Vakongwa Vakalie — Olie Huku Apondola Okukonga?

Konyima etyi ahakula omulume ankho una ouvela umumitisa olutu, Sesusi nkhele ankho ukahi meumbo liomu Faliseu. Sesusi amono okuti vokuakongwa vekahