SITELE

1 Pononthiki mba Asuwelu,* Asuwelu wokutumina omapunda-umbo omanene* 127+ okuhimbikila ko India atee ko Etiopia,* 2 pweetyi ohamba Asuwelu ili kovipundi mombala* yo Susaa,*+ 3 menima lya tatu lioutumini wae, ailingila otyipito ovatumini aveho kumwe novaundapi vae. Omaswalali omo Pelesa,+ no omo Mendia,+ nomanene atyo, novatumini vomapunda-umbo omanene,* vekahi ponthele yae. 4 Evelekesa omalumono outumini wae omunene, nomunkhima wao, nononkhono mbao mononthiki ononyingi, ononthiki 180. 5 Etyi ononthiki ombo mbapwa, ohamba ailingila otyipito ovanthu aveho vekahi mombala* yo Susaa,* aveho okuhimbikila kovanene atee kovatutu, pepata liondywo yohamba liokwatwikwa ovifo viononthemo. 6 Ankho muna ovinyanga viomulinya, no violukutau lwasesa, notyinyanga otyingole tyatungilwa otyipuka tyikahi ngotyilanda, noulienge wotyivala tyonkhula wahakwa moulwilo wopalata, nonomphandyi mbomamanya omawa unene, novipundi vioolu, no viopalata vikahi pohi patungwa nomamanya omandomba, nomamanya omakwavo omawa unene, nomangonga, nomandyiloi.

7 Ovinyu ankho ipakwa momalufo oolu,* omalufo atyo kaelifwile. Ovinyu yohamba onyingi-nyingi, ohamba vala ityivila okukala nayo. 8 Ovanthu vanwa vala ngeetyi vapopilwa nohamba, nawike ukuluminywa okunwa; mokonda ohamba, kumwe novakwatesiko vayo, valinga atyiho opo munthu na munthu alinge etyi ahanda.

9 Onkhai-hamba Vasiti+ nae alingila otyipito ovakai vakala meumbo Liohamba* Asuwelu.

10 Monthiki ya pandu-vali pweetyi omutima wohamba wahambukwa mokonda yovinyu, atumu Mehumaa, na Mbisita, na Halumbona,+ na Mbingitaa, na Ambangata, na Setale, na Kalakasi, ovalume epandu-vali ovakwatesiko vo mombala vakwatesako Ohamba Asuwelu, 11 opo vaete kwe Onkhai-hamba Vasiti una omulami* woutumini akalekese kovanthu, no kovatumini, ouwa wae, mokonda omuwa unene. 12 Mahi Onkhai-hamba Vasiti ayehetavela etyi ohamba yatuma ovakwatesiko vo mombala yohamba. Ohamba ainumana unene, aikala nonyengo.

13 Pahe ohamba aipopila ovanongo vei nawa onomphela,* (ngootyo etyi ohamba ihanda atyihiki kovanthu aveho vei nawa ovitumino, nokukoyesa onomphela. 14 Vokumupakela-mo omapanga ae, ovo Kalesena, na Setale, na Andimata, na Talisi, na Melesi, na Malisena, na Memukaa.+ Ovatumini ovo epandu-vali vo mo Pelesa, no mo Mendia vapondola okwenda pohamba, ovanene unene motyilongo). 15 Ohamba aipulu okuti: “Ngeetyi otyitumino tyipopia, oityi Onkhai-hamba Vasiti ina okulingwa, mokuhetavelele etyi ohamba Asuwelu yatumine ovakwatesiko vo mombala?”

16 Memukaa akumbululila pohamba, no povatumini okuti: “Onkhai-hamba Vasiti kalingile vala etyi tyapenga kohamba,+ mahi tupu walinga etyi tyapenga kovatumini vatyo aveho, no kovanthu aveho vakala momapunda-umbo omanene* Ohamba Asuwelu. 17 Ovakai aveho vokwanepwa maveivi etyi onkhai-hamba yalinga avatombo ovalume vavo, avati: ‘Ohamba Asuwelu yaihanene Onkhai-hamba Vasiti, mahi ehetavela.’ 18 Onthiki oyo ovakai aveho vovatumini mo Pelesa no mo Mendia, tyina vameivi etyi onkhai-hamba yalinga, mavapopi ovalume vavo, ovakwatesiko vohamba ngeetyi ngwe alinga, otyo atyeeta omutomba, nolukundo. 19 Ine tyitavela hamba, kulingwe otyitumino otyipe menyina liove, movitumino vyo Pelesa no vyo Mendia vina vihapondola okupiluluka,+ muhonekwe okuti: Vasiti kameya-aya umwe vali Kohamba Asuwelu; ove hamba paka pomphangu Yonkhai-hamba omukai omukwavo ukahi vali nawa. 20 Putyina otyitumino tyohamba tyamanoñgonokwa moutumini wove auho, ovakai aveho vanepwa mavakala nonthilo novalume vavo, okutuka komunene atee komututu.”

21 Onondaka ombo ambuhambukiswa ohamba novakwatesiko vohamba, ohamba ailingi etyi Memukaa apopia. 22 Ohamba aitumu omikanda komapunda-umbo omanene ohamba,*+ viahonekwa ngeetyi tyihonekwa momapunda-umbo omanene,* no momalaka ovanthu vapopia, okuti ovalume aveho vena okukala ovatumini* vo momaumbo avo, muna okupopiwa elaka liavo mwene.

