinkhombo tyokwahula+ ku Siovaa, etyipakulila onkhali. 10 Mahi otyinkhombo tyokwahula ku Asaseli tyina okweetwa nomwenyo ku Siovaa, tyikohe ononkhali mbovanthu, pahe haa otyinkhombo otyo, avetyitahe, atyiende no moluhandya.+

11 “Alau aeta onthane yotyiawa tyononkhali mbae, akoho ononkhali mbae mwene, no mbo veumbo liae. Pahe aipaa onthane yotyiawa tyononkhali mbae mwene.+

12 “Apolo oseke-seke+ yeyula omakala ena otupia apolwa komutala wovilikutila+ uli komutwe wa Siovaa, nomankhanya evali okahinde kombao+ yokunika nawa, ovipuka ovio evitwala konyima yotyinyanga+ tyateta pokati omphangu ikola. 13 Alau akalela komutwe wa Siovaa,+ apake ombao komakala, omwihi wombao auyula kotyipato+ Tyotyikasa Tyoumbangi+ na ahankhie.

14 “Apolo kapii pohonde+ yonthane aipaa, amomesila pohi komutwe wotyikasa nomunwe wae, koutundilo wekumbi. Mamomesila pohi kapii ohonde komutwe wotyikasa,+ awana-wana atee tyivasa pepandu-vali.

15 “Pahe aipaa otyinkhombo tyotyiawa tyononkhali mbovanthu,+ ohonde yatyo eitwala mokati, alambe otyinyanga,+ eilingi ngeetyi alinga ohonde+ yondume-tane. Wiimomesila pohi otyo apilukila kotyipato, amomesila vali kotyipato tyatyo.

16 “Makoho omphangu ikola kovipuka viasila ova Isilayeli valinga, no kovivi valinga, no kononkhali mbavo.+ Otyo ena okulinga ngootyo opo asukule ohinge yomaliongiyo ili pokati kavo, pokati kovanthu valinga ovivi.

17 “Pokusukula omphangu ikola petupu ou upondola okukala mohinge yomaliongiyo atee Alau alupuka-mo. Una okulikoha kononkhali mbae mwene, akoho mbo veumbo liae,+ no mbova Isilayeli aveho.+

18 “Tyina amalupuka-mo, aende komutala wovilikutila+ uli komutwe wa Siovaa, eusukula kononkhali. Una okupola kapii pohonde yonthane no pohonde yotyinkhombo, awaveka konombinga ambuho mbomutala. 19 Tupu amomesila kapii pohi ohonde komutala nomunwe wae, awana-wana atee tyivasa pepandu-vali, eukoho kovivi vialingwa-lingwa nova Isilayeli, ausukuka.

20 “Tyina amamane okusukula+ omphangu ikola, nohinge yomaliongiyo, nomutala wovilikutila,+ aeta otyinkhombo tyina omwenyo.+ 21 Alau mapake omavoko ae evali komutwe wotyinkhombo otyo tyina omwenyo, elipopila-ko ovipengi aviho viova Isilayeli, novivi viavo, nononkhali mbavo ambuho, alingi ngatyina embupaka komutwe wotyinkhombo,+ atumu omulume umwe wanakwa* etyitahele moluhandya. 22 Otyinkhombo otyo atyityindi ovivi ovio,+ atyivitwala moluhandya.+ Una okutyitaha atyiende nohika.+

23 “Alau anyingila mohinge yomaliongiyo, alulu-mo ovikutu viomulinya ankho avala pokunyingila momphangu ikola, ngamo evisa. 24 Elikohela pomphangu imwe ikola, elikoho olutu aluho* nomaande,+ avale ovikutu viae,+ pahe aende alingi otyiawa tyae tyokuyokwa notyiawa+ tyovanthu aveho tyokuyokwa,+ elikoho ononkhali mbae, akoho vali ovanthu ononkhali mbavo.+ 25 Ovilenga viotyinyama tyotyiawa tyonkhali evipake potupia komutala vitwimine-ko.

26 “Omulume wokwataha otyinkhombo tyokwahula ku Asaseli,+ una okukoha ovikutu viae, elikoho olutu aluho nomaande, pahe anyingila nawa monthanda.

27 “Ovinyama viohonde yatwalwa momphangu ikola, ikohe ovanthu kononkhali, onthane yotyiawa tyonkhali, notyinkhombo tyotyiawa tyonkhali, mavitwalwa kondye yonthanda. Onombandwa mbovinyama ovio, nohitu yatyo, novityandya viatyo, vina okuyokwa motupia.+ 28 Una weviyoka una okukoha ovikutu viae, elikoho olutu aluho nomaande, pahe anyingila nawa monthanda.

29 “Etyi otyitumino muna okulandula apeho. Monthiki 10 yohanyi ya pandu-vali, munthu na munthu elilingi onya* mokonda yononkhali mbenyi. Kamupondola okuundapa,+ tyilinge onwe va Isilayeli tyilinge ononthunda-vilongo mbukala pokati kenyi. 30 Onthiki oyo mamukohwa ononkhali mbenyi,+ amupopiwa okuti mwasukuka. Mamusukuka kononkhali mbenyi ambuho komaiho a Siovaa.+ 31 Onthiki oyo otyasapalo. Onthiki yenyi yokupululukwa-po. Munthu na munthu una okulilinga onya* mokonda yononkhali mbenyi.+ Otyo otyitumino muna okulandula apeho.

32 “Omunakwa walembulwa,+ apewa otyilinga tyounakwa*+ opo apinge pu he,+ oe makoho ononkhali tyavala ovikutu viomulinya,+ ovikutu vikola.+ 33 Makoho omphangu ikola unene,+ nohinge yomaliongiyo,+ nomutala wovilikutila,+ akoho ononkhali mbovanakwa, no mbovanthu aveho.+ 34 Otyo otyitumino muna okulandula+ apeho opo ova Isilayeli vakohwe like menima,+ mokonda yononkhali mbavo ambuho.”

Alau alingi umwe etyi Siovaa atumine Mwisesi.

17 Siovaa atolela vali Mwisesi ati: 2 “Popila Alau novana vae, nova Isilayeli aveho uti: ‘Siovaa watuma okuti lingei ñgaa:

3 “‘“Ine omulume umwe pova Isilayeli wiipaa otyipako, tyilinge ongombe onthwei tyilinge otyiketa tyongi, tyilinge otyinkhombo, etyiipaela monthanda pamwe etyiipaela kondye yonthanda, 4 mahi ehetyiipaela kombundi yohinge yomaliongiyo, kekaka lya Siovaa tyilinge otyiawa tya Siovaa, omulume oo uvelwa onombei. Una okuvelwa onombei mokonda waipaa omapita otyipako, pokati kovanthu vae una okwipawa-po. 5 Tyina okulingwa ngootyo, opo ova Isilayeli vatwaile Siovaa ovinyama vekahi nokwipaela moluhandya, avevipakula komunakwa kombundi yohinge yomaliongiyo. Vena okuviavela Siovaa+ vilingwe ovilikutila viombembwa. 6 Omunakwa manyanye ohonde komutala wa Siovaa wovilikutila, uli kombundi yohinge yomaliongiyo, apake ovilenga potupia komutala, vilingile omuniko omuwa* Siovaa.+ 7 Vena okulinga ngootyo, opo vahalingile vali ovilikutila ovilulu vikahi ngotyinkhombo,*+ evi velisilisa navio tyina vevifenda.+ Otyo otyitumino muna okulandula, noonwe novanthu mavakatuka-tuka mwoonwe.”’

8 “Vepopila okuti: ‘Omu Isilayeli ine hamwe onthunda-vilongo uli pokati kenyi, wamalingi otyiawa tyokuyokwa ine hamwe otyilikutila, 9 ehetyitwala kombundi yohinge yomaliongiyo ngako etyiavela Siovaa, pokati kovanthu vae+ una okwipawa-po.

10 “‘Ine omulume umwe mova Isilayeli ine hamwe onthunda-vilongo uli pokati kenyi ulia ohonde+ yotyipuka tyimwe, omunthu oo* mandyimwendela andyimunyimi-ko. 11 Omwenyo uli* mohonde, ame nemupa ohonde+ opo mukohe nayo ononkhali mbenyi* tyina mulinga ovilikutila komutala,+ mokonda ohonde oyo ikoha omunthu kononkhali,+ kombanda yomwenyo ina-o. 12 Otyo ame napopilila ova Isilayeli okuti: “Nawike pwoonwe una okulia ohonde, tupu naike onthunda-vilongo ili pokati kenyi+ ina okulia ohonde.”+

13 “‘Ine omu Isilayeli umwe ine hamwe onthunda-vilongo imwe ili pokati kenyi, ukayeva avasi otyinyama mohika ine hamwe otyiila tyiliwa, una okutyipola ohonde+ yatyo eihihila pohi. 14 Omwenyo* wovitungwa aviho, ohonde, mokonda omwenyo uli* mohonde. Otyo napopilila ova Isilayeli okuti: “Mwahaliei ohonde, mokonda omwenyo wovitungwa aviho ohonde. Wameili una okunyimwa-ko.”+ 15 Ine omunthu umwe* omu Isilayeli ine hamwe onthunda-vilongo ulia ohitu yotyinyama tyimwe tyavahiwa tyankhia, ine hamwe tyaliwa notyinyama tyohika,+ omunthu una okukoha ovikutu viae, elikoho olutu aluho nomaande, akala tyasila atee kokangulohi.+ Tyina amalingi ngootyo, pahe akala tyasukuka. 16 Mahi ine kakoho ovikutu viae, ehelikoho olutu aluho nomaande, makapulwa onkhali yae.’”+

18 Siovaa apopila vali Mwisesi ati: 2 “Popila ova Isilayeli uti: ‘Ame, ame Siovaa Huku yenyi.+ 3 Mwahalingei ngovanthu votyilongo tyo Isitu oku mukala, tupu mwahalingei ngovanthu votyilongo tyo Kanaa, oku mandyimutwala nako.+ Mwahalandulei ovitumino viavo. 4 Tavelei ovitumino viange vionomphela, amulandula ovitumino viange, ngamo mweendela.+ Ame, ame Siovaa Huku yenyi. 5 Tavelei ovitumino viange, novitumino viange vionomphela. Una ulinga ngootyo, makakala nomwenyo.+ Ame, ame Siovaa.

