EPALUKUNUNO

1 Mwisesi apopila ova Isilayeli aveho, etyi veli mofika yo Solondau, mehoko, momaluhandya okwelihula nofika yo Sufe, ofika yati nthele imwe kuna o Palaa, oku o Tofeli, oku o Lambau, oku o Haselote, oku o Ndisaambe. 2 Okutunda ko Holembe atee ko Kande-Mbalaneya,+ okwata ondyila yo komphunda yo Seili, paendwa ononthiki 11. 3 Menima 40,+ mohanyi 11, monthiki yo tete yohanyi, Mwisesi apopila ova Isilayeli* atyiho Siovaa atuma. 4 Apa evepopila-tyo, opo walwisa-le Siyoo atili-ko,+ Siyoo ohamba yova Amoleu wakalele mo Hesimboo, nohamba yo Mbasaa, Onge+ ukala ko Asitalote mo Endelei.+ 5 Mofika yondongi yo Solondau, motyilongo tyo Moambe, omo Mwisesi ahangununina Ovitumino evi,+ ati:

6 “Etyi tuli ko Holembe, Siovaa Huku wetupopilile ati: ‘Onwe mwakala-le ehimbwe mofika ei yonomphunda.+ 7 Pahe manekei, mwende no kofika yonomphunda, ofika yova Amoleu,+ no monofika mbo popepi navo, o Alambaa,+ nofika yonomphunda, no Sefelaa, no Nengembe, amwii no kongengeso yelunga,+ otyilongo tyo Kanaa, noko Limbanu,*+ no kondongi onene, ondongi Eufalate.+ 8 Tala, otyilongo etyi netyipakula kwoonwe. Nyingilei-mo tyilinge tyenyi, otyilongo Siovaa atile metyaavela ovakwaukulu venyi, ovo Ambalayau, na Isake,+ na Sakoo,+ novana* vavo.+

9 “O pononthiki opo ame nemupopilile okuti: ‘Ame hipondola okumutwala andyike.+ 10 Siovaa Huku yenyi, wemukwatesako mweliyawisa, pahe hono muvanyingi ngononthungululu mbo meulu.+ 11 Siovaa Huku yovakwaukulu venyi, emukwateseko, mukale vali ovanyingi-nyingi*+ tyipona pahetyino, emuyambe, ngeetyi emutolelele.+ 12 Oñgeni ame mandyitutumba andyike, onwe mupwilisa ñgaa, amuti kokuñgoñga?+ 13 Ovolei ovalume vamwe pwoonwe ovanongo, valunguka, vei nawa ovipuka, vepolei momihoko vienyi, ndyivelinge ononkhalamutwe mbenyi.’+ 14 Onwe amunkhumbulula okuti: ‘Etyi wapopia tyaviuka.’ 15 Pahe ame andyipolo ovalume momihoko vienyi, ononkhalamutwe mbatyo, ovanongo, vei nawa ovipuka, andyivepe otyilinga tyokumuhongolela. Atyiti ava ononkhalamutwe mbovityita ekwii, vamwe o votyita, ovakwavo o vomakwii etano, ava ovakwavo o vekwii, tupu avalingi ngatyina ovo ovatumini momihoko vienyi.+

16 “O pononthiki opo tupu nalongesile vokukoya onomphela mbenyi andyiveti: ‘Tyina mwameivi okuti vakwenyi vena onondaka, muna okukoya nawa omphela yavo+ mokonda velikwai, tupu ngatyo mulinga momphela yonthunda-vilongo.+ 17 Tyina mwamati pokuteta omphela mwahalingei okapungulula.+ Tyilinge omunene, tyilinge omututu, muna vala okuvetehelela otyipuka tyike.+ Mwahatilei owoma ovanthu,+ mokonda, omphela o ya Huku.+ Omphela yamemupono, yeetei kuno, ndyiitehelele.’+ 18 Pononthiki mbatyo opo, ame nemulongesile ovipuka aviho muna okulinga.

19 “Pahe atutundu ko Holembe, atutauluka oluhandya luna olunene,+ lutilisa owoma, oluhandya noonwe mwene mwamona etyi twakwata mofika yonomphunda, ofika yova Amoleu,+ ngeetyi Siovaa Huku yetu etutumine, atee twehika mo Kande-Mbalaneya.+ 20 Ame andyimutolela okuti: ‘Mwehika mofika yonomphunda, ofika yova Amoleu, ei Siovaa Huku yetu etwaavela. 21 Tala, Siovaa Huku yenyi, wemwaavela otyilongo. Endei-mo, tyilinge tyenyi ngeetyi Siovaa Huku yovakwaukulu venyi emupopila.+ Mwahatilei owoma, nii mwahalingei otyiho.’

22 “Mahi, onwe amuho amuya kwaame, amuti: ‘Tutumei ovalume vakatale komutwe, vakatale otyilongo, aveya okutupopila ondyila yaviuka matukwata, avatale omapunda-umbo matukavasa.’+ 23 Okutyitala ngoti tyaviuka, andyikoyo pwoonwe ovalume 12, momihoko aviho, amutundu wike-wike.+ 24 Ovalume ovo, avakatuka avaende, avalondeka no kofika yonomphunda,+ avaende avekehika melola lyo Esikole, avatale oñgeni mukahi. 25 Avatyindi-ko ovinyango vimwe viotyilongo, avevieeta. Avetweetela ondaka, avati: ‘Otyilongo Siovaa Huku yetu metwaavela otyiwa.’+ 26 Mahi onwe amwehetavela okwenda-ko, amwaanye otyitumino tya Siovaa Huku yenyi.+ 27 Mulondovolela momakaka enyi, otyo muti: ‘Siovaa utuyele, otyo etupolela kotyilongo tyo Isitu, weya okutupakula pomavoko ova Amoleu na vetwiipae. 28 Pahe oku tuhungi kukahi ñgeni? Ava tulilandula navo vetusoyesa,*+ vati: “Ovanthu vana ovanene vali kwoonthwe tupu ovalaale vali, omapunda-umbo avo omanene, ovimato viatyo viapamekwa unene.*+ Tupu twamona-ko ovana va Anake.”’+

29 “Ame andyimupopila okuti: ‘Mwahalingei otyiho nii mwehevetilei owoma.+ 30 Siovaa Huku yenyi, memukalela komutwe, emulwila-ko+ ngeetyi alingile ko Isitu, etyi emwaamenene otyo onwe mutala.+ 31 Etyi mwati mehoko, onwe mwetyimona oñgeni Siovaa Huku yenyi emuveleka-po, ngomulume uveleka omona wae, wali omuveleki wenyi ponofika ambuho mwaenda-enda atee mwehika pano.’ 32 Mahi soka, onwe kamwayumbile onthumbi mu Siovaa Huku yenyi,+ 33 Huku umukalela komutwe mondyila yenyi, emwoovolele apa mamwongo onthanda. Kounthiki uya kwoonwe motupia, komutenya eya kwoonwe mekaka, opo emulekese ondyila muna okukwata.+

34 “Pomuvo opo, aviho mupopia Siovaa uviiva. Otyo atyimunumanesa unene, aane,+ ati: 35 ‘Nawike povalume ava vehetavela, makamona otyilongo otyiwa napopilile ovoho,+ 36 o Kalembe vala omona wa Sefunee meketyimona. Kalembe meketyimona, mandyikemupa ofika motyilongo aile, nae novana vae, mokonda wetavela Siovaa nomutima auho.*+ 37 (Siovaa atee umwe anumanena ame kombanda yenyi, anthi: “Noove kumakanyingila-mo.+ 38 Omukwatesiko wove Susuwee omona wa Nuu,+ oe makanyingila motyilongo.+ Mupameka,*+ oe makwatesako ova Isilayeli, avakanyingila motyilongo.”) 39 Ovana venyi ava onwe mwatile onondyale mbenyi mavai navo ngatyina vapundwa,+ novana nkhele vehei otyiwa nii otyivi, ovo mavakanyingila-mo, andyivepe otyilongo, atyilingi tyavo.+ 40 Onwe kondokei, endei no moluhandya, amukwate ondyila yo Kelunga Liakuhuka.’*+

41 “Onwe okwiiva otyo amumphopila okuti: ‘Twalinga onkhali ku Siovaa. Pahe matweende umwe atukalwa, atukalinga etyi Siovaa Huku yetu etutuma!’ Amukwata oviti vienyi mukalwe, mokwasoka okuti matyipepuka okulondeka mofika yonomphunda.+ 42 Mahi Siovaa amphopila okuti: ‘Vetolela uti: “Mwahayei-ko, mwehekevelwisei, ame himelipake-po, himwaamena.+ Ine mwenda-ko, amukevelwisa konondyale mbenyi mamukatila-ko.”’ 43 Ame netyitolele, onwe amwehetyitavela. Onwe kamwetavelele otyitumino tya Siovaa, amulingi omakamo okwenda kofika yonomphunda. 44 Etyi ova Amoleu vakala momphunda oyo veya, amulihonyena navo avemutaata umwe lwononyiki, avemutaata avekemuhikiya ko Seili atee ko Holomaa. 45 Etyi mwati pokwakondoka, amuhimbika okuliyava ku Siovaa, mahi Siovaa ehemutehelela nii ehesuku noonwe. 46 Otyo onwe mwakalela ehimbwe mo Kande.

2 “Etyi twatunda opo, atukondoka, atweende no koluhandya, atukwata ondyila yo Kelunga Likuhuka, ngeetyi Siovaa atumine,+ atweende ononthiki ononyingi, otyo tuliseta nomphunda yo Seili. 2 Pahe Siovaa antholela ati: 3 ‘Onwe mweliseta-seta ehimbwe nomphunda ei. Pahe londekei no kombanda. 4 Ovanthu vepopila okuti: “Onwe tyamei vala nohika yovakulu venyi ovana va Isauu+ vakala komphunda yo Seili,+ ngwe mavemutili owoma.+ Mahi onwe veyekei vala. 5 Mwehevelwisei,* ame himemupe-ale ohika motyilongo tyavo, nii vala kamamuliate-mo, tyeetyi Omphunda yo Seili neipa Isauu, ilinge ohika yae.+ 6 Okulia kwenyi mwene landei, nomeva mamunu landei.+ 7 Siovaa Huku yenyi uli nokumukwatesako, ovipuka aviho mulinga vieenda nawa. Oungendi wenyi uwii umwe nawa, mweenda-enda vala tupu apa moluhandya olu olunene umweete. Omanima aa 40 Siovaa Huku yenyi akala noonwe, kamwakambele natyike.”’+ 8 Twatyama umwe tyili notyilongo tyovakulu vetu, ovana va Isauu,+ vakala mo Seili, atwahakwate ondyila yoko Alambaa, nii yoko Elate, nii ko Esioo-Sembele.+

“Etyi twatunda oko, atweende nondyila onkhwavo, ondyila yo moluhandya lwo Moambe.+ 9 Siovaa antholela okuti: ‘Wahalwise o Moambe, motyilongo omo himekupe-mo ohika, ohika yo Ale neipa-le vokwatuka mu Lote, ilinge yavo.+ 10 (Motyilongo omo mwali ova Emii.+ Ovanthu ovo ankho ovanthu vamwe vokwapama, vali ovanyingi, ovalaale ankho uti vala ovana va Anake. 11 Ova Lefaii+ navo ankho uti vala ovana va Anake,+ otyo ova Moambe ankho vevetila ova Emii. 12 Kohale ankho vakala mo Seili ova Oleu,+ mahi avataatwa-mo novana va Isauu, ngavo vakala-mo,+ vatewa-tewa-mo umwe ngeetyi ova Isilayeli mavalingi vo motyilongo etyi Siovaa meveavela.) 13 Onwe endei, amuyauka Elola lyo Selende.’ Pahe atutundu opo, atuyauka Elola lyo Selende.+ 14 Pokwatunda ko Kande-Mbalaneya atee twayauka Elola* lyo Selende, pakalele omanima 38, atee ovalume aveho veti liokwenda movilwa monthanda vapwa okunkhia, etyi Siovaa amapopile umwe.+ 15 Siovaa ankho wevekatulila okuvoko kwae, evehanye-ko aveho atee monthanda vapwa-mo.+

16 “Etyi ovalume aveho veti liokwenda movilwa, vapwa okunkhia,+ 17 Siovaa antholela vali ati: 18 ‘Hono ove mokalambela motyilongo tyo Moambe, mo Ale. 19 Wahatie hikee popepi nova Amoo ovelwisa, hamwe oveleve, motyilongo tyova Amoo himekupe-mo-ale ohika, ame netyaavela-le vokwatuka mu Lote, otyavo.+ 20 Otyilongo otyo, kohale tupu vetyiti otyo va Lefaii.+ (Kohale, ankho mukala ova Lefaii, ava ova Amoo ankho vati ova Sasumii. 21 Ovanthu vamwe ovanene, ovanyingi, ovalaale, uti vala ovana va Anake.+ Mahi Siovaa evenyimi-ko umwe otyo ova Amoo vatala, ngavo vapinga-mo. 22 Otyo alingile ngootyo ova Oleu,+ etyi evenyima-ko otyo ovana va Isauu vatala, ngavo vapinga motyilongo tyavo, mo Seili,+ na hono omo vakala. 23 Ava ova Avii, vakalele mohika yo Ngasa,+ avahanywa-ko nova Kafetolii,*+ vokwatukile mu Kafetole, ngavo vapinga-mo.)

24 “‘Katukei, taulukei Elola lyo Alunoo.+ Tala! Siyoo+ omu Amoleu, ohamba yo Hesimboo nekupakulila-e. Nyingila motyilongo tyae, omulwisila-mo, tyilinge tyenyi. 25 Onthiki ove movelwisa, ame mandyitilisa owoma ovanthu aveho veli mombwelo yeulu, mavekutili owoma aveho vekekwiiva. Okukwiiva vala mavehulilwa, avateketa.’*+

26 “Andyikatula ovatumwa-ndaka moluhandya lwo Kendemote,+ andyivetumu ku Siyoo Ohamba yo Hesimboo, vakapopie onondaka ombu mbombembwa:+ 27 ‘Ndyikwate-vo motyilongo tyove. Mandyilambe vala ondyila, himayapuka, himayembe nii kokulio nii kokumbili.+ 28 Okulia mandyili, nomeva mandyinu mandyilande. Ndyilambele-mo-vo vala, omphai yange mailiate-mo umwe vala tyokukwata-mo’ 29  — ongootyo tyandinga vokwatuka mu Isauu vakala mo Seili, nova Moambe vakala mo Ale — atee nayauka o Solondau, andyinyingila motyilongo Siovaa Huku yetu metwaavela.’ 30 Mahi Siyoo Ohamba yo Hesimboo, ehetuyeke tulambele-mo, mokonda Siovaa Huku yetu wemuyekele akale nomakamo,+ nomutima watena, opo emupakule peke lietu ngeetyi tutyilwete hono.+

31 “Siovaa amphopila okuti: ‘Tala! Apa katutu mankhupakulila Siyoo notyilongo tyae. Nyingila motyilongo tyae, tyilinge tyove.’+ 32 Etyi Siyoo akatula ovita viae aviho eye okutulwisa etyi tuli mo Saasi,+ 33 Siovaa Huku yetu, emupakula pomavoko etu, onthwe atumwiipa, atwiipaa ovana vae, novanthu votyilongo tyae aveho. 34 Atunyingila momapunda-umbo ae aeho, atweehanyauna-po, atwipaa-mo ovalume ankho veli-mo, novakai, novana. Katwasile-mo nawike.+ 35 Atutyindi-po vala ovipako viatyo, atupundu ovipuka momapunda-umbo atyo. 36 Okuhimbikila ko Alowele,+ otyilongo tyafwena Kelola lyo Alunoo (epunda-umbo likala melola) atee ko Sileyande, petupu ovanthu vepunda-umbo nalike vetuponene. Siovaa Huku yetu, omapunda-umbo avo weepakulile peke lietu aeho.+ 37 Ove kwaile motyilongo tyova Amoo,+ kwaile kongengeso Yelola lyo Samboke,+ kwaile momapunda-umbo ohika yonomphunda, nii monofika ononkhwavo vali Siovaa Huku yetu atile mwahayei-mo.

3 “Atwaanguluka-ko, atweende nondyila yo ko Mbasaa. Ou Onge, ohamba yo Mbasaa akatula ovita viae, eya ko Endelei+ etulwise. 2 Siovaa amphopila okuti: ‘Wehemutile owoma, mokonda mandyimupakula peke liove, nae novanthu votyilongo aveho, notyilongo tyatyo. Momulingi ngeetyi walinga-le Siyoo ohamba yova Amoleu mo Hesimboo.’ 3 Siovaa Huku yetu, apakula Onge ohamba yo Mbasaa, nae novanthu votyilongo tyae aveho peke lietu, atuveipaa apahahupu nawike. 4 Atunyingila momapunda-umbo avo aeho. Petupu epunda-umbo nalike twahanyingilile, aeho alingile etu — omapunda-umbo atyo aeho ena 60. Aeho o otyilongo tyo Alungombe, yatumininwe nohamba Onge mo Mbasaa.+ 5 Omapunda-umbo oo aeho apamekwa novimato viaya peulu, nomapito, nomakumba, nonohika mbatyo ononyingi. 6 Mahi atuhanye-ko omapunda-umbo oo, ngeetyi twahanyene+ omapunda-umbo ohamba Siyoo, ohamba yo Hesimboo. Tweehanyene-po aeho, atwiipaa-mo ovanthu aveho, ovalume, novakai, novana.+ 7 Momapunda-umbo omo, atupundu-mo ovipako viatyo aviho novipuka ovikwavo.

8 “Pononthiki mbatyo opo, onohamba+ ombo onombali mbova Amoleu mbukala mohika yo Solondau, atumbupolo otyilongo tyambo okupolelela Kelola lyo Alunoo atee komphunda yo Helemoo,+ 9 (omphunda oyo, ova Sindone veiti o Siliyoo, ava ova Amoleu veiti o Senile), 10 tupu atuvepolo omapunda-umbo aeho omoluhandya, no Sileyande aiho, no Mbasaa aiho, no Salekaa no Endelei,+ omapunda-umbo aeho atuminwa nohamba yo Mbasaa, Onge. 11 Onge ohamba yo Mbasaa oe vala wahupa-po pova Lefaii. Otyinthandala* tyae tyotyivela* nkhele okotyili, tyivahiwa kotyilongo tyo Lambaa, ohika yova Amoo. Okutyeeleka, moule tyina onokovandu* etyive, mounthanda tyina onokovandu ononkhwana. 12 Pononthiki mbatyo opo, twapingile motyilongo tyahimbikila ko Alowele+ yelihula Nelola lyo Alunoo, nomphunda yo Sileyande nthele imwe. Vokwatuka mu Lumbe no vokwatuka mu Ngande,+ andyivepe omapunda-umbo otyilongo otyo. 13 Ohika yo Sileyande nthele imwe, nohika yo Mbasaa aiho mbutuminwa nohamba Onge, ombo andyimbwavela ovana vamwe va Manasesi.+ Ohika aiho yo Alungombe yokwahula ko Mbasaa, veiti otyilongo tyova Lefaii.

14 “Saili+ omona wa Manasesi apolo-ko ohika aiho yo Alungombe,+ eipolo-ko ehikila monondimbu mbova Sesule nova Maakate,+ onohika ombo mbo Mbasaa embuluku enyina liae, ati mbutiwa Havote-Saili,*+ na hono otyo mbutumbulwa ngootyo. 15 Makili+ andyimupe o Sileyande. 16 Ohika naavela ovana va Lumbe nova Ngande,+ ihimbikila mo Sileyande atee Kelola lyo Alunoo, aikehikila pokati kelola, ayiende atee ko Samboke, elola lionondimbu mbavo nova Amoo, 17 tupu andyivepe otyilongo tyo Alambaa, nohika yo Solondau nongengeso yatyo, okupolelela mo Kinelete atee Kelunga lyo Alambaa, Elunga Liomongwa,* menyi liomphunda yo Pisinga liahula koutundilo.+

18 “Pahe onwe andyimupe otyitumino, andyiti: ‘Siovaa Huku yenyi wemwaavela otyilongo etyi, tyilinge tyenyi. Mahi ovalume aveho vokwapama, vena okumaneka vayauke o Solondau, mulwileko vakwenyi mulikwai navo, ova Isilayeli.+ 19 Momapunda-umbo nemupa, mamusala vala ovakai venyi, novana venyi, novipako vienyi (ame ndyityii okuti onwe muna ovipako ovinyingi). 20 Lwei atee Siovaa apululukiswa-po vakwenyi mulikwai navo, ngoonwe, navo avapingi motyilongo Siovaa Huku yenyi meveavela himba-lina ondongi yo Solondau. Pahe haa onwe amukondoka nawa monohika nemwaavela.’+

21 “Pononthiki opo, andyitolela Susuwee,+ andyimuti: ‘Ove wamona nomaiho ove mwene etyi Siovaa Huku yove alinga onohamba ombu onombali. Ongootyo Siovaa makalinga omauhamba aeho eli himba-lina, oku moi nako.+ 22 Mwehevetilei owoma, mokonda Siovaa Huku yenyi, oe ukahi nokumulwilako.’+

23 “Pomuvo watyo opo, ame andyilivondela ku Siovaa, andyiti: 24 ‘Tatekulu Hamba Onene Siovaa, ove pahe walekesa ame muundapi wove okuti umunene, okuvoko kwove kwapama.+ Okuti kuna vali huku omukwavo keulu? Okuti pena omukwavo pohi ulinga ovipuka ovinene ngoove?+ 25 Mbambavo, ndyeke ndyiyauke himba lina o Solondau, ndyikatale otyilongo otyiwa, ohika oyo ongwa yonomphunda, no Limbanu.’+ 26 Mahi Siovaa nkhele opo wandumanena kombanda yenyi,+ ehenthavela. Siovaa ati: ‘Tyapwa! Wahamphopaile umwe vali otyipuka otyo. 27 Londeka komphunda yo Pisinga+ oi pokatanga-tanga, otale koutakelo, otale kombanda, otale kombwelo, otale koutundilo, utale mwene nomaiho ove etyi otyilongo tyikahi, mokonda kumai nthele ina ondongi yo Solondau.+ 28 Avela Susuwee+ otyilinga, akale onkhalamutwe, mupameka, akole omutima, mokonda oe matwala ovanthu ava nthele ina,+ vende vakapinge motyilongo otyo motale.’ 29 Otyo atyiho wetyilinga etyi tuli melola, lielihula notyilongo tyo Mbete-Peole.+

4 “Pahe, onwe va Isilayeli, tehelelei onondongwa ambuho, novitumino viange vionomphela ndyimulongesa mutyivile okuvitavela mukamone omwenyo,+ amupingi motyilongo Siovaa Huku yovakwaukulu venyi memwaavela. 2 Mwahayawisei ondaka naike konondaka ndyimupopila, nii mwahapolei-ko naike.+ Endelei nawa movitumino vya Siovaa Huku yenyi, evi ndyikahi nokumupopila.

