Omulume Umue Wakola Omutima

ETYI ovanthu vahimbika okuliyauisa kombanda yoohi, otyinyingi ankho tyilinga ovipuka ovivi nga Kaim. Anthi ankho kuna omulume umue welikalela, utiwa o Enoke. Enoke wali omulume umue wakola omutima. Ovanthu aveho ankho valinga ovipuka ovivi. Anthi Enoke watuaileko nokuumbila Huku.

Ove utyii omokonda yatyi ovanthu ankho valingila ovipuka ovivi? Sokolola. Olie wakengelela Andau na Eva opo vahatavele ku Huku iya avali kotyinyango tyailikua? Oandyu imue ondingavivi. Mombimbiliya iihanua okuti o Satanasi. Satanasi uhanda ovanthu aveho vakale onondingavivi.

Onthiki imue Yehova Huku wapopila Enoke atolele ovanthu otyipuka tyimue ovo vahahandele okutehelela. Enoke wati: ‘Makuiya onthiki, Huku mahanyaunako ovanthu aveho onondingavivi.’ Anthi, ovanthu vanumanene unene etyi veiva onondaka ombo. Avahande okuipaa Enoke. Moluotyo, Enoke wasukisile okukala nomutima wakola opo atolele ovanthu kombinga yetyi Huku malingi.

Huku kayekele Enoke akaleko omuvo omunyingi pokati kovanthu ovo onondingavivi. Enoke wakaleleko vala 365 omanima. Omokonda yatyi tupopila okuti “wakaleleko vala 365 omanima?” Omokonda ovanthu kononthiki mbuna ankho vapama unene tyipona hono. Ankho vakala omanima omanyingi. Tala vala omona wa Enoke Metusalem wakaleleko 969 omanima.

Konyima yononkhia mba Enoke, ovanthu vavililepo okulinga ovipuka ovivi. Ombimbiliya yati, ‘ankho ovanthu vasoka vala ovipuka ovivi omuvo auho. Moluotyo, ‘oohi ankho yeyulile oungangala.’

Ove utyii omokonda yatyi ovitateka viakalele ovinyingi mononthiki mbuna? Omokonda Satanasi ankho wavasa onkhalelo imue omphe yokukengelela ovanthu opo valinge ovipuka ovivi. Pahe matulilongesa kombinga yotyo.