Omukanda Wononkhalamutwe Mbo Nombangi Mba Jeova

Mutangi Onthyolwe Uhole Jeova:

Jesus wati: “Onwe mamunoñgonoka otyili, iya otyili atyimuyovola.” (João 8:32) Onondaka ombo mbupameka unene! Tyotyili, tyitavela okunoñgonoka otyili, namphila tukahi ‘mononthiki mbuno mbepuiya mbokuahulilila’ mbeyula ounkhembi. (2 Timóteo 3:1) Ove uhinangela etyi wehimbika okunoñgonoka otyili ngetyi tyapopiwa Mondaka ya Huku? Wahambukilwe unene!

Putyina tukala nenoñgonoko liafuapo konthele yotyili nokupopila vakuetu apeho enoñgonoko olio, matyilekesa okuti tukahi nokuendela motyili. Mahi opo tutyilinge, tuesukisa okukala mohole ya Huku. Otyo tyakutikinya tyi? Onondaka mba Jesus motyinthiki tyahulililako tyononkhia mbae, mbukumbulula epulo olio. Watolela ono apostolu mbae vekolelo okuti: “Inkha muendela movitumino viange, mamutualako okukala mohole yange, ngetyi ame ndyitualako okukala mohole ya Tate mokonda ndyiendela movitumino viae.”—João 15:10.

Tala okuti Jesus wakalele mohole ya Huku pokutavela ovitumino via Tate yae. Nonthue hono otyo tuesukisa okulinga. Opo tukale mohole ya Huku, tuesukisa okuundapesa ovitumino via Huku momuenyo wetu ononthiki ambuho. Tupu motyinthiki otyo, Jesus wati: “Inkha muanoñgonoka ovipuka evi, mamukala nombembwa inkha muvilinga.”—João 13:17.

Tuhanda nomutima auho omukanda ou ukukuateseko okutualako okuundapesa ovitumino via Huku momuenyo wove nokukala “mohole ya Huku . . . pala okupewa omuenyo wahapu.”—Judas 21.