6 “‘Pwoonwe pahamone ou wenda poula wa una velii nae, alala nae.*+ Ame, ame Siovaa. 7 Pahamone ou ulala na he, nii pahamone ou ulala na ina. Pahamone ou ulinga ngootyo ina; omunthu kapondola okulala na ina.

8 “‘Pwoonwe pahamone ou ulala nomukai wa he.+ Otyo olukundo aetela he.*

9 “‘Pwoonwe pahamone ou ulala nomphange yae, tyilinge velikwai mu he, tyilinge velikwai mu ina, tyilinge ou watyitwa meumbo, tyilinge ou watyitwa kondye.+

10 “‘Wahalale nomutekula wove, tyilinge omona womona wove omukwendye, tyilinge omona womona wove omufikwena, mokonda otyo olukundo ulietela.

11 “‘Wahalale nomona omufikwena womukai wa ho. Mokonda watuka mu ho, tyina muna-e, omphange yove.

12 “‘Wahalale na henkhai yove, mokonda ohonde ike+ na ho.

13 “‘Wahalale na nyoko muhikwena, hamwe onyoko yomukulu, mokonda ohonde ike na nyoko.

14 “‘Wahalale nomukai wa ho yomona, hamwe omukai wa ho yomukulu, omwetela olukundo. Oo tyina muna-e, onyoko.+

15 “‘Wahalale nomukwekai wove,*+ mokonda omukai womona wove. Wahalale nae.

16 “‘Wahalale na nawa yove,+ mokonda otyo matyikundisa mukwenyi ngwe mulilandula.

17 “‘Wahatie olala nomukai, olala vali nomona wae. Wahalale nomutekula wae, omona womona wae omukwendye, hamwe omona womona wae omuhikwena,+ mokonda ohonde ike. Otyo ouhayo.*

18 “‘Wahanepe nawa yove, omulingi onthawa,+ olala nae, ngwe omukai wove velilandula nae nkhele una omwenyo.

19 “‘Weheliyame kolutu nomukai wasila, walinga tyo konohanyi.+

20 “‘Wahalale nomukai wa mukwenyi,* olisilisa.+

21 “‘Wahayeke nawike watuka mwoove alingwe* otyilikutila tya Moleke.+ Wahasilise enyina lya Huku yove.+ Ame, ame Siovaa.

22 “‘Wahalale nomulume mukwenyi ngatyina omukai.+ Otyo otyipuka tyitoyesa.

23 “‘Omulume kapondola okulala notyinyama, elisilisa. Nii omukai kapondola okulipakula kotyinyama tyilale nae.+ Otyo katyilingwa.

24 “‘Mwahalingei natyike povipuka ovio amulisilisa, mokonda, ovipuka ovio, ovio viasilisa+ ovanthu vovilongo evi ndyikahi nokumutaata. 25 Otyo eheke liavo liasilila. Ame mandyiveetela ononkhumbi mbata movivi viavo. Eheke malihandye ovanthu valio.+ 26 Mahi onwe, tyilinge omu Isilayeli, tyilinge onthunda-vilongo ikala pokati kenyi, tavelei ovitumino viange aviho, novitumino viange vionomphela.+ Mwahalingei natyike povipuka ovio vitoyesa.+ 27 Mokonda ovipuka ovio aviho vitoyesa ovio vilingwa novanthu vatetekela kwoonwe+ okukala motyilongo etyi. Pahe otyilongo tyasila. 28 Ngootyo otyilongo kamatyisukisa okumuhandya, mokonda yokwetyisilisa, ngeetyi tyahandya ovanthu vovilongo vatetekela kwoonwe okukala-mo. 29 Ine omunthu umwe ulinga tyimwe povipuka ovio vitoyesa, pokati kovanthu vae una okwiipawa-po. 30 Tavelei atyiho nemutuma, mwahalingei natyike povipuka vitoyesa vilingwa-mo-ale etyi mweheneye,+ opo viehemusilise. Ame, ame Siovaa Huku yenyi.’”

19 Siovaa atolela vali Mwisesi ati: 2 “Popila ova Isilayeli aveho uti: ‘Lingei ovanthu vakola, mokonda ame Siovaa Huku yenyi ndyikola.+

3 “‘Munthu na munthu ahumbe* ovo he na ina,+ tupu muna okutavela otyitumino tyotyasapalo.+ Ame, ame Siovaa Huku yenyi. 4 Mwahakaovolei ono huku mbahasilivila,+ nii mwehelinthililei ono huku.+ Ame, ame Siovaa Huku yenyi.

5 “‘Ine mulingila Siovaa otyilikutila tyombembwa,+ muna okutyilinga nawa opo mutavelwe.+ 6 Tyina okuliwa monthiki tyalingwa no monthiki ilandula-ko. Mahi tyahupa-po atyivasi monthiki ya tatu, tyina okuyumbwa motupia.+ 7 Mahi ine tyahupa-po tyiliwa monthiki ya tatu, matyinumanesa Huku, kamatyitavelwa. 8 Ou wamali-ko makapulwa onkhali oyo, mokonda wasilisa otyilikutila tyikola tyalingilwa Siovaa. Omunthu oo,* pokati kovanthu vae una okwipawa-po.

9 “‘Tyina wamateye momapia ove, wahateye omane atee oku liaoyela, nii wahapupulule-mo evi viesala-mo.+ 10 Tupu wahanyange-ko onouva mbesala-sala komivinyu viove, nii ombu mbatokaila pohi mepia liove. Una okumbusa-po mbukale mbovahepi*+ nononthunda-vilongo. Ame, ame Siovaa Huku yove.

11 “‘Mwahavakei,+ mwahakembei,+ tupu mwahalingei emphinia vakwenyi. 12 Mwahaanei omatutu menyina liange, amusilisa enyina lya Huku yenyi.+ Ame, ame Siovaa. 13 Wahapombe mukwenyi,+ nii wehemuvake.+ Ove kupondola okukala nondyambi ya mukwenyi waundapa, ohemupe-yo otyinthiki atyiho atyilambe atee kutya.+

14 “‘Wahatele onkhano* una weheivi-po,* nii wahapake otyihingi mondyila yomumphoki.+ Tila Huku yove.+ Ame, ame Siovaa.

15 “‘Wahalinge onya tyina ukoyesa onomphela. Wahalinge okapungulula, oamena omuhepi, nii okwamena omuhona.+ Ove una okukoyesa onomphela mba vakwenyi nouviuki.

16 “‘Wahaende-ende pokati ka vakwenyi otyo utendeleya ovanthu.+ Wahalinge natyike tyipondola okunyona omwenyo wa* mukwenyi.*+ Ame, ame Siovaa.

17 “‘Wahayale mukwenyi momutima.+ Ove una okuviyula mukwenyi+ opo uhavelwe onombei mbonkhali yae.

18 “‘Wahakondolele vakwenyi otyivi notyivi, nii wehevepakele onkhongo.+ Humba mukwenyi ngeetyi ove ulihole.+ Ame, ame Siovaa.

19 “‘Onwe muna okutavela ovitumino viange. Ovinyama viove utekula viahahonyeke olutyito. Wahakune onombuto onombali+ mbelikalela mepia like, nii wahavale ovikutu viomilinya vivali vielikalela.+

20 “‘Ine omulume umwe ulala nomukai, ngwe omukai oo omupika, mahi manepwa-le nomulume omukwavo, mahi nkhele omulume oo kenemufetele emuyovole, kavapondola okukala tyahalingwa natyike, mahi kavaipawa mokonda nkhele ankho omukai oo kenefetelwe. 21 Omulume una okwetela Siovaa otyiawa tyokwavelwa onombei kombundi yohinge yomaliongiyo. Una okweta ongi ilingwe otyiawa tyokwavelwa onombei.+ 22 Omunakwa memukohela komutwe wa Siovaa ononkhali mbae nongi yotyiawa tyokwavelwa onombei monkhali yae alinga, aevelwa ononkhali mbae.

23 “‘Tyina mwamanyingila motyilongo mandyimwavela, amutwiki omiti viovinyango, ovinyango viatyo vina okukala tyasila, viailikwa, kaviliwa. Vina okukala omanima etatu otyo mwehevili. Kavipondola okuliwa. 24 Mahi menima lya kwana, ovinyango ovio mavilingi ovinyango vikola, avilingi viokuhambukilwa kotyipala tya Siovaa.+ 25 Tyina tyiti menima lya tano, pahe mupondola okulia kovinyango viatyo, kweetyi mamuteye muyawiseko ovinyango. Ame, ame Siovaa Huku yenyi.

26 “‘Mwahaliei natyike tyina ohonde.+

“‘Mwehelipakei momatambu onombale, nii momawanga.+

27 “‘Mwahakululei* onohuki mbo mombwelo, amulingi ekelengenge momutwe, nii mwahakeyei onondyeli.+

28 “‘Mwehelitetei kolutu tyina mwamanyimisa omunthu,*+ nii mwehelipakei ona. Ame, ame Siovaa.

29 “‘Wahakundise omona wove okumulinga ekunga,+ opo otyilongo tyeheyula momakunga, amulingwa ovivi ovinyingi.+

30 “‘Tavelei otyitumino tyange tyotyasapalo,+ amulingi onthilo* omphangu yange onthyukuki. Ame, ame Siovaa.

31 “‘Mwahaovolei vokuundapa novilulu,+ nii ovitapi,+ ovo mavemusilisa. Ame, ame Siovaa Huku yenyi.

32 “‘Katuka+ tyina umona omukulu wonohuki onongonga. Nkhimaneka ombwale,+ otili Huku yove.+ Ame, ame Siovaa.

33 “‘Ine pena omunthu umwe onthunda-vilongo ukala pokati kenyi, mwehemulingei onya.+ 34 Onthunda-vilongo ikala motyilongo tyenyi muna okwitala ngatyina omu Isilayeli mukwenyi.+ Muhumbei ngeetyi onwe mwene mulihole, mokonda noonwe mwali ononthunda-vilongo kotyilongo tyo Isitu.+ Ame, ame Siovaa Huku yenyi.

35 “‘Mwahaelekei mweevi vivaka, tyina mweeleka otyipuka tyimwe moulaale, nomulemo watyo, na apa tyilifwe.+ 36 Ovipeyalo vienyi vilinge viokupopia otyili, evi mweeleka navio vilinge viotyili, aviho neevi muyonga navio ovipuka viakukuta,* neevi mweeleka navio viokunuwa nomilela.*+ Ame, ame Siovaa Huku yenyi, wemupola kotyilongo tyo Isitu. 37 Tavelei ovitumino viange aviho, novitumino viange vionomphela, amweendela-mo. Ame, ame Siovaa.’”+

20 Siovaa atolela Mwisesi ati: 2 “Popila ova Isilayeli uti: ‘Tyilinge omu Isilayeli, tyilinge onthunda-vilongo ikala pokati kenyi, una wamapolo omunthu umwe pu vana vatuka mwe, emupakula ku Moleke una okwipawa.+ Ovanthu vo motyilongo ovo mwene vena okumutyopa-tyopa nomamanya, avemwiipa. 3 Ame, ame mwene mandyiendela omulume oo, pokati ka vakwavo andyimunyimi-po, mokonda wapakulila Moleke omunthu watuka mwe, wasilisa omphangu yange ikola+ nenyina liange likola. 4 Ine ovanthu votyilongo valingila wina, avehesuku na una wapakula omunthu watuka mwe ku Moleke, avehemwipaa,+ 5 ame mwene, ame mandyimwendela, nae nombunga yae.+ Pokati ka vakwavo mandyimunyimi-po, nae novanthu aveho velipaka kumwe nae, avafende* Moleke.

6 “‘Mahi omunthu wahakala* omukwatyili aovola vonombale,+ novitapi,+ ame mandyimwendela, pokati ka vakwavo andyimunyimi-po.+

7 “‘Lisukulei, mulinge ovanthu vakola,+ mokonda ame, ame Siovaa Huku yenyi. 8 Tavelei ovitumino viange, amwendela-mo.+ Ame, ame Siovaa ndyili nokumukoha.+

9 “‘Ine pena umwe utela onkhano he ine hamwe o ina, una okwipawa.+ Mokonda oe mwene walinga ngootyo, oe welietela ononkhia.

10 “‘Omulume wamalingi oumbalehi, etyi ena okulingwa otyetyi: Una wamaende poula womukai wa mukwavo, una okwipawa. Nomulume watyo nomukai watyo aveho vena okwipawa.+ 11 Omulume wamaliate koula wa he neetwe, ukundisa he.*+ Aveho, na mulume na mukai vena okwipawa. Mwene ovo velietela ononkhia. 12 Ine omulume umwe ulala nomukwekai wae,* aveho vena okwipawa. Valinga etyi tyahalingwa. Mwene ovo velietela ononkhia.+

13 “‘Ine omulume umwe ulala nomulume mukwavo ngeetyi omulume alala nomukai, otyo valinga otyipuka tyitoyesa.+ Vena okwipawa. Mwene ovo velietela ononkhia.

14 “‘Ine omulume umwe unepa omukai umwe, anepe vali omona womukai oo, otyipuka otyo otyivi+ unene.* Aveho vetatu vena okuyokwa+ opo otyipuka otyo otyivi tyahalingwe vali pokati kenyi.

15 “‘Ine omulume umwe ulala notyinyama, una okwipawa, nae notyinyama tyatyo vena okunkhia.+ 16 Ine omukai umwe ulipakula kotyinyama tyilale nae,+ muna okwipaa omukai oo notyinyama tyatyo. Nae notyinyama otyo vena okwipawa. Ovanthu ovo, ovo mwene velietela ononkhia.

17 “‘Ine omulume umwe uhanda omphange yae velilandula mu he, hamwe o mu ina, alala nae, otyo otyipuka tyikundisa.+ Vena umwe okwipaelwa momaiho a vakwavo. Walinga omphange yae etyi tyikundisa. Una okulingwa etyi tyata monkhali alinga.

18 “‘Ine omulume umwe wenda koula womukai walinga tyo konohanyi, alala nae, aveho vevali kavalingile onthilo ohonde yomukai oo.+ Pokati ka vakwavo vena okwipawa-po.

19 “‘Wahalale na nyoko yomukulu, hamwe onyoko muhikwena, nii wahalale na henkhai yove. Otyo matyieta olukundo+ mokonda muhonde ike. Aveho vena okulingwa etyi tyata monkhali yavo. 20 Ine omulume umwe ulala nomukai wa he yomona, hamwe o wa he yomukulu, ukundisa he.+ Omulume oo nomukai watyo vena okulingwa etyi tyata monkhali yavo. Vena okunkhia tyehena ovana. 21 Ine omulume umwe unepa omukai wa mukwavo velikwai nae, otyo tyitoyesa.+ Ukundisa una velilandula nae. Vena okukala tyehena ovana.

22 “‘Tavelei ovitumino viange aviho, novitumino viange vionomphela,+ amweendela-mo,+ opo otyilongo oku ndyimutwala mukakale-mo, tyehemuhandye-mo.+ 23 Mwahaendelei movitumino viovanthu vovilongo evi ndyikahi nokumutaata, mokonda valinga ovipuka ovio aviho.+ Ovipuka ovio, ame vinthoyesa.+ 24 Otyo nemupopilile okuti: “Onwe mamukakala motyilongo tyavo. Ame mandyimwavela otyilongo tyavo atyikala tyenyi, otyilongo tyomahini nowiki.+ Ame, ame Siovaa Huku yenyi, nemuyapula kovanthu vovilongo ovikwavo.”+ 25 Muna okupungulula otyinyama tyasukuka neetyi tyasila, notyiila tyasila neetyi tyasukuka.+ Mwahaliei ovinyama, nii oviila, nii ovipuka vilikoka vili kombanda yeheke. Ovinyama ovio neviyapula kovikwavo mokonda viasila.+ 26 Lingei ovanthu vange vakola vasukuka,+ mokonda ame Siovaa ndyikola. Ndyikahi nokumuyapula kovanthu vovilongo ovikwavo mukale ovanthu vange.+

27 “‘Tyilinge omulume tyilinge omukai wokuundapa no vonombale, ine hamwe o wokutapesa, una okwipawa.+ Ovanthu vena okuveipaa nomamanya. Mwene ovo velietela ononkhia.’”

21 Siovaa apopi vali na Mwisesi, ati: “Popila ovana va Alau, ovanakwa uti: ‘Puvo pahamone nawike uyama komunthu umwe*+ pova Isilayeli wankhia, atyimusilisa. 2 Mahi ine owae-wae mwene, hamwe o he, o ina, omona wae omukwendye ine hamwe omukainthu, ine hamwe velilandula nae, opo upondola okumuyama elisilisa. 3 Tupu upondola okuyama komphange yae wanyima wehei mulume, ankho vakala nae, nkhele ankho wehenenepwe. 4 Kapondola okuyama komukai umwe pova Isilayeli ankho wanepwa atyimusilisa. 5 Kavapondola okulikeya onohuki ambuho momutwe,+ nii okulikulula onondyeli, nii okuliteta kolutu.+ 6 Vena okulinga ovakwa-ukola ku Huku yavo.+ Kavapondola okusilisa enyina lya Huku yavo,+ mokonda ovo vayoka oviawa vilingilwa Siovaa, okulia kwa* Huku yavo. Vena okulinga ovakwa-ukola.+ 7 Kavapondola okunepa ekunga,+ nii omukai waendwa-le nae, nii omukai wahengwa nomulume wae.+ Mokonda, omunakwa ukola ku Huku yae. 8 Koha omunakwa,+ mokonda oe upakula okulia kwa Huku yenyi. Omunakwa muna okumutala okuti omunthu ukola, mokonda onwe mukohwa na ame Siovaa, ame mukwa-ukola.+

9 “‘Ine omona umwe omukainthu womunakwa ulisilisa mokonda yokwakala ekunga, ngootyo wasilisa he. Omona oo, una okupakwa motupia.+

10 “‘Povanakwa aveho wamakala omunene-nakwa, apakwa omulela wokulembula momutwe,+ apewa otyilinga* avale ovikutu viounakwa,+ kapondola okuyeka onohuki mbae tyankhindala vala, nii kapondola okutandula ovikutu viae.+ 11 Kapondola okufwena pomunthu wankhia;*+ nii ngatyilinga-linga he ine hamwe o ina kapondola okumuyama asili. 12 Kapondola okuhondovoka pomphangu onthyukuki, nii kapondola okusilisa omphangu onthyukuki ya Huku yae,+ mokonda enyingilikilo liokwelipakula, omulela wokulembula wa Huku yae,+ uli kombanda yae. Ame, ame Siovaa.

13 “‘Una okunepa omukai weheneende nomulume.+ 14 Kapondola okunepa omuhepe nii omukai wahengwa, nii omukai waendwa-le nae, nii ekunga. Omukai manepe una okutunda po vomuhoko wae mwene, mahi weheneende na mulume. 15 Kapondola okusilisa ovanthu vatuka mwe* pokati ka vakwavo,+ mokonda ame, ame Siovaa nemukoha.’”

