esusi Ulinga Omahuviso Omanene Mo Kafalanau

Sesusi wakonga ovalongwa vekuana — Petulu na Andelee na Tiaku na Suau — opo vakale ovafwi vovanthu. Pahe Motyasapalo, aveho avaende mondyuo yokufendela ko Kafalanau. Sesusi alongesa ovanthu mondyuo yokufendela, avahuvu nonkhalelo yae yokulongesa. Ankho ulongesa ngatyina etyitumwa, ha ngovahoneki vovitumino.

Motyasapalo otyo, akuya omulume umwe ankho una otyilulu. Iya omulume oo ahimbika okupopila peulu mondyuo yokufendela okuti: “Oityi uhanda ku onthue Sesusi omu Nasalee? Weya okutunyima-ko? Ame ndyikwii umwe nawa, ove Umusukuki wa Huku!” Sesusi akandukila otyilulu otyo ankho tyikahi momunthu, ati: “Uti filuu, tunda mwe!” — Maluku 1:24, 25.

Ngotyo, otyilulu atyitokesila omulume pohi ahimbika okusavila iya atyiliyavela unene peulu. Mahi otyilulu atyitundu momulume oo “atyihemulingi omapita.” (Luka 4:35) Ovanthu ankho vekahi mondyuo yokufendela avahuvu unene! Avelipulu okuti: “Etyi oityi?” “Una epondolo liokutumina alo umwe ovilulu, avimutavela.” (Maluku 1:27) Liwa-liwa, onondaka konthele yehuviso olio ambuliyandyana mo Ngalileya aiho.

Sesusi novalongwa vae avatundu mo Ngalileya, avaende keumbo lya Simau Petulu. Avavasi inaivi ya Petulu wavela unene, ankho una elema. Avaiti Sesusi emukuateseko. Ngotyo, Sesusi aende-ko, emukuate mokuvoko iya emukatula. Liwa-liwa aveluka, ahimbika okuundapela Sesusi novalongwa vae, tyafuile ankho uvetelekela-ko okulia.

Tyina ekumbi linyingila, ovanthu vatunda kononthele ambuho aveya peumbo lya Petulu novavei vavo. Tyimoneka ngoti liwa-liwa ovanthu aveho vomepunda-umbo veliongiya pombundi. Omokonda yatyi? Omokonda ankho vahanda okuhakulwa. Tyotyili, ‘aveho ankho vokuna ovavei vena omauvela elikalaila, aveveeta kwe. Ngwe ankho upaka vala omavoko ae kuvo, otyo vaveluka.’ (Luka 4:40) Omauvela aeho ovanthu ankho vena, Sesusi ankho uvekuatesako ngetyi eulo liapopile. (Isaías 53:4) Alo umwe wayovolele ovanthu kovilulu. Tyina ovilulu ankho vitunda movanthu, vipopia okuti: “Ove Umona wa Huku.” (Luka 4:41) Mahi Sesusi ankho uvikandukila, eheviyeke vipopie. Ovilulu ankho vityii okuti Sesusi o Kilisitu, mahi Sesusi ankho kahande vililekese ngatyina viumbila Huku yotyotyili.