Sesusi Ututilisa Omona Womuhepe

Etyi Sesusi ahakula omupika wonkhalamutwe yomafualali, atundu ko Kafalanau aende kepunda-umbo lyo Naii, paendwa onokilometulu 32 kokumbili kuekumbi. Ankho kekahi aike. Ankho ukahi nokueenda novalongwa vae novanthu ovanyingi ovakuavo. Tyina ekumbi linyingila, pahe vekahi nokuhika ko Naii. Avavasi-ko ova Sundeu ovanyingi ankho vekahi nokuenda mohika. Omukuendye wokuanyima ankho vemutyinda opo vekemupake.

Omunthu ankho waihamenwa vali unene, o ina yomona oo. Ankho omuhepe iya pahe omona wae wike vala wanyima. Etyi omulume wae anyima, ankho wesala nomona oo womukuendye. Ankho vakala omapanga omanene nomona wae, ankho o mwe vala apaka ekevelo liae, oe ayumba onthumbi yokuti memutekula. Pahe omona oo wanyima. Olie makala nae iya olie memutekula?

Etyi Sesusi amona omukai oo, atyimuihama okumutala okuti ankho waihamenua unene, tupu wasoya mokonda yotyitateka otyo. Emupopila nokankhenda, monkhalelo imukalesa nonthumbi okuti: “Uhalile vali.” Sesusi kapopile vala, walinga vali otyipuka otyikuavo. Afuene-po, akuate kotyinthandala ankho kuna otyivimbi. (Luka 7:13, 14) Mokonda yonkhalelo yae netyi alinga, ovanthu vomepunda-umbo ankho vekahi nokulila, avahalili vali. Tyafuile velipulile okuti: ‘Oityi ahanda iya oityi malingi?’

oñgeni vana ankho vaenda na Sesusi vakalele etyi vamona omahuviso alinga, nomauvela omanyingi ahakula? Tyafuile nalumwe vamuene Sesusi watutilisa omunthu. Namphila ankho kuna-le ovanthu vatutilisilwe kohale, okuti Sesusi nae matutilisa omunthu? (1 Reis 17:17-23; 2 Reis 4:32-37) Sesusi ati: “Mona wange, ndyikupopila okuti, pinduka-po!” (Luka 7:14) Iya omunthu oo apinduka-po. Apumphama, ahimbika okupopia! Me yae ankho wahuva, wahambukwa unene iya Sesusi emuavela omona wae. Pahe ankho kamakala vali aike.

Etyi ovanthu vamona okuti omukuendye una vali omuenyo, avahilivika Omuavi Womuenyo, Siovaa, avati: “Huku wetukatulila omuuli omunene pokati ketu.” Ovanthu ovakuavo avanoñgonoka otyilinga tyihuvisa tya Sesusi, avapopi okuti: “Huku wahinangela ovanthu vae.” (Luka 7:16) Liwa-liwa, ovanthu avahimbika okupopia ehuviso olio aliliyandyana motyilongo atyiho, tyafuile alo ko Nasalee otyilongo tya Sesusi, ankho paendwa onokilometulu 10. Ovanthu avetyipopi atyiliyandyana alo umwe kokumbili kwo Sundeya.

Suau Batisita nkhele ankho uli mokaleya iya ankho uhanda unene okunoñgonoka ovilinga Sesusi apondola okulinga. Ovalongwa va Suau avemupopila konthele yomahuviso oo. Oñgeni Suau akalele?