Metapalo Lioko Damasku

UTYII olie omulume ou walangala pohi? O Saulu. Hinangela okuti Saulu oe ankho wali nokuyunga ovikutu vio valume vana vatyopa Estevau no mamanya. Tala otyitei otyo. Oityi tyikahi nokupitapo?

Konyima yokuleka Estevau, Saulu wahimbika okuyeva ovalongwa va Yesu pala okuveipaa. Ankho wenda eumbo neumbo otyo evekokamo no kuvetuala mokaleya. Ovalongwa ovanyingi vatilila komapundaumbo omakuavo iya oko avahimbika okuivisa “onondaka onongwa Mbouhamba wa Huku.” Mahi Saulu waya komapundaumbo omakuavo, okukaovola ovalongwa va Yesu. Pahe ankho ukahi nokuenda noko Damasku. Anthi, mondyila muapita otyipuka tyihuvisa.

Liwa liwa, kuatunda otyitei tyimue keulu tyaliaimina Saulu. Saulu atokela pohi, ngetyi uluete polutalatu apa. Iya ondaka imue aipopi okuti: ‘Saulu, Saulu. Omokonda yatyi ukahi nokundandaulila?’ Ovalume ankho vekahi na Saulu veete otyitei, no kuiivite ondaka, mahi etyi ankho tyipopiwa kavetyinoñgonokele.

Saulu apulu okuti: ‘Ovelie, Tatekulu?’

Ondaka aikumbulula okuti: ‘Ame Yesu, una ukahi nokuyeva.’ Yesu wapopia ngotyo mokonda tyina Saulu ayeva ovalanduli va Yesu, ongatyina ekahi nokuyeva Yesu.

Saulu pahe apulu okuti: ‘Oityi ndyina yokulinga Tatekulu?’

Yesu apopi okuti: ‘Katuka enda ko Damasku. Oko, mokatolelwa oityi una yokulinga.’ Etyi Saulu akatuka waikula omaiho, mahi ehetyivili okutala. Walinga omumphoki. Moluotyo, ovalume ankho vekahi nae vemukuata mokuoko iya avemuhindikila alo ko Damasku.

Pahe Yesu atolela umue povalongwa vae okuti: ‘Katuka, Anania. Enda ketapalo litiwa Okulio. Tyina wamehiki meumbo lia Judas, pula omulume umue utiwa o Saulu. Ame nemuholovona opo akale omuumbili wange wakolela.’

Anania etavela. Etyi avasa Saulu, emupake omaoko ae iya apopi okuti: ‘Tatekulu wanthuma opo omaiho ove apatuluke, iya ukale weyula ospilitu sandu.’ Iya momaiho a Saulu amutoko otyipuka tyimue tyilinga ngoti omapeta, iya omaiho aapatuluka ahimbika okutala.

Saulu waundapesua monkhalelo imue yakolela pala okupopila ondaka ya Huku ovanthu vovilongo ovinyingi. Akala o apostolu Paulu. Matulilongesa unene kombinga yae. Mahi tete, tutalei etyi Huku atuma Petulu okulinga.