16 Siovaa apopila vali Mwisesi okuti: 17 “Tolela Alau, uti: ‘Povanthu aveho mavakatuka-tuka mwoove, omulume walemana kapondola okufwena pomutala wovilikutila apakula okulia kwa Huku yae. 18 Omulume walemana kapondola okufwena pomutala wovilikutila, tyilinge omumphoki, tyilinge uteñgina, tyilinge walemana eyulu, tyilinge una okuvoko okulaale vali kokukwavo, hamwe otyikalo otyilaale vali kotyikwavo, 19 tyilinge walemana omphai, tyilinge okuvoko, 20 tyilinge omulume una onkhunda, tyilinge omusupi tyoulema,* tyilinge walemana eiho, tyilinge una onombulu, hamwe una ovihengu, tyilinge walemana kounthu wae, ahafwene-po.+ 21 Ovalume aveho vokwatuka momunakwa Alau,* omulume walemana kapondola okufwena pomutala wovilikutila, alingila Siovaa oviawa viokuyokwa. Wokwalemana kapondola okufwena pomutala wovilikutila, apakula okulia kwa Huku yae. 22 Upondola okulia okulia kwa Huku yae kwapolwa povipuka vikola unene,+ no povipuka vikola.+ 23 Mahi kapondola okufwena potyinyanga,+ nii pomutala wovilikutila,+ mokonda walemana. Kapondola okusilisa omphangu yange onthyukuki,+ mokonda ame, ame Siovaa ndyivekoha.’”+

24 Mwisesi etyipopila Alau novana vae, nova Isilayeli aveho.

22 Siovaa apopila vali Mwisesi ati: 2 “Tolela Alau novana vae okuti vena okulinga onthilo* ovipuka vikola, ovipuka ova Isilayeli vaeta, vahasilise enyina liange likola,+ novipuka viasukulilwa ame.+ Ame, ame Siovaa. 3 Vetolela, uti: ‘Aveho mavakatuka-tuka mwoonwe, ou wasila ahafwene povipuka vikola ova Isilayeli vasukulila Siovaa. Omunthu oo,* una okwiipawa, anehemumono vali momaiho ange.+ Ame, ame Siovaa. 4 Ine omunthu umwe watuka mu Alau una otyilunda,+ hamwe oluvinga-honde,+ kapondola okulia kovipuka vikola tyina nkhele ehenesukuke,+ nii omunthu wayama kwo ou wasila mokonda yokwakwata otyivimbi,+ nii omulume watunda ehu,+ 5 nii omunthu uyama kovipuka ovitutu viasila vili kombanda yohi+ ine hamwe omunthu uyama ku una wasila mokonda yokwakwata kotyipuka tyimwe tyasila+ tyipondola okumusilisa, kali-ko. 6 Una wamayame* pu vimwe povipuka ovio, makala tyasila atee kokangulohi. Kapondola okulia kovipuka vikola, mahi wesukisa okulikoha olutu aluho nomeva.+ 7 Tyina ekumbi liamanyingila, masukuka, opo pahe upondola okulia ovipuka vikola, mokonda okulia kwae.+ 8 Tupu kapondola okulia otyinyama tyavasiwa tyankhia nii otyinyama tyaliwa novinyama ovikwavo viomofika, mokonda matyimusilisa.+ Ame, ame Siovaa.

9 “‘Vena okutavela ovitumino viange na vahalinge onkhali yokusilisa ovipuka vikola, avankhi. Ame, ame Siovaa ndyivesukukisa.

10 “‘Omunthu wahatuminwe* kapondola okulia kovipuka vikola.+ Nii onthunda-vilongo omweenda womunakwa, nii omuundapi ufetwa, kavapondola okulia kovipuka vikola. 11 Mahi ine omunakwa ulanda omunthu* nonombongo mbae mwene, omunthu oo upondola okulia kovipuka ovio. Ovapika vatyitilwa meumbo liae navo vapondola okulia kokulia kwae.+ 12 Ine omona womunakwa unepwa nomunthu wehemunakwa,* kapondola okulia kovipuka viaawa vikola. 13 Mahi ine omona womunakwa ukala omuhepe ine hamwe uhengwa mahi utupu ovana, akondoka meumbo lya he, ngeetyi ali pouhikwena, upondola okulia kokulia kwa he.+ Mahi omunthu wahatuminwe* kapondola okukulia.

14 “‘Ine omunthu umwe ulia otyipuka tyikola, tyehetyii okuti tyikola, una okwaavela omunakwa otyipuka tyatyo otyo tyikola, ayawisa-ko vali katutu.+ 15 Kavapondola okusilisa ovipuka vikola ova Isilayeli vaavela Siovaa,+ 16 okulinga ngootyo, mavelieetela avavelwa onombei mokonda yokwalia kovipuka vikola. Ame, ame Siovaa ndyivesukula.’”

17 Siovaa apopila vali Mwisesi okuti: 18 “Tolela Alau novana vae, nova Isilayeli aveho okuti: ‘Tyina omunthu umwe, tyilinge omu Isilayeli tyilinge onthunda-vilongo uli pokati kenyi amaetela Siovaa otyiawa tyokuyokwa+ na afwisepo etyi apopile, ine hamwe wetyiava kotyali tyae,+ 19 una okweta otyipako otyitwei,+ ongombe, ongi, hamwe otyinkhombo, opo etavelwe. 20 Mwahaetei otyinyama natyike tyina otyinthembia,*+ mokonda ine mweeta etyi tyina otyinthembia kamamutavelwa.

21 “‘Ine omunthu ulingila Siovaa otyilikutila tyombembwa+ opo afwisepo etyi apopile, hamwe wetyiaava vala kotyali tyae, una okwaava etyi tyikahi nawa apola povipako viae, ponongombe mbae, ponongi mbae no povinkhombo viae opo etavelwe. Katyipondola okukala otyinyama tyina otyinthembia. 22 Mwahaetei otyinyama natyike otyimphoki, natyike tyateka ovikalo, natyike tyina apa tyatetwa, natyike tyalinga onombulu ine hamwe okapele. Mwahaetelei Siovaa natyike povinyama ovio, nii mwehevilingilei Siovaa ovilikutila. 23 Otyiawa ulinga kotyali tyove, tyitavela okweta ongombe onthwei ina otyikalo tyehelifwe novikwavo, okuti hatyo, ongi. Mahi otyinyama ngootyo, katyitavelwa tyilingwe otyiawa tyokufwisapo etyi wapopile. 24 Kamupondola okwaavela Siovaa otyipako tyalemana omapita, hamwe tyatyopwa ine hamwe tyatukanwa. Onwe motyilongo tyenyi kamupondola okwaava otyipako ngootyo. 25 Ine onthunda-vilongo yaava otyipako ngootyo, tyilinge tyokulia kwa Huku yenyi, mwehetyitambulei. Mokonda ovinyama ovio vialemana, viasila, kamavitavelwa.’”

26 Siovaa atolela vali Mwisesi okuti: 27 “Tyina ongombe yamatyiti, hamwe ongi ine hamwe otyinkhombo, otyiketa tyatyo tyina okukala notyiina ononthiki epandu-vali,+ monthiki ya tyinana tyipondola okulingilwa Siovaa otyiawa tyokuyokwa. 28 Mwahaipaei ongombe monthiki ike nonkhembe yayo, nii ongi notyiketa tyayo.+

29 “Ine mulingila Siovaa otyilikutila tyokupandula,+ muna okutyilinga umwe ngeetyi tyilingwa opo mutavelwe. 30 Tyina okuliwa monthiki yatyo. Kamupondola okutyilaleka.+ Ame, ame Siovaa.

31 “Muna okutavela ovitumino viange, amweendela-mo.+ Ame, ame Siovaa. 32 Mwahasilisei enyina liange likola.+ Ame ndyina okunoñgonokwa pokati kova Isilayeli okuti ndyikola.+ Ame, ame Siovaa ndyimusukukisa,+ 33 ame wokwemupola kotyilongo tyo Isitu ndyikale Huku yenyi.+ Ame, ame Siovaa.”

23 Siovaa atolela vali Mwisesi ati: 2 “Popila ova Isilayeli uti: ‘Ovipito+ vya Siovaa muna okukalavandya+ opo vilingwe, omaliongiyo omanene akola. Ovio ovipito viange:

3 “‘Mupondola okuundapa mononthiki epandu, mahi onthiki ya pandu-vali o Tyasapalo tyokupululukwa,+ onthiki yeliongiyo enene likola. Onthiki oyo kamupondola okulinga natyike. Muna okwilinga otyasapalo tya Siovaa apeho oku mwamakakala-kala.+

4 “‘Ovio ovipito vya Siovaa. Omaliongiyo omanene akola muna okukalavandya alingwe mononthiki mbatyo: 5 Monthiki 14 yohanyi yo tete,+ tyina tyiti kokangulohi* opasikwa+ ya Siovaa otyo maihimbika.

6 “‘Monthiki 15 yohanyi oyo, onthiki Yotyipito tya Siovaa+ tyonombolo Mbahapakelwe Onkhiso. Onwe muna okulia onombolo mbahaile onkhiso+ mononthiki epandu-vali. 7 Monthiki yo tete, muna okulinga eliongiyo enene likola.+ Onthiki oyo mwahalingei otyilinga natyike tyalema. 8 Mononthiki epandu-vali muna okulingila Siovaa otyiawa tyokuyokwa. Monthiki ya pandu-vali, lingei eliongiyo enene likola. Onthiki oyo mwahalingei otyilinga natyike tyalema.’”