2 Konyima yovipuka ovio, etyi onyengo Yohamba Asuwelu+ yatula, ahinangela etyi Vasiti alingile+ neetyi atokolele okumulinga.+ 2 Ovakwatesiko vohamba avapopila ohamba okuti: “Ohamba yovolelwe ovafikwena ovawa veheneende nomukwendye. 3 Ohamba itume ovatumini vomomapunda-umbo omanene* outumini wayo+ opo vaete ovafikwena aveho ovawa veheneende nomukwendye, mombala* yo Susaa* mondywo yovakai.* Omo mavakala, otyo valingwa nawa na Hengai+ onkhalamutwe yondywo yovakai,* wokuyunga ovakai, avaviukiswa* opo vehiwe. 4 Omufikwena wamapandwa nohamba akale Onkhai-hamba apingi pu Vasiti.”+ Olusoke olo aluhambukiswa ohamba, ngatyo ilinga.

5 Ankho kuna omulume umwe omu Sundaa ukahi mombala* yo Susaa*+ utiwa o Molondekai+ omona wa Saili, Saili omona wa Simei, Simei omona wa Kisi womuhoko wa Mbesamii,+ 6 wapolelwe ko Selusalei atwalwa koukonde kumwe novanthu vaile na Sekoniya*+ Ohamba yo Sundaa ina Nambukondonosole Ohamba yo Mbambilonia atwaile koukonde. 7 Ankho watekula* Handasa,* utiwa o Sitele omona wombunga yae kovohe,+ mokonda utupu he na ina. Ankho omuhikwena omuwa unene, okumutala umupeleya, tundee apa ovohe na ina vanyima Molondekai ankho umutekula ngatyina omona wae. 8 Etyi otyitumino tyohamba netokolo liae liapopiwa, mombala* yo ko Susaa* amweetwa ovafikwena ovanyingi ankho vayungwa na Hengai,+ Sitele nae atwalwa mondywo* yohamba, esala nokuyungwa na Hengai omulume wokuyunga ovakai.

9 Hengai ahambukilwa Sitele emupande,* liwa-liwa alingi atyiho opo vemuviukise nawa efiwe,*+ apewa okulia kwelikalela. Emupake kumwe novahikwena epandu-vali aholovona vomeumbo liohamba. Tupu evetumu vakakale momphangu ikahi vali nawa mondywo yovakai.* 10 Sitele ahapopi natyike konthele yovanthu+ vomuhoko wae ine vombunga yae,+ mokonda Molondekai ankho wemupopila ehetyipopie komunthu nawike.+ 11 Ononthiki ambuho, Molondekai ankho ukwata mepata liondywo yovakai* opo anoñgonoke oñgeni Sitele ekahi no ñgeni ankho atekulwa.

12 Tyina nkhele ovafikwena veheneende Kohamba Asuwelu, aveho vena okulingwa nawa monohanyi 12, ngeetyi ovakai vena okulingwa. Otyipuka ankho vena okulingwa opo vehiwe* otyetyi: Onohanyi epandu vafiwiswa nomulela womila, monohanyi epandu vafiwiswa nomulela+ wombasamu nomilela+ omikwavo viokufiwiswa.* 13 Pahe omufikwena wafwapo opo ekelilekese kohamba, ankho upewa atyiho aita mondywo yovakai,* opo atyinde tyina enda kondywo yohamba. 14 Ankho unyingila mondywo yohamba kongulohi, komuhuka aende mondywo onkhwavo yovakai,* otyo ayungwa na Saasingasi omuundapi wohamba,+ wokuyunga ononthawa. Ankho kapondola vali okukondoka kohamba, nkhwali o putyina ohamba yemuhambukilwa, aitumbula enyina liae, aitumu vemwihane.+

15 Etyi onthiki ya Sitele yehika-po yokulilekesa kohamba, Sitele omona wa Ambiyaili ombunga ya Molondekai, una atekula ngatyina omona wae,+ ahaiti vali natyike, atyindi vala etyi apewa na Hengai omuundapi wohamba ankho uyunga ovakai. (Mokweenda kwononthiki ombo ambuho, Sitele otyo apandwa novanthu aveho vemumona.) 16 Sitele atwalwa mondywo Yohamba Asuwelu mohanyi ya 10, ohanyi ya Tembete,* menima lya pandu-vali+ lioutumini wohamba. 17 Ohamba aipande vali Sitele tyipona ovakai aveho. Sitele apandwa nohamba* tyipona ovafikwena ovakwavo. Emupake omulami* woutumini emulingi onkhai-hamba+ apingi pu Vasiti.+ 18 Ohamba ailingila otyipito otyinene Sitele, aikongo ovatumini aveho novaundapi vayo. Ayovola aveho vekahi movikaleya momapunda-umbo omanene, aavela ovanthu ovipuka oviwa vivilwa vala okulingwa nohamba.

