Okamukuendye Yesu Mondyuo ya Huku

TALA omukuendye ou omututu ukahi nokutomphola novakulu ava. Ovakulu ava ovalongesi vomondyuo ya Huku mo Jelusalei. Okamukuendye o Yesu. Ankho pahe wekula, una omanima 12.

Ovalongesi vahuva unene na Yesu, mokonda ankho una enoñgonoko enene kombinga ya Huku no yovipuka viahonekwa mo Mbimbiliya. Mahi, omokonda yatyi Jose na Maliya apa vehepo? Opi vekahi? Tutalei.

Kese enima, Jose ankho utuala ombunga yae ko Jelusalei kotyipito tyakolela tyitiwa o Pasikwa. Ankho oungendi umue omunene okutunda ko Nazare alo ko Jelusalei. Pononthiki opo ankho kutupu omatukutuku, ni vala omboyo. Ovanthu ankho vaendela vala pohi, ankho valinga ononthiki ononthatu pala okuhika ko Jelusalei.

Jose ankho una ombunga onene. Ankho vena ovana ovatutu onomphange no nondenge mba Yesu pala okuyunga. Menima olio, Jose na Maliya vakondoka novana vavo ovatutu keumbo ko Nazare. Ovo vasoka okuti Yesu ukahi navakuavo. Mahi, kekumbi etyi vatalama, kavamuene Yesu. Vemutaindya pokati konombunga mbavo no mapanga, mahi kavemuvasile. Moluotyo, avakondoka ko Jelusalei okukatala inkha oko ekahi.

Okuhulako vavasa Yesu apa novalongesi. Yesu ankho uvetehelela otyo evelinga omapulo. Ovanthu aveho ankho vahuva nounongo wa Yesu. Anthi, Maliya ati: ‘Mona wange, omokonda yatyi wetulingila otyipuka ngetyi? Tate yove naame tualinga otyiho tukahi nokukutaindya.’

Yesu akumbulula okuti: ‘Omokonda yatyi munthaindyila? Kamutyii okuti ame ndyina yokukala mondyuo ya Tate yange?’

Enga, Yesu ankho uhole okukala apa apondola okulilongesa kombinga ya Huku. Oyo hangeleka nonthue tupondola okukuama? Etyi akondoka keumbo ko Nazare, onosimano ambuho ankho Yesu wenda komaliongiyo pala okukafenda. Yesu welilongesa ovipuka ovinyingi Mombimbiliya, mokonda ankho apeho utehelela nawa. Tulandulei ongeleka ya Yesu.