9 Siovaa atolela Mwisesi ati: 10 “Popila ova Isilayeli uti: ‘Tyina pahe mwamanyingila motyilongo mandyimupe, amuteye ovikuna vienyi, twailei omunakwa+ otyipandi tyovilia vyo tete+ mwateya. 11 Ngwe metyeendaisila Siovaa, no komutwe no konyima, opo onwe mutavelwe. Omunakwa una okutyeendaisa monthiki ilandula kotyasapalo. 12 Monthiki otyipandi matyeendaiswa onwe muna okwava ondyona ikahi nawa, ina enima like kokwatyitwa, ailingilwa Siovaa otyiawa tyokuyokwa. 13 Otyiawa tyatyo tyovilia, tyina okutuuka omapati ekwana nenthinge ohinde yanyetuka yahonya nomulela, ilingilwe Siovaa otyiawa tyokuyokwa tyomuniko omuwa.* Otyiawa tyokunwa tyituuke onolitulu ononthatu nenthinge mbowalende. 14 Mwahaliei ombolo naike, nii ononkhange, nii ovilia ovipe atee onthiki oyo ihika-po, amutwala otyiawa tya Huku yenyi. Otyo otyitumino muna okulandula apeho apa mamukakala-kala, noonwe novanthu mavakatuka-tuka mwoonwe.

15 “‘Muna okuvalula ovityasapalo epandu-vali okuhimbikila monthiki ilandula kotyasapalo, onthiki mamutwala otyipandi tyotyiawa tyokwendaiswa.+ Ononthiki epandu-vali mbonosimanu ombo ambuho mbuvalulwe. 16 Atee monthiki ilandula ko tyasapalo tyosimanu ya pandu-vali, mamukala ononthiki 50,+ pahe amwetela Siovaa+ otyiawa otyikwavo tyovilia ovipe. 17 Etei onombolo onombali muna okupola momaumbo enyi, mbulinge otyiawa tyokwendaiswa. Mbulingwe nomapati ekwana nenthinge ohinde yanyetuka. Mbuna okulingwa nonkhiso,+ ambuyokwa; ovio ovilia viatetekela okuyela vipewa Siovaa.+ 18 Momanima atyo aeho tyina mweta onombolo ombo, mbuye nonondyona epandu-vali mbukahi nawa, nonthane ike, nonongi onombali ononthwei.+ Mbulingilwe Siovaa otyiawa tyokuyokwa, kumwe novilia viatyo, novikunwa, viotyawa tyokuyokwa, tyomuniko omuwa tyilingilwa Siovaa. 19 Muna okwaava otyinkhombo tyilinge otyiawa tyononkhali,+ nonondyona onombali ononthwei mbenima like kokwatyitwa, mbulingwe otyiawa tyombembwa.+ 20 Omunakwa maendaisa onondyona ombo onombali, nonombolo mbovilia viokwatetekela okuyela, vilingilwe Siovaa otyiawa tyokwendaiswa. Mbuna okukala otyipuka tyikola tyapakulilwa Siovaa tyilinga tyomunakwa.+ 21 Onthiki oyo muna okulinga eliongiyo enene+ likola. Mwahalingei otyilinga natyike tyalema. Otyo, otyitumino muna okulandula apeho apa mamukakala-kala, noonwe novanthu aveho vakatuka-tuka mwoonwe.

22 “‘Tyina uteya ovikuna mepia liove, wahamane okuteya aliho atee oku liakaoyela, wahamanauhule-mo evi viesala-salamo.+ Visila-mo omuhepi,*+ nonthunda-vilongo.+ Ame, ame Siovaa Huku yenyi.’”

23 Siovaa apopila vali Mwisesi ati: 24 “Tolela ova Isilayeli uti: ‘Onthiki yo tete yohanyi ya pandu-vali, muna okupululukwapo, onthiki yokuhinangela maiivaleswa nonkhwino,+ onthiki yeliongiyo enene likola. 25 Mwahalingei otyilinga natyike tyalema, lingilei Siovaa otyiawa tyokuyokwa.’”

26 Siovaa atolela vali Mwisesi ati: 27 “Mahi monthiki yatyo 10 yohanyi oyo ya pandu-vali, ilinge onthiki Yokukohwa Ononkhali.+ Muna okulinga eliongiyo enene likola; munthu na munthu elilinge onya* kombanda yononkhali mbenyi,+ amulingila Siovaa otyiawa tyokuyokwa. 28 Onthiki oyo mwahalingei otyilinga natyike, onthiki yokukohwa kononkhali, mukohwa ononkhali mbenyi,+ mulinge ovanthu va Siovaa Huku vasukuka. 29 Omunthu una* wahamelilingi onya* onthiki oyo, pokati ka vakwavo maipawa-po.+ 30 Pwoonwe amuho una wamalingi otyilinga tyimwe monthiki oyo, mandyimwipaa. 31 Mwahalingei otyilinga natyike. Otyo otyitumino muna okulandula akuho oku mwamaende nako, noonwe novanthu mavakatuka-tuka mwoonwe. 32 Otyo otyasapalo tyenyi mupululukwa-po; munthu na munthu una okulilinga onya*+ monthiki ya tyive yohanyi tyina tyati kokangulohi. Muna okulilinga ngootyo okuhimbikila kokangulohi atee kokangulohi konthiki onkhwavo.”

33 Siovaa apopila vali Mwisesi ati: 34 “Tolela ova Isilayeli uti: ‘Monthiki 15 yohanyi ya pandu-vali, lingilei Siovaa+ Otyipito Tyomakaka,* tyikala ononthiki epandu-vali. 35 Onthiki oyo makulingwa eliongiyo enene likola; mwahalingei otyilinga natyike tyalema. 36 Mononthiki epandu-vali ambuho muna okulingila Siovaa otyiawa tyokuyokwa. Onthiki ya tyinana amulingi eliongiyo enene likola,+ amwaavela Siovaa otyiawa tyokuyokwa. Olio eliongiyo limwe enene. Mwahalingei otyilinga natyike tyalema.

37 “‘Ovio ovipito+ vya Siovaa muna okupopia, omaliongiyo omanene akola+ muna okulinga, amuyokela Siovaa oviawa, oviawa viokuyokwa,+ noviawa viovilikutila viovilia,+ no viovikunwa,+ evi mwatiwa muna okuvilinga nthiki na nthiki. 38 Ovio oviawa mamulingi, viyawisa koviawa vilingwa motyasapalo tya Siovaa,+ oviawa viotyali,+ noviawa vilingwa nauna ufwisapo etyi apanga,+ noviawa vya una mwene welihinda,+ evi muna okwaavela Siovaa. 39 Monthiki 15 yohanyi ya pandu-vali, tyina mwamateye ovikuna motyilongo, muna okulinga otyipito tya Siovaa tyikala ononthiki epandu-vali.+ Onthiki yo tete oyokupulukwa amuhalingi natyike, nonthiki ya tyinana mupululukwa tyahalingi natyike.+ 40 Onthiki yo tete, nyangei ovinyango komiti ominene, amutokola omafo komindende, amutenge ovimpha komiti+ viayova nawa, no komiti vyo momilola, onwe mamuhambukilwa+ Siovaa Huku yenyi mononthiki epandu-vali.+ 41 Lingailei Siovaa otyipito otyo tyikala ononthiki epandu-vali like menima.+ Otyo otyitumino muna okulandula, noonwe novanthu mavakatuka-tuka mwoonwe, tyilingei-lingei mohanyi ya pandu-vali. 42 Muna okukala monohinge mononthiki epandu-vali.+ Ova Isilayeli aveho ovatyitwa tyilongo, vena okukala monohinge, 43 ovanthu aveho vakatuka-tuka mwoonwe opo veketyinoñgonoke okuti,+ omonohinge napakaile ova Isilayeli pokwevepola kotyilongo tyo Isitu.+ Ame, ame Siovaa Huku yenyi.’”

44 Pahe Mwisesi apopila ova Isilayeli ovipito ovio mavilingailwa Siovaa.

24 Siovaa atolela vali Mwisesi ati: 2 “Tuma ova Isilayeli vekweetele omulela womundyambi wahankhingaile upakwe movikandiyelo, opo vikale tyatema apeho.+ 3 Alau una okupakela Siovaa ovikandiyelo viatema mohinge yomaliongiyo. Vikalela kondye yotyinyanga tyili potyikasa tyoumbangi, avikala tyatema okuhimbikila kokangulohi atee komuhuka. Otyo otyitumino muna okulandula noonwe novanthu aveho mavakatuka-tuka mwoonwe. 4 Una okuviukisila nawa Siovaa ovikandiyelo vyo kokandiyelo koolu konomphalavinga+ apeho.

5 “Pola ohinde yanyetuka nawa olingi nayo onombolo 12 mbeliseta elola. Ombolo ike wiilinga nomapati ekwana ohinde nenthinge. 6 Una okumbwongiyila Siovaa+ ounthunthu uvali, kombanda yomesa yoolu, ombutenthaika epandu-epandu.+ 7 Kombanda yambo opake-ko olimbanu, otyo matyilingi ngatyina otyiawa tyonombolo+ ambuho, otyiawa tyokuyokwa tyilingilwa Siovaa. 8 Apeho movityasapalo, una okupakela Siovaa+ onombolo mbafwiikwa nawa. Oyo omphango nalinga nova Isilayeli itwalako apeho. 9 Onombolo ombo mbulinga mba Alau novana vae,+ ngwe vena okumbulila pomphangu imwe ikola,+ mokonda mbapolwa kotyiawa tyikola vapewa tyapolwa poviawa vikola vilingilwa Siovaa viokuyokwa, otyo otyitumino tyina okulandulwa apeho.”