19 Etyi ovafikwena+ vaetwa vali, Molondekai upumphi kombundi yohamba. 20 Sitele ankho kapopi natyike tyayemba kovanthu vomuhoko wae, nii kombunga yae+ ngeetyi Molondekai emulongesile. Sitele utavela etyi alongeswa na Molondekai ngeetyi alinga-le pweetyi ankho emutekula.+

21 Pononthiki mbatyo opo, etyi Molondekai epumphi kombundi yohamba, Mbingitani na Telesi ovaundapi vohamba, ovayungi vo konombundi ankho vanumana avapange okwipaa* Ohamba Asuwelu. 22 Mahi Molondekai etyinoñgonoka, liwa-liwa etyipopila Onkhai-hamba Sitele. Sitele etyipopi kohamba menyina lya Molondekai.* 23 Otyitateka otyo atyiovololwa nawa atyihololoka, pahe ovalume ovo vevali avayendywa momuti, atyihonekwa momukanda wovipuka viaenda-ko, otyo ohamba ityiete.+

3 Etyi pakala, Ohamba Asuwelu aivialeka Hamaa+ omona wa Hamendata omu Angange+ emukulameka, emwavela otyilinga otyinene vali tyipona ovatumini aveho.+ 2 Aveho ovaundapi vohamba vekahi kombundi, avaikila konongolo okulipetamena ku Hamaa, ngeetyi ohamba yapopia. Mahi, Molondekai ehetavela okwikila konongolo elipetamene kwe. 3 Ovaundapi vohamba vekahi kombundi avapulu Molondekai okuti: “Omokonda yatyi ove wehetavelela otyitumino tyohamba?” 4 Otyo vemupula ngootyo ononthiki ambuho, mahi ngwe kevetehelela. Aveketyipopila Hamaa, opo vatale ine Molondekai mayekwa atwaleko ngootyo,+ mokonda wevepopilile okuti omu Sundaa.+

5 Etyi Hamaa amona okuti Molondekai ketavelele okwikila konongolo, elipetamene kwe, anumana unene.+ 6 Mahi ngwe kahandele okwipaa vala* Molondekai, mokonda wapopililwe ovanthu vomuhoko wa Molondekai. Pahe, Hamaa aovola okwipaa ovanthu aveho va Molondekai, ova Sundaa aveho vekahi movilongo vituminwa na Asuwelu.

7 Menima lya 12 lyo Hamba Asuwelu mohanyi yo tete, ohanyi ya Nisaa,*+ avayumbu o Puli+ (avatapesa) otyo Hamaa atala, opo vatale onthiki nohanyi vena okuveipaa, atyilekesa ohanyi 12, ohanyi ya Andale.*+ 8 Hamaa apopila Ohamba Asuwelu okuti: “Pena ovanthu vamwe veliyandyana+ notyilongo momapunda-umbo* aeho omanene outumini wove.+ Vena ovitumino vielikalela no viovanthu aveho, kavetavela ovitumino viohamba, katyaviukile kohamba okuveyeka ngootyo. 9 Ine tyaviuka kohamba, hinda otyitumino tyokuvenyima-ko aveho. Ame mandyifete onotalendu* 10.000 mbopalata kovaundapi vohamba, avembutwala motyilimba tyohamba.”*

10 Ohamba aipolo onela yokupaka otyilimbo+ kokuvoko aiivaleka Hamaa,+ omona wa Hamendata omu Angange,+ ondyale yova Sundaa. 11 Ohamba aipopila Hamaa okuti: “Opalata novanthu vikahi pomavoko ove. Velinga etyi wahanda.” 12 Ngootyo monthiki 13 yohanyi yo tete, ovahoneki vohamba avaihanwa.+ Avahoneka+ atyiho Hamaa atuma tyeende kovakwatesiko vohamba, no kovatumini vomapunda-umbo omanene,* no kononkhalamutwe mbovanthu, tyahonekwa ngeetyi ovanthu momapunda-umbo* vahoneka no momalaka avo. Omikanda ovio viahonekwa menyina lyo Hamba Asuwelu avipakwa otyilimbo nonela yohamba.+

13 Omikanda ovio avipewa ovatumwa-ndaka vevitwale komapunda-umbo omanene* ohamba, muna otyitumino tyokwipaa ova Sundaa nokuvehanyako, avanyimiko aveho, ovakwendye, novakulu, novana, novakai, vena okwipawa monthiki ike vala, monthiki 13 yohanyi 12, ohanyi ya Andale,+ avevepundu ovipuka viavo.+ 14 Otyipuka otyo ankho tyina okuhonekwa momukanda omukwavo atyilingi otyitumino tyo momapunda-umbo aeho omanene,* atyipopilwa ovanthu aveho, opo velipongiye mokonda yonthiki oyo. 15 Ovatumwa-ndaka avaende nokuhateka+ ngeetyi vatumwa nohamba; otyitumino atyipopiwa mombala* yo Susaa.*+ Pahe ohamba, na Hamaa avapumphama opo vanwe, mahi epunda-umbo lyo Susaa,* otyo liahangayala.