3 “Onwe mwamona umwe nawa nomaiho enyi mwene, etyi Siovaa alinga ovanthu va Mbaale yo ko Peole. Siovaa Huku yenyi, waipaa ovanthu aveho vafenda ku Mbaale yo ko Peole.+ 4 Mahi onwe vokwakakatela mu Siovaa Huku yenyi, amuho na hono muna omwenyo. 5 Tala, ovitumino aviho ame nemulongesa-vio, novitumino+ vionomphela Siovaa Huku yange anthuma nemupopila-vio, nga mwehika motyilongo mamukakala vitavelei. 6 Onwe muna okuvilandula umwe nawa-nawa,+ opo ovanthu vetyimone okuti, muvanongo,+ mwakungunyika+ ovipuka, ovanthu mavati: ‘Ovanthu ava ovanongo, vakungunyika ovipuka.’+ 7 Okuti pena vali ovanthu votyilongo tyimwe vena huku yavo uvekalela popepi, nga Siovaa, Huku ukala popepi noonthwe apeho tyina tulikwambela kwe?+ 8 Ovalie vali vena ovitumino viaviuka, ovitumino vionomphela vikahi ngeevi ame ndyikahi nokumupa hono?+

9 “Onwe pahe, pakei umwe nawa evi mwapopilwa, talei nawa,* mwahalimbwei ovipuka mwamona nomaiho enyi mwene, ononthiki ambuho tyina nkhele muna omwenyo viahatunde momitima vienyi. Tupu vilongesei ovana venyi, novatekula venyi.+ 10 Onthiki mwatalamene pu Siovaa Huku yenyi, ko Holembe, Siovaa wamphopilile okuti: ‘Ongiya ovanthu ponthele yange, veive onondaka mandyipopi,+ opo vanthile owoma+ ononthiki ambuho veli kombanda yeheke, navo aveketyilongesa ovana vavo.’+

11 “Onwe mwafwenene-ko, amutalama mekolo* liomphunda, omphunda aiteme omutemo umwe omunene wehikile keulu.* Ngwe ankho kwanthikovela, kuna ekaka, nepuputu limwe enene.+ 12 Siovaa ahimbika okupopia noonwe mokati kotupia.+ Onwe amwiivi ondaka, mahi amwahamono omunthu nawike.+ Ondaka vala mweivile.+ 13 Emupopila omphango yae,+ ati muna okwitavela, omphangu Yovitumino* 10.+ Ovitumino ovio, evihoneka komamanya evali omapapi.+ 14 Pononthiki mbatyo opo, Siovaa anthumu ndyimulongese ovitumino aviho, aviho no vionomphela, ovitumino onwe muna okutavela, tyina mamunyingila motyilongo tyenyi mamupewa.

15 “Mokonda onwe kamwamwene omunthu nawike, etyi Siovaa apopia noonwe, eivalela mokati kotupia ko Holembe, liyungei nawa,* 16 opo mwehelieetele, amulihongela otyilolo tyina etyi tyelifwa natyo, tyilinge tyelifwa nomulume tyilinge tyelifwa nomukai,+ 17 hamwe atyilifu notyinyama tyimwe tyili kombanda yeheke, tyilinge tyelifwa notyiila tyinthanana meulu,+ 18 tupu hamwe atyelifu notyinyama tyimwe tyeendela keimo, tyilinge tyelifwa nombisi yo momeva, mombwelo yeheke.+ 19 Tyina wamayelula omaiho ove, omono ekumbi, nohanyi, nononthungululu, ovita aviho vyo meulu, viehekulingisise, olipetamena kuvio, nii wehevifende.+ Siovaa Huku yove weviaavela ovanthu aveho, mombwelo yeulu. 20 Mahi onwe, onwe Siovaa akoya-po, emupolo mo Isitu, ofolono yokuyoka ovivela, mukale ovanthu vae, ovanthu vae mwene,+ pahe hono muvanthu vae umwe.

21 “Siovaa anumanena unene ame, mahi o kombanda yenyi,+ pahe wanthi ngaliti pano, kuyauka ondongi yo Solondau, kumanyingila motyilongo otyiwa Siovaa Huku yenyi memwaavela tyilinge tyenyi.+ 22 Ame mandyinkhila vala motyilongo tyino. Himayauka o Solondau,+ onwe vala mamuyauka, amukaya motyilongo otyo otyiwa. 23 Pakei nawa atyiho mwatolelwa, mwahalimbwei omphango Siovaa Huku yenyi alinga noonwe.+ Mwehelihongelei ovilolo viafwa otyipuka tyailikwa na Siovaa Huku yenyi.+ 24 Siovaa Huku yenyi, otupia tuyoka,+ wahanda una umufenda, ufenda vala kwe.+

25 “Ine ukala novana, novatekula, motyilongo amukala-mo ehimbwe, amulingi evi vimweetela, amuhimbika okulihongela ovilolo,+ amulingi ovivi komaiho a Siovaa Huku yenyi, okulingila umwe tyawina,+ 26 opo hono onombangi mbange eulu nohi, mamuti vala nyingilee motyilongo mamwende, amunyimwa-mo, mamunyimwa-mo motyilongo mamupewa himba lina ondongi yo Solondau. Kamukakala-mo ehimbwe, mamukanyimwa-mo umwe amuho.+ 27 Siovaa mekemukuva movilongo novilongo,+ pwoonwe mapakahupa vala ava vehehi+ mavekesala movilongo omu Siovaa mekemutyandyanesa. 28 Kovilongo vatyo oko, onwe mamukafenda ovika-huku viomiti, no viomamanya viahongwa novanthu,+ ovika-huku viahatale, vieheivi-ko, viahali, vina vieheivi etyi tyanika.

29 “Ine tyina mukati oko, mwoovola Siovaa Huku yenyi,+ nomutima wenyi auho, nohande* yenyi aiho, mamumuvasi.+ 30 Tyina haa mwamakala mononkhumbi ononene, amulimonenako mwene kovipuka ovio aviho, mamukondoka ku Siovaa Huku yenyi, ngwe mekemwiiva.+ 31 Siovaa Huku yenyi, una okankhenda.+ Kamemuyeke-po, kamemuhanye-ko, kamalimbwa omphango alingile novakwaukulu venyi,+ ei alingile aane.

32 “Nkhele pulei evi viamonaikile kohale, etyi onwe mweheneye kouye, okuhimbikila monthiki Huku atunga omunthu kombanda yohi. Ovola apa eulu liaoyela, olisete umwe nalio aliho. Okuti kumbi mwamwene-ale otyipuka otyinene tyihuvisa? Okuti mweivile-ale otyipuka ngootyo?+ 33 Okuti kuna vali ava veivile ondaka ya Huku iivalela mokati kotupia, avahankhi ngoonwe?+ 34 Okuti kumbi Huku wapolele-ale ovanthu motyilongo tyimwe, mahi apolo-mo vala vamwe? Okuti kumbi watetele-ale onomphela, alingi ovipuka ovinene, ovipuka vihuvisa,+ alwisa onohamba+ nokuvoko kwapama,+ nenkhanya liatandavela, alingi ovipuka vitilisa owoma,+ ngeetyi hono Siovaa Huku yenyi alinga pokwemupola ko Isitu otyo onwe mulitalelako nomaiho enyi mwene? 35 Mahi soka onwe mwamona ovipuka ovio aviho, munoñgonoke okuti Siovaa oe o Huku yotyotyili.+ Kutupu vali Huku omukwavo.+ 36 Wemuyeka tupu mwiive ondaka yae keulu, okwahanda okumuviyula. Apa pohi apakatuka otupia twae otunene,+ amulimonena-ko, ngamo mumwiivila.

37 “Mokonda ankho uhole unene ovakwaukulu venyi, etyi ovo vavombako akoyo-po vokwatuka* muvo,+ onwe pahe emuyovola ko Isitu kononkhono mbae ononene. 38 Wataata-taata ovanthu ovanyingi vali kwoonwe mwene noonwe mwetyimona, ovanthu ankho vapama vali kwoonwe. Walinga tupu ngootyo, wahanda okumunyingiya motyilongo tyavo, tyilinge tyenyi, noonwe mwene hono mutyilwete.+ 39 No onwe pahe hono noñgonokei-vo okuti, Siovaa oe o Huku yotyotyili, oe keulu, keulu lieheke oe pohi, mombwelo yeulu,+ otyipuka otyo, tyipakei komitima. Kutupu vali Huku omukwavo.+ 40 Pakei nawa ovitumino viae, nonondongwa mbae ombu hono ndyili nokukupopila, okulinga ngootyo atyiho matyimweende nawa, tyilinge onwe tyilinge ovana venyi, opo mukakale-kale motyilongo Siovaa Huku yenyi memwaavela.”+

41 Pononthiki mbatyo opo, Mwisesi aholovona omapunda-umbo etatu mohika yo Solondau+ yokwahula koutundilo. 42 Omunthu wamaipaa mukwavo motyiponyo, namphila ankho ehemuyele,+ una okutaulila mu limwe pomapunda-umbo oo, ngamo akahupila.+ 43 Omapunda-umbo atyo oo, ankho tyati: o lyo Mbesele+ moluhandya, monthanthalahi, liakoyelwa vomuhoko wa Lumbe, no lyo Lamote+ mo Sileyande liakoyelwa vomuhoko wa Ngande, no lyo Ngolaa+ mo Mbasaa liakoyelwa vomuhoko wa Manasesi.+

44 Ovio Ovitumino+ Mwisesi apele ova Isilayeli. 45 Onondaka ombo mbokulondola, nonondongwa ambuho, novitumino vionomphela, ovio Mwisesi apele ova Isilayeli etyi vatunda ko Isitu.+ 46 Wevepopilile-vio etyi veli mohika yondongi yo Solondau, melola lielihula no Mbete-Peole,+ otyilongo tya Siyoo Ohamba yova Amoleu, ankho ukala mo Hesimboo,+ una ovo Mwisesi nova Isilayeli vaipaele etyi vatunda ko Isitu.+ 47 Avanyingila motyilongo tyae, no motyilongo tya Onge+ Ohamba yo Mbasaa. Onohamba ombo onombali mbova Amoleu ankho mbukala mohika yo Solondau, koutundilo, 48 avanyingila motyilongo tyavo okuhimbikila ko Alowele,+ Kelola lyo Alunoo, atee komphunda yo Sioo, o Helemoo,+ 49 nohika yo Alambaa* aiho, mo Solondau yahula koutundilo, atee kelunga Alambaa mehina lyo Pisinga.+

5 Mwisesi aongiya ova Isilayeli aveho, evepopila okuti: “Tehelelei onwe va Isilayeli, tehelelei onondongwa ambuho, novitumino vionomphela hono ndyimupopila. Noñgonokei etyi mandyipopi, mutyivile okutyitavela. 2 Siovaa Huku yetu, walingile omphango noonthwe etyi tuli komphunda yo Holembe.+ 3 Omphango oyo, Siovaa keilingile novakwaukulu vetu, mahi weilinga noonthwe, onthwe atuho tuli pano hono. 4 Siovaa wapopia noonwe etyi tuli komphunda, amulitale tyipala na tyipala, etyi apopila mokati kotupia.+ 5 Pononthiki mbatyo opo,+ onwe amwahalondeka komphunda+ mokonda ankho mwatila owoma otupia. Ame ankho ndyitai pokati kenyi na Siovaa, opo ndyimupopile ondaka ya Siovaa. Ngwe ati:

6 “‘Ame, ame Siovaa Huku yove, wekupola kotyilongo tyo Isitu, otyilongo tyoupika.+ 7 Wahakale novika-huku, fenda vala kwaame.+

8 “‘Wehelihongele otyilolo+ tyelifwa notyipuka tyimwe keulu, nii kombanda yohi, nii momeva mombwelo yohi. 9 Wehelipetamene kuvio, nii wehevifende,+ mokonda ame Siovaa Huku yove, ame Huku wokuhanda okufendwa vala aike.+ Ovivi vituka konkhali ya vana vendyele,*+ mandyikevieta kovana vavo, no kovatekula vavo, no konomphokole mbavo, no kovana vonomphokole mbavo. 10 Mahi ndyikala nolwembia olunene* na vana venthyole, vetavela ovitumino viange, ndyilinga olwembia aveho vakatuka-tuka muvo.

11 “‘Wahanyane nenyina lya Siovaa Huku yove,*+ mokonda Siovaa kamayeke vala ngootyo una unyana nenyina liae.+

12 “‘Onthiki Yotyasapalo ihinangaila apeho, itwaleko okukala onthiki ikola, ngeetyi Siovaa Huku yove ekutuma.+ 13 Mononthiki epandu undapa,+ linga ovilinga viove aviho. 14 Mahi onthiki yapandu-vali, otyasapalo tya Siovaa Huku yove.+ Wahalinge otyilinga natyike,+ nii ove nii omona wove omukwendye nii omukainthu, nii omupika wove omukwendye nii omufikwena, nii ongombe yove, nii otyimbulu tyove, natyike povipako viove, nii onthunda-vilongo ikala momapunda-umbo*+ ove, opo omupika wove, tyilinge omukwendye tyilinge omuhikwena apululukwe ngoove.+ 15 Hinangela okuti ove wali omupika motyilongo tyo Isitu, Siovaa Huku yove ekupolo-mo nenkhanya liapama,+ nokuvoko kwatandavela. Otyo Siovaa Huku yove ekutumina uhinangaile onthiki Yotyasapalo.

16 “‘Humba ho na nyoko,+ linga etyi Siovaa Huku yove ekutuma, ukale ehimbwe motyilongo Siovaa Huku yove mekwaavela+ opo aviho ulinga vieende nawa, okakala-mo okaputuka.*

17 “‘Wahaipae.+

18 “‘Wahalinge onkhali youmbalehi.+

19 “‘Wahavake.+

20 “‘Wahahunge mukwenyi.+

21 “‘Wahapeleye omukai wa mukwenyi.+ Wahapeleye eumbo lya mukwenyi, nii epia liae, nii omupika wae omukwendye, nii omupika wae omuhikwena, nii ongombe yae, nii otyimbulu tyae, wahapeleye natyike tya mukwenyi.’+

22 “Siovaa wemupopilile ovitumino* ovio onwe amuho nondaka yakaluluka komphunda, mokati kotupia, mekaka, mepuputu,+ ahapopi vali natyike. Pahe, evihoneka komamanya evali omapapi, eemphe.+

23 “Mahi, etyi onwe mweiva ondaka iivalela menthiki, otyo omphunda itema,+ onohongoi ambuho mbomihoko vienyi, novakulu aveho, avafwene pwaame. 24 Onwe amuti: ‘Siovaa Huku yetu wetulekesa omunkhima wae, nounene wae, tweiva ondaka yae iivalela motupia.+ Hono twelimonena-ko okuti Huku upondola okupopia nomunthu, mahi omunthu apopia nae ahankhi.+ 25 Vakwe pahe tunkhila umwe pano? Ekundungala eli liotupia lipondola okutuyoka. Etyi vakwe matunkhi, twahakalei pano ñgaa atwiivi ondaka ya Siovaa Huku yetu. 26 Kuna-le ou* weivile ondaka ya Huku una omwenyo iivalela motupia, ngoonthwe ñgaa, mahi ahankhi? 27 Ove mwene fwena-ko otehelela atyiho Siovaa Huku yetu mapopi, haa otupopila atyiho Siovaa Huku yetu ekupopila. Etyi ove haa motupopila, otyo vala onthwe matulingi.’+

28 “Siovaa eivi etyi mwamphopila, pahe Siovaa amphopila okuti: ‘Neiva etyi ovanthu ava vekupopila. Etyi vapopia tyaviuka.+ 29 Ine ovanthu ava vali-vo vala nomutima una owoma naame,+ avetavela ovitumino viange aviho,+ ñgeno vakaputuka, navo novana vavo!+ 30 Enda okeveti: “Kondokei komakaka enyi.” 31 Mahi ove wahaye, nkhele tusale atuho, ndyikupopile ovitumino aviho, nonondongwa, novitumino vionomphela movelongesa, evi vena okulandula tyina vamanyingila motyilongo mandyivepe, omu mavakala.’ 32 Pahe onwe amuho, talei nawa etyi Siovaa Huku yenyi emutuma,+ ngatyo mulinga. Mwahapambukei-mo, mwahayembei nii kokulio nii kokumbili.+ 33 Endelei vala mondyila Siovaa Huku yenyi emupopila,+ opo mukale nomwenyo, amukaputuka, amukakala ononthiki ononyingi motyilongo mamunyingila.+

6 “Ovio, ovitumino, nonondongwa, novitumino vionomphela Siovaa Huku yenyi atuma ndyimulongese-vio, mweendele-mo tyina mwamai himba lina ondongi, amunyingila motyilongo mamupewa, 2 na mutile Siovaa Huku yenyi, amutavela onondongwa mbae, novitumino viae ndyimupopila — noonwe novana venyi, novatekula venyi+ — mweendele-mo ononthiki ambuho muna omwenyo, na mweende-ko ehimbwe.+ 3 Tehelelei nawa onwe va Isilayeli ovitumino ovio, vitavelei, opo aviho mulinga vieende nawa, amukala ovanyingi motyilongo tyomahini nowiki, ngeetyi Siovaa Huku yovakwaukulu venyi emupopilile.

4 “Tehelela Isilayeli: Huku yetu o Siovaa vala, o Siovaa vala kwapwa.+ 5 Humba Siovaa Huku yove, muhumba nomutima wove auho, nohande*+ yove aiho, nononkhono mbove ambuho.*+ 6 Onondaka ombu ndyikupopila hono, mbukale momutima wove, 7 mbupitaululila* ovana vove,+ ovepopila-mbo tyina upumphi meumbo liove, na tyina weenda mondyila, na tyina ulangala-po, na tyina upinduka-po.+ 8 Mbupatekela peke liove, mbukuhinangailise, tupu mbukale ngomulami womombamba yove.*+ 9 Mbuhoneka pombundi yondywo yove potyikulilo, no konombundi mbeumbo liove.

10 “Tyina Siovaa Huku yove amekunyingiya motyilongo apopilile ovakwaukulu vove,+ ovo Ambalayau, na Isake, na Sakoo, otyilongo tyomapunda-umbo omanene, omapunda-umbo omawa wahatungile,+ 11 otyilongo tyovitunge vieyula ovipuka aviho oviwa, ovipuka ove wahaundapele, otyilongo tyononyombo wahaheyele, tyomapia omiti vionouva no omindyambi, omiti wahatwikile — pahe walia wekuta,+ 12 tala nawa, wahalimbwe Siovaa,+ wekupola kotyilongo tyo Isitu, eumbo lioupika. 13 Una okutila Siovaa Huku yove,+ oe vala una okulingila,+ tyina waana, enyina liae vala utumbula.+ 14 Mwahayei no kono huku ononkhwavo, ono huku mbovanthu mwelikalaila navo popepi,+ 15 mokonda Siovaa Huku yenyi, uli pokati kenyi, wahanda una umufenda, ufenda vala kwe.+ Ine mwenda no kono huku ononkhwavo, onyengo ya Siovaa Huku yenyi mainkhinduka,+ kombanda yeheke emunyimi-ko.+

16 “Mwahalolei+ vali Siovaa Huku yenyi, ngeetyi mwalingile ko Masaa.+ 17 Tavelei ovitumino aviho vya Siovaa Huku yenyi, nonondaka mbae mbokulondola, nonondongwa mbae, lingei atyiho emutuma. 18 Lingei etyi tyaviuka, etyi tyikahi nawa komaiho a Siovaa, opo aviho mulinga vieende nawa, amunyingila motyilongo otyiwa, ngamo mukala, otyilongo Siovaa apopilile ovakwaukulu venyi,+ aane. 19 Siovaa mataata-mo onondyale mbenyi ambuho otyo onwe mutala, malingi umwe etyi apopile.+

20 “Haa tyina ovana venyi vamemupulu okuti: ‘Oityi Siovaa Huku etwaavelela ovitumino evi aviho, nonondaka mbokulondola, novitumino evi vionomphela?’ 21 Nga vemupula ngootyo, onwe vekumbululei ñgaa: ‘Onthwe twali ovapika va Falaoo ko Isitu, mahi Siovaa etupolo-ko nokuvoko kwapama. 22 Siovaa ayumbu ovihuna ovinene mo Isitu,+ alingi ovipuka vihuvisa, ovipuka vihanya, avinyono o Isitu na Falaoo, novanthu aveho veumbo liae,+ otyo onthwe tutala. 23 Etupolo-ko, etweeta kuno, etwaavele otyilongo apopilile ovakwaukulu vetu,+ etyi apopile aane. 24 Pahe Siovaa ati, tuna okutavela ovitumino evi aviho, atutili owoma Siovaa Huku yetu.+ Wetwaavela-vio vitukwateseko, tweende-ko vali ehimbwe,+ ngeetyi mutweete hono ñgaa. 25 Matutiwa vala tuviukisa tyina tutavela umwe nawa-nawa ovitumino ovio aviho, tyina tutavela ku* Siovaa Huku yetu, atulingi evi etutuma.’+

7 “Tyina Siovaa Huku yove amekutwala motyilongo mekwaavela,+ makataata-mo ovanthu ovanyingi otyo utala.+ Mataata-mo vokwatuka mu Hete, nova Silingaseu, nova Amoleu,+ nova Kanaa, nova Peliseu, nova Heveu, nova Sembusi,+ ovilongo epandu-vali vina ovanthu ovanyingi vali kwoove, vapama vali kwoove.+ 2 Siovaa Huku yove mekevepakula kwoove, ove ovehanye-ko.+ Ove vehanya-ko umwe.+ Wahalinge navo omphango naike, nii wehevelinge okankhenda.+ 3 Mwehelinepelei. Ovana vove ovafikwena vahanepwe novana vavo, nii ovana vove ovakwendye vahanepe ovana vavo.+ 4 Mokonda, mavayapula ovana vove kwaame, avakafenda ono huku ononkhwavo,+ Siovaa ekunumanena, ekuhanye-ko vala liwa-liwa.+

5 “Mahi muna okuvelinga ñgana: Hanyaunei omitala viavo viovilikutila, nonomphandyi mbavo mbukola,+ novipandyi viavo vikola,*+ ovilolo+ viavo amuvipake otupia. 6 Onwe mukola, muvanthu va Huku yenyi Siovaa, Siovaa Huku yenyi onwe akoya mulinge vae,* mukale ovanthu velikalela kombanda yohi+ vehelifwile novanthu vakwavo.

7 “Mwahatiei hamwe Siovaa wemuhumba tupu, emukoyo omokonda muvanyingi vali ku vakwenyi.+ Onwe ankho kamuhi, vakwenyi aveho ankho ovanyingi vali kwoonwe.+ 8 Mahi Siovaa wemukoya-po tupu, omokonda umuhole, walinga vala etyi atolelele ovakwaukulu venyi.+ Otyo Siovaa emupolela peke* lya Falaoo ohamba yo Isitu nenkhanya liapama, emuyovola meumbo lioupika.+ 9 Onwe mutyii nawa okuti Siovaa Huku yenyi, o Huku yotyotyili, o Huku wotyili, una nolwembia olunene na vana vemuhole, ukala umwe nolwembia novanthu aveho vakatuka-tuka mu ava vemuhole, vana vetavela ovitumino viae.+ 10 Mahi vana vemuyele mevehanye-ko,+ kameliseta-seta vali navo. Vokumuyele mevehanye-ko vala liwa-liwa, kamevesetesa vali. Mevelingi etyi tyata muvo, kameliseta-seta vali navo. 11 Onwe, tavelei umwe ovitumino aviho, nonondongwa, novitumino vionomphela hono ndyimupopila, lingei etyi ndyili nokumupopila.