10 Kwali omona umwe omukwendye womukai omu Isilayeli, he omu Isitu,+ eya pokati kova Isilayeli, avahimbika okulwila monthanda nomulume umwe omu Isilayeli. 11 Omona oo womukai omu Isilayeli, ahimbika okupopia omapita Enyina,* otyo elihingana.*+ Avemutwala ku Mwisesi,+ ngwe naina ina o Selomite omona wa Ndimbili womuhoko wa Ndaa. 12 Omona oo akwatwa, avakevela Siovaa eveholololele etyi omona oo ena okulingwa.+

13 Pahe Siovaa atolela Mwisesi ati: 14 “Etei kondye yonthanda omona oo wokwapopia omapita enyina liange, aveho vemwiva etyi apopia vena okupaka komutwe wae omavoko avo, ova Isilayeli aveho avemutyopo nomamanya.+ 15 Pahe ove opopila ova Isilayeli okuti: ‘Omunthu upopia omapita Huku yae malingwa etyi tyata monkhali yae. 16 Ngootyo una uundula enyina lya Siovaa, una okwipawa kapondola okuhupa.+ Ova Isilayeli aveho vena okumutyopa-tyopa nomamanya. Tyilinge onthunda-vilongo tyilinge omutyitwa-tyilongo, uundula Enyina lya Huku una okwipawa.

17 “‘Omunthu upola mukwavo omwenyo,* una okwipawa, kapondola okuhupa.+ 18 Ine umwe uveta otyinyama tyokutekulwa atyinkhi, una okupingiya-po otyikwavo, una okutyifeta, omwenyo nomwenyo.* 19 Ine omunthu umwe uvanga mukwavo, etyi alinga nae una okutyilingwa.+ 20 Uteya mukwavo enkhipa nae una okuteywa enkhipa, upola mukwavo eiho nae una okupolwa eiho, okuti eyo nae eyo, otyipute umwe amavange mukwavo nae una okukala natyo.+ 21 Omunthu wamavange otyinyama atyinkhi, una okutyipingiya-po,+ mahi una wamavange mukwavo ankhi, nae una okwipawa.+

22 “‘Amuho muna vala okulandula otyitumino tyike, tyilinge onthunda-vilongo tyilinge omutyitwa-tyilongo+ mova Isilayeli, ame, ame Siovaa Huku yenyi.’”

23 Mwisesi etyipopila ova Isilayeli, ngwe avapolo una wokwapopia omapita enyina lya Huku avemutwala kondye yonthanda, avemutyopa-tyopa nomamanya.+ Mokwalinga ngootyo ova Isilayeli vetavela etyi Siovaa atumine Mwisesi.

25 Siovaa apopila vali Mwisesi etyi eli Komphunda Sinai, ati: 2 “Tolela ova Isilayeli, uti: ‘Tyina mwamehiki motyilongo mandyimwaavela,+ eheke lina okukala tyahalimwa motyasapalo tya Siovaa.+ 3 Una okulima vala momapia ove omanima epandu, nokulombolola omiti viove vionouva omanima epandu, otyo uteya ovikuna viove.+ 4 Mahi enima lya pandu-vali, enima lieheke okupululukwa-po, otyasapalo tya Siovaa. Ove kupondola okukuna mepia liove, nii kupondola okulombolola omiti viove vionouva. 5 Kupondola okuteya omandyilimenena ovikuna viatokailile mepia liove menima liahulilila okulimwa, nii kupondola okunyanga onouva mbomiti viove viahalombololelwe. Kuna okukala enima eheke lina okupululukwa menima liahulilila okulimwa. 6 Mahi mupondola okulia ovikuna viayela momapia enyi vielimenena motyasapalo, noonwe novapika venyi ovalume novakai, novaundapi venyi mwakonga, nononthunda-vilongo mukala nambo, mupondola okulia. 7 Ovipako viomeumbo, novinyama viomofika vyo motyilongo tyenyi, navio vipondola okulia ovikuna ovio. Mupondola okulia ovikuna aviho viayela menima olio.

8 “‘Muna okuvalula omanima otyasapalo atee avasa pepandu-vali, opalaika okuvalula ngootyo, atyivasi pepandu-vali. Omanima otyasapalo aatuuka omanima 49. 9 Mohanyi ya pandu-vali monthiki 10 amuhiki onkhwino mayiivala kokule-kule. Monthiki Yokukoha Ononkhali,+ muna okuhika onkhwino ayiivala motyilongo atyiho. 10 Enima 50 lina okukala enima likola, amupopila ovanthu aveho motyilongo tyenyi, okuti ombu ononthiki mbeyovo.+ Olio Enima Lieyovo* lienyi. Munthu na munthu una okukondoka konohika mbae, no kombunga yae.+ 11 Enima 50 malikala enima Lieyovo lienyi. Onwe kamupondola okukuna, nii kamupondola okuteya omandyilimenena ovikuna viatokailile pohi, nii kamupondola okunyanga onouva komiti viahalombololelwe.+ 12 Olio enima Lieyovo. Lina okukala enima lienyi likola. Muna okulia vala omandyilimenena.+

13 “‘Menima Lieyovo, munthu na munthu una okukondoka kotyae.+ 14 Ine pena etyi mulilandesa na mukwenyi, mwehelivakei.+ 15 Etyi walanda ku mukwenyi, tyina okutalelwa komanima akala-po okutuka menima Lieyovo. Etyi amekulandesa tyina okutalelwa komanima okulima nkhele akamba-ko.+ 16 Ine nkhele kwakamba omanima omanyingi, una okwiita vali unene. Ine omanima akamba-ko kaehi, opo una okwiita vala katutu. Mokonda etyi ekahi nokukulandesa, una okutalela kovikuna moteya-teya momanima oo. 17 Mwehelivakei na vakwenyi.+ Muna okutila Huku yenyi.+ Ame, ame Siovaa Huku yenyi.+ 18 Ine mutavela ovitumino viange, amweendela movitumino viange vionomphela, kamamukatila owoma otyipuka natyike motyilongo omu mamukakala.+ 19 Ovinyango vyo motyilongo omo,+ mavikaima avikapia, amukalia ngeetyi mwahanda, amukakala-mo tyehena otyiho.+

20 “‘Mahi ine mulipula okuti: “Tyina menima lya pandu-vali twahamalimi nii atwahamateye, opo haa matuli-tyi?”+ 21 Noñgonokei okuti mandyimuyambe menima lya pandu. Omapia maayele ovilia vituuka omanima etatu.+ 22 Mamulimi vala menima lya tyinana, otyo mulia onkhundyu, atee menima lya tyive. Mamuli onkhundyu, atee evi mwalima viyela.

23 “‘Ohika kaipondola okulandeswa, aikala apeho+ yo ou weilanda mokonda eheke oliange.+ Kwaame+ onwe munonthunda-vilongo, muvaenda. 24 Motyilongo tyenyi atyiho, tyina mwalandesa ohika, muna okwiiyovola-ko.

25 “‘Ine umwe mulilandula nae uhepa alandesa ohika yae, umwe pombunga yae, omuyovoli, una okuyovola-ko ohika oyo mukwavo alandesa.+ 26 Ine omunthu umwe utupu ou memuyovola, mahi ngwe wakala-le omuhona, pahe una-le etyi eiyovola-ko natyo, 27 una okutala omanima eñgapi alamba-po, okutuka apa eilandesa, atale ine potyifwe yalandele pahupa. Etyi tyahupa-po, etyikondola kwo ou weilandele. Ngwe akondoka pofika yae.+

28 “‘Mahi, ine utupu etyi eiyovola natyo, ohika alandesa nkhele ikale vala ya una weilanda, akevela menima Lieyovo.+ Tyina enima Lieyovo liamehiki-po, eikondolelwa, akondoka pohika yae.+

29 “‘Ine omunthu umwe ulandesa eumbo liae mepunda-umbo liahondywa notyimato, tyina nkhele pehenelambe enima,+ upondola okuliyovola-ko. Uliyovola-ko vala tyina pehenelambe enima. 30 Mahi ine eumbo olio lili mepunda-umbo liahondywa notyimato keliyovola-ko, apalambe enima, opo eumbo olio malikala umwe vala lyo ou welilanda, oliavo nae novanthu mavakatuka-tuka mwe. Kaliyovoka vali nii menima Lieyovo. 31 Mahi eumbo lili kondye yepunda-umbo, liahahondyelwe notyimato, hekulu uliyovola-ko apa ahandela, ngeetyi tyilingwa epia. Apa vala amamonena etyi eliyovola natyo, eliyovola-ko. Ine enima Lieyovo liehika-po, una okulikondolelwa.

32 “‘Mahi omaumbo a vana vatuka mu Levii eli momapunda-umbo avo,+ etei vala apa vahandela okweeyovola-ko. 33 Mahi ine umwe watuka mu Levii, walandesile eumbo liae lili mepunda-umbo liavo, eheliyovola-ko, ulikondolelwa menima Lieyovo,+ mokonda omaumbo eli momapunda-umbo o vokwatuka mu Levii motyilongo tyova Isilayeli,+ o avo mwene. 34 Onohika mbomalihilo+ mbeliseta nomapunda-umbo avo, kambulandeswa, mbukala-kala vala mbavo.