4 Etyi Molondekai+ eiva otyipuka otyo,+ atandula ovikutu viae, avale onosaku mbonongosa, elipake etwe; aende mepunda-umbo otyo alila unene, weihamenwa unene. 2 Aende ehikila vala kombundi yeumbo liohamba, tyeetyi nawike upondola okunyingila meumbo liohamba tyavala onosaku mbonongosa. 3 Momapunda-umbo*+ aeho omanene muna mwapopiwa otyitumino tyohamba, netyi yatuma, ova Sundaa vaihamenenwe unene,+ avakala tyihali, otyo valila nokuliyava. Ovanyingi avalangala konongosa, no metwe.+ 4 Ovahikwena ovaundapi va Sitele novalume vokwatukanwa ovaundapi vonkhai-hamba Sitele etyi veya okumupopila otyitateka otyo, alingi unene otyiho. Atumu ovikutu ku Molondekai opo alule-mo onongosa avale ovikutu, mahi aanye okuvivala. 5 Sitele atumu okwihana Hatake, umwe povalume vokwatukanwa vohamba, wapelwe otyilinga tyokuundapela Sitele, emutumu akapule Molondekai, omokonda yatyi akalela ngootyo, oityi eiva.

6 Hatake akapopia na Molondekai ukahi popalasa ikala komutwe wombundi yeumbo liohamba. 7 Molondekai emupopila atyiho tyemumonekela, tupu apopi onombongo+ Hamaa alaa okufeta, mambupakwa motyilimba tyohamba, opo ova Sundaa vaipawe.+ 8 Tupu aavela Hatake omukanda wotyitumino tyatumwa ko Susaa,*+ tyipopia okuvenyima-ko. Ankho una okuutwala ku Sitele, emuhangununina-o,+ emupopila ende kohamba akaite imwaamene, nokwiita ikwateseko ovanthu vae.

9 Hatake akondoka, akapopila Sitele etyi Molondekai emupopila. 10 Sitele atumu vali Hatake, akapopile Molondekai+ okuti: 11 “Ovaundapi aveho vohamba novanthu vokukala momapunda-umbo omanene* ohamba, vetyii okuti ine omunthu umwe, tyilinge omukai tyilinge omulume wenda mepata liohamba tyahaihanenwe,+ una vala okulingwa otyipuka tyike tyikahi movitumino: Una okwiipawa; kamaipawa vala ine ohamba itandaveka omphangoti yayo yoolu no kwe.+ Ngwe pakala-le ononthiki 30 ame nahaihanwa vali nohamba.”

12 Etyi Molondekai eiva etyi Sitele atola, 13 atumu okupopila Sitele okuti: “Wahasoke okuti mokonda uli meumbo liohamba, ove mohupu, ova Sundaa vakwenyi avaipawa. 14 Ove okwahapopi natyike, eyovo liova Sundaa, nou mevekwatesako,+ mavitundu komunthu omukwavo, mahi ove no vomeumbo lya tate yove mamunkhi. Tyipondola wakala onkhai-hamba opo utwetele eyovo mononthiki mbuno, ine hatyo?”+

15 Pahe Sitele atumu okukumbulula Molondekai okuti: 16 “Enda kaongiye ova Sundaa aveho vekahi mo Susaa,* amukala tyahali mokonda yange.+ Mwahaliei, nii mwahanwei natyike mononthiki ononthatu,+ otyitenya notyinthiki, ame novaundapi vange ovafikwena, noonthwe kamatuli. Ame mandyiende kohamba, namphila tyapenga movitumino. Ine ndyiipawa, opo ndyiipawe vala.” 17 Molondekai aende, alingi atyiho atolelwa na Sitele.

5 Monthiki ya tatu,+ Sitele avale ovikutu viae vioutumini, aende pepata meumbo liohamba* akevelela komutwe wondywo yohamba. Ohamba ipumphi kotyipundi tyayo tyoutumini mondywo yohamba, yapilukila kombundi. 2 Etyi ohamba yamona Onkhai-hamba Sitele utai pepata, aimuhambukilwa unene,+ aitandaveka omphangoti yayo yoolu ankho ina-yo ku Sitele. Sitele afwene-po akwata kondungu yatyo.

3 Ohamba aimupulu aiti: “Oityi Nkhai-hamba Sitele? Wahanda okwiita-tyi? Atee umwe ine wiita* ouhamba wange nthele imwe, mandyikupe-o!” 4 Sitele akumbulula okuti: “Ine tyaviuka kohamba, endywei hono na Hamaa+ mulie mandyikemutelekela-po.” 5 Ohamba aipopila ovaundapi vayo okuti: “Popilei Hamaa muti akanyauke kuno, ngeetyi Sitele aita.” Pahe ohamba na Hamaa avakalia etyi Sitele ateleka.

6 Etyi vekahi nokunwa ovinyu, ohamba aipulu Sitele okuti: “Oityi mohande okwiita? Mandyikwavela-tyo! Wahanda okwiita-tyi? Atee umwe ine wiita* onthele imwe youhamba wange, moipewa!”+ 7 Sitele akumbulula okuti: “Etyi nahanda okwiita otyetyi: 8 Ine hamba unthyole umwe, tyaviuka kohamba okundyavela etyi naita, upondola okulinga etyi nahanda, mandyimutelekela okulia, muhuka endywei na Hamaa mulie, muhuka mandyikumbulula epulo liohamba.”