12 “Ine mutwalako okutehelela nawa ovitumino ovio vionomphela, amuvitavela, amulingi umwe etyi viapopia, Siovaa Huku yenyi kamayeke-po omphango alinga noonwe, makala nolwembia olunene noonwe ngeetyi apopilile ovakwaukulu venyi. 13 Huku makala nolwembia noonwe, emuyambe, amukala ovanyingi. Huku mekemupa ovana ovanyingi,*+ makaendeka nawa ovikuna viomomapia enyi, ovilia vienyi, novinyu yenyi omphe, nomulela wenyi.+ Onongombe mbenyi mambukelityita, onongi mbenyi mambukelitotola motyilongo apopile okuti memupe-tyo,+ otyilongo apopilile ovakwaukulu venyi. 14 Onwe mamukayambwa vali kovanthu vatyo aveho.+ Petupu omunthu nawike makakala tyehena ovana. Ovipako vienyi aviho mavikelityita.+ 15 Siovaa makapola pokati kenyi omauvela aeho, kamekemuyumba ouvela nawike omuvi pomauvela aa mwamwene ko Isitu.+ Mahi, omauvela oo mekeeyumba kovanthu aveho vemuyele. 16 Ovanthu aveho Siovaa Huku yenyi mapakula peke lienyi vehanyei-ko,*+ mweheveevelei.*+ Mwahafendei ono huku mbavo,+ ine mumbufenda mambumukala eliva.+

17 “Ine ulipopila, oti: ‘Ovanthu ovanyingi nga va ñgaa, ngwe onthwe katuhi, matuvetaata ñgeni?’+ 18 Mwehevetilei owoma.+ Hinangelei etyi Siovaa Huku yenyi alinga Falaoo, no Isitu aiho,+ 19 etyi atetele onomphela* ononene noonwe mwene amulimoneka-ko, ovipuka ovinene alingile, ovipuka vihuvisa,+ atyiho alingile nenkhanya liapama, nokuvoko kwatandavela, okuvoko kwa Siovaa Huku yenyi kwemupola+ ko Isitu. Ongootyo Siovaa Huku yenyi makalinga ovanthu aveho onwe mwatila owoma.+ 20 Siovaa Huku yenyi mekevehonga avateketa,* atee aveho vahupa-po vankhia,+ na vana umwe ankho vakaholama. 21 Mwahateketei tyina mwamevemono, mokonda Siovaa Huku yenyi una onwe,+ Huku omunene, utilisa owoma.+

22 “Tyotyili, Siovaa Huku yenyi makataata ovanthu ava vovilongo otyo onwe mutala, mekevetaata katutu-katutu.+ Onwe kamamuyekwa muvehanye-ko vala liwa-liwa, mokonda ine muvehanya-ko liwa-liwa, ovinyama viofika mavilityitila-mo, avimuli-po. 23 Siovaa Huku yenyi mevepakula peke lienyi, amuvelwisa ngwe avatili-ko, atee aveho vapwa-ko.+ 24 Huku makapakula onohamba mbavo peke lienyi.+ Mamukembunyima-ko, omanyina ambo aahatumbaulwa vali mombwelo yeulu.+ Kwoonwe nawike makaveta-ko+ atee aveho muvenyima-ko.+ 25 Ovilolo vyo no huku mbavo vipakei otupia.+ Mwahafwevei opalata yavio, nii oolu yavio, nii mwehevipolei-po,+ opo viehemukale eliva, mokonda, Siovaa Huku+ kevihande vimutoyesa. 26 Mwahaetei momaumbo enyi etyi tyitoyesa matyihanywa-ko, opo noonwe mwahahanywe-ko. Etyi tyitoyesa, tyiyalei, noonwe tyitoyei, mokonda matyihanywa-ko.

8 “Lungukei, tavelei ovitumino aviho ndyimupopila hono, vitavelei mutwaleko nomwenyo+ amuliyawisa, opo munyingila motyilongo Siovaa atolelele ovakwaukulu venyi, aane.+ 2 Mwahalimbwei ondyila ina onde, ondyila Siovaa Huku yenyi emukwatesa, etyi mwakala moluhandya+ omanima aa 40. Wemupa ondyila oyo opo mulikondole koututu. Wemulinga ngootyo atale+ etyi tyili momitima vienyi+ opo emunoñgonoke atale ine mamutavela umwe ovitumino viae. 3 Wemulongesa mulikondole koututu etyi emuyeka nondyala,+ emwaavela omanaa+ tyati vala onwe kamuyii, ovoho kaveii. Wemupa-yo munoñgonoke okuti hambolo vala ipa omunthu omwenyo, mahi tyipa omunthu omwenyo ondaka itunda momulungu wa Siovaa.+ 4 Ovikutu vienyi kaviapwile, nkhele mwaendele momanima aa 40+ onomphai mbenyi kambamitile. 5 Onwe mutyii umwe nawa momitima vienyi okuti, Siovaa Huku yenyi wemuviyaula,+ wemuviyula lwomunthu uviyula omona wae.

6 “Tavelei ovitumino vya Siovaa Huku yenyi, amweendela monondyila mbae, amumutili owoma. 7 Siovaa Huku yenyi ukahi nokumunyingiya motyilongo otyiwa,+ otyilongo tyonondongi mbweenda,* tyonondyivi-ndyivi mbomeva, tyonohika mbukena omeva, omeva ahateka momilola, omeva atunda monomphunda, 8 otyilongo tyotiliku, tyina osevata, nomiti vionouva, nomikuyu, nomilomaa,*+ otyilongo tyomulela, tyina owiki,+ 9 otyilongo tyokulia okunyingi, onwe kamamukakamba natyike motyilongo tyomamanya ena ovivela, omu monomphunda mbatyo mokavasa-mo otyitasu.

10 “Tyina ove wamali okuta, oli otuuka, nkhimaneka Siovaa Huku yove, wekwaavela otyilongo otyiwa.+ 11 Lungukei, mwahalimbwei Siovaa Huku yenyi, mwahayekei-po ovitumino viae, mwehemulimbwei amuyeke-po ovitumino viae vionomphela, nonondongwa mbae ndyimupopila hono. 12 Tyina mwamati ñgaa mwalia amukuta, amutungu onondywo onongwa, ngamo mukala,+ 13 mukati ñgaa onongombe mbenyi nonongi mbenyi mbelityita, opalata yenyi noolu yenyi yalinga onyingi, amukala ovahona, 14 mwahayekei omitima vimutyinde amulipake-ko,+ omutima aumulingisisa, amulimbwa Siovaa Huku yenyi, Huku wemupola kotyilongo tyo Isitu, eumbo lioupika,+ 15 wemuhongolela etyi mwakwata moluhandya+ olu olunene lutilisa owoma, muna ononyoka ononkhalavi nononge, amukwata mohika yakukuta yehena omeva. Huku wemupolelele omeva monkhanda,+ 16 emupe omanaa+ etyi muli moluhandya, ngayo mulia-alia, omanaa ovoho vehei, walinga ngootyo emulongese okulikondola koututu,+ atale etyi tyili momitima vienyi, opo emukwateseko, komutwe wandyila mukakale nawa.+ 17 Ine wamatale momutima wove mweya olusoko lwokuti: ‘Olumono olu, nelumona kohalwange mwene, kokuvoko kwange mwene,’+ 18 hinangela okuti o Siovaa Huku yove, wekwaavela ononkhono mbekupa ouhona,+ oe walinga etyi apangelele ovakwaukulu vove, aane, noove mwene pahe hono utyilwete.+

19 “Ine muti lale-lale amulimbwa Siovaa Huku yenyi, amukalandula ono huku ononkhwavo, amulipetamena kumbo, ngambo mufenda, ame hono ndyimupopila okuti mamunkhi.+ 20 Ine onwe kamutavela Siovaa Huku yenyi+ mamunkhi, mamunkhi umwe ngovanthu ava Siovaa eli nokwiipaa, ava veli nokunkhila umwe momaiho enyi.

9 “Tehela kuno ove Isilayeli, ove hono uyauka o Solondau+ wende ukanyingile motyilongo muna ovanthu ovanene vali kwoove, ovanthu vapama vali,+ otyilongo tyomapunda-umbo omanene, apamekwa umwe no keulu,*+ 2 otyilongo tyovanthu vamwe vapama, ovalaale, ovana va Anake,+ ava umwe ove wii, ava uhole okwiiva vapopiwa okuti: ‘Olie upondola okulwa novana va Anake, evevili?’ 3 Ove, noñgonoka hono okuti Siovaa Huku yove, oe mekukalela komutwe.+ Huku otupia tuyoka,+ mekevenyima-ko. Mekevelwisa avatili-ko otyo ove utala, mevetaata-mo* liwa-liwa, ovehanye-ko, ngeetyi Siovaa ekupopilile.+

4 “Tyina Siovaa Huku yove amevetaatela umwe momaiho ove, wahayeke momutima wove muye olusoko lwokuti: ‘Siovaa wanyingiya tupu motyilongo muno ndyipinge-mo, omokonda ndyilinga evi viaviuka.’+ Ngwe Siovaa wekunyingiya-mo tupu, omokonda yovanthu ava valinga ovivi,+ ava ekahi nokutaata-mo otyo ove utala. 5 Hakuti monyingila tupu motyilongo tyavo omo, opingi-mo omokonda ove uviukisa, hamwe oti omutima wove waviuka. Au otyo hatyo-ko, waya-mo vala mokonda yovanthu ava valinga ovivi, ava Siovaa Huku yove ekahi nokutaata otyo utala.+ Siovaa walinga ngootyo afwisepo ondaka apopile, ei apopilile ovakwaukulu vove, ovo Ambalayau,+ na Isake+ na Sakoo.+ 6 Noñgonokei okuti, otyilongo Siovaa Huku yenyi memupe otyiwa, hakuti memupe-tyo tupu, okulinga kwenyi evi viaviuka, onwe munomphuki.*+

7 “Hinangelei — mwahalimbwei-ko — onwe mwanumanesile Siovaa Huku yenyi etyi muli moluhandya.+ Okupolelela monthiki mwatunda kotyilongo tyo Isitu atee kuno, onwe mwanumanaisa-le Siovaa.+ 8 No pweetyi umwe muli ko Holembe, onwe mwanumanesile Siovaa, Siovaa anumana unene, tyokuhanda umwe okumuhanya-ko.+ 9 Etyi naile komphunda nkhapole omamanya omapapi,+ omamanya omphango Siovaa alinga noonwe,+ nakalele-ko ovitenya 40 novinthiki 40,+ tyahali natyike, tyahanu omeva. 10 Etyi nakati oko, Siovaa amphe omamanya evali omapapi, oku ahoneka nomunwe wae mwene. Komamanya oko, kwahonekwa onondaka ambuho Siovaa emupopililile komphunda, mbuna apopilile mokati kotupia, onthiki ovanthu aveho veliongiya.+ 11 Etyi ovitenya 40 novinthiki 40 viapwa, Siovaa amphe omamanya evali omapapi, omamanya omphango, 12 Siovaa antholela okuti: ‘Mukwe katuka, tuluka, kuluminya ovanthu vove ava wapola ko Isitu, valinga onkhali.+ Vayapuka-le mondyila nevetuma. Velilingila otyilolo* tyotyivela.’+ 13 Siovaa amphopila okuti: ‘Tala, ovanthu ava naina vatena omitima.*+ 14 Vendyekele ndyivehanye-ko, andyinyimi-ko enyina liavo mombwelo yeulu. Mwoove ngamo ndyipola ovanthu vapama vali kuvo, ovanene vali tyipona-vo.’+

15 “Mokweiva otyo, ame andyianguluka, andyituluka-ko, otyo omphunda yakwata otupia,+ omamanya evali omapapi omphango neetyinda pomankhanya ange.+ 16 Tyina ndyiti ñgana, onwe mwalinga onkhali ku Siovaa Huku yenyi! Onwe mwelilingilile onthane yotyivela.* Mwayapuka liwa mondyila Siovaa emutuma.+ 17 Otyo atyinumanesa, andyikwate omamanya oo evali omapapi, andyieyumbu pohi, aatyatyaukila momaiho enyi.+ 18 Etyi natunda opo, andyikelipetamena-po ku Siovaa ngeetyi ndyilinga-le movitenya 40 novinthiki 40. Anahali natyike, nii anahanu omeva,+ mokonda yononkhali onwe mwalinga, etyi mwalinga etyi tyapenga komaiho a Siovaa, ankho mwemuleva. 19 Ame ankho natila owoma onyengo ya Siovaa,+ mokonda mwemunumanesa unene. Wahandele umwe okumuhanya-ko. Mahi pononthiki opo, Siovaa anthehelela vali.+

20 “Siovaa wanumana unene, tyalinga Alau ketyihandele, tyokuhanda umwe okumuhanya-ko.+ Ame andyilivondela ñgoo vali kwe, ehemuhanye-ko. 21 Andyikwata otyilolo tyemulingisa onkhali,+ onthane mwalingile, andyiiyumbu motupia. Andyiityopa-tyopa, andyiikunkhaulula, ofinde yatyo andyiiyumbu momeva atunda momphunda.+

22 “Pweetyi tuli ko Tambelaa,+ no ko Masaa,+ no ko Kimbelote-Ataavaa,+ onwe mwankhindulile ñgoo vali onyengo ya Siovaa. 23 Etyi tuli ko Kande-Mbalaneya+ Siovaa emutumu, ati: ‘Endei, kanyingilei motyilongo mandyimwaavela.’ Onwe mwaanyene vali otyitumino tya Siovaa Huku yenyi,+ amwehemuyumbu onthumbi,+ nii amwehemutavela. 24 Nkhele vala nemunoñgonokele onwe otyo vala mukahi ñgaa, kamutavela-le ku Siovaa.

25 “Otyo atyimphe okulipetamena ku Siovaa ovitenya 40 novinthiki 40.+ Nakalele tupu ngootyo tyelipetamena, omokonda Siovaa watile memuhanye-ko. 26 Andyilivondela ku Siovaa, andyiti: ‘Tatekulu Hamba, Siovaa, wahahanye-ko ovanthu vove. Ovo ovove mwene,+ ava wayovola, weveyola tupu ounene wove, wevepola ko Isitu nenkhanya liove enene.+ 27 Hinangela ovafendi vove, ovo Ambalayau, na Isake, na Sakoo.+ Wehesuke novanthu ava, ava onomphwiiliki, wahaye novivi valinga, wahaye nononkhali valinga.+ 28 Ove okuvenyima-ko umwe, ovanthu vo oku wetupola, mavati: “Siovaa ketyivilile okutwala ovanthu vae kotyilongo evepopilile. Uveyele, otyo evepolela kuno, wahandele okukeveipaele moluhandya.”+ 29 Ovanthu ava, ovove mwene, ovanthu vove+ wapola ko Isitu kononkhono mbove ononene, ava wapola-ko nokuvoko kwatandavela.’+

10 “Pononthiki mbatyo opo, Siovaa amphopila okuti: ‘Teta omamanya omapapi evali elifwa nomamanya otete,+ okambasa komphunda. Tunga otyikasa, tyitunga nomavai. 2 Ame mandyihoneka komamanya oo, onondaka mbali komamanya evali otete omapapi watyatyaula. Omamanya oo, haa epaka motyikasa.’ 3 Etyi natunda opo, ankhatunga otyikasa nomavai omuti omu akasiya, andyihongo omamanya evali elifwa no otete, andyilondeka komphunda nomamanya oo evali peke.+ 4 Etyi nehika-ko, Huku ahoneka komamanya oo etyi ahonekele-ale,+ ahoneka-ko Ovitumino*+ 10, vina Siovaa apopilile komphunda, mokati kotupia,+ monthiki ovanthu aveho veliongiya.+ Pahe Siovaa eemphe. 5 Komphunda oko,+ pahe andyitundu-ko, andyituluka-ko. Aa omamanya andyeelingi umwe etyi Siovaa anthuma, andyeepake motyikasa natunga. No hono omo eli.

6 “Etyi ova Isilayeli vatunda ko Mbeelote Mbene-Sakaa avaende no ko Moselaa. Oko, oko Alau anyimina, ngako apakwa.+ Omona wae Eliyasale, ngae upinga potyilinga tyounakwa.+ 7 Etyi vatunda oko, avaende no ko Ngundingondaa, etyi vatunda ko Ngundingondaa avaende no ko Sotimbata,+ otyilongo tyonondongi mbweenda.*

8 “O pononthiki mbatyo opo, Siovaa aholovona vomuhoko wa Levii,+ Siovaa eveholovona vatyinde-tyinde otyikasa tyae tyomphango,+ na vakale kotyipala tya Siovaa, vemulingile, vape-ape ovanthu elao menyina liae.+ Na hono otyo veli nokulinga. 9 Otyo vomuhoko wa Levii vahakalelele nohika, otyo vahapelelwe ohika nga vakwavo. Ngwe vahula vala ku Siovaa, ngeetyi Siovaa Huku yenyi apopilile Levii.+ 10 Mahi ame andyikala ñgoo vali komphunda ovitenya 40 novinthiki 40,+ Siovaa anthehelela ñgoo vali.+ Siovaa kahandele emuhanyeke-ko. 11 Siovaa amphopila, ati: ‘Maneka, uhongolele ovanthu aveho, na vanyingile motyilongo mandyiveavela, vanyingile-mo ngamo vakala ngeetyi napopilile ovakwaukulu vavo.’+

12 “Ove Isilayeli, oityi Siovaa Huku yove ahanda ove ulinge?+ Wahanda vala utile owoma Siovaa Huku yove,+ oendela apeho monondyila mbae,+ omuhumbu, olingila Siovaa Huku yove nomutima wove auho, nohande* yove aiho,+ 13 otavela evi Siovaa ekulonga, novitumino viae ndyikupopila hono, na ukale nawa.+ 14 Tala, Siovaa Huku yove, oe o hekulu yeulu, eulu lyo keulu,* o hekulu yohi, novipuka aviho vili-mo.+ 15 Mahi, Siovaa wakoyele-po vala ovakwaukulu vove, ngavo elikwata-po navo, ovo vala alingile olwembia. Pokati kovanthu aveho, aholovona-po onwe vokwatuka muvo,+ ngeetyi tutyeete hono. 16 Pahe sukulei* omitima vienyi,+ mwahakalei-vo vali ovanthu vokwehetavela.*+ 17 Mokonda Siovaa Huku yenyi, o Huku yo no huku,+ o Tatekulu yovo tatekulu, o Huku omunene, uvila atyiho, utilisa owoma, wahalingi okapungulula,+ wehelipumwa-po. 18 Kalingi onya omona wehena he,* nomuhepe,+ uhole onthunda-vilongo, upa onthunda-vilongo+ okulia nomuvalo. 19 Lingei olwembia onthunda-vilongo, mokonda, noonwe mwali kotyilongo tyehe-tyenyi, otyilongo tyo Isitu.+

20 “Tilei owoma Siovaa Huku yenyi, mulingilei,+ kakatelei mwe, pokwaana, tukailei enyina liae. 21 Oe muna okuhilivika.+ Oe o Huku yenyi, oe wemulingila ovipuka evi aviho, ovipuka evi ovinene vitilisa owoma, evi mwamona.+ 22 Etyi ovakwaukulu venyi valauka ko Isitu,+ vena* 70. Mahi pahe Siovaa Huku yenyi, wemukalesa ovanyingi, pahe mwakala ovanyingi ngononthungululu meulu.+

11 “Humbei Siovaa Huku yenyi,+ apeho lingei etyi emutuma, tavelei ovitumino viae vionomphela, neevi emulonga, ovitumino viae aviho. 2 Hono onwe mutyeete, ndyikahi nokupopia noonwe, hikahi nokupopia novana venyi, ovana venyi vehei Siovaa Huku yenyi,+ veheneviyulwe-ale nae, vahamwene ounene wae,+ nenkhanya liae liapama,+ nokuvoko kwae kwatandavela. 3 Ovana venyi kavamwene ovipuka vihuvisa Huku alingile, kavamwene etyi alinga o Isitu, na Falaoo ohamba yo Isitu, notyilongo tyae atyiho.+ 4 Kavamwene etyi alinga omaswalali o Isitu, nononkhambe mba Falaoo, nomatemba ae ovilwa. Kavetyimwene etyi ovo Falaoo vanyinwa-po nomeva Elunga Likuhuka pweetyi vekahi nokumulandula, etyi Siovaa evehanya-ko, avakakota umwe.*+ 5 Atyiho Huku emulingaila okuhimbikila moluhandya atee mwehika pano, ovana venyi kavetyimwene. 6 Nii kavamwene etyi alingile ovo Ndataa na Ambilau ovana va Eliyambe, Eliyambe omona wa Lumbe, pweetyi ohi yaikuka aivenyini-po, aivenyini-po aveho novo momaumbo avo, nomakaka avo, novanthu aveho vena-vo, novipako viavo, momaiho ova Isilayeli aveho.+ 7 Ovipuka aviho ovinene Siovaa alinga-linga mwelimonena-ko umwe nomaiho enyi.

8 “Tavelei ovitumino aviho hono ndyimupopila, ovio mutavela mukale tyapama amuyauka, mukanyingile motyilongo, tyilinge tyenyi, 9 mukakale-kale-mo,+ otyilongo Siovaa apopilile ovakwaukulu venyi, nonomphinga mbavo,*+ otyilongo tyomahini nowiki.+

10 “Otyilongo mamupewa katyikahi ngotyilongo tyo Isitu oku mutunda, ko Isitu onwe ankho muti amukunu ombuto, amutandula nonomphai omikungu mulekale ngotyitaka. 11 Mahi motyilongo onwe mamunyingila, otyilongo tyonomphunda, otyilongo tyomalola.+ Tyinwa omeva o keulu,+ omeva ombila. 12 Otyilongo otyo, otyilongo tyili peke lya Siovaa Huku yenyi. Omaiho a Siovaa Huku yenyi, omo vala atala enima aliho, okulihimbikila umwe konthyimbi atee likapwa.

13 “Onwe okutavela umwe nawa-nawa ovitumino ndyimupopila hono, amuhumbu Siovaa Huku yenyi, amumulingila nomutima wenyi auho, nohande*+ yenyi aiho, 14 opo ame mandyilokesa ombila momuvo watyo motyilongo tyenyi, ombila yonkhalula nondyondoloka. Maimulokela umwe amuteye ovikuna vienyi, amunyungu onovinyu mbenyi onomphe, amulingi omulela wenyi.+ 15 Mandyikayovesa eholi monohika mbenyi, eholi liovipako vienyi, onwe mamukalia amukuta.+ 16 Lungukei, omitima vienyi viahayapulwe, mwahayapukei amukafenda ono huku ononkhwavo, amukelipetamena kumbo.+ 17 Ine otyo mulinga otyo, Siovaa mankhinduka umwe, neulu eliiki, ombila ayahaloko,+ ovikuna meheke aviahayele, motyilongo onwe kamamukala-mo otyilongo otyiwa Siovaa memwaavela,+ mamuti vala hikee-mo amuvombo-ko.