35 “‘Ine ou mukala nae uhepa, ahamono umwe neetyi vala mali, ove una okumukwatesako,+ ngeetyi ñgeno walinga onthunda-vilongo, nomweenda,+ opo ahankhie. 36 Wahalevalese, otyitisa, nii wahayumbilwe-ko.*+ Tila Huku yove,+ ohupisa mukwenyi. 37 Wahalevalese mukwenyi onombongo, otyitisa,+ nii wehemwaavele okulia oti ndyifetwa. 38 Ame, ame Siovaa Huku yenyi, wokwemupola kotyilongo tyo Isitu,+ andyimwaavela otyilongo tyo Kanaa, mutyimone okuti ndyi-Huku yenyi.+

39 “‘Ine mukwenyi mukala nae uhepa, elilandesa kwoove,+ wehemutyitule omupika.+ 40 Etyi tyilingwa omuundapi wakongwa nae otyo alingwa,+ ngatyina omweenda. Una okukuundapela atee menima Lieyovo. 41 Pahe aende, nae novana vae.* Akondoka kovavo. Una okukondoka konohika mbovavo.+ 42 Tyeetyi ngwe ovapika vange napola kotyilongo tyo Isitu.+ Kavapondola okulilandesa, ngeetyi tyilandeswa omupika. 43 Wehemulinge onya.+ Tila Huku yove.+ 44 Omupika wove, tyilinge omulume, tyilinge omukai, utunda vala movanthu mukala navo vovilongo ovikwavo. Omo, omo vala muna okulanda omupika, tyilinge omulume tyilinge omukai. 45 Tupu mupondola okulanda ovapika pu ava vatyitwa novaenda mukala navo.+ Mupola puvo, no ponombunga mba ava vatyitilwa motyilongo tyenyi, avakala venyi. 46 Mupondola okuveavela ovana venyi vakale epingo liavo, avevepiñgana-po avakala-kala umwe vavo. Mupondola okuvelinga ovaundapi venyi, mahi mokonda navo ova Isilayeli ngoonwe, mwehevelingei onya.+

47 “‘Mahi ine mukala nomunthu umwe onthunda-vilongo, hamwe o umwe ongendi, ukala omuhona, ngwe umwe pwoonwe omu Isilayeli, ahepe, elilandesa konthunda-vilongo, hamwe o kongendi ine okomunthu umwe wavo yonthunda-vilongo, 48 namphila elilandesa, mahi upondola okuyovolwa-ko. Umwe pu ava elilandula navo, upondola okumuyovola-ko.+ 49 Okuti hatyo, umwe po vohe ine hamwe una velilandula nae mo vohe, upondola okumuyovola. Tupu ine pena umwe velii nae mombunga yae tipi-tipi,* upondola okumuyovola.

“‘Nae pahe ankho una-tyo, upondola okufeta mwene eliyovola.+ 50 Una okuvalula omanima okuhimbikila kenima elilandesa kwe, atee menima Lieyovo.+ Etyi afetelwa, tyina okulifwa nomanima akala-po.+ Etyi mafetwa mononthiki aundapa, tyina okulifwa pweetyi omuundapi wokwakongwa afetwa.+ 51 Ine nkhele kwakamba omanima omanyingi, etyi ena okufeta opo eliyovole tyina okutalelwa komanima akamba-ko. 52 Ine kenima Lieyovo kwakamba vala omanima ehehi, una okutala aa akamba-ko, etyi mafete eliyovole atyilifu pomanima oo. 53 Nima na nima una okuundapela ou wemulanda, ngatyina omuundapi wakongwa. Wahayeke ou wemulanda emulinge onya.+ 54 Mahi ine ketyivilile okuliyovola ngeetyi tyapopiwa, opo mayovoka vala menima Lieyovo,+ nae novana vae.

55 “‘Mokonda ova Isilayeli ovapika vange. Mwene ovapika vange napola kotyilongo tyo Isitu.+ Ame, ame Siovaa Huku yenyi.

26 “‘Mwehelilingilei ovika-huku viahasilivila,+ nii mwehelinthililei ovilolo,+ tupu mweheliovolelei otyipandyi tyikola, nii mwehelilingilei emanya+ amuliviukisa nawa opo mulifende,+ amulipake motyilongo tyenyi. Ame, ame Siovaa Huku yenyi. 2 Onwe muna okulandula otyitumino tyovityasapalo viange, amulingi onthilo* omphangu yange ikola. Ame, ame Siovaa.

3 “‘Ine kamuyeke-po okweendela mweetyi ndyipopia, amutavela ovitumino viange, amuvifwisapo,+ 4 mandyimulokesila ombila mononthiki mbatyo,+ eheke malikayela ovikuna,+ omiti viomomapia viovinyango avikaima. 5 Mamukatyopa atee pomuvo wokunyanga onouva, amukanyanga onouva atee pomuvo wokukuna; mamukalia etyi mwahanda amukuta, amukakala nombembwa motyilongo.+ 6 Mandyikemukalesa nombembwa motyilongo tyenyi.+ Onwe mamukalala olumphoki tyehena owoma.+ Mandyikemuyovola kovinyama viofika, omutunga wovilwa kaukaliata motyilongo tyenyi. 7 Onwe mamukataata onondyale mbenyi, amukembutokesa nomutunga. 8 Vetano pwoonwe maveketyivila okutaata onondyale mbenyi 100, vena 100 pwoonwe, aveketyivila okutaata onondyale mbenyi vena 10.000. Onwe mamuketyivila okutokesa onondyale mbenyi nomutunga.+

9 “‘Ame mandyimulingi okankhenda, andyimukalesa ovanyingi, amuliyawisa.+ Ame mandyifwisapo omphango nalinga noonwe.+ 10 Mamukakala nonkhundyu ovikuna vienima liokwalamba-le, amukesukisa okuviyumbahi, opo mumone apa mupaka ovipe. 11 Mandyikapaka ekaka liange liefendelo pokati kenyi,+ ame anehekemwanya.* 12 Mandyikakala noonwe, andyikalinga Huku yenyi,+ onwe amukakala ovanthu vange.+ 13 Ame, ame Siovaa Huku yenyi, nemupola kotyilongo tyo Isitu opo muhakale vali ovapika vavo. Nemupola okanga pekohi, andyimukwatesako muyelule omutwe tyina mweenda.

14 “‘Mahi ine mundyanya amuhetavela ovitumino ovio aviho,+ 15 tupu ine mwaanya ovitumino viange,+ amuyale ovitumino viange vionomphela, mokwehetavela ovitumino nemwaavela, amuyeke-po omphango twalinga noonwe,+ 16 etyi mandyimulingi otyetyi: mandyimumonesa ononkhumbi, andyimweetela onombela, omukolo omunene, nelema, amwahamono-po nawa, otyo atyimupolo ononkhono. Mamukakuna ombuto yenyi, aikapeseka mokonda onondyale mbenyi mambukeilia-po.+ 17 Ame mandyimupilukila-po. Onwe mamulwiswa nonondyale mbenyi,+ amutili-ko. Vana vemuyele, mavemumonesa emone.+ Onwe mamukaya-nkholo, apehena nawike uli nokumutaata.+

18 “‘Mahi ine no ngootyo kamunthavela, mandyikemumonesa ononkhumbi okupalaika atee tyituuka epandu-vali, mononkhali mbenyi mulinga. 19 Omakamo enyi muna-o mandyimupolo-o, eulu lienyi mandyilitenesa ngotyivela,+ ombila aihaloko, eheke lienyi andyilitenesa ngotyinthasu, alihayele ovikuna. 20 Onwe mamukalinga ononkhono-pwila, mokonda eheke kamalikayela ovikuna,+ omiti viovinyango motyilongo tyenyi kamavikaima.

21 “‘Mahi ine mutwalako okunthesa onkhango, amuhenthavela, mandyimuvange vali, andyimupalaika okumuvanga atee tyituuka epandu-vali, kombanda yononkhali mbenyi. 22 Mandyimutumu ovinyama viohika,+ avili ovana venyi,+ amusala tyehena ovana, avili ovinyama mutekula aviho, onwe avimuli-po amutepuluka, omatapalo enyi aesala omaluhandya.+

23 “‘Mahi ine ngandyilingi ñgoo ovipuka ovio, kamutavela etyi nemuviyula,+ amutwalako ñgo okundwisa, 24 opo naame mandyimupilukila-mo, ame mwene mandyimuvange, andyimupaleka okumuvanga atee tyituuka epandu-vali, kombanda yononkhali mbenyi. 25 Mandyimutumu onondyale mbenyi, ambumulwisa nomutunga, kombanda yeetyi mwayeka-po omphango twalinga noonwe.+ Ine mukaholama momapunda-umbo enyi, andyimutumu onongembia.+ Onwe mamukatokela pomavoko onondyale mbenyi.+ 26 Tyina namahanyauna apa* mupola ombolo yenyi,+ ovakai 10 mavekemuyokela ombolo mofolono ike vala, avekeitepaula, onwe avemwavela oumbembu wehehi.+ Mamukalia, amuhekekuta.+

27 “‘Ine nongootyo kamunthavela, amutwalako okundyanya, 28 onyengo yange maivilipo, ame mwene mandyimumonesa ononkhumbi,+ andyimupalaika okumumonesa ononkhumbi atee tyivasa pepandu-vali, kombanda yononkhali mbenyi. 29 Onwe mamukalia ovana venyi mwene, tyilinge ovana venyi ovakwendye tyilinge ovana venyi ovakainthu.+ 30 Mandyikahanyauna-po onomphangu mbenyi mbukola mbokwaya peulu,+ andyikateya-teya-po omitala vienyi muyokela oisesu, amukankhia, ovivimbi vienyi andyikeviyumba kovivimbi viovilolo vienyi viasila.+ Mandyikemutoya, andyikemuyeka-po.+ 31 Omapunda-umbo enyi ndyikeepakulila omutunga,+ onomphangu mbenyi mbukola mandyikembusa tyehena ovanthu. Himekeiva omuniko omuwa* wovilikutila vienyi. 32 Mwene ame mandyikasa otyilongo tyehena ovanthu,+ onondyale mbenyi mbukala motyilongo omu, okutyimona mambukatumphuluka.+ 33 Onwe mandyikemutyandyanesa movanthu vovilongo ovikwavo,+ andyikapolela omutunga motyilalo monyima yenyi.+ Otyilongo tyenyi matyikesala tyehena ovanthu,+ omapunda-umbo enyi ahanyauka-po.

34 “‘Pononthiki opo, eheke malikafetela-po ovityasapalo vialio liahapululukilwe ononthiki ambuho malikala tyehena ovanthu, tyina onwe mamukakala motyilongo tyonondyale mbenyi. Eheke malikapululukwa-po, alifete ovityasapalo vialio.+ 35 Malipululukwa ononthiki ambuho malikala tyehena ovanthu, mokonda kaliapululukilwe ononthiki ambuho mwakala-mo.