9 Monthiki oyo, tyina Hamaa atunda-ko wahambukwa, komutima wae kukahi nawa. Mahi etyi Hamaa avasa Molondekai kombundi yeumbo liohamba, Molondekai ahakatuka, nii okuteketa,+ Hamaa atyimunumanesa unene. 10 Mahi, Hamaa elikondola omutima aende no keumbo liae. Pahe aihana omapanga ae na Selesi,+ omukai wae. 11 Hamaa elipake-ko mokonda yomunkhima womalumono ae, novana ovanyingi ena-vo,+ neetyi ohamba yemuvialeka akala omunene vali tyipona ovatumini novaundapi vohamba.+

12 Hamaa ayawisa-ko vali okuti: “Tyihe-otyo vala, Onkhai-hamba Sitele wakonga vala ame opo tukalie nohamba etyi etutelekela.+ Ame nakongwa vali opo ndyende kwe muhuka nohamba.+ 13 Mahi no ngootyo vala, omutima wange kaukala-le nawa tyina ndyitala Molondekai omu Sundaa upumphi kombundi yeumbo liohamba.” 14 Omukai wae Selesi, nomapanga ae avemupopila okuti: “Ovola omuti umwe una onokovandu 50* moulaale. Komuhuka-huka oiti kohamba opo Molondekai ayendywe-mo.+ Ine ulinga ngootyo, mohambukwa tyina pahe ukalia nohamba.” Otyo atyihambukiswa Hamaa, atumu vaovole omuti, aveutalameka.

6 Motyinthiki otyo ohamba aihalala.* Mokonda yotyo, aitumu vaete omukanda upopia ovipuka viaendele-ko+ aveutangela ohamba. 2 Etyi veutanga avavasi-mo okuti Molondekai oe waholololele omphango ya Mbingitani na Telesi, ovaundapi vohamba ovayungi vo konombundi etyi vahandele okwipaa* Ohamba Asuwelu.+ 3 Ohamba aipulu okuti: “Oityi Molondekai alingwa opo ankhimanekwe nokuyambwa mokonda yetyi alinga?” Ovakwatesiko vohamba avati: “Natyike alingwa.”

4 Ohamba aipulu vali okuti: “Olie ukahi mepata?” Ngwe opo uli mepata+ meumbo* liohamba o Hamaa, wanyingila aite-ko Molondekai akayendywe momuti emupakela.+ 5 Ovakwatesiko vohamba avakumbulula okuti: “O Hamaa+ ukahi mepata.” Ohamba aiti: “Mupopilei anyingile.”

6 Etyi Hamaa anyingila ohamba aimupulu okuti: “Oityi omulume una ohamba ihanda okunkhimaneka ena okulingwa?” Hamaa elipopila ati: “Ohamba olie vali ihanda okunkhimaneka tyihe ame?”+ 7 Ngootyo, Hamaa akumbulula ohamba okuti: “Omulume una ohamba ihanda okunkhimaneka, 8 una okwetelwa ovikutu viohamba+ vina ohamba ivala, nonkhambe yokweenda nohamba, aveipake otyiuya tyohamba komutwe. 9 Ovikutu nonkhambe yatyo vina okuyungwa na umwe povatumini vokwankhimana vali vohamba, avivalekwa omulume ohamba ihanda okunkhimaneka, avelama konkhambe popalasa yepunda-umbo. Vena yokupopila komutwe wae okuti: ‘Etyi otyo tyina okulingwa omulume ohamba ihanda ankhimanekwe!’”+ 10 Liwa-liwa ohamba aipopila Hamaa okuti: “Enda kanyauka kaete ovikutu nonkhambe, linga atyiho ngeetyi wapopia Molondekai omu Sundaa, upumphi kombundi yeumbo liohamba. Wahakambese-po natyike pwevi wapopia.”

11 Hamaa aeta ovikutu nonkhambe avaleka Molondekai,+ emuvelameka konkhambe popalasa yepunda-umbo, apopila komutwe wae okuti: “Etyi otyo tyina okulingwa omulume ohamba ihanda ankhimanekwe!” 12 Konyima Molondekai akondoka kombundi yeumbo liohamba, mahi liwa-liwa Hamaa aende no keumbo liae, tyelihika komutwe otyo alila. 13 Hamaa apopila Selesi omukai wae,+ nomapanga ae atyiho tyamoneka nae, ovanongo vae na Selesi omukai wae, avemupopila okuti: “Ine Molondekai, ou walinga ovipuka ovio o womuhoko wa Sundaa,* kumemuvili vali okumulinga natyike. Ove tyotyili kumetyivili vali.”