18 “Pakei nawa onondaka mbange, mbupakei momutima wenyi, mbupakei mohande* yenyi, amulikutila-mbo peke lienyi ambulingi mbokumuhinangelesa, mbuna okukala omulami wo mombamba* yenyi.+ 19 Mbulongesei ovana venyi. Vepopilei-mbo tyina mupumphi meumbo, na tyina mweenda mondyila, na tyina mulangala-po, na tyina mupinduka-po.+ 20 Mbuhonekei povikulilo vionondywo mbenyi, no konombundi mbenyi, 21 lingei ngootyo opo tyitie noonwe novana venyi mukakale-kale motyilongo Siovaa apopilile ovakwaukulu venyi,+ mukale-kale-mo umwe apeho,+ mukale-mo umwe ononthiki ambuho eulu lili keulu lieheke.

22 “Ine mutavela umwe ovitumino evi ndyimupopila hono, amweendela-mo, amuhumbu Siovaa Huku yenyi,+ amweendela monondyila mbae ambuho, amukakatela mwe,+ 23 opo Siovaa mataata ovanthu vovilongo evi aviho, mevetaatela umwe momaiho enyi.+ Onwe mamunyingila movilongo ovinene, movilongo viovanthu ovanyingi vali kwoonwe.+ 24 Movilongo onwe mamuliate, aviho mavilingi vienyi.+ Mavilingi vienyi, okuhimbikila moluhandya atee ko Limbanu, atyiho no Kondongi, ondongi Eufalate atee kelunga* lyo koutakelo. Oko, oko makuhikila ohika yenyi.+ 25 Kwoonwe nawike makaveta-ko.+ Siovaa Huku yenyi, makatilisa owoma ovanthu movilongo aviho mamuliate. Ovanthu okumwiiva, mavakateketa,+ ngeetyi mwene apopile.

26 “Tala, ame hono ndyimupakela oviwa, nononkhano:+ 27 Mamukaviuka vala tyina mutavela ovitumino vya Siovaa Huku yenyi, evi ndyimupopila hono.+ 28 Mahi ine kamutavela ovitumino vya Siovaa Huku yenyi,+ amuyapuka mondyila ndyimupopila hono, amulandula ono huku mwehei, opo mamukatengala.

29 “Tyina Siovaa Huku yove amekunyingiya motyilongo mopewa, kakalele Komphunda yo Selisii ope ovanthu elao, oku Komphunda yo Embale,+ ngako upopila ononkhano. 30 Onomphunda ombo, mbahula himba lina o Solondau okuyemba koutakelo,* motyilongo tyova Kanaa vakala mo Alambaa, o Alambaa yelihula no Silingale, konthele komiti ominene vyo Molee.+ 31 Onwe mamuyauka o Solondau amunyingila motyilongo Siovaa Huku yenyi memwaavela,+ otyilongo etyi mamupewa. Tyina mwamanyingila-mo, amukala-mo, 32 muna okusuka novitumino aviho amuvitavela, ovitumino vionomphela ndyimupopila hono.+

12 “Ndyili nokumupopila ovitumino aviho, novitumino vionomphela mbenyi, ovitumino muna okuta ombili ononthiki ambuho mamukala motyilongo Siovaa Huku yovakwaukulu venyi mekemwaavela. 2 Apa ovanthu mamutaata motyilongo ankho vafendela ono huku mbavo,+ atyiho tyili-po tyihanyei-po, tyilinge omonomphunda, tyilinge omovipunda, tyilinge omombwelo yomiti, omiti viokwayova nawa. 3 Hanyei-po omitala viavo viovilikutila, nonomphandyi mbavo mbukola,+ novipandyi viavo vikola* amuvipake otupia. Hanyei-ko ovilolo viono huku mbavo,+ ovilolo viavo viahatumbaulwe umwe vali motyilongo omo.+

4 “Onwe mwahafendei Siovaa Huku yenyi ngeetyi ngwe vafenda ovika-huku viavo.+ 5 Mahi, onwe tyina mufenda Siovaa Huku yenyi, kemufendelei apa akoya, apa papakwa enyina liae, apa makala pokati kenyi omihoko nomihoko. Apa akoya opo mwenda.+ 6 Apa akoya opo muna okutwala oviawa vienyi viokuyokwa,+ novilikutila vienyi, neetyi mumupolela pekwii,+ noviawa vyo peke lienyi,+ noviawa viokulingwa na una pahe ulinga etyi apangele, noviawa viotyali,+ nonongombe mbenyi mbatetekela okutyitwa, nonongi mbatyo.+ 7 Lilei ponthele ya Siovaa Huku yenyi,+ no onwe no vomomaumbo enyi, amuhambukilwa atyiho mwalinga,+ mokonda Siovaa Huku yenyi wemupa oviwa.

8 “Mwahalingei ngeetyi tukahi nokulinga hono, tyokuti vala ou ulinga etyi ahanda ou ulinga etyi ahanda,* 9 mokonda onwe nkhele kamunenyingile momphangu yokupululukwa,+ otyilongo Siovaa Huku yenyi memwaavela. 10 Tyina mwamayauka o Solondau,+ amukala motyilongo Siovaa Huku yenyi memwaavela, otyilongo matyikala tyenyi, Huku mekemupa ombembwa amupululukwa-po konondyale mbenyi ambuho, amukala mombembwa.+ 11 Atyiho ndyikahi nokumutuma, onwe mamweende natyo amutyitwala apa Siovaa Huku yenyi makoyo pakale enyina liae+ — oviawa vienyi viokuyokwa, novilikutila vienyi, novipuka mupola pekwii,+ noviawa vyo peke lienyi, noviawa viokufwisapo etyi mwapopilile Siovaa. 12 Onwe mamukahambukilwa Siovaa Huku yenyi,+ mamukemuhambukilwa noonwe novana venyi ovakwendye novakainthu, novapika venyi ovakwendye novahikwena, no vokwatuka mu Levii mukala navo momapunda-umbo enyi,* vokwehena ohika, vahapelwe ohika yavo mwene ngoonwe.+ 13 Lunguka, wahatie vala apa wavasa petavela okulinga otyilikutila, ngapo ulingila ovilikutila viokuyokwa.+ 14 Apa Siovaa amapopi okuti opo una okulingila ovilikutila, opo ulingila oviawa viokuyokwa. Mofika yo vomuhoko wove, omo vala ulingila atyiho ndyikupopila.+

15 “Apeho tyina ove wahanda* okulia ohitu tyina uli momapunda-umbo ove* mwene, upondola okwipaa otyinyama,+ pola pu evi Siovaa Huku yove ekwaavela. Tyilinge omunthu wasila, tyilinge ou wasukuka, aveho vapondola okulia-ko ngeetyi ulia omenye nombambi. 16 Mahi, wahalie ohonde.+ Inengulila pohi ngomeva.+ 17 Ove kumayekwa ulile momapunda-umbo ove* ovipuka upola pekwii, evi upola povilia viove, no kovinyu yove omphe, no komulela wove, no ponongombe mbove mbokwatetekela okutyitwa,+ nonongi mbatyo, no poviawa viokufwisapo etyi wamapopi, no ku etyi waava kotyali tyove, no poviawa vyo peke liove. 18 Ovipuka ovio ukevilila pu Siovaa Huku yove, apa Siovaa Huku yove mwene amakoyo+ — mamukevilia okuti nomona wove omukwendye nomona wove omukainthu, nomupika wove omukwendye nomupika wove omuhikwena, no wokwatuka mu Levii mukala nae momapunda-umbo enyi.* Ovipuka aviho molingi, mavikekuhambukiswa, mokahambukilwa pu Siovaa Huku yove. 19 Apeho tyina uli motyilongo tyove, lunguka, wahalinge omusenyo una watuka mu Levii.+

20 “Tyina Siovaa Huku yove amekuyawisila kofika+ yove ngeetyi apopia,+ kumbi pahe ove ohande* okulia ohitu, apeho tyina wamasoko oti: ‘Nahanda* okulia ohitu,’ upondola okulia.+ 21 Ine watala wakala kokule na apa Siovaa Huku yove aholovona pakale enyina liae,+ opo linga ngeetyi nekutuma, pola ponongombe mbove, okuti hatyo, pola ponongi mbove, ombu Siovaa ekupa, oipaa olila momapunda-umbo enyi,* apeho tyina wahanda ipaa ulie.* 22 Upondola okwiipaa oli, lia umwe vala ngatyina ulia omenye nombambi.+ Tyilinge ou wasila, tyilinge ou wasukuka, aveho vapondola okulia-ko. 23 Mahi lunguka, wahalie ohonde,+ ohonde omwenyo.*+ Wahalie ohitu nomwenyo wayo.* 24 Wahalie ohonde. Inengulila pohi ngomeva.+ 25 Wahalie ohonde, weheilie, ovipuka vikweende nawa, noove novana vove amukakala nawa, mokonda opo mamulingi etyi tyaviuka komaiho a Siovaa. 26 Tyina wenda apa Siovaa akoya, tyinda vala ovipuka viove vikola, otyindi oviawa viove viokufwisapo etyi wamapopile. 27 Tyina wakati oko, oave oviawa viove viokuyokwa, ava umwe ohitu nohonde+ yatyo, paka komutala wa Siovaa Huku yove, omutala wovilikutila. Ohonde yovinyama violikutila viove, itilwa komutala wovilikutila+ wa Siovaa Huku yove, mahi ohitu yatyo, upondola okwiilia-po.

28 “Suka nonondaka ombu ambuho ndyikukupopila ombutavela, mbutavela ovipuka vikweende nawa, noove novana vove mavekekupinga, mavikweende nawa mokonda mukahi nokulinga etyi tyaviuka, tyikahi nawa komaiho a Siovaa Huku yove.

29 “Tyina Siovaa Huku yove amahanye ovanthu vovilongo, ovanthu ava ove motaata,+ opingi motyilongo tyavo, 30 lunguka, wahalinge ngavo. Wahaovole ovika-huku viavo, oti: ‘Ovanthu ava ankho vafenda ñgeni-ale ono huku mbavo? Oti naame otyo mandyilingi.’+ 31 Wahalinge ngootyo, osi-po Siovaa Huku yove, mokonda ovanthu vovilongo ovipuka valingila ono huku mbavo ovipuka Siovaa atoya, ovipuka eyele. Novana vavo umwe mwene vevepaka motupia, povakwendye vatyo povakainthu vatyo, vevepaka motupia, veveyokela ono huku mbavo.+ 32 Onondaka ambuho ndyimupopila, mbulandulei umwe nawa.+ Mwati umwe amwahayawisa-ko, amwahapolo-ko.+

13 “Ine pokati kenyi patumbuka omuuli, hamwe apatumbuka omutali uta onondyoi amono evi mavikamoneka komutwe, emupopila okuti mamumono otyinthumba tyongandi no tyongandi, 2 ngeetyi apopile onwe mukati ñgaa tyamoneka, pahe ati: ‘Tufendei ono huku ononkhwavo, ono huku onwe mwehei,’ 3 mwehetavelei omuuli oo, mwehetavelei omutali oo wonondyoi,+ otyo o Siovaa Huku yenyi wahanda vala okumutala+ ine muhole umwe Siovaa Huku yenyi, ine mumuhole umwe nomutima auho, nohande*+ yenyi aiho. 4 Onwe landulei vala Siovaa Huku yenyi, oe vala mutila owoma. Endelei movitumino viae, tehelelei ondaka yae. Oe vala muna okulingila, kakatelei mu Huku.+ 5 Mahi omuuli oo, hamwe omutali wonondyoi una okwipawa,+ mokonda opo ngootyo uhongiliya ovanthu avatyitukila-po Siovaa Huku yenyi, Huku yenyi wemupola kotyilongo tyo Isitu, emuyovola meumbo lioupika. Omunthu oo mahande okumuyapula mondyila ya Siovaa Huku yenyi, omu ati omo mweendela. Polei ovivi pokati kenyi.+

6 “Ine umwe mulii nae, tyilinge mulilandula mu nyoko, tyilinge omona wove omukwendye hamwe omukainthu, tyilinge omukai wove uhole, tyilinge epanga liove enene,* ukuhongiliyila pokamphengi, ati: ‘Twende tukafende ono huku ononkhwavo,’+ ono huku ove wehei, ono huku novakwaukulu vove ankho vehei, 7 ono huku mbovanthu vovilongo vieliseta notyilongo tyenyi, tyilinge vyo popepi, tyilinge vyo kokule, ono huku mbuvahiwa kononthele ambuho mbotyilongo, 8 wehemutavele, wahatehele etyi apopia.+ Wehemweetehile-mo onkhenda, wehemweevele, nii wehemwaamene. 9 Omunthu ngo oo mwiipaa umwe.+ Pokumwiipaa, ove umwe utetekela okuveta, okuvoko kwove ngako kulinga kwotete, vakwenyi valandule kwoove.+ 10 Muveta nomamanya, muveta umwe ankhi,+ mokonda maa ekuyapula ku Siovaa Huku yove, wekupola kotyilongo tyo Isitu, meumbo lioupika. 11 Ova Isilayeli aveho okutyiiva, mavatili owoma, avehetyilinga-linga vali, petupu vali ou malingi otyivi ngootyo pokati kenyi.+

12 “Ine una etyi wiivila momapunda-umbo Siovaa Huku yove memwaavela, oivi ava vati: 13 ‘Vakwe pokati kenyi patumbuka ovanthu vamwe vehekahi nawa, vahanda okutwala nohika ovanthu vomepunda-umbo liavo, veveti: “Twendei tukafende ono huku ononkhwavo,” ono huku onwe mwehei,’ 14 tala nawa otyipuka otyo weiva, tyoovola umwe, opula-pula nawa.+ Ine uti ñgaa naina otyili umwe, tyili-tyili tyalingwa umwe pokati kenyi, 15 aveho vakala mepunda-umbo liatyo olio veipaa nomutunga.+ Epunda-umbo liatyo lihanya-po, hanyauna atyiho tyili-mo, novipako viatyo wehevihupise, viipaa+ nomutunga. 16 Oongiya popalasa yepunda-umbo olio atyiho mwapunda-mo, epunda-umbo liatyo olipake otupia. Atyiho wapunda-mo, tyaavelwe Siovaa Huku yove, tyilinge otyiawa tyaoya. Epunda-umbo olio lihanyauke umwe, liahapindaulwe-po vali. 17 Okuvoko kwove kwahakwate natyike tyatiwa tyihanywe,+ wahakwate-ko opo Siovaa anthie-mo onyengo yae yatokota, ekweevela, ekulinge okankhenda, ekupe elao mulinge ovanyingi, ngeetyi amapolile ovakwaukulu vove.+ 18 Ove tavela* vala Siovaa Huku yove, endela monondyila mbae ambuho, ombu ndyikupopila hono, olingi etyi tyaviuka komaiho a Siovaa Huku yove.+

14 “Onwe muvana va Huku yenyi Siovaa. Wenyi okunyima, mwehelikwatelei onkhiki amulitete,+ mwehelikululei monombamba.*+ 2 Onwe mukola,+ muvanthu va Huku yenyi Siovaa. Siovaa onwe akoya mulinge vae,* mukale ovanthu velikalela kombanda yohi vehelifwile novanthu vakwavo.+

3 “Wahalie natyike tyitoyesa.+ 4 Ovinyama mupondola okulia ovievi:+ Ongombe, ongi, otyinkhombo, 5 ombambi, omenye, omphundya, onkhonkha, oholongo, ongi yohika, nongi yo monomphunda. 6 Mupondola okulia ovinyama aviho viomakondyo eliyapuka, elitepuka pokati, aviho vioola.* 7 Mahi mwahaliei ovinyama viokwoola viehena omakondyo eliyapuka: Ekamelu, otyindimba, nekopo, mweheviliei mokonda vioola, mahi vitupu omakondyo eliyapuka. Kwoonwe vilinge ovinyama viasila.+ 8 Notyingulu mwehetyiliei, mokonda tyina omakondyo eliyapuka, mahi katyoolo. Kwoonwe tyasila. Mwahaliei ohitu yovinyama ovio, natyina viankhia mwahayamei komandindi atyo.

9 “Ovinyama aviho viomeva, evi mupondola okulia ovievi: Oviokuna omapapatelo, viokuna omapeta mupondola okulia.+ 10 Mwahaliei evi viehena omapapatelo, viehena omapeta. Kwoonwe vilinge ovinyama viasila.

11 “Oviila aviho viokwasukuka, mupondola okulia. 12 Mahi mwahaliei evi: Onkhombe, onkhwalukuvo, onkhuvi onthikovei,+ 13 omakateve, omavimbi, omavimbi atyo aeho mwahaliei, 14 omakwaila atyo aeho mwahaliei, 15 ompho, ondyimbi, ongaivota, nomalukoi, omalukoi atyo aeho, 16 otyikulu, ondyimbi yomakutwi omalaale, epato lyo momeva, 17 otyikasuswa, onkhuvi, onkhuva, 18 onkhumbi-nkhumbi, omakaluhane, omakaluhane atyo aeho, otyikapumphu, notyisiki-siki. 19 Ounyama auho unthanana* kombanda yohi, nao wasila onwe mweheuliei, kauliwa. 20 Mahi aviho viokunthanana viasukuka mupondola okuvilia.

21 “Mwahaliei otyinyama tyelinkhila.+ Mupondola okutyaavela onthunda-vilongo uli momapunda-umbo* enyi, oo upondola okutyilia, tupu mupondola okutyilandesa onthunda-vilongo. Onwe mukola, muvanthu va Siovaa Huku yenyi.

“Wahateleke otyiketa momahini otyiina.+

22 “Kovikuna viove aviho, evi uteya nima na nima, polapola-ko, kekwii upolako tyike.+ 23 Etyi upola kovilia viove, no kovinyu yove, no komulela wove, nonongombe mbokwatetekela okutyitwa upola povipako viove, no ponongi mbatyo, aviho mokevilila pu Siovaa Huku yove, apa akoya pakale enyina liae,+ na ukatile-tile owoma Siovaa Huku yove.+

24 “Mahi ine paendwa ehimbwe, kumetyivili okutyinda ovipuka ovio aviho, kumetyivili okuvitwala apa Siovaa Huku yove akoya pakale enyina liae,+ ñgeno kwalinga kokule unene (tyeetyi Siovaa Huku yove mekekuyamba), 25 opo upondola okuvikumana nonombongo, onombongo mbatyo ombo ngambo utyinda tyina wenda apa Siovaa Huku yove akoya. 26 Pahe haa, olande nonombongo ombo atyiho wahanda,* olande onongombe, nonongi, novinkhombo, novinyu, okuti kwalandele ovinyu olande ovikunwa ovikwavo viokulula, novipuka aviho wahanda,* ovilila pu Siovaa Huku yove, amuli notyikumba tyove muhambukwe.+ 27 Wahalinge omusenyo una watuka mu Levii ukala momapunda-umbo enyi,+ una wati umwe vala ehena onkhu yae mwene, ahapelwe ohika ngoove.+

28 “Apeho tyina pamalambe omanima etatu, pola povikuna viove wateya menima lya tatu, pekwii upola-po tyike, evi upola-po ovipake momapunda-umbo ove.+ 29 Wokwatuka mu Levii, wehena onkhu yae, wahapelwe ohika ngoonwe, nonthunda-vilongo, nomona wehena he,* nomuhepe, ovanthu muna-vo momapunda-umbo enyi, maveya avali avekuta,+ opo Siovaa Huku yove ekuyambe movilinga aviho ulinga.+

15 “Apeho tyina enima lya pandu-vali lipwa, ou wali nongele yove wehemufetese vali, ikale.+ 2 Tyina pena ou ankho una ongele lingei ñgaa: Una walevalesile mukwavo, ehemufetese vali. Ahatanthe vali mukwavo ongele yae, ahatanthe vali una velilandula nae, otyitumino otyo haa matyipopilwa ovaunyingi okuti, otyitumino tya Siovaa tyati, ou una ongele wayovoka.+ 3 Mahi onthunda-vilongo mutantha ongele yove,+ ou mulilandula nae ongele yae ikale vala, ahafete vali. 4 Pwoonwe pahamone ou uhepa, mwene Siovaa mekekuyamba,+ Siovaa Huku mekekupela oviwa motyilongo mekwaavela, otyilongo mokakala atyilingi tyove, 5 mahi Siovaa Huku yove mekekuyamba vala putyina ukakatela mondaka yae, oendela umwe nawa-nawa movitumino aviho ndyikupopila hono.+ 6 Siovaa Huku yove mekekuyamba, mekekuyamba umwe ngeetyi ekupopilile, ove mokalevalesa ovanthu vovilongo ovinyingi, mahi ove kumekevelevala natyike.+ Ove mokatumina ovanthu vovilongo ovinyingi, mahi ngwe kamavekekutumina.+

7 “Ine umwe uhepa, umwe pwaava mulilandula navo ava mukala navo momapunda-umbo o motyilongo Siovaa Huku yove mekwaavela, wahateneke omutima wove, wahapateke peke liove, onumina mukwenyi wehena-tyo-vo.+ 8 Ove patulula peke liove, omulingi otyali,+ omulevalesa atyiho ahanda, atyiho akamba. 9 Lunguka, momutima mweheye ei yahaviukile, oti: ‘Enima lya pandu-vali lipepi-ale,+ enima liokuyovola ou wekulevala,’ pahe ohalingi vali otyali mukwenyi, ohemupe, ai mankhanya. Omunthu oo okukeliyava ku Siovaa tyo ove wehemupele, ombei mailingi yove.+ 10 Mwaavela umwe nomutima welihandya,+ wehemupe* tyahahandele. Okumupa nawa, Siovaa Huku yove mekuyambe, ovilinga viove aviho avikupe, ovipuka aviho ulinga avieende nawa.+ 11 Onwe kamamukambe-ale ava vahepa motyilongo tyenyi.+ Otyo natila: ‘Patulula peke liove, olingi mukwenyi otyali, opopila ou wamona emone, ou wahepa mukala nae motyilongo tyenyi.’+

12 “Ine umwe pu ava mulikwai navo omu Hembeleu mukwenyi ulandeswa, ove omulande-po, tyilinge omulume tyilinge omukai, pahe alingi omupika wove, kala nae omanima epandu, tyina tyiti mo lya pandu-vali muyeka aye.+ 13 Ine wenda, tyina ati pokwenda, ayahe vala mankhanya. 14 Mwaavela-vo tyimwe, mwaavela nomutima welihandya, mupolela povipako viove, mupolela potyipale tyove, na apa unyungila ovinyu yove, na apa ulingila omulela. Mwaavela ngeetyi Siovaa Huku yove ekwaavela-vo. 15 Hinangela okuti, ove wali omupika kotyilongo tyo Isitu, Siovaa Huku yove ekuyovola-ko. Otyo hono nekupela otyitumino otyo.