36 “‘Vana mavakahupa,+ ame mandyikevelinga etyi matyivehulilika tyina veli kotyilongo tyonondyale mbavo. Efo vala malisakata liatyindwa nomphepo malikeveisa-nkholo, avakahateka ngatyina vekwaiwe nomutunga, avakatokaila pohi tyehena nawike uvekwai.+ 37 Mavekelifondauka mu vakwavo ngovanthu vaya-nkholo omutunga, ngwe petupu ou uli nokuvetaata. Onwe kamamuketyivila okulwisa onondyale mbenyi, amumbuvili.+ 38 Onwe pokati kovanthu vovilongo ovikwavo mamukanyima-po,+ otyilongo tyonondyale mbenyi matyikemulia. 39 Vana mavakahupa-po, mavakayekelwa motyilongo tyonondyale mbavo,+ avavolela-mo kombanda yovivi valinga. Mavakavola kombanda yovivi ovohe valinga.+ 40 Mavekelipopia ovipuka vapengesa, nevi ovohe vapengesa+ mokwehetavelele. Mwene mavekelipopia okuti twapengesa etyi twehekutavelele, atukuyale.+ 41 Mokonda naame etyi natala, andyiovola okuveyala,+ andyivetwala kotyilongo tyonondyale mbavo.+

“‘Omutima wavo wokwehetavela* hamwe ulikondola koututu.+ Okuvelinga ngootyo matyikala ngatyina vafeta ononkhali mbavo. 42 Ame mandyikahinangela omphango nalinga na Sakoo,+ nomphango nalinga na Isake,+ mandyikahinangela omphango nalinga na Ambalayau,+ andyikahinangela otyilongo etyi. 43 Etyi otyilongo vetyisapo, tyafeta ovityasapalo viatyo,+ tyakala tyehena ovanthu etyi ngwe vapita. Ngwe vafeta onkhali yavo kombanda yeetyi vaanya ovitumino viange vionomphela, avatoyo* ovitumino viange.+ 44 Mahi namphila mandyivelingi ngootyo, tyina veli kotyilongo tyonondyale mbavo, ame hikeveyeka-po,+ nii hikevetoya tyokuvenyima-ko, mokonda okulinga ngootyo mandyinyono omphango nalinga navo.+ Ame, ame Siovaa Huku yavo. 45 Opo ndyivekwateseko, mandyihinangela omphango nalingile novakwaukulu vavo+ napolele kotyilongo tyo Isitu otyo ovanthu vovilongo vatala,+ opo ndyikale Huku yavo. Ame, ame Siovaa.’”

46 Ovio ovitumino vionomphela, ovitumino Siovaa aavelele ova Isilayeli komphunda yo Sinai etyi atuma Mwisesi.+

27 Siovaa atolela vali Mwisesi ati: 2 “Tolela ova Isilayeli uti: ‘Ine omunthu umwe upanga+ okwavela Siovaa otyifwe tyituuka momunthu* opo alinge etyi apopile, una okulinga ñgaa: 3 Etyi omulume womanima 20 atee po womanima 60 ena okufetelwa, onosikulu* 50 mbopalata mbata momulemo wosikulu ili momphangu ikola.* 4 Mahi ine omukai, una okufetelwa onosikulu 30. 5 Ine omunthu umwe una omanima 5 atee po womanima 20, tyina omulume, una okwefetelwa onosikulu 20, omukai afetelwa onosikulu 10. 6 Mahi olukembe luna ohanyi ike atee komona womanima etano, tyina omukwendye una okufetelwa onosikulu ononthano mbopalata, tyina omukainthu una okufetelwa onosikulu ononthatu mbopalata.

7 “‘Ine omunthu una omanima 60 ine hamwe alamba-po, tyina omulume, una okufetelwa onosikulu 15, tyina omukai, afetelwa onosikulu 10. 8 Mahi ine omunthu wapanga okufeta wahepa unene,+ utupu etyi tyituuka afete, una okutwala omunthu mafetela komunakwa, omunakwa emunakela etyi ena okufeta. Omunakwa memunakela etyi ena okufeta okutalela kwetyi omunthu wokwalinga omphango ena-tyo.+

9 “‘Ine omunthu wapanga okufeta otyipako, otyo maavela Siovaa, tyapewa Siovaa tyina okukala otyipuka tyikola. 10 Kapondola okupingiya-po otyikwavo nii okutyikumana notyinyama tyikahi nawa, nii neetyi tyikahi omapita. Mahi ine utyikumana notyinyama otyikwavo, otyinyama tyatyo mwene neetyi tyokwetyikumana, vina okulinga evi vikola. 11 Ine otyinyama tyasila,+ tyahapondola okupewa Siovaa, omunthu wokwetyiava, una okutyitwala komunakwa. 12 Omunakwa metyitale etyi tyikahi, apopi otyifwe tyituuka. Etyi omunakwa amapopi otyo yatyo. 13 Mahi ine omunthu oo uhanda okutyiyovola-ko, konombongo aitwa una okuyawisa-ko, komapati 10 opalata uyawisa-ko omapati evali.+

14 “‘Ine omunthu umwe ukoha eumbo liae, eliavela Siovaa lilinge otyipuka tyikola, omunakwa melitale etyi likahi, apopi otyifwe lituuka. Otyifwe omunakwa amapopi otyo eumbo olio lituuka.+ 15 Mahi ine omunthu wokwakoha eumbo liae eliave, uhanda okuliyovola-ko, una okufeta etyi aitwa, ayawisa-ko, komapati 10 opalata uyawisa-ko omapati evali, eumbo alikala liae.

16 “‘Ine omunthu umwe utetela Siovaa epia liae likale otyipuka tyikola, otyifwe lituuka okufeta matyitalelwa kombuto ituuka okukunwa mepia omo. Elila like nomapati 30* ombuto yosevata malituuka onosikulu 50 mbopalata. 17 Ine waava epia liae menima Lieyovo,+ otyifwe tyapopilwe lifeta, katyipiluluka. 18 Ine etyi eliava enima Lieyovo lialamba-le, omunakwa mapopi otyifwe lifeta, okutalela komanima nkhele akamba kenima ekwavo Lieyovo. Kotyifwe mafete una okutepulwa, ahafete atyiho.+ 19 Mahi ine una waava epia, alikala otyipuka tyikola uhanda okuliyovola-ko, una okufeta otyifwe tyaitwa ayawisa-ko, komapati 10 opalata uyawisa-ko omapati evali, epia alikala liae. 20 Mahi ine ketyivilile okuliyovola-ko, epia alilandeswa komunthu omukwavo, kaliyovaulwa-ko vali. 21 Tyina epia liamayovoka menima Lieyovo, malilingi lya Siovaa, alilingi otyipuka tyikola, alilingi epia liapakulwa kwe. Epia olio, lilinga liovanakwa.+

22 “‘Ine omunthu umwe waavela Siovaa epia alanda, epia ahapiñganene,+ 23 omunakwa memunakela otyifwe matyifetwa okutalela komanima akamba kenima Lieyovo, monthiki yatyo oyo ngamo afeta etyi aitwa.+ Tyafetwa otyipuka tyikola tya Siovaa. 24 Menima Lieyovo, epia malikondoka ku una lialandelwe, likondoka ku hekulu yalio.+

25 “‘Otyifwe tyatyo atyiho tyina okutalelwa momulemo wosikulu ili momphangu ikola. Osikulu ina okutuuka onosela* 20.

26 “‘Mahi nawike vali upondola okwavela Huku otyinyama tyatetekelwa okutyitwa, mokonda otyinyama tyitetekela okutyitwa otya Siovaa-e.+ Tyilinge ongombe tyilinge otyingi, aviho ovia Siovaa.+ 27 Ine otyinyama otyo o tyimwe povinyama viokwasila, etyiyovola afete otyifwe tyaitwa, una okufeta otyifwe tyituuka motyinyama otyo ayawisa-ko, komapati 10 opalata, uyawisa-ko omapati evali.+ Ine otyinyama otyo katyiyovolwa, opo tyilandesiwa motyifwe tyatyo tyaitwa.

28 “‘Mahi otyipuka omunthu amapakulila* Siovaa, otyipuka apola povipuka viae, katyipondola okulandesiwa nii katyipondola okuyovolwa, tyilinge omunthu tyilinge otyinyama, tyilinge epia. Atyiho tyapakulilwa Siovaa tyikola.+ 29 Tyihe-otyo vala, omunthu wapakulilwa kehanyauno kapondola okuyovolwa.+ Omunthu oo una okwipawa, kapondola okuhupa.+

30 “‘Povikuna aviho vili motyilongo, tyilinge evi viomepia, tyilinge ovinyango, polela-po Siovaa, pweevi vina 10,+ mupolela-po tyike. Tyilinge otyipuka tyikola tya Siovaa. 31 Ine omunthu umwe uhanda okuyovola tyimwe aava apola povipuka viae 10, una okutyifeta ayawisa-ko, komapati 10 opalata uyawisa-ko omapati evali. 32 Otyipako tya 10 tyapolwa ponongombe no ponongi povipako viakwata mombwelo yomphangoti yomunthita, tya 10 tyilinge otyinyama tyikola tya Siovaa. 33 Kapondola okutala ine otyinyama tyikahi nawa ine katyikahi nawa, nii kapondola okutyikumana. Mahi ine utyikumana, tyilinge otyinyama tyatyo mwene, tyilinge tyokwetyikumana, aviho vilinge evi vikola.+ Otyinyama katyipondola okuyovolwa.’”

34 Ovio, ovio ovitumino Siovaa apele Mwisesi komphunda Sinai+ evipopile ova Isilayeli.