14 Pweetyi nkhele vekahi nokupopia nae, akuya omaswalali ohamba liwa-liwa avatwala Hamaa kokulia Sitele ateleka.+

7 Ngootyo, ohamba na Hamaa+ avaende vakalie Konkhai-hamba Sitele. 2 Onthiki onkhwavo etyi vekahi nokulia nokunwa ovinyu, ohamba aipulu vali Sitele aiti: “Oityi wahanda okwiita Nkhai-hamba Sitele? Tyipopia mandyikwavela-tyo. Oityi mohande okwiita? Atee ine wiita* ouhamba wange nthele imwe, moupewa!”+ 3 Onkhai-hamba Sitele aikumbulula okuti: “Ine hamba unthyole umwe ngwe tyaviuka kohamba, etyi nahanda okwiita kwoove okuti evela-vo omwenyo wange,* ndyikwita-vo uyovole ovanthu vange.+ 4 Mokonda ame novanthu vange twalandeswa+ opo twipawe tuhanywe-ko, atunyimwa-ko.+ Ine tyitiwa twalandesilwe atulingi vala ovapika, ñgeno hapopile natyike. Mahi ononkhumbi ombo hipondola okumbuyeka, mokonda matyietela ovitateka ohamba.”

5 Ohamba Asuwelu aipulu onkhai-hamba Sitele okuti: “Olie walinga ngootyo? Uli-pi omulume watyo welipa ovipuka, asoko okulinga otyipuka otyo?” 6 Sitele akumbulula okuti: “Ondyale, wokuhanda okutwipaa ondingavivi ei Hamaa.”

Hamaa atili unene owoma ohamba nonkhai-hamba. 7 Ohamba aikatuka, aisi-po ovinyu vanwa aikatuka nonyengo onene, ayiende kepata liondywo yohamba kokwatwikwa ovifo viononthemo. Mahi Hamaa akatuka opo elivondele konkhai-hamba Sitele opo ahupise omwenyo wae,* mokonda wetyimona okuti ohamba ina etyi maimulingi. 8 Ohamba aitundu kepata kokwatwikwa ovifo viononthemo, ayiende kondywo vekahi nokunwa ovinyu aimono okuti Hamaa weliyumba ku Sitele ukahi kombandwa. Ohamba aimukandukila aiti: “Nkhele wahanda okulala nonkhai-hamba kononkhono meumbo liange?” Tyina onondaka ombo mbutunda momulungu wohamba, Hamaa avemufiki motyipala. 9 Halumbona+ umwe pomaswalali omondywo yohamba, ati: “Hamaa tupu waovola omuti opo aipaele-mo Molondekai+ wahupisile omwenyo wohamba.+ Omuti watyo uli keumbo lya Hamaa una onokovandu 50* moule.” Ohamba aiti: “Omo umwe mukemuyendya!” 10 Hamaa ayendywa momuti aovolelele Molondekai, onyengo yohamba aitulu.

8 Monthiki oyo, ondywo ya Hamaa+ ondyale yova Sundaa,+ Ohamba Asuwelu eiyaavela Onkhai-hamba Sitele. Ohamba aitavela Molondekai eye kwe, mokonda Sitele wapopilile ohamba okuti Molondekai ombunga yange.+ 2 Ohamba ailipolo onela yayo yokupaka otyilimbo+ yapolele ku Hamaa, eyaavela Molondekai. Sitele aavela Molondekai otyilinga tyokukala omunene wondywo yali ya Hamaa.+

3 Pahe Sitele akapopia vali nohamba. Eliyumbu kovikalo viohamba, elivondela kwe otyo alila, emwiiti opo anyimeko otyitumino tyokuvelinga omapita tyahindwa na Hamaa omu Angange, anyimiko omphango yokuhanya-ko ova Sundaa.+ 4 Ohamba aitandaveka omphangoti yayo yoolu no ku Sitele,+ Sitele atalama komutwe wohamba. 5 Sitele ati: “Ine matyihambukiswa ohamba, ame ndyimunthu omuwa kohamba, ine tyaviuka kwoove, tupu unthyambukilwa, tuma otyitumino matyityilika omikanda vya Hamaa+ omona wa Hamendata, omu Angange,+ ahonekele opo ahanye-ko ova Sundaa monombala ambuho* mbohamba. 6 Oñgeni ame ndyipondola okutala vala otyipuka otyo otyivi ovanthu vange vapondola okulingwa? Oñgeni ndyipondola okutala ombunga yange ihanywa-ko anahalingi natyike?”

7 Ngootyo, Ohamba Asuwelu aipopila Onkhai-hamba Sitele+ na Molondekai omu Sundaa okuti: “Naavela-le Sitele eumbo lya Hamaa ngwe nemutuma ayendywe momuti+ mokonda wapangele okwipaa ova* Sundaa. 8 Pahe honekei ngeetyi mweete okuti tyaviuka, otyitumino menyina liohamba matyikwatesako ova Sundaa, amutyipake otyilimbo nonela yohamba. Mokonda otyitumino tyahonekwa menyina liohamba atyipakwa otyilimbo nonela, katyipondola okwanywa.”+

9 Ovahoneki vohamba avaihanwa mohanyi ya tatu, ohanyi ya Siva,* monthiki 23 avahoneka atyiho Molondekai evetuma vahonekele ova Sundaa, nomanene atyo,+ novakwatesiko vohamba, novatumini vomapunda-umbo omanene,*+ okutuka ko India atee ko Etiopia, omapunda-umbo* 127 omanene, vahonekele ngeetyi tyihonekwa momapunda-umbo* no momalaka ovanthu vapopia, no omu ova Sundaa vahoneka, melaka liavo.