16 “Mahi ine ukuti: ‘Ame hikuyeke-po nii hieende!’ apopi ngootyo mokonda ukuhole, uhole veumbo liove, ononthiki mwakala nae wahambukwa,+ 17 opo mutwala pepito, omutiuula kokutwi notyitungo, alinge-linge umwe vala omupika wove. Nomupika wove omuhikwena otyo umulinge ngootyo. 18 Pokumuyeka apa wahatie hamwe tyapenga, muyeka umwe aye, ovilinga ekulingila momanima epandu vipona povilinga vialingwa novaundapi vevali vafetwa. Siovaa Huku yove wekuyamba-le, etyi walingilwa otyinene-ale.

19 “Ovipako viove vikoha vilinge vya Siovaa Huku yove,+ tyilinge onongombe mbove, tyilinge onongi mbokwatetekela okutyitwa. Ongombe yove yokwatetekela okutyitwa wahalinge nayo otyilinga natyike.* Wahakulule onongi mbove omainya, onongi mbokwatetekela okutyitwa. 20 Tyitie noove notyikumba tyove, endei amukalila otyipako otyo pu Siovaa Huku yenyi, otyo mulinge otyo nima na nima, mwenda amukulila apa Siovaa maholovona.+ 21 Mahi otyipako tyina otyinthembia — hamwe tyiteñgina, hamwe otyimphoki hamwe tyina vali otyinthembia otyikwavo otyinene — otyo wehetyilingile Siovaa Huku yove+ otyilikutila. 22 Otyipako ngootyo, utyilila vala mepunda-umbo ukala.* Tyilinge ou wasila tyilinge ou wasukuka, vapondola okulia-ko, otyo mutyilia vala ngeetyi mulia omenye, nombambi.+ 23 Mahi ohonde yatyo wahalie.+ Ohonde yatyo yende no pohi ngomeva.+

16 “Hinangela ohanyi ya Ambimbe,* olingila Siovaa Huku yove Opasikwa.+ O mohanyi ya Ambimbe Siovaa Huku yove ekupola ko Isitu kounthiki.+ 2 Pola ponongi mbove no povinkhombo viove, no ponongombe mbove,+ ulingile Siovaa Huku yove+ otyilikutila tyo Pasikwa, ulingile apa Siovaa akoya pakale enyina liae.+ 3 Otyilikutila otyo, pokutyilia tyahapakwe onkhisiso.+ Mokala ononthiki epandu-vali nokulia ombolo yahaile onkhisiso, ombolo yemone, mokonda motyilongo tyo Isitu watundile-mo vala nondyanga.+ Linga-linga ngootyo, uhinangaile apeho onthiki watunda motyilongo tyo Isitu.+ 4 Wahavasiwe una onkhiso naike mononthiki epandu-vali,+ potyilongo tyove atyiho pahakale onkhisiso. Ohitu aiho yotyilikutila kaipondola okulala aikavasa monthiki onkhwavo.+ 5 Kamatyitavela ulingile otyilikutila tyo Pasikwa momapunda-umbo Siovaa Huku yove mekwaavela. 6 Motyilingaila vala pana Siovaa Huku yove akoya pakale enyina liae. Otyilikutila tyo Pasikwa, utyilinga vala tyina ekumbi liamanyingila kokawiiwii,+ utyilinga monthiki nge ei watundile ko Isitu. 7 Otyilikutila otyo, tyitelekela+ apa Siovaa Huku yove makoyo,+ ngapo utyilila, tyina tyiti komuhuka watyo okondoka kekaka liove. 8 Mononthiki epandu lia vala ombolo yahaile onkhisiso, monthiki ya pandu-vali makulingwa eliongiyo likola lya Siovaa Huku yove. Wahalinge otyilinga natyike.+

9 “Valula onosimanu epandu-vali. Valula okuhimbikila pomuvo wahimbika okuteya nofoso ovikuna viove.+ 10 Pahe olingila Siovaa Huku yove+ Otyipito Tyonosimanu, notyiawa tyotyali tyo peke liove, oavela Siovaa Huku yove etyi tyata mu etyi ekupa.+ 11 Hambukilwa pu Siovaa Huku yove, hambukilwa apa Siovaa Huku yove makoyo pakale enyina liae, noove, nomona wove omukwendye nomukainthu, nomupika wove omukwendye nomufikwena, no wokwatuka mu Levii ukala momapunda-umbo* ove, nonthunda-vilongo, nomona wehena he,* nomuhepe, aveho mukala navo.+ 12 Hinangela okuti noove wali omupika mo Isitu.+ Tavela ovitumino evi, endela-mo.

13 “Tyina wamatutu ovilia viove potyipale, tyina wamatutu omulela wove novinyu yove, pahe olingi Otyipito Tyomakaka,*+ mahi tyikale ononthiki epandu-vali. 14 Motyipito+ omo amuho hambukwei, amuho, noove, nomona wove omukwendye nomukainthu, nomupika wove omukwendye nomuhikwena, no wokwatuka mu Levii, nonthunda-vilongo, nomona wehena he, nomuhepe, aveho mukala navo momapunda-umbo enyi. 15 Molingila Siovaa Huku yove otyipito+ otyo mononthiki epandu-vali, motyilingila apa Siovaa akoya, opo Siovaa Huku yove ekuyambe, ovikuna viove aviho aviyele, atyiho ulinga atyiviuku,+ noove mwene ohambukwa.+

16 “Ovanthu aveho vena okwenda pu Siovaa Huku yove, apa akoya, vena okwenda-po tutatu menima: Potyipito Tyonombolo Mbahaile Onkhiso,+ Notyipito Tyonosimanu,+ Notyipito Tyomakaka.*+ Amuho tyina mwenda pu Siovaa mwahayei mankhanya. 17 Munthu na munthu atyinde etyi tyata mu etyi Siovaa Huku yenyi emupa.+

18 “Koya vokuteta onomphela,+ nonohongoi mbovanthu vomihoko aviho momapunda-umbo* aeho Siovaa Huku yove mekwaavela. Ovanthu ovo, ovo vena okuteta onomphela ambuho, mahi vena umwe okupopila omu omphela yaviukila. 19 Wahapengese omphela,+ wahalinge okapungulula,+ wehetavele okulipumwa-po, okulipumwa-po tyipata omaiho omunongo,+ tyinyona ondaka yondingaviwa. 20 Etyi ulinga, viukisa — viukisa,+ weende-ko vali ehimbwe, onyingila motyilongo Siovaa Huku yove mekwaavela.

21 “Wahatwike omuti ulinge otyipandyi tyikola,*+ weheutwikile pomutala wovilikutila, omutala motungila Siovaa Huku yove.

22 “Nomphandyi ikola wahatunge,+ otyo otyipuka Siovaa Huku yove eyele.

17 “Wahalingile Siovaa Huku yove otyilikutila, wahaipae ongombe onthwei ina otyinthembia, hamwe ongi ina otyinthembia, hamwe oipaa ei ina apa yalemana, otyo matyitoyesa Siovaa Huku yove.+

2 “Soka ñgeno momapunda-umbo Siovaa Huku yenyi memwaavela, mukala-mo nomulume, hamwe omukai wavasiwa ulinga otyipuka tyapenga komaiho a Siovaa Huku yenyi, wavasiwa waliatela komphango ya Huku,+ 3 omunthu oo apambuka umwe movitumino, ai mokufenda ono huku ononkhwavo, elipetamena kumbo, hamwe afende kekumbi, hamwe okohanyi, hamwe okovipuka aviho vyo meulu,+ alingi etyi nahatumine,+ 4 tyina otyipuka otyo wametyipopilwa hamwe wetyiiva-iva vala, tyoovola umwe nawa, utyinoñgonoke. Ine uti ñgaa otyili umwe,+ tyili-tyili tyalingwa mo Isilayeli, 5 wokwetyilinga, tyilinge omulume tyilinge omukai, mutwala kondye yepunda-umbo, amumuvete nomamanya, muvetei umwe ankhi.+ 6 Omunthu wiipawa, oyou vala una etyi alinga tyamonwa nonombangi vevali,* okuti hatyo, onombangi avalingi vevatu.+ Etyi tyamonwa vala nomunthu wike, katyiipaesa munthu.+ 7 Pokumwipaa, okuvoko kwonombangi, oko kuna okutetekela, ovaunyingi avalandula-ko. Polei otyivi pokati kenyi.+

8 “Ine mu limwe pomapunda-umbo enyi mukala omphela imwe mwehevilile, tyilinge omphela yomunthu waipawa+ tyilinge o yatyimwe vali, tyilinge pena ava veliveta-veta, tyilinge ondaka imwe vali onkhwavo, ove una okwenda apa Siovaa Huku yove akoya.+ 9 Enda kovanakwa vokwatuka mu Levii no komukoyesi+ uli-ko pononthiki opo, ovepopila ondaka yove, na vekupopile etyi una okulinga.+ 10 Olingi etyi wapopilwa na ava vakala apa Siovaa akoya. Linga umwe etyi vekupopila. 11 Linga etyi tyapopia otyitumino vekulekesa, linga umwe etyi vekupopila.+ Wahayapuke mweetyi mavekupopila, wahayembe nii kokulio nii kokumbili.+ 12 Omunthu ulipaka-ko, ahatehelela kovanakwa vekahi nokuundapela Siovaa Huku yove, hamwe o komukoyesi, aipawe.+ Pola otyivi mo Isilayeli.+ 13 Ovaunyingi okutyiiva, mavatili owoma, avahalingi vali otyivi ngootyo.+

14 “Tyina wamanyingila motyilongo Siovaa Huku yove mekwaavela, etyi matyilingi tyove, pahe okala-mo, oti: ‘Ndyikoye ohamba mainthumina ngeetyi tyilinga ovanthu vovilongo aviho vieliseta naame,’+ 15 opo, ove una okukoya ohamba Siovaa Huku yove akoya.+ Omunthu mokoyo akale ohamba, una okutunda pu ava mulilandula navo. Ove wailikwa okukoya onthunda-vilongo, kupondola okukoya omunthu mwehelikwai nae. 16 Mahi omunthu oo malingi ohamba, eheliovolele ononkhambe ononyingi,+ ovanthu ehevekondole ko Isitu, ehevekondole-ko amonene-mo vali ononkhambe,+ mokonda Siovaa wemupopila okuti: ‘Mwahakondokei vali ko Isitu.’ 17 Tupu ahanepe ovakai ovanyingi, mphoko omutima wae wenda nohika.+ Ahaovole opalata onyingi noolu.+ 18 Tyina amapumphama kotyipundi tyae tyoutumini, ahoneke omukanda Wovitumino* evi, apole momukanda wapakwa novanakwa vokwatuka mu Levii.+

19 “Omukanda oo akale nao, eutange ononthiki ambuho ena omwenyo,+ opo etyivile okutila owoma Siovaa Huku yae, etavela onondaka ambuho Mbovitumino evi, nonondongwa mbatyo, aendela-mo.+ 20 Okulinga ngootyo, omutima wae kamaulipake-ko, kamatombo ava velilandula navo, tupu kamayapuka movitumino, kamayembe nii kokulio nii kokumbili, matyiti umwe nae novana vae outumini ukalinga-linga vala wavo, ovo vala vakatumaina ova Isilayeli.

18 “Ovanakwa vokwatuka mu Levii, novanthu aveho vomuhoko wa Levii, kamavakala nofika, kamavapewa eheke ngova Isilayeli vakwavo. Mavakalia-alia oviawa viokuyokwa vialingilwa Siovaa. Koviawa oko, oko umwe vahula.+ 2 Ovo, kamavakala nofika nga vakwavo, vahula umwe vala ku Siovaa ngeetyi evepopilile.

3 “Una wamalingi otyilikutila, tyilinge ongombe tyilinge ongi, upola-ko epe, nonomphanda, notyihapu, aavela ovanakwa. 4 Ovikuna viove utetekela okuteya, novinyu yove omphe yotete, nomulela wove wotete, nomainya utetekela okukulula konongi mbove, viaavela omunakwa.+ 5 Pomihoko vienyi aviho, Siovaa Huku yenyi wapola-po vomuhoko wa Levii, aveho novana vavo valinge-linge ovilinga menyina lya Siovaa.+

6 “Mahi ine umwe watuka mu Levii utunda mepunda-umbo akala+ nova Isilayeli vakwavo, aende* apa Siovaa akoya,*+ 7 upondola okuundapa na vakwavo avasa-po, vatuka mu Levii vakala-le pu Siovaa,+ nae upondola okulinga ovilinga menyina lya Siovaa Huku yae. 8 Omunthu oo wati umwe, okulia apewa upewa vala etyi tyilifwe po tya vakwavo,+ tyina pweetyi tyasile-po ovakwaukulu vavo pamalandeswa tyimwe, nako upolelwa-ko.

9 “Tyina wamanyingila motyilongo Siovaa Huku yove mekwaavela, wehelipake moviso vitoyesa viovanthu votyilongo otyo.+ 10 Pwoonwe pahakale nawike upaka omona wae motupia,+ omona wae omukwendye hamwe omukainthu, pahakale nawike utapesa,+ watambula,+ wonombale,+ onganga,+ 11 una otyiteta, ukaovola omutali,+ otyitapi,+ pahakale nawike woovola okupopia no vokwankhia.+ 12 Siovaa kahande ou ulinga ovipuka ovio, umutoya. Siovaa Huku yove uli nokutaata ovanthu ovo, no ove utyeete, uvetaata tupu o kombanda yoviso ovio vitoyesa. 13 Ove wahalinge evi vikuvelesa onombei, opo wahanumanesa Siovaa Huku yove.+

14 “Ovanthu ava muli nokutaata, ankho venda povimbanda+ no povitapi.+ Mahi Siovaa Huku yenyi kemuyekele onwe mulinge ovipuka ovio. 15 Siovaa Huku yenyi mekemukatulila omuuli pokati kovanthu mulikwai navo, omuuli ukalinga ngaame. Omuuli oo, haa mutehelelei.+ 16 Noonwe mwene otyo-ale mwaitile ku Siovaa Huku yenyi ko Holembe, monthiki muna ovanthu veliongiyile,+ amuti: ‘Vakwe onthwe katuvokwiva-iva ñgaa Siovaa Huku yetu upopia, katuvokumona-mona ñgaa otupia twae otunene, haa matunkhi.’+ 17 Siovaa amphopila okuti: ‘Etyi vapopia tyikahi nawa. 18 Puvo mandyikevekoyela-po omuuli ukahi ngoove,+ andyikapaka onondaka mbange momulungu wae,+ ngwe ekevepopila atyiho ndyili nokukupopila.+ 19 Ame mankhaongela omphela omunthu wahatehela onondaka mbange omuuli oo makapopia, onondaka makapopia, ombu ndyimupa.+

20 “‘Omuuli ulipaka-ko, apopi ondaka nehemutumine, mahi eipopi ngatyina ame nemutuma, hamwe apopi ondaka yo no huku ononkhwavo, omuuli oo aipawe.+ 21 Hamwe momutima wove molipulu, oti: “Oñgeni matutyinoñgonoka okuti ondaka oyo ha Siovaa-ko weipopia?” 22 Tyina omuuli amati natumwa na Siovaa, mahi etyi apopia atyahamoneka, hamwe atyahalingwa, opo ngootyo ondaka oyo ha Siovaa-ko weipopia. Omuuli oo welipa vala ovipuka. Wehemutile owoma.’

19 “Tyina Siovaa Huku yove amahanye-ko ovanthu vakala motyilongo etyi Siovaa Huku yove mekwaavela, onyingila-mo, pahe okala umwe momapunda-umbo atyo, no momaumbo atyo,+ 2 motyilongo Siovaa Huku yove mekwaavela,+ holovona-mo omapunda-umbo etatu. 3 Otyilongo Siovaa Huku yove mekwaavela, otyilongo matyilingi tyove, una okutyiteta-teta onondimbu, atyitepuka onofika ononthatu, omatapalo oeviukisa nawa, tyina omunthu amaipaa mukwavo, etyivile okukahateka no momapunda-umbo oo.

4 “Ou wamaipaa mukwavo motyiponyo, namphila ehemuyele, ataulile momapunda-umbo omo, ahupe.+ 5 Ine vaya na mukwavo mohika, vakatiava ononkhunyi, pahe ou pokutyoka nonkhava, omutwe watyo auhukuka-ko, auvete mukwavo ankhi, oo wokwaipaa mukwavo, ataulile momapunda-umbo omo, ahupe.+ 6 Otyo alinge ngootyo, mokonda ine wokuyavala ohonde+ yo wae umuvasa, ngwe wanumana-le, memwiipaa,* mokonda omapunda-umbo eli unene kokule. Mahi ngwe ha wokwiipawa-ale mokonda waipaa umwe vala motyiponyo, hakuti umuyele.+ 7 Otyo nekutila: ‘Holovona-mo omapunda-umbo etatu.’

8 “Ine Siovaa Huku yove uhandyula kohika yove ngeetyi apopilile ovakwaukulu vove,+ ekwaavela otyilongo atyiho apopilile ovakwaukulu vove,+ 9  — ove otavela ovitumino evi aviho ndyikupa hono oheviyeke-po, ohumbu Siovaa Huku yove, oendela apeho monondyila mbae+ — opo, komapunda-umbo oo etatu, yawisa-ko vali etatu.+ 10 Ine ulinga ngootyo, opo otyilongo Siovaa Huku yove mekwaavela, motyilongo mokakala, kamamukaipawa omunthu wehena etyi alinga,+ ove ohavelwa onombei.+

11 “Mahi ine omulume umwe uyele mukwavo,+ emupange omphango, emuvange unene,* ankhi, pahe akahateka no momapunda-umbo omo, 12 opo, ovakulu vomepunda-umbo atunda vekemupole-ko, avemupakula komunthu wokuyavala ohonde yo wae, omunthu oo aipawe.+ 13 Wehemulinge* okankhenda. Pola onkhali yohonde pokati kova Isilayeli,+ mokonda waipaa omunthu wehena etyi alinga. Otyo ulinga otyo, ovipuka vikweende nawa.

14 “Tyina ove wamapewa ohika yove motyilongo Siovaa Huku yove mekwaavela, omu mokala-kala, wahahondovole onondimbu mbenyi na mukwenyi,+ onondimbu mbapakelwe-po novakulu.

15 “Oumbangi womunthu wike hao omunthu akwatelwa atiwa walinga etyi tyapenga,+ hamwe atiwa walinga onkhali. Ondaka itavelwa vala tyina ina onombangi* vevali, okuti hatyo vetatu.+ 16 Ine omunthu utendeleya mukwavo tyokumuyele vala, ati umwe walinga onkhali,+ 17 ovalume ovo vevali vena onondaka, vatwale ondaka yavo ku Siovaa, veitwale kovanakwa no kovakoyesi veli-ko pononthiki opo.+ 18 Vokuteta onomphela mavetyoovola umwe nawa.+ Ine omulume wokwati ombangi ukemba vala, naina utendeleya vala mukwavo, 19 opo, onwe mulingei etyi ahandela mukwavo.+ Polei ovivi pokati kenyi.+ 20 Ovaunyingi okutyiiva, mavatili owoma, pokati kenyi apahapalekwa vali otyivi ngootyo.+ 21 Wehemweevele.*+ Pomwenyo, panyingile umwe omwenyo,* peiho eiho, peyo eyo, pokuvoko okuvoko, pomphai omphai.+

20 “Ine mwenda movilwa mukalwise onondyale mbenyi, tyina mukati ñgana ononkhambe mbavo ononyingi vali kombenyi, omatemba avo omanyingi vali ko enyi, omafwalali avo omanyingi vali kwoonwe, mwehevetilei owoma, mokonda Siovaa Huku yenyi wemupola kotyilongo tyo Isitu, una onwe.+ 2 Tyina pahe mamuhimbika okulwa, omunakwa una okuya povanthu aveho.+ 3 Evepopila okuti: ‘Tehelelei onwe va Isilayeli, onwe mamuhimbika okulwa nonondyale mbenyi. Mwahasoyei. Mwahatilei owoma, mwahalingei otyiho, mwehevetilei owoma, 4 mokonda Siovaa Huku yenyi uli pokati kenyi oe memulwila-ko, mahanye-ko onondyale mbenyi, emuyovola.’+

5 “Ovatumini vovita navo vapopie-po, vapopile ovaunyingi okuti: ‘Ine pena ou watunga ondywo yae, nkhele wehenelale-mo, akondoke keumbo liae. Akondoke, ine ukankhila movilwa mapeseka, mondywo yae amukala mukwavo. 6 Ine pena ou watwika omiti viae vionouva, nkhele wehenelie-ko, akondoke keumbo liae. Akondoke, ine ukankhila movilwa mapeseka, ovinyango viae aviliwa na mukwavo. 7 Ine pena ou una omufikwena ahanda, nkhele kavenelinepe, akondoke keumbo liae.+ Akondoke, ine ukankhila movilwa, omufikwena ahandele makanepwa na mulume mukwavo.’ 8 Ovatumini ovo, tupu vapule ovaunyingi okuti: ‘Olie watila owoma, olie wasoya?+ Akondoke keumbo liae. Akondoke, una okulingisisa vakwavo, navo avasoyo ngae.’*+ 9 Tyina ovatumini vovita vamapopila ngootyo ovaunyingi, pahe avakoyo ava mavakalela komutwe ovita pokwenda movilwa.

10 “Tyina muna epunda-umbo mukalwisa, muti hikee-ko, nkhele amukapopia no vo mepunda-umbo liatyo, amupopi navo kombembwa.+ 11 Ine vetavela ombembwa, avekwiikulila onombundi unyingile, ovanthu vatyo aveho vavahiwa-mo valinge vove, valinge ovapika vove.+ 12 Mahi ine kavetavela omphango yombembwa, avekulwisa, opo ove vehondyela-mo. 13 Siovaa Huku yove, mapakula epunda-umbo olio peke liove. Ovalume aveho veli-mo, vevanga nomutunga. 14 Mahi ovakai vatyo, novana vatyo enda navo, novipako viatyo, novipuka aviho vili mepunda-umbo omo, nolumono lwatyo, vipunda-mo.+ Ove mokalia ovipuka ovio wapunda konondyale mbove, ovanthu Siovaa Huku yove apakula peke liove.+

15 “Ongootyo mokalinga omapunda-umbo aeho okokule noove, omapunda-umbo ehe-ovanthu vokwekukalela popepi. 16 Mahi momapunda-umbo ovanthu ovo, omapunda-umbo Siovaa Huku yove mekwaavela alinge ove, wahase-mo natyike tyifima.+ 17 Ipaa-mo ovanthu aveho velimo: Vokwatuka mu Hete, nova Amoleu, nova Kanaa, nova Peliseu, nova Heveu, nova Sembusi.+ Una okulinga ngeetyi Siovaa Huku yove ekutuma, 18 veipaa-mo vehekulongese oviso viavo vitoyesa, evi valingila ono huku mbavo, mphoko vekulingisisa onkhali ku Siovaa Huku yove.+

19 “Ine uyolamena epunda-umbo limwe unyingile-mo, apakala ehimbwe otyo mulwa vala, pahe haa olipolo-ko umwe, omiti viatyo wehevityoke-mo, wehevikwatele onkhava. Upondola okulia-ko, mahi wehevityoke-mo.+ Okuti nomuti vala womepia wehe-munthu uulwisa ngomunthu? 20 Omiti weete okuti kaviliwa upondola okuvityoka-mo. Omiti ngo ovio upondola okuvityoka ohondyo navio epunda-mbo, uliyakulile konondyale mbove mbukulwisa, atee epunda-umbo liavo liwa-po.

21 “Ine mepia limwe motyilongo Siovaa Huku yove mekwaavela tyilinge tyove, muvahiwa omunthu wankhia, mahi wemwipaa keiwe, 2 ovakulu votyilongo, no vokuteta onomphela,+ vende-po, avaeleka okupolelela potyivimbi tyatyo atee momapunda-umbo opopepi, avatale otyikambo tyili-po. 3 Ovakulu vepunda-umbo lili vali popepi unene notyivimbi, vena okupola onthane ondema, yehenelinge otyilinga natyike, onthane yeheneende kokanga. 4 Ovakulu ovo vena okutwala onthane oyo ondema melola mweenda omeva, mombwelo, mwahaliminwe nii mwahakuninwe natyike. Tyina vamehiki-mo, aveityoko pelumbu.+

5 “Vomuhoko wa Levii ovanakwa, ovo maveya-po, mokonda Siovaa Huku yove, ovo akoya vemulingile,+ ovo vapa ovanthu elao menyina lya Siovaa.+ Ovanakwa, ovo mavapopi oñgeni tyitetwa omphela ya ava veliveta-veta.+ 6 Ovakulu aveho vo mepunda-umbo lili popepi notyivimbi, vena okukoha omavoko avo,+ velikohela kombanda yendindi liongombe oyo ondema, ei yokwatyokelwa elumbu melola, 7 avati: ‘Onthwe twelikoha pomavoko, hanthwe-ko twaipaa, katyalingililwe momaiho etu, tyemwiipaa onthwe katutyii. 8 Ove Siovaa, wehetuvele onombei onthwe vanthu vove, onthwe va Isilayeli, onthwe wayovola.+ Onkhali yohonde yomunthu wehena etyi alinga, weheiyeke ikale movanthu vove ova Isilayeli.’+ Tyina vamalingi ngootyo, onkhali yohonde yomunthu wankhia kamailingi yavo. 9 Tyina wamalingi ngootyo, onkhali yohonde yomunthu wankhia wehena etyi alinga, ipola pokati kenyi, olingi etyi tyaviuka komaiho a Siovaa.

10 “Ine wenda movilwa okalwisa onondyale mbove, Siovaa Huku yove ekulwila-ko avatili-ko, ove oetelela-ko ononkhwatwa,+ 11 pononkhwatwa opo omono-po omukai umwe omuwa, omufweve, ohande umunepe, 12 upondola okumutwala meumbo liove. Omukai oo, una okukululwa onohuki momutwe, elitete onohoka, 13 alulu-mo ovikutu viounkhwatwa, akala meumbo liove. Mahi akale ohanyi+ aiho tyilila ovo he na ina. Konyima pahe, mupondola okuliyama nae kolutu, olingi omulume wae, ngwe alingi omukai wove. 14 Mahi ine watala kwemuhandele vali, muyeka aye,+ aye mwene no oku ahanda.* Mahi wehemulandese omukumana nonombongo, nii wehemulinge onya, ove wemukundisa.

15 “Ine omulume umwe wanepa oluvale, povakai vae uhole-po vali wike,* ovakai ovo avatyiti ovana ovakwendye, mahi omona otyiveli o womukai ehehole,+ 16 tyina omulume oo apa ovana vae ovipuka, evi vihiwa kotyiveli ehevipe omona womukai ehole vali, ngwe omona oo hatyiveli-ko, ou otyiveli akala-po mokonda vala o womukai ehehole. 17 Omulume oo kapondola okulimbwa omona otyiveli, namphila omona womukai ehehole. Povipuka aviho ena-vio, una okumupolela-po vivali-vivali, oe omunthu atetekela okweeta kouye. Atyiho tyipewa otyiveli, otyae umwe.+

18 “Ine omulume umwe una omona omphuki, omona ondupilupi, wehetavela he nii wehetavela ina,+ ngwe ovohe vaviyaula-ko-ale otyo ehevetavela,+ 19 ovo he na ina vena okumukwata, avemutwala kondye, kovakulu votyilongo, kombundi yepunda-umbo liavo, 20 avapopila ovakulu vomepunda-umbo liavo okuti: ‘Omona wetu ou, omphuki, omona ou ondupilupi, ketutavela. Ulia unene,+ onkholwa.’+ 21 Ovalume aveho vomepunda-umbo, vemuvete nomamanya ankhi. Okulinga ngootyo, wapola otyivi pokati kenyi. Ova Isilayeli aveho okutyiiva mavatili owoma.+

22 “Ine omulume umwe walinga onkhali imwipaesa, pahe aipawa,+ ove omuyendyelesa momuti,+ 23 otyivimbi otyo katyipondola okulala momuti.+ Ove una okukemupaka monthiki yatyo, mokonda una wayendyeleswa momuti, wateyelwa onkhano na Huku.+ Ove kupondola okusilisa otyilongo Siovaa Huku yove ekwaavela, otyilongo tyove.+

22 “Ine umona ongi, hamwe omono ongombe* ya mukwenyi yenda nohika, weheitale vala oiyeke.+ Ityilika, oitahela ku hekulu, mokonda tyina muna-e mulikwai. 2 Mahi ine hekulu ukala kokule, tupu hamwe kumwii, otyipako otyo tyitwala no keumbo liove, okala natyo atee hekulu eya okutyipola. Tyina ameya, omwavela-tyo.+ 3 Otyo ulinge otyimbulu, notyikutu, notyipuka otyikwavo mukwenyi avombesa, apeho tyina wamavasi tyaamwene. Wahalinge ngoti kwetyimwene.

4 “Ine umona otyimbulu tya mukwenyi tyatokela metapalo, hamwe ongombe wavasa yatoka, wahalambe vala. Ipindula-po.+

5 “Omukai ahavale ovikutu viovalume, ou omulume ahavale ovikutu viovakai. Mokonda ou ulinga ngootyo utoyesa Siovaa Huku yove.

6 “Ine tyina weenda mondyila umona otyiyu tyotyiila, mahi pena omailona, hamwe ombalela apa pena vala omayiyi, tyilinge tyili komuti, tyilinge tyili pohi, mahi tyaunda-ko, wehetyipole-po otyindi-po notyiina nomailona atyo.+ 7 Otyiina tyatyo tyiyeka tyende, upondola vala okupola-po omailona-atyo. Linga-linga ngootyo ovipuka vikweende nawa, opo weende-ko ehimbwe.

8 “Ine utunga ondywo, keulu tunga-ko otyimato tyiti monthulo+ opo kwahatoke omunthu, vomeumbo liove avakala nonkhali yohonde.

9 “Mepia liove liomiti vionouva wahatwike-mo onombuto mbelikalela.+ Wahalinge ngootyo, okutyilinga, matyiti umwe ovikuna viove aviho, otyetyi wapola momiti viove vionouva, atyiho motyipolwa kononkhono, avikala vyo momphangu ikola.

10 “Wahapandeke kokanga ike ongombe* notyimbulu.+

11 “Wahavale ovikutu viatungwa nomainya ahonyekwa nomulinya wombalavandi.+

12 “Komavava ekwana onthanga yove una okutungila-ko ovindyendyelela.+

13 “Ine omulume umwe unepa omukai, aveliyame kolutu, mahi haa ehemuhande vali,* 14 emutendeleya okuti otyihayo, emuundula motyilongo, ati: ‘Nanepa omukai ou, mahi etyi tweliyama kolutu, okumutala kalingi ngo ou wehei ovalume,’ 15 ovo he na ina yomufikwena oo, vena okwenda kombundi yepunda-umbo avalekesa kovakulu votyilongo okuti omufikwena oo kei ovalume. 16 He yomufikwena una okupopila ovakulu okuti: ‘Omukwendye ou nemunepesa umwe omona wange, mahi umuyele,* 17 wemutendeleya okuti otyihayo, wati: “Momona wove havahile-mo natyike tyilekesa okuti kei ovalume.” Mahi, etyi tyilekesa okuti omona wange kei ovalume, otyetyi.’ Nga vapopia ngootyo, vena okukwata omulele, aveuyale pohi otyo ovakulu vepunda-umbo vatala. 18 Ovakulu vepunda-umbo,+ avakwate omulume oo, avemumasula.+ 19 Mavemufetesa ono sikulu* 100 mbo palata, avembwaavela he yomufikwena, omulume oo wasilisa omufikwena omu Isilayeli.+ Kapondola okumuyeka-po ukala umwe omukai wae. Ononthiki ambuho nkhele ena omwenyo, kapondola okumuhenga.

20 “Mahi ine etyi tyapopia omulume otyili umwe, petupu etyi tyalekesa okuti omufikwena oo kei mulume, 21 opo, vena okutwala omufikwena oo kondye, kombundi yeumbo lya he. Ovalume vomepunda-umbo liavo vena okumuveta nomamanya ankhi, mokonda etyi alinga tyikundisa,+ wakundisa ova Isilayeli, walalela meumbo lya he+ novakwendye.* Pola otyivi pokati kenyi.+

22 “Ine omulume umwe uvahiwa ulangi nomukai wa mukwavo, aveho vevali vena okunkhia, tyilinge omulume watyo tyilinge omukai watyo+ aveho vankhie. Ove una okupola otyivi pokati kova Isilayeli.

23 “Ine ovafikwena umwe mepunda-mbo weheneende novakwendye una omukwendye memunepe, mahi avahonyenena nomulume omukwavo, avalangala-po, 24 muna okuvetwala kondye, kombundi yepunda-umbo olio, amuvevete nomamanya avankhi. Omufikwena una okwipawa mokonda kaululile onkhu mepunda-umbo. Omulume watyo una okwipawa mokonda wakundisa omukai wa mukwavo.+ Ove una okupola otyivi pokati kenyi.

25 “Mahi ine omufikwena una-le omukwendye memunepe uvahiwa mofika nomulume, omulume oo emukwata alala nae kononkhono, opo, omulume oo wokwalala nae, oe vala una okwipawa. 26 Omufikwena wehemulinge natyike. Omufikwena kalingile onkhali imwipaesa. Otyo ongomulume ulwisa mukwavo, emwipaa.*+ 27 Omufikwena wavasiwa mofika, namphila ena-le omukwendye, waululile umwe onkhu, mahi petupu ou weile okumupopila.

28 “Ine omulume umwe uvasa omufikwena wehena omukwendye, emukwate alala nae kononkhono, avamonwa,+ 29 omulume oo, una okufeta he yomufikwena ono sikulu 50 mbo palata, emunepe.+ Una okukala nae ononthiki ambuho mbomwenyo wae, kapondola okumuhenga mokonda wemukundisa.

30 “Petupu omulume nawike upondola okunepa omukai wa he. Mokonda ulinga ngootyo, maundula he.*+

23 “Omulume watukanwa, hamwe watyopwa, okuti hatyo, oyo una watetwa ounthu wae, kapondola okukala povanthu va Siovaa.+

2 “Omona wehemutyitwa-tyilongo, kapondola okukala pokati kovanthu va Siovaa.+ Nawike povatekula vae kumbi ukaliata pokati kovanthu va Siovaa.

3 “Nawike pova Amoo, nawike pova Moambe upondola okukala pokati kovanthu va Siovaa.+ Aveho vakatuka-tuka muvo, nawike kumbi ukaliata pokati kovanthu va Siovaa, 4 mokonda pokutunda ko Isitu+ kavemupele okulia, nomeva vala kavemupele, soka nkhee vekemwiihanenene Mbalaau omona wa Mbeole wo ko Petole, ko Mesopotamia, emuteyele onkhano.*+ 5 Mahi Siovaa Huku yenyi, ehetavela etyi Mbalaau+ ahandele. Siovaa Huku yenyi etyipilulula, Mbalaau ehemuteyela onkhano, emupe elao,+ mokonda Siovaa Huku yenyi umuhole.+ 6 Ononthiki ambuho una omwenyo, ove weheveovolele ombembwa, wehevehandele oviwa.+

7 “Wahayale omu Endoo, oo tyina muna-e mulikwai.+

“Wahayale omu Isitu, noove wali-vo onthunda-vilongo motyilongo tyae.+ 8 Onomphokole mbavo vapondola okukakala novanthu va Siovaa.

9 “Tyina woonga onthanda na ulwise onondyale mbove, wahakale neetyi tyasila.*+ 10 Ine omulume umwe ukala tyasila, hamwe welisilisa neehu kounthiki,+ monthanda una okutunda-mo, ahakondoka-mo vali. 11 Tyina tyiti komakumbi elikohe nomeva, akondoka vala monthanda tyina ekumbi linyingila.+ 12 Muna okukoya apa mamwiila-ila kohika, kondye yonthanda, ngako mwenda-enda nako. 13 Povityuma uundapa navio pakale okatemo. Tyina wenda kondye, heya etoto, ngapo ulingila, ohihila-ko. 14 Siovaa Huku yove, weenda-enda monthanda yove wahanda ekuyovole,+ mapakula onondyale mbove peke liove. Mahi, onthanda yove ilinge onthanda ikola,+ pwoonwe ahavase-po natyike tyasila, ine uvasa-po memuyeke-po ahaenda-enda vali noonwe.

15 “Ine umona omupika umwe wahena ou aundapela, weya kwoove, ove wehemukondole-ko. 16 Omupika oo upondola okukala apa ahanda momapunda-umbo enyi, mwene akoye apa ahanda. Wehemulinge onya.+

17 “Ovafikwena aveho ovana vova Isilayeli, pahamone ou ulinga ekunga,+ alingila ovivi mondywo yokufendela. Ovakwendye aveho ovana vova Isilayeli, pahamone ou ulinga ekunga,+ alingila ovivi mondywo yokufendela. 18 Onombongo* mbafetwa ekunga, lilinge ekunga liomukai, lilinge liomulume* ove wehembutwale mondywo ya Siovaa Huku yove, nii mbahafete pomphango imwe yalingilwe, ombo onombongo Siovaa Huku yove atoya.

19 “Tyina utantha ongele mukwenyi mulikwai nae una ongele yove,+ wahatyitise onombongo mbove, wahayawisilwe kokulia walevasile, nii kotyipuka otyikwavo. 20 Tyitisa vala ongele yonthunda-vilongo,+ mahi mukwenyi mulikwai nae, wehemulinge ngootyo,+ wehemulinge ngootyo opo Siovaa Huku yove ekuyamba movipuka aviho mokalinga motyilongo mopewa.+

21 “Ine ulinga omphango ulingile Siovaa Huku yove+ otyipuka tyimwe, wahasete, tyilinga umwe.+ Siovaa Huku yove, mekutanthe-tyo, ove okwehetyilingi pahe opo onkhali.+ 22 Mahi ine kwalingile omphango naike, opo kwalingile onkhali.+ 23 Mahi tyamatundu momulungu wove, tyilinga umwe,+ linga etyi omulungu wove wapanga tyilinge ngatyina walinga otyali Siovaa Huku yove.+

24 “Ine unyingila motyitaka tya mukwenyi, muna omiti vionouva, nyanga-ko onouva oli okuta,* mahi wahanyange opake motyipapo tyove.+

25 “Ine unyingila mepia lya mukwenyi liovilia, tenga-mo nomavoko ove evi viayela-le, mahi wahakwatele ofoso ovikuna vya mukwenyi.+

24 “Ine omulume umwe unepa, haa ahahande vali omukai oo anepa, ehemuhande vali mokonda wamona tyimwe tyasila momukai oo, nkhele ahoneke omukanda wokulihenga,+ emwaavela-o, pahe emutaata meumbo liae.+ 2 Omukai nga atunda meumbo liomulume oo, upondola okukanepwa nomulume omukwavo.+ 3 Ine vekeliyala vali nomulume oo wekemunepa, omulume oo ahoneka omukanda wokulihenga emwaavela-o, emutaata meumbo liae, okuti hatyo, hamwe omulume oo wa vali unyima, 4 omulume wae wo tete, wokwemutaatele-ale kapondola vali okumunepa ngwe wasila-le, mokonda otyipuka otyo Siovaa utyitoya. Wahaete onkhali motyilongo Siovaa Huku yove mekwaavela, motyilongo ove mokala.

5 “Omulume wokwanepa pahe, kapondola okwenda kovilwa, kapondola okupewa vali otyilinga otyikwavo. Una okukala enima tyahalingi otyilinga natyike, ukala vala meumbo ahambukiswe omukai wae.+

6 “Mukwenyi okukulevala, opinyolo wahatyinde onkhunkho yae, hamwe emanya liokukunkha.+ Pahamone ou ulinga ngootyo, otyo okupola mukwenyi etyi tyimuhupisa.*

7 “Ine umwe uvahiwa wavaka omunthu* pu ava mulikwai navo ova Isilayeli, emulingi onya, emulandesa,+ omunthu oo wokwavaka aipawe.+ Pola ovivi pokati kenyi.+

8 “Tyina pena apa patumba otyilunda,* linga umwe atyiho ovanakwa vokwatuka mu Levii mavekupopila.+ Linga umwe atyiho-atyiho nevetolela. 9 Hinangelei etyi Siovaa Huku yenyi alingile Miliaa mondyila, pokutunda ko Isitu.+

10 “Ine walevalesa mukwenyi,+ ove wahanyingile mondywo yae olipolela-mo etyi matyilingi opinyolo. 11 Ove talamena vala pondye, ou wokwekulevala ekweetela-tyo pondye. 12 Ine omunthu wokwekulevala wahepa, wahaye poula etyi ekupa tyopinyolo otyo nkhele una-tyo.+ 13 Tyina ekumbi linyingila, etyi ekupa tyopinyolo mutwaila-tyo, ekelihike-mo,+ ekekupopie-popie nawa. Okutyilinga otyo, Siovaa Huku yove mekuti undingaviwa.

14 “Wahavake omuundapi wakongwa, wahavake omuundapi wehena-tyo, wahepa, tyilinge mulilandula nae, tyilinge onthunda-vilongo ukala motyilongo tyenyi, momapunda-umbo enyi.*+ 15 Mufeta umwe monthiki yatyo aundapa,+ mufeta tyina ekumbi liehenenyingile, mokonda utupu-tyo, utei* vala ku etyi afetwa. Ankho kumufete meliyave ku Siovaa, opo pahe molieetela onkhali.+

16 “Vokuna ovana kavapondola okwipaelwa kombanda yeetyi tyalinga ovana vavo. Ava ovana navo kavapondola okwipaelwa kombanda yeetyi tyalinga ovohe.+ Omunthu mwene wiipaelwa umwe onkhali alinga.+

17 “Monomphela, wahalinge onya onthunda-vilongo, wahalinge onya omona wehena he.*+ Tyina omuhepe amekulevala, wehemupole omanda yae, ailingi opinyolo.+ 18 Hinangela okuti noove wali omupika ko Isitu, Siovaa Huku yove ekuyovola-ko.+ Otyo nekupela ovitumino ovio.

19 “Pokuteya, ine mepia liove walimbwa-mo otyipandi tyike, wahakondoke oketyipola-mo. Tyisa-mo tyilinge tyonthunda-vilongo, tyilinge tyomona wehena he, tyilinge tyomuhepe,+ opo Siovaa Huku yove ekuyambe movilinga viove aviho.+

20 “Tyina wamapukumuna omundyambi wove, wahakondoke-ko vali. Tyesala-ko tyilinge tyonthunda-vilongo, tyilinge tyomona wehena he, tyilinge tyomuhepe.+

21 “Tyina wamati pokunyanga onouva mbove mepia liove, wahakondoke-mo vali, okapupulula-ko. Ombu mbesala-ko, mbulinge mbonthunda-vilongo, mbulinge mbomona wehena he, mbulinge mbomuhepe. 22 Hinangela okuti ove wali omupika kotyilongo tyo Isitu. Otyo nekupela ovitumino ovio.

25 “Tyina ovanthu vevali vena onondaka, vena okwenda ko vokuteta onomphela.+ Ovo, mavatete omphela yavo, avati umwe waviukisa oyou, wapengesa oyou.+ 2 Wokwapengesa uhiwa okuvetwa,+ wokuteta onomphela memuti langalapo ombupe, avetelwa umwe momaiho ae. Una okuvetwa, ine otyivi alinga otyinene, avetwa unene, ine etyi alinga otyitutu, avetwa katutu. 3 Wokumuveta, upondola okumuveta novimbonde vikehika 40,+ mahi kapondola okulambesa opo. Okumuveta alambesa-po, makundisa mukwavo, memukundihila umwe momaiho ove.

4 “Wahakute ongombe* komulungu tyina ityopa ovilia.+

5 “Ovalume vevali velikwai vakala aveho, umwe puvo anyimi ahasi-po ovana, omuhepe watyo kapondola okukanepwa nomunyingi. Nawa yae una okwenda komuhepe oo, emunepe-po, avelinepe pounawa.+ 6 Omona wo tete omuhepe oo akutula, oe ulinga omphinga yo ou wokwanyima,+ opo ova Isilayeli+ vahalimbwe enyina liae.

7 “Ine omulume oo kahandele okulinepa na nawa yae omuhepe, omuhepe oo ende kovakulu, kombundi yepunda-umbo, eveti: ‘Nawa yange, kahandele enyina lyo ou velilandula nae lihinangailwe mo Isilayeli. Kahandele tulinepe nae, kahandele tulinepe pounawa.’ 8 Ovakulu vomepunda-umbo omu akala, vena okwiihana omukwendye oo, avapopi nae. Okwehetavela umwe, ati umwe: ‘Ame himuhande,’ 9 opo, omuhepe oo una okufwena pwe, momaiho ovakulu, emuhukula olukaku komphai,+ emunthili omate motyipala, ati: ‘Ongootyo tyilingwa omulume wahahande okupindula-po eumbo lyo ou velikwai nae.’ 10 Okutuka opo, aveho veumbo lyae, ova Isilayeli mavekevetia-atia:* ‘O veumbo lyo wokwahukulwa olukaku.’

11 “Ine ovalume vevali vahimbika okulwa, omukai wa umwe elipake-po, aamena komulume wae, omukai oo akwate omapita ou uli nokulwisa omulume wae, 12 omukai oo, enkhaya liatyo mutipula-lio. Wehemweevele.*

13 “Motyipapo tyove mwahakale omamanya evali+ okweeleka, eli enene eli etutu. 14 Meumbo liove mwahakale ovipuka vivali viokweeleka,*+ etyi otyinene etyi otyitutu. 15 Evi uyonga navio, vilinge evi viahavake, evi vaviuka, evi weeleka navio vilinge evi viahavake, viaviuka, opo ukale ehimbwe motyilongo Siovaa Huku yove mekwaavela.+ 16 Mokonda, omunthu uvaka, Siovaa Huku yove+ umutoya.

17 “Hinangela etyi tyekulingile Amaleke mondyila, pokutunda ko Isitu.+ 18 Amaleke wekuvahile mondyila, alwisa aveho veli monyima yove, ngwe onwe mwaponwa, mwepwila. Katilile owoma Huku. 19 Tyina Siovaa Huku yove amekupululula-po, ohamono vali onondyale mbove ambuho mbeliseta notyilongo Siovaa Huku yove mekwaavela, tyikale tyove,+ Amaleke muhanya-ko, muhanya-ko ahatumbaulwa vali mombwelo yeulu.+ Wahalimbwe-ko.

26 “Tyina wamanyingila motyilongo Siovaa Huku yove mekwaavela, otyilongo matyikala tyenyi, omu mamukala-kala, 2 kovikuna aviho vyo tete viotyilongo,* evi moteye motyilongo Siovaa Huku yove mekwaavela, pola-ko katutu opake mosesu, otwala apa Siovaa Huku yove akoya pakale enyina liae.+ 3 Enda komunakwa uli nokuundapa monthiki omo, mupopila okuti: ‘Hono nati ndyende nkhapopile Siovaa Huku yove okuti, pahe nanyingila motyilongo Siovaa etupopilile, etyi atolelele ovakwaukulu vetu.’+

4 “Omunakwa matambula osesu una-yo peke, eipake pomutala wovilikutila, pomutala wa Siovaa Huku yove. 5 Pahe ove opopila kotyipala tya Siovaa Huku yove, oti: ‘Tate wali omu Alameu+ ankho ukuva-kuva vala,* aende ko Isitu,+ ngako akakala, veumbo liae ankho kavehi-ale.+ Ko Isitu oko, oko vakalingila ovanthu ovanene, oko pahe vakalingila ovanthu, avalingi ovanyingi-nyingi.+ 6 Ova Isitu ankho vetulinga onya, vetumonesa emone, ankho vetupaka moupika umwe omunene.+ 7 Onthwe atuhimbika okuliyava ku Siovaa Huku yovakwaukulu vetu. Siovaa eivi ondaka yetu, amono ononkhumbi ankho tuli nokumona, nemone ankho tuna-lio, nonya ankho tulingwa.+ 8 Pahe, Siovaa etupolo ko Isitu nenkhanya liapama, etupolo-ko nokuvoko kwatandavela,+ alingi ovipuka vitilisa owoma, ovipuka ovinene, ovipuka vihuvisa.+ 9 Etweeta muno, motyilongo etyi etwaavela, otyilongo tyina omahini nowiki.+ 10 Pahe naeta ovikuna evi vyo tete nateya mohika ei Siovaa ampha.’+

“Nga wamana okupopia, opake osesu ponthele ya Siovaa Huku yove, olipetamena ku Siovaa Huku yove. 11 Okutuka opo, noove no wokwatuka mu Levii, nonthunda-vilongo mukala nayo, no vomeumbo liove,+ amuho mamuhambaukilwa ovipuka aviho oviwa Siovaa Huku yenyi emwaavela.

12 “Tyina pamakala omanima etatu, mo lya tatu yatyo, kovikuna viove aviho pola-ko, kekwii pola-ko tyike,+ olio enima liokupola kovikuna viove. Evi wapola-pola-ko oviaavela vomuhoko wa Levii, nonthunda-vilongo, nomona wehena he,* nomuhepe. Ngwe mavalila ovipuka ovio momapunda-umbo enyi,* mavali avekuta.+ 13 Tyina wamevepe-vio, opopila ponthele ya Siovaa Huku yove oti: ‘Napola meumbo liange ovikuna vikola, andyiviaavela vomuhoko wa Levii, nonthunda-vilongo, nomona wehena he, nomuhepe,+ nalinga etyi wanthuma. Haliatelele kovitumino viove, nii hevilingile omusenyo. 14 Hevilile tyalula, heviyamene tyasila, nii hapolele-ko natyike hapolelele-ko vokwankhia. Netavela ondaka ya Siovaa Huku yange, andyilingi atyiho anthuma. 15 Pahe, tala-vo mombwelo, keumbo liove oko likola ukala, keulu, tala-vo mombwelo ope oviwa ovanthu vove ova Isilayeli, ope elao otyilongo etyi wetwaavela,+ etyi wapopilile ovakwaukulu vetu,+ otyilongo tyomahini nowiki.’+

16 “Hono Siovaa Huku yove, wati, una okutavela ovitumino evi aviho, ovitumino aviho vionomphela. Vitavela, endela-mo nomutima wove auho,+ nohande* yove aiho. 17 Hono etyi tyapopia Siovaa wetyiiva, wetyiiva etyi ati makala vala Huku yove, putyina ove weendela monondyila mbae,+ otavela ovitumino viae,+ otavela evi ekulonga, novitumino viae vionomphela,+ putyina utehelela ondaka yae. 18 Hono, etyi onwe mwapopia Siovaa wetyiiva, wetyiiva etyi mwati mamukala ovanthu vae, ovanthu vae velikalela,*+ ngeetyi ekupopilile, wetyiiva etyi mwati mamutavela ovitumino viae aviho. 19 Ngwe wati malingi etyi emupopilile, memukulameka, amulambe-po ovanthu aveho vovilongo ovikwavo alinga,+ emupe omunkhima, nounene, nouwa, putyina onwe mutwala-ko okukala ovanthu vakola va Siovaa Huku yenyi.”+

27 Pahe atyiti na Mwisesi, novakulu ova Isilayeli, avatalama komutwe wovaunyingi, Mwisesi ati: “Tavelei ovitumino aviho hono ndyili nokumupopila. 2 Onthiki onwe muyauka o Solondau amunyingila motyilongo Siovaa Huku yenyi memwaavela, talamekei omamanya omanene, amweehoto.*+ 3 Amuhoneka-ko onondaka ambuho Mbovitumino evi, mumbuhoneka tyina mwamayauka ondongi yo Solondau, opo munyingile motyilongo Siovaa Huku yenyi memwaavela, otyilongo tyomahini nowiki, ngeetyi Siovaa Huku yovakwaukulu venyi emupopilile.+ 4 Tyina onwe mwamayauka ondongi yo Solondau, muti yaukee amukatalameka omamanya oo Komphunda Embale,+ amweehoto,* amulingi ngeetyi ndyikahi nokumupopila hono. 5 Tupu tungei-ko omutala wovilikutila, omutala wa Siovaa Huku yenyi, ulinge omutala womamanya. Pomamanya atyo, mwahapakei-po otyivela.+ 6 Tungei omutala wa Siovaa Huku yove, omutala wovilikutila, utungei nomamanya ahavambaulilwe, ngako mulingila Siovaa Huku yenyi otyiawa tyokuyokwa. 7 Avei ovilikutila viombembwa,+ ngapo muvilila,+ lingei ngootyo muhambukilwe pu Siovaa Huku yenyi.+ 8 Onondaka Mbovitumino+ evi mohoneka komamanya mbumoneke umwe nawa.”

9 Ovo Mwisesi no vomuhoko wa Levii ovanakwa, avapopila ova Isilayeli aveho, avati: “Vakwe tehelei kuno, tehelelei kuno onwe va Isilayeli. Onwe hono mwalinga ovanthu va Siovaa, mwalinga ovanthu va Huku yenyi.+ 10 Tehelelei ondaka ya Siovaa Huku yenyi, tavelei ovitumino viae+ nondongwa mbae, ombu hono ndyili nokumutolela.”

11 Monthiki yatyo omo, Mwisesi atolela ovaunyingi ati: 12 “Tyina onwe mwamayauka o Solondau, vomuhoko wa Simiyau, no wa Levii, no wa Sundaa, no wa Isakale, no wa Susee, no wa Mbesamii, aveho vatalame Komphunda Selisii,+ avapeleyila oviwa ovanthu aveho. 13 Ava vomuhoko wa Lumbe, no wa Ngande, no wa Asele, no wa Sembulau, no wa Ndaa, no wa Nafitalii vakatalame Komphunda Embale,+ avateyela ovanthu onkhano. 14 Ava vomuhoko wa Levii, vapopile ovalume aveho ova Isilayeli, vevepopile nondaka yakaluluka+ okuti:

15 “‘Una uhonga otyika-huku+ akatengale, akatengale una unthila otyilolo,*+ otyipuka tyitoyesa Siovaa,+ otyika-huku tyalingwa komavoko omunongo.* Una utyiholeka akatengale.’ (Ovanthu aveho avati: ‘Amem!’*)

16 “‘Akatengale, una ulinga onya tate yae, hamwe alingi onya ina.’+ (Ovanthu aveho avati: ‘Amem!’)

17 “‘Akatengale, una uhondovola onondimbu mbavo na mukwavo.’+ (Ovanthu aveho avati: ‘Amem!’)

18 “‘Akatengale, una uvombesa omumphoki, una umupola mondyila.’+ (Ovanthu aveho avati: ‘Amem!’)

19 “‘Akatengale, una upengesa omphela+ yonthunda-vilongo, una upengesa omphela yomona wehena he,* upengesa omphela yomuhepe.’+ (Ovanthu aveho avati: ‘Amem!’)

20 “‘Akatengale, una ulala nomukai wa he, otyipuka tyikundisa he.’*+ (Ovanthu aveho avati: ‘Amem!’)

21 “‘Akatengale, una ulala notyinyama.’+ (Ovanthu aveho avati: ‘Amem!’)

22 “‘Akatengale, una ulala nomphange yae, tyilinge omona wa he tyilinge omona wa ina.’+ (Ovanthu aveho avati: ‘Amem!’)

23 “‘Akatengale, una ulala na inaivi.’+ (Ovanthu aveho avati: ‘Amem!’)

24 “‘Akatengale, una uyolamena mukwavo emwipaa.’+ (Ovanthu aveho avati: ‘Amem!’)

25 “‘Akatengale, una utavela okulipumwa-po aipaa* omunthu wehena etyi alinga.’*+ (Ovanthu aveho avati: ‘Amem!’)

26 “‘Akatengale, una wehetavela onondaka Mbovitumino evi, ahalingi etyi viapopia.’+ (Ovanthu aveho avati: ‘Amem!’)

28 “Ine ove utehelela umwe nawa ondaka ya Siovaa Huku yove, otavela ovitumino viae aviho ndyikupopila hono, tyotyili Siovaa Huku yove mekekukulameka, olambe-po ovanthu vovilongo aviho vili kombanda yohi.+ 2 Ine ove apeho utehelela ondaka ya Siovaa Huku yove, momono oviwa evi aviho,+ avikekulandaula:

3 “Mokayambwa, tyilinge mepunda-umbo, tyilinge mepia.+

4 “Ovana vove mavakayambwa,*+ ovikuna vyo motyilongo tyove mavikayela, ovipako viove mavikaviuka, ononkhembe mbove, noviketa vionongi mbove.+

5 “Osesu yove maikeyula-yula,+ etemba liove malikahamphiauka.+

6 “Atyiho matyikekweenda nawa, no pokunyingila, no pokulupuka.

7 “Onondyale mbove vahanda okukulwisa, Siovaa mekevetilisa, mekevetilisila umwe momaiho ove.+ Pokukulwisa mavatumbukila nthele ike, mahi pokukahomboka avelitipauka.+ 8 Siovaa mekekupa elao, novimbundu viove mavikeyula-yula.+ Tyotyili, Siovaa Huku yove mekekuyamba motyilongo mekwaavela. 9 Siovaa mekemulinga ovanthu vae,+ ovanthu vakola, ngeetyi emupopilile aane,+ mokonda onwe muli nokutavela ovitumino vya Siovaa Huku yenyi, muli monondyila mbae. 10 Ovanthu aveho kombanda yohi maveketyimona okuti onwe muvanthu va Siovaa,+ maveketyimona avemutili owoma.+

11 “Siovaa mekekupa ovana ovanyingi, novipako ovinyingi, nofika iyela ovikuna,+ ovio Siovaa mekekupa ovio motyilongo mekwaavela, otyilongo apopilile ovakwaukulu vove.+ 12 Siovaa mekekupatulila ovimbundu viae oviwa, eulu, alokesa ombila motyilongo tyove momuvo watyo,+ ekuyambe, atyiho ulinga atyiviuku. Ove mokalevalesa ovanthu vovilongo ovinyingi, mahi ove kumekevelevala.+ 13 Siovaa mekekulinga omutwe, kamekekulinga omutyila, mekekupaka peulu,+ kamekekupaka pombwelo, mekekulinga-tyo vala putyina ove utavela apeho ovitumino vya Siovaa Huku yove, olingi umwe etyi viapopia, ovitumino evi hono ndyikupopila. 14 Wahayapuke monondaka ambuho ndyikupopila hono, wahayembe nii kokulio nii kokumbili,+ wahaye kono huku ononkhwavo ngambo ukafenda.+

15 “Mahi ine kutehelela ondaka ya Siovaa Huku yove, ine kutavela ovitumino viae, ovitumino viae ndyikupopila hono, kumakaviuka, mokatengala:+

16 “Mokatengala tyilinge mepunda umbo, tyilinge mepia.+

17 “Osesu yove kaikeyula,+ metemba liove kamukakala natyike.+

18 “Ovana vove mavakatengala,*+ atyiho novikuna vyo motyilongo tyove mavikatengala, nononkhembe mbove, noviketa vionongi mbove.+

19 “Mokatengala, kumakaviuka tyilinge pokunyingila tyilinge pokulupuka.

20 “Siovaa mekekuyumba ovihuna, nonondyaya, evi ulinga ovio mekekumasula navio, atee uhanywa-ko, ovombo-ko vala liwa-liwa, mokonda yonontheto mbove onombi, mokonda wandyeka-po.+ 21 Siovaa mekekuyekela ouvela, atee ekunyima-mo motyilongo monyingila.+ 22 Siovaa mekekuyumba onkhololo onene, nelema,+ novimita, noutalala, mekekuvanga nomutunga,+ mekekutahela omutenya watokota, nonkhume.+ Ovipuka ovio mavikekumonesa ononkhumbi onyimi-ko. 23 Eulu kombanda yove malikala otyitasu, ei ohi, ohi ei uliata, aikala otyivela.+ 24 Ombila iloka motyilongo tyove, Siovaa mekeityitula ombuma, mekeityitula eheke, aiwila kombanda yove atee unyima-ko. 25 Siovaa mekekuyekela onondyale mbove,+ otili-ko. Pokukevelwisa movetumbukila nthele ike, mahi pokukahomboka amulitipauka. Onohamba+ ambuho kombanda yohi mambukekutila owoma. 26 Ove okunkhia, mokalinga okulia kwoviila meulu, mokalinga okulia kwovinyama vili kombanda yohi, apahamono nawike uvitaata.+

27 “Siovaa mekekuyumba ovinthimba vyo ko Isitu, nouvela wondyange, nonombulu, novipute molutu, ovipute viahaveluka. 28 Siovaa mekekuyumba embili-mbili, noumphoki,+ nonondyaya.* 29 Na tyina weenda komutenya watokota mokahihita ngomumphoki uli menthiki.+ Ovipuka aviho ulinga kavikaviuka. Mokakalaila vala okupolwa tyove, nokuvakwa, apahamono ou ukuyovola.+ 30 Ove mokakala nomuhikwena, mahi mulume mukwenyi ekemukwata kononkhono. Mokatunga ondywo ohakala-mo.+ Mokatwika omiti vionouva, ohamakela-ko.+ 31 Ongombe yove onthwei maikaipaelwa umwe momaiho ove, mahi ove ohakalia-ko. Otyimbulu tyove matyikavakelwa momaiho ove, mahi ove kumeketyityilika-ko. Ongi yove maikapewa onondyale mbove, apahamono ou wiiyovola-ko. 32 Ovana vove ovakwendye, novakainthu mavakapewa ovanthu votyilongo otyikwavo+ otyo ove utala, mokeveivaluka, mahi omavoko ove etupu apa maakapola ononkhono. 33 Ovinyango viohika yove, novikuna viatyo, mavikaliwa novanthu wehei,+ ove mokakalaila vala okupolwa viove, nokulingwa onya. 34 Etyi omaiho ove maakamona, matyikekuhalukisa.

35 “Siovaa mekekuyumba ovinthimba viihama unene, ovinthimba viahaveluka, mavikakwata ponongolo, nomovikalo, okuhimbikila mouwa womphai atee pombalanganga. 36 Matyiti umwe noove, nohamba wakoya, Siovaa mekemutwala kotyilongo onwe mwehei, otyilongo no voho ankho vehei.+ Ove mokafenda ono huku ononkhwavo, ono huku mbomiti, ono huku mbomamanya.+ 37 Otyipuka mokalingwa matyikatilisa owoma ovanthu, mokakalaila vala okupenywa,* nokukwelwa pokati kovanthu aveho mokavasa oku Siovaa eli nokukutwala nako.+

38 “Mokakuna ombuto onyingi mepia, mahi okateya-mo vala katutu,+ mokonda mavikaliwa-mo novimphunia-mphunia. 39 Mokatwika omiti vionouva, mahi kumakanwa ovinyu yatyo, nii kumakatokola-ko otyinyango,+ mokonda mavikapwa komativa. 40 Mokakala nomindyambi motyilongo tyove atyiho, mahi kumakawava omulela, mavikalaumuka vala. 41 Mokatyita ovana ovakwendye novakainthu, mahi kavakalinga vove, mavakatwalwa koupika.+ 42 Ounyama ounyingi-nyingi,* maukanyona omiti viove aviho, novinyango viomofika yove. 43 Onthunda-vilongo mukala nae makakulama ekulambe-po, otyo ove wenda vala no pohi. 44 Mekekulevalesa, mahi ove kumekemulevalesa.+ Ngwe makakala omutwe, ove okakala omutyila.+

45 “Ovihuna ovio aviho+ maviya kombanda yove, omono ononkhumbi, aviehekuyeke umwe atee unyima-ko,+ mokonda, kwatehelelele ondaka ya Siovaa Huku yove, kwetavelele ovitumino ekupopila,+ kwetavelele etyi ekulonga. 46 Movihuna omo, omo mopangaila vala, novana vove omo vala vakapangaila, ngako ulondaukila,+ 47 mokonda, kwalingilile Siovaa Huku yove nehambu, kwemulingilile nomutima welihandya pweetyi ankho una atyiho.+ 48 Siovaa makatuma onondyale mbove, ambukulwisa, okembuundapela nondyala,+ nohunga, nepene, okembuundapela tyehena natyike.+ Mekekupaka okanga yotyivela pekohi, mekuyekela-yo umwe atee unkhia.

49 “Siovaa mekekweetela ovanthu vokokule-kule,+ oku kwaoyela ohi, avekulwisa. Mavekekuyombela lwonkhombe.+ Ovanthu ovo, ovanthu vamwe vapopia elaka ove wehei.+ 50 Ovanthu vamwe vena ovipala vitilisa owoma, vahamesuku nombwale, vahamalingi onkhenda omukwendye.+ 51 Ovanthu ovo, mavakalia oviketa viove, nononkhembe mbove, novikuna viomomapia ove, atee unyima-ko. Kamavakasa-po natyike, tyilinge ovilia, tyilinge ovinyu omphe, tyilinge omulela, tyilinge onkhembe, tyilinge otyiketa, mavekupolo atyiho avekuhanye-ko.+ 52 Mavekekuhondyela momapunda-umbo ove aeho,* momapunda-umbo otyilongo tyove, nga-mo vekwiikila, atee ovimato viove viokwapama viwa-po, evi uyumba onthumbi. Mavekekuhondyela umwe momapunda-umbo ove aeho, motyilongo tyove, otyilongo Siovaa Huku yove ekwaavela.+ 53 Ove mokalia ovana vove, ohitu yovana* vove ovakwendye novakainthu,+ ava Siovaa Huku yove ekwaavela, ovo mokalia mokonda yongandyo itilisa owoma onondyale mbove vahondya, mokonda yononkhumbi mavekumonesa.

54 “Motyilongo tyenyi, nomulume wokusuka umwe na vakwavo, uhole ovanthu, kamakaetehila-mo onkhenda ou velilandula nae, kamalingi onkhenda omukai wae ehole, nii ovana vae nkhele esala navo, 55 nii kamekevetepulila kohitu yovana vae, ava makalia-po, nae utupu vali apa akwatelela mokonda yongandyo itilisa owoma onondyale mbove vahondya, nemone mavaeta momapunda-umbo enyi.+ 56 “Omukai wokusuka na vakwavo, omwali wovanthu, ankho una-tyo, ankho wahasoko-ale okupaka omphai yae pohi,+ kamakalinga okankhenda omulume wae ehole, nomona wae omukwendye, nomukainthu, 57 kamekevetepulila nii vala katutu kovana vae makalia-po, ovana vae akutula, noko tyo konyima tyitunda pokati kovikalo viae, kekevetepulila-ko. Makalila pokamphengi mokonda yongandyo itilisa owoma onondyale mbove vahondya, nemone mavaeta momapunda-umbo enyi.

58 “Ine ove kutavela onondaka ambuho Mbovitumino evi, mbahonekwa momukanda ou,+ ohatili enyina eli enene litilisa owoma,+ enyina lya Siovaa+ Huku yove, 59 matyiti umwe noove novanthu aveho vakatuka mwoove, Siovaa memutahela ovihuna ovinene vitilisa owoma,+ vililandula vala, nomauvela ahaveluka. 60 Mekekweetela vali omauvela aeho oko Isitu, ana watilile owoma. Omauvela oo okukutumbukila, kaekekuyeka-yeka vali. 61 Siovaa mekekutahela omauvela omakwavo, mekekutahela ovihuna viahahonekelwe momukanda ou Wovitumino, mekekuyekela-vio umwe atee unyimwa-ko. 62 Namphila onwe mwalinga ovanyingi unene ngononthungululu meulu,+ pwoonwe mapakahupa vala ava vehehi.+ Mokonda, kamwatehelelele ondaka ya Siovaa Huku yenyi.

63 “Ngeetyi Siovaa ahambukililwe okumukulisa, mulinge ovanyingi, otyo ñgoo Siovaa makakala pokumuhanya-ko, pokumunyima-ko. Motyilongo mamunyingila, mamukatukulwa-mo.

64 “Siovaa mekekukuva movilongo aviho, okahakwa oku kwaoyela ohi.+ Kovilongo oko moi, ove mokafenda ono huku mbomiti, no mbomamanya, ono huku ove wehei, ono huku no voho ankho vehei.+ 65 Kovilongo oko moende kumakamona ombembwa,+ utupu apa mokapaka omphai yove upululukwe-vo vala. Siovaa mekekupa omutima wotyiho,+ wehulilwa,* mekekupa omaiho ahamono-po nawa.+ 66 Omwenyo wove mokeutyinda vala peke, mokatila owoma komutenya no kounthiki, ohulilwa umwe na apa uhupila ohepemono vali. 67 Tyina kutya moti: ‘Kakunthikovelela-tyi pahe!’ Etyi kunthikovela oti: ‘Kakutyila-tyi pahe!’ Matyikekupopisa ngootyo, omutima wove maukatila unene owoma, ovipuka omaiho ove maakamona. 68 Siovaa mekemukondola ko Isitu nombaluku, emukwatesa mondyila ei nemutolelele okuti: ‘Onwe kamamukwata-kwata-mo vali,’ amukelilandesa konondyale mbenyi mulinge ovapika, mahi petupu ou mekemulanda-po.”