10 Molondekai ahoneka omikanda menyina Liohamba Asuwelu, evipake otyilimbo nonela+ yohamba evitumu ovatumwa-ndaka vokweenda nononkhambe, vana vaenda nononkhambe mbokuhateka unene, mbuundapela ohamba. 11 Momikanda ovio, ohamba yetavelele ova Sundaa momapunda-umbo aeho veliongiye, avaamena omienyo viavo.* Vapondola okwipaa nokunyima-ko ovanthu aveho ine otyilongo tyamaneka opo tyivelwise, tupu vena okwipaa atee umwe ovakai vavo, novana vavo avevepundu ovipuka viavo.+ 12 Otyo tyina okulingwa monthiki ike vala momapunda-umbo* aeho Ohamba Asuwelu, monthiki 13 yohanyi 12, ohanyi ya Andale.*+ 13 Omukanda oo* upopia etyi ohamba apopia, una okupopiwa momapunda-umbo* aeho omanene okuti otyitumino. Tyina okupopiwa kovanthu aveho opo ova Sundaa velipongiye, vetyivile okulwisa onondyale mbavo monthiki oyo.+ 14 Ngeetyi vatuminwe nohamba, ovatumwa-ndaka avavelama kononkhambe mbuundapela ohamba, avaende liwa-liwa nokuhateka. Otyitumino tupu atyikapopiwa mombala* yo Susaa.*+

15 Molondekai atundu ponthele yohamba tyavala ovikutu vioutumini vialingwa notyinyanga otyingole* notyingonga, ankho wavala ombuya onene youtumini yoolu, notyinyanga tyokainya tyotyivala tyonkhula.+ Mepunda-umbo lyo Susaa,* ovanthu avakwilila nehambu. 16 Mokonda ova Sundaa vayovoka,* pahe avahambukwa, avahele, avankhimana. 17 Monombala ambuho, no momapunda-umbo* aeho, muna mwehikile etyi ohamba yapopia notyitumino tyae, ova Sundaa avahambukwa unene avahele, avateleka omakulia avalingi ovipito. Ovanthu ovanyingi vovilongo ovikwavo avahimbika okuliti ova Sundaa,+ mokonda vevetila owoma.

9 Monthiki 13 yohanyi 12, ohanyi ya Andale,*+ etyi ondaka yohamba notyitumino tyayo tyina okulingwa,+ monthiki onondyale mbova Sundaa mbukevela okuvemonesa ononkhumbi, ovipuka aviahaende ngeetyi vahanda, ova Sundaa avahanye-ko vana veveyele.+ 2 Ova Sundaa aveliongiya momapunda-umbo avo monombala ambuho Mbohamba* Asuwelu,+ opo vakalwise vana vaovola okuvelinga omapita. Petupu ou wetyivilile okuvelwisa, mokonda ovanthu aveho+ vakalele nowoma navo. 3 Ovatumini vatyo aveho vomapunda-umbo* omanene,+ nomanene atyo, novakwatesiko vohamba na vana vayunga onondando mbohamba avakwatesako ova Sundaa, mokonda vatila owoma Molondekai. 4 Molondekai wakalele omunene+ mondywo* yohamba, omunkhima wae auliyandyana momapunda-umbo* aeho omanene, mokonda utwalako okukala vali omunene.

5 Ova Sundaa avaipaa onondyale mbavo ambuho nomutunga, aveveipaa, avevehanye-ko. Avalingi atyiho vahanda vana veveyele.+ 6 Mombala* yo Susaa,*+ ova Sundaa avaipaa ovalume 500 avevehanye-ko. 7 Tupu avaipaa Palesandata, na Ndalefone, na Asipata, 8 na Polata, na Andalia, na Alindata, 9 na Palemasita, na Alisai, na Alindai, na Vaisata, 10 ovana 10 va Hamaa ondyale yova Sundaa,+ omona wa Hamendata. Mahi, avehevepundu ovipuka viavo etyi veveipaa.+

11 Monthiki oyo, avapopila ohamba ombalulo yovanthu vokwaipawa mombala* yo Susaa.*

12 Ohamba aipopila Onkhai-hamba Sitele okuti: “Mombala* yo Susaa,* ova Sundaa vaipaa ovalume 500 avevehanye-ko kumwe novana 10 va Hamaa. Ine mo Susaa vaipaa ngootyo, pahe momapunda-umbo*+ omanene omakwavo ohamba, valinga-mo ñgeni? Una vali etyi wahanda okwiita? Popia matyifwiswapo. Oityi vali wahanda? Motyipewa.” 13 Sitele akumbulula okuti: “Ine tyaviuka kohamba,+ muhuka valinge vali ngeetyi tyapopia otyitumino ova Sundaa vo ko Susaa* vapewa hono,+ ovivimbi viovana 10 va Hamaa viyendyeleswe momuti.”+ 14 Ohamba aitavela tyilingwe. Otyitumino atyipopiwa mo Susaa,* ovivimbi viovana 10 va Hamaa aviyendywa momuti.

15 Ova Sundaa vakala mo Susaa* aveliongiya vali monthiki 14 yohanyi ya Andale,+ avaipaa ovalume 300 mo Susaa,* mahi avehevepundu ovipuka viavo.

16 Ova Sundaa ovakwavo vokukala momapunda-umbo* omanene ohamba, navo aveliongiya avayakulila omienyo viavo.*+ Aveliyovola konondyale mbavo,+ avaipaa ovanthu 75.000 veveyele, mahi avehevepundu ovipuka viavo. 17 Otyo tyamoneka monthiki 13 yohanyi ya Andale. Monthiki 14 avapululukwa-po, onthiki oyo, aveilingi onthiki yotyipito, nonthiki yehambu.

18 Ova Sundaa vakala mo Susaa,* aveliongiya monthiki 13+ no monthiki 14+ yohanyi ya Andale. Monthiki 15 avapululukwa-po, onthiki oyo, aveilingi onthiki yotyipito, nonthiki yehambu. 19 Otyo ova Sundaa vakala momapunda-umbo opopepi valingila onthiki 14 yohanyi ya Andale ikale onthiki yehambu, yotyipito,+ yokulia, nonthiki yokulituma omakulia na vakwavo.+

20 Molondekai+ ahoneka ovipuka ovio, atumu omikanda kova Sundaa aveho momapunda-umbo* aeho omanene Ohamba Asuwelu, tyilinge ana eli popepi tyilinge okokule. 21 Evepopila okuti omanima atyo aeho vena okuhinangela onthiki 14 nonthiki 15 yohanyi ya Andale, 22 mokonda ononthiki ombo, ova Sundaa vapululukwa-po konondyale mbavo, mohanyi oyo olunuma lwavo alukala ehambu,+ olwihamo lwavo alukala otyipito. Ankho vena okuhinangela ononthiki ombo, ngatyina ononthiki mbokulia nehambu, ngomuvo wokulitumikisa omakulia na vakwavo nokwaavela oviawa ovahepi.

23 Ova Sundaa avetavela okutwalako okulinga otyipito otyo, avahimbika okulinga atyiho Molondekai evehonekela. 24 Mokonda Hamaa,+ omona wa Hamendata omu Angange+ ondyale yova Sundaa aveho, wapangele okuhanya-ko ova Sundaa,+ wayumbile o Puli,+ (otyo okutapesa,) opo eveteketese nokuvehanyuna-ko. 25 Mahi etyi Sitele apita kohamba, ohamba aitumu vahoneke+ okuti: “Omphango yae ombi yokuhanya-ko ova Sundaa+ imukondokele.” Hamaa novana vae avakayendywa momuti.+ 26 Otyo vaihanene ononthiki ombo okuti o Pulii, yatunda mondaka Puli.*+ Mokonda yetyi tyahonekwa momukanda, neetyi vamona neetyi ankho tyevemonekela, 27 ova Sundaa avelipopila okuti ovo novana vavo na vana aveho veliwaneka navo,+ vena okuhinangela ononthiki ombo onombali, nokulinga etyi tyahonekwa konthele yambo, mononthiki mbanakwa omanima atyo aeho. 28 Ononthiki ombo mbuna okuhinangelwa, amulingwa otyipito nomakula atyo aeho, nonombunga ambuho, monombala ambuho no momapunda-umbo aeho* omanene. Ononthiki ombo mbo Pulii ova Sundaa kavapondola okuyeka-po okumbuhinangela, otyipito otyo ovana vavo kavapondola okutyiyeka-po.

29 Konyima akuhonekwa vali omukanda, upopia konthele yononthiki mbo Pulii, Onkhai-hamba Sitele omona wa Ambiyaili na Molondekai omu Sundaa, mokonda vena outumini aveutavela. 30 Omikanda avitumwa kova Sundaa aveho momapunda-umbo* omanene 127+ moutumini wohamba Asuwelu,+ nonondaka mbombembwa noukwatyili, 31 tyilekesa okuti vetavela ononthiki mbo Pulii mbulingwa pononthiki mbanakwa ngeetyi Molondekai omu Sundaa, Nonkhai-hamba Sitele vevetumine,+ neetyi mwene* vapangele okufwisapo+ kumwe novana vavo, okukala tyihali,+ nokulikwambela.+ 32 Otyitumino tya Sitele atyitavela ovipuka ovio aviho viononthiki mbo Pulii,+ otyo atyihonekwa momukanda.

10 Ohamba Asuwelu ayavela ovanthu ovilinga vialema unene motyilongo na vana vakala poulongo wo pokati kelunga.

2 Pahe ovipuka ovinene alinga, ovinene unene, neetyi ohamba yaavelele Molondekai,+ emukulameka, kaviahonekelwe momukanda womahipululo+ o pononthiki mbonohamba mbo Mendia no mbo Pelesa?+ 3 Mokonda Molondekai omu Sundaa, ankho omunthu wa vali wankhimana unene okulandula kohamba Asuwelu. Wali omunene* vali ku vakwavo pokati kova Sundaa, ulingwa onthilo novanthu aveho vombunga yae. Ankho uundapela ouwa wovanthu vae, ukwatesako aveho vomuhoko wae okukala nomwenyo omuwa.*