29 Ombu onondaka mbomphango Siovaa atumine Mwisesi, omphango Mwisesi alingile nova Isilayeli motyilongo tyo Moambe, atentheka ku ina alingile-ale navo ko Holembe.+

2 Mwisesi aongiya ova Isilayeli aveho, evetolela okuti: “Onwe mwamona atyiho Siovaa alinga otyo mutala, etyi alinga motyilongo tyo Isitu, neetyi alinga Falaoo, novalingilili vae aveho, etyi alinga otyilongo atyiho tya Falaoo,+ 3 mwamona onomphela ononene,* novipuka ovinene, ovipuka vihuvisa.+ 4 Mahi na hono,+ Siovaa kemupele omutima wekungunyiko, kemupele omaiho okutala, kemupele omakutwi okutehelela. 5 ‘Omanima aa 40 nakala noonwe moluhandya,+ ovikutu vienyi kaviapwile, ononkhaku mbo konomphai mbenyi+ kambapwile. 6 Onwe kamwalile ombolo, kamwanwine ovinyu, kamwanwine ovikunwa ovikwavo vipialukisa, ovipuka ovio kamwevimwene munoñgonoke okuti, ame, ame Siovaa Huku yenyi.’ 7 Pahe onwe ava mwehika pano. Etyi mwehika pano, Siyoo Ohamba yo Hesimboo,+ na Onge Ohamba yo Mbasaa,+ aveya okutulwisa, mahi ku onthwe avahavete-ko.+ 8 Otyilongo tyavo atutyipolo-ko, atutyaavela vomuhoko wa Lumbe, no wa Ngande, novana vamwe va Manasesi,+ ngatyo tyikala tyavo. 9 Pahe, tavelei onondaka mbomphango ei, mbutavelei, aviho mulinga vimweende nawa.+

10 “Onwe amuho, hono muli pu Siovaa Huku yenyi: Onohongoi mbomihoko vienyi, novakulu vatyo, novatumini vomafwalali, ovalume vatyo aveho ova Isilayeli, 11 novana venyi, novakai venyi,+ nononthunda-vilongo+ veli monthanda yenyi, aveho no vokumutiavela ononkhwii, no vokumutapela omeva. 12 Hono onwe muli pano, mwaane, na munyingile momphango ya Siovaa Huku yenyi, omphango Siovaa Huku yenyi malingi hono,+ 13 opo emulinge ovanthu vae,+ ngwe alingi Huku yenyi,+ ngeetyi apopilile ovakwaukulu venyi, ovo Ambalayau,+ na Isake,+ na Sakoo.+

14 “Hanwe vala nalinga noonwe omphango, hanwe vala napopila andyaane, 15 mahi, ndyilinga omphango na ava tuna-vo pano hono, pu Siovaa Huku yetu, na ava twehena-vo pano. 16 (Onwe mutyii umwe nawa etyi ankho tukahi, etyi tuli kotyilongo tyo Isitu, na apa twakwata-kwata mupei nawa, twakwata pokati kovanthu vovilongo ovinyingi.+ 17 Mwamona-mona ovipuka vitoyesa vena-vio, ovilolo vitoyesa*+ viomiti, ovilolo viomamanya, no viopalata, novilolo vyo olu ankho vena-vio pokati kavo.) 18 Lungukei, pokati kenyi pahakale omulume nawike wayapuka ku Siovaa Huku yetu, nii omukai, nii ovanthu vombunga imwe, nii vomuhoko umwe vomutima wayapuka vakafenda ono huku mbovanthu vovilongo ovikwavo,+ mwahakalei navo, pokati kenyi pahakale omwii woukola, nii otyifo tyilula.+

19 “Mahi ine pena umwe weiva umwe onondaka ombu, mahi omutima wae aumutyindi elipakeko ati: ‘Ame mandyeendela umwe monondyila omutima wange wahanda, mwene mandyikala-le nombembwa,’ pahe anyono atyiho* tyili mondyila yae, 20 Siovaa kamemupolelapo ati otyiponyo.+ Siovaa mankhila ononyengo omunthu oo ononkhano ambuho mbahonekwa momukanda ou ambumweendela,+ Siovaa makanyima enyina liomunthu oo mombwelo yeulu. 21 Pomihoko viova Isilayeli aviho, Siovaa mekemupola-po akamone ononkhumbi, makamona ononkhumbi mbutuka kononkhano mbapopiwa momphango yahonekwa momukanda ou Wovitumino.

22 “Kumbi ovana venyi vakatyitwa komutwe wandyila, nonthunda-vilongo yatunda kokule, aveho maveya okumona ovihuna viakwata motyilongo tyino, atyiti umwe omauvela Siovaa maeta-mo, 23 oisofele, omongwa, otupia, otyilongo atyiho atyahakunwa, atyahamene oluhongo, atyahamene eholi, ngo pehanyauno lyo Sondoma no lyo Ngomola,+ no lyo Andimaa no lyo Semboi,+ ovilongo Siovaa ahanyene-ko etyi anumana, etyi ankho ankhia onyengo, 24 matyiti ovana ovo, onthunda-vilongo oyo, ovanthu vovilongo aviho, mavakati: ‘Oityi Siovaa alingila ñgaa otyilongo etyi?+ Oityi ankhila unene onyengo ñgaa, onyengo yatokota ngeetyi?’ 25 Ovanthu avakati: ‘Omokonda vayeka-po omphango ya Siovaa+ Huku yovakwaukulu vavo, ei alingile navo etyi evepola kotyilongo tyo Isitu.+ 26 Veisa-po, vakafenda ono huku ononkhwavo, vekelipetamena kumbo, ono huku ankho vehei, ombu ankho ahayeke vembufende.*+ 27 Otyo Siovaa ankhila onyengo anumanena unene otyilongo etyi, wetyitahela ononkhano ambuho mbahonekwa momukanda ou.+ 28 Otyo Siovaa anumanena unene, otyo evetukulila motyilongo tyavo, vemunkhisa ononyengo,+ anumana unene evetwala kotyilongo otyikwavo, oku pahe hono veli.’+

29 “Ovipuka viakwaholama, ovia Siovaa Huku yetu.+ Mahi evi vili-ale poluhandya, ovio vilinga vietu, vikalinga-linga vietu novana vetu, tulinge umwe ngeetyi tyapopiwa Movitumino evi aviho.+

30 “Tyina onondaka ombo ambuho mbamelimonekela, omono aviho nekupopila ove mwene pahe wakoya,+ tyilinge oviwa, tyilinge ovivi, ove ombuhinangelela,*+ okembuhinangelela kovilongo oku Siovaa Huku yove mekutwala-twala na-ko,+ 2 okondoka ku Siovaa Huku yove+ nomutima wove auho nohande*+ yove aiho, otehelela ondaka yae, atyiti umwe noove novana vove amulingi atyiho ndyili nokupopia hono, 3 opo, Siovaa Huku yenyi, koukonde+ mekekuyovola-ko. Siovaa Huku yove mekekulinga okankhenda,+ ekekupola vali pokati kovanthu aveho ekutyandyanesa.+ 4 Na tyina ovanthu vove velityandyana avekehika oku kwakaoyela ohi, oko umwe Siovaa Huku yove mekekupola, ekweeta.+ 5 Siovaa Huku yove mekekunyingiya motyilongo ovoho vapewa, noove ngamo ukala. Mekekukwatesako, atyiho atyikweende nawa, ekemulinga ovanyingi, amulambe apa ovoho velifwile.+ 6 Siovaa Huku yove, makakoha* omutima wove, nomitima viovana vove,+ ohumbu Siovaa Huku yove nomutima wove auho, nohande* yove aiho, opo ukamone omwenyo.+ 7 Siovaa Huku yove, makanthingula vokukuyele avakantengala, aveho vekuyele, vekumonesa emone.+

8 “Ove mokakondoka ku Siovaa otehelela ondaka yae, otavela ovitumino aviho hono ndyikupopila. 9 Siovaa Huku yove mekekuyamba, ovilinga aviho ulinga nomavoko ove+ avikekupa, mekekupa ovana ovanyingi, mekekupa elao ovipako viove avikelityita, ovikuna vyo momapia ove avikayela. Siovaa mahambukwa ekuyambe vali ngeetyi alingile ovakwaukulu vove.+ 10 Opo, opo pahe moketavela ondaka ya Siovaa Huku yove, otavela ovitumino viae, neevi ekulonga vili momukanda ou Wovitumino, okondoka ku Siovaa Huku yove nomutima wove auho nohande*+ yove aiho.

11 “Ovitumino evi hono ndyikupopila, vina kavikupwiya-le, kaviekukalele-ale kokule.*+ 12 Viati umwe avieheli keulu, hamwe utie: ‘Olie mai keulu, eketweetele-vio tuviive tutyivile okulinga etyi viapopia?’+ 13 Avieheli nthele-ina-elunga, hamwe utie: ‘Olie mai-ko eketupolele-vio tuviive tutyivile okulinga etyi viapopia?’ 14 Mahi, ondaka unayo umwe popepi, unayo umwe momulungu, unayo momutima,+ unayo-ale itavela vala.+

15 “Tala, hono nkhupa onondyila onombali. Imwe ikutwala koviwa, komwenyo, ei onkhwavo ikutwala kovivi, kononkhia.+ 16 Ine utavela ovitumino vya Siovaa Huku yove evi hono ndyikupopila, ohumbu Siovaa Huku yove,+ oendela monondyila mbae, ohayeke-po ovitumino viae, neevi ekulonga, novitumino viae vionomphela,+ opo mokamona omwenyo, amukalinga ovanyingi. Siovaa Huku yove mekekuyamba, mekekupa oviwa motyilongo moende.+

17 “Mahi omutima wove okuyapuka,+ awehetavela, ohindilwa, okelipetamena kono huku ononkhwavo, ngambo ufende,+ 18 ame ndyimupopila hono okuti, mamunkhi.+ Motyilongo mamweende, kamukakala ehimbwe, motyilongo mamunyingila tyina mwamayauka o Solondau. 19 Tyati umwe eulu lityeete ei ohi ityeete okuti nemupa onondyila onombali, ei o yomwenyo ei o yononkhia, ei o yoviwa, ei o yovivi.+ Pahe ove koya-po yomwenyo,+ tyitie umwe noove novana vakatuka mwoove+ mukamone omwenyo, 20 humba Siovaa Huku yove,+ tehela ondaka yae, kakatela mwe,+ oe omwenyo wove, Siovaa oe mekekupa oviwa okakala motyilongo apopilile ovakwaukulu vove, ovo Ambalayau, na Isake na Sakoo,+ etyi apopile aane.”

31 Mwisesi akatuka, apopila ova Isilayeli aveho onondaka ombu ambuho, 2 ati: “Hono ame navetesa omanima 120.+ Ame hame-ko vali nkhalamutwe yenyi,* Siovaa wamphopila okuti: ‘Ove kumayauka o Solondau ei.’+ 3 Siovaa Huku yenyi, oe memukalela komutwe emuyaula o Solondau, makahanya-ko ovanthu ovo vovilongo, eveipaa umwe otyo mutala, onwe mamuvetaata-mo.+ Susuwee oe memukalela komutwe emuyaula ondongi,+ otyo Siovaa apopia. 4 Siovaa, ovo mekevelinga etyi alinga ovo Siyoo+ na Onge,+ onohamba mbova Amoleu, etyi alinga otyilongo tyambo, pweetyi evehanya-ko.+ 5 Siovaa oe mekemulwila-ko, kwoonwe mavatili-ko, onwe velingei atyiho nemupopila.+ 6 Kola omutima, kala tyapama.+ Wahatile owoma, wehevetile owoma tyina wenda kuvo,+ Siovaa Huku yove, mekukalela komutwe. Kamahondovoka pu ove, nii kamekuyeke.”+

7 Pahe, Mwisesi aihana Susuwee otyo ova Isilayeli aveho vatala, emupopila okuti: “Kola omutima, kala tyapama,+ ove ove monyingiya ovanthu ava motyilongo Siovaa apopilile ovakwaukulu vavo, otyilongo apopile aane, ove mokevepa-tyo, tyilinge tyavo.+ 8 Siovaa oe mekukalela komutwe, kamekuyeke, makala-kala vala noove.+ Kamahondovoka pwoove, nii kamekuyeke. Wahatile owoma, wahalinge otyiho.”+

9 Mwisesi ahoneka Ovitumino ovio,+ eviaavela vomuhoko wa Levii ovanakwa, vatyinda Otyikasa tya Siovaa Tyomphango, novakulu aveho vova Isilayeli. 10 Mwisesi evepopila ati: “Apeho tyina enima lya pandu-vali liamapu, tyina tyamati pononthiki mbanakwa, ononthiki mbeyovo,+ Potyipito Tyomakaka,*+ 11 tyina ova Isilayeli aveho vameya ku Siovaa Huku yenyi,+ aveya apa akoya, tangei Ovitumino evi, vitangelei ova Isilayeli aveho veviive.+ 12 Ongiya ovanthu aveho,+ novalume, novakai, novana,* nononthunda-vilongo muna-vo momapunda-umbo enyi,* vatehelele Ovitumino vitangwa, vanoñgonoke Siovaa Huku yenyi, vemutile owoma, avetavela onondaka ambuho Mbovitumino. 13 Ava ovana vavo vehei Ovitumino, apa vevitehelela,+ mavanoñgonoka okuti vena okutila owoma Siovaa Huku yenyi, ngatyo valinga ononthiki ambuho muli motyilongo mamupewa apa muyauka ondongi yo Solondau.”+

14 Siovaa apopila Mwisesi ati: “Tala! Onthiki yononkhia mbove, ili pepi.+ Ihana Susuwee, amweende nae* pekaka liomaliongiyo, eye kuno ndyimupe otyilinga akale onkhalamutwe.”+ Ava ovo Mwisesi na Susuwee avaende pekaka liomaliongiyo. 15 Siovaa eya pekaka liomaliongiyo momukundu-kundu wekaka, ekaka limwe lielitunga, litai, alitalama pombundi yekaka liomaliongiyo.+

16 Siovaa atolela Mwisesi ati: “Tala! Ove apa katutu monkhi,* ovanthu ava, mavahimbika okulinga oumbalehi nono huku vehei, ono huku mbeliseta notyilongo tyavo omu mavaende.+ Mavakandyeka-po,+ avaliatela komphango nalinga navo.+ 17 Pononthiki opo, onyengo yange maikevetokotela,+ andyiveyeke-po,+ andyiholeka otyipala tyange kuvo+ avahanywa-ko. Tyina vamatumbukilwa novihuna ovinyingi, avamono ovitateka,+ mavati: ‘Okuti ovihuna evi tumona ñgaa ha Huku yetu weheli vali pokati ketu?’+ 18 Mahi ame mandyiveholeka umwe otyipala tyange monthiki yatyo oyo, ovivi valinga ovinene, vaya kono huku ononkhwavo.+

19 “Pahe, honekei otyiimbo etyi,+ amutyilongesa ova Isilayeli.+ Velongesei-tyo,* tyikale tyoumbangi pokati ketu nova Isilayeli.+ 20 Tyina namevetwala motyilongo napopilile ovakwaukulu vavo,+ etyi napopile andyaane, otyilongo tyomahini nowiki,+ avali avekuta, ovipuka aviveende nawa,*+ mavaende no kono huku ononkhwavo ngambo vakafenda, avahandingi vali onthilo, avaliatela komphango yange.+ 21 Tyina vamatumbukilwa novihuna ovinyingi,+ avamono ononkhumbi, otyiimbo etyi matyilingi ombangi (tyeetyi ovana vavo kamavetyilimbwa), mokonda oku vayembela ndyikulwete-ale,+ nekumona-le tyina nkhele nehenevenyingiye-ale motyilongo nevepopilile, etyi napopile andyaane.”

22 Mwisesi ahoneka otyiimbo otyo monthiki yatyo omo, etyilongesa ova Isilayeli.

23 Pahe, aavela* Susuwee+ omona wa Nuu, otyilinga tyounkhalamutwe, emuti: “Kola omutima, kala tyapama,+ ove ove monyingiya ova Isilayeli motyilongo nevepopila,+ ame mandyitwalako okukala noove.”

24 Etyi Mwisesi amana okuhoneka onondaka ambuho Mbovitumino evi pomukanda,+ 25 apopila vomuhoko wa Levii vokutyinda otyikasa tya Siovaa tyomphango, ati: 26 “Tambulei omukanda ou Wovitumino,+ amuupake potyikasa+ tya Siovaa Huku yenyi tyomphango, ngapo ukala, omukanda ou ulinge ombangi. 27 Mokonda ame ndyimwii nawa, onwe kamutavela,+ kamutehela.*+ Tyalinga ndyina omwenyo onwe kamwetavelele Siovaa, apa pahe ndyinkhia kamatyivili-po! 28 Ongiyei ponthele yange ovakulu vomihoko vienyi aveho, ongiyei nononkhalamutwe mbomafwalali enyi, ndyipopie onondaka ombu, vetyiivite, onombangi mbetu eulu nohi.+ 29 Ame ndyityii nawa okuti, tyina ame namankhi onwe mamulingi umwe ovivi,+ mamuyapuka mondyila nemutuma. Mahi kumbi mamutumbukilwa novihuna,+ mokonda, onwe mamulingi ovivi komaiho a Siovaa, mamumuleve novilinga vyo pomavoko enyi.”

30 Pahe Mwisesi apalukununa onondaka mbotyiimbo otyo, etyihimbikila konthyimbi etyivitula otyo ova Isilayeli aveho vatehelela, ati:+

 3 Ame mandyikaivisa enyina lya Siovaa.+

Hipululei ounene wa Huku yetu!+

 5 Ovo, ovo mwene valinga etyi tyapenga.+

Ovo havana vae-ko, ovo mwene vena otyinthembia.+

Ovo ovanthu vamwe vokwapenga, vahasilivila!+

15 Etyi Sesulu* pahe anina,* alingi omphuki, asane mwo ou wemweetele kouye.

Ove pahe wanina, pahe wakola, pahe wekuta unene.+

29 Ine vali ovanongo ñgeno hahe!+ Ñgeno vasoka!+

Ñgeno vasoka ovipuka valinga mavikeveetela-tyi.+

Mbupinduke-po mbumukwatesako.

Mbuye mbumuyakulile.

Ame nati umwe okwiipaa ndyityivila, okupa omunthu omwenyo ndyityivila.+

44 Mwisesi eya, apitulula motyiimbo etyi atyiho otyo ovanthu aveho vetyiivite.+ Mwisesi vali na Oseya*+ omona wa Nuu. 45 Etyi Mwisesi apopila ova Isilayeli aveho onondaka ombo ambuho, 46 pahe eveti: “Pakei momutima onondaka ombu napopia hono,+ onondaka mbumulondola, mutyivile okumbupopila ovana venyi, navo valinge atyiho tyipopia Mbovitumino evi.+ 47 Onondaka ombu napopia, ombu hanondaka vala, onondaka mbumupa omwenyo.+ Onondaka ombo mbupondola okukemupa nomwenyo motyilongo mamukakala tyina mwamayauka o Solondau.”

48 Siovaa apopila Mwisesi monthiki yatyo oyo, ati: 49 “Londeka komphunda ei yo Ambalii,+ Omphunda yo Nembu+ yokuli motyilongo tyo Moambe, yapilukila mo Selikoo, otale otyilongo tyo Kanaa, otyilongo mandyaavela ova Isilayeli, omu mavakala.+ 50 Komphunda oko moi nako, oko mokankhila, wende kovenyi,* ngeetyi omukulu wove Alau anyimina Komphunda yo Hole,+ aende kovavo, 51 onwe vevali kamwalingile etyi napopile, kamwenthavelele komaiho ova Isilayeli, pomaande oko Melimbaa+ ko Kande moluhandya lwo Sii, onwe kamwankhimanekelele pova Isilayeli.+ 52 Otyilongo ove moketyitalela vala kokule, mahi kumanyingila motyilongo mandyaavela ova Isilayeli.”+

33 Ombu onondaka Mwisesi omunthu wa Huku yotyotyili apopile pokupeleyila oviwa ova Isilayeli, apopile pweetyi nkhele ehenenkhie.+ 2 Watile:

 7 Apeleyila oviwa Sundaa, ati:+

 8 Pokupeleyila oviwa Levii, ati:+

12 Pokupeleyila oviwa Mbesamii, ati:+

13 Pokupeleyila oviwa Susee, ati:+

18 Pokupeleyila oviwa Sembulau, ati:+

19 Mavakaihana ovanthu vovilongo, mavekeveihanena komphunda.

Oko mavakalingila ovilikutila viaviuka.

20 Pokupeleyila oviwa Ngande, ati:+

“Una uyawisa kohika ya Ngande makayambwa.+

Onohongoi mbovanthu mavekeliongiya.

22 Pokupeleyila oviwa Ndaa, ati:+

“Ndaa ewena lionkheyama.+

Makalomboka ko Mbasaa.”+

23 Pokupeleyila oviwa Nafitalii, ati:+

Ohika yo koutakelo, no yo kombwelo, ambuho mbulinge mbove.”

24 Pokupeleyila oviwa Asele, ati:+

“Asele wapewa ovana ovakwendye.

29 Onwe muna ehambu, onwe va Isilayeli!+

34 Mwisesi akatuka moluhandya lwo Moambe, alondeka no Komphunda yo Nembu,+ pokatanga-tanga ko Pisinga,+ yapilukila mo Selikoo.+ Siovaa emulekesa otyilongo atyiho, okuhimbikila ko Sileyande atee ko Ndaa,+ 2 no Nafitalii aiho, notyilongo tya Efalaii no tya Manasesi, notyilongo atyiho tyo Sundaa atee kelunga lyo koutakelo,*+ 3 no Nengembe,+ nofika yo Solondau,+ nelola lyo Selikoo, nepunda-umbo liomindende atee ko Sowale.+

4 Siovaa apopila Mwisesi, ati: “Utyeete otyilongo etyi, otyo otyilongo napopilile ovo Ambalayau na Isake na Sakoo andyaane, andyiti: ‘Mandyiketyaavela ovana* venyi.’+ Ame nekulekesa-tyo, utyitale vala nomaiho, mahi kumaliate-mo.”+

5 Mwisesi omuundapi wa Siovaa ngako ankhila, ankhila umwe motyilongo tyo Moambe, ngeetyi Siovaa apopile.+ 6 Emupake melola lyo motyilongo tyo Moambe lielihula no Mbete-Peole. Na hono, apa apakwa nawike upei.+ 7 Etyi Mwisesi anyima una omanima 120.+ Omaiho ae kaatwikile, nononkhono wali nambo. 8 Ava ova Isilayeli ankho veli moluhandya lwo Moambe, avalili Mwisesi, vemulilile ononthiki 30.+ Pahe omutambo aupu umwe, ovanthu avelipola-pola-po.

9 Susuwee omona wa Nuu wali omunongo* mokonda Mwisesi wemuyambekele okuvoko.+ Ova Isilayeli avalingi evi apopia, avalingi umwe etyi Siovaa atumine Mwisesi.+ 10 Mahi mo Isilayeli kamunekale vali omuuli ukahi nga Mwisesi,+ ou Siovaa ei tyipala na tyipala.+ 11 Mwisesi walingile ovipuka ovinene, ovipuka aviho vihuvisa Siovaa emutumine, evi emutumine evilinge motyilongo tyo Isitu, otyilongo atyiho,+ evilingile pu Falaoo no povaundapi vae aveho. 12 Mwisesi tupu walingile ovipuka nokuvoko kwapama, walingile ovipuka vihuvisa momaiho ova Isilayeli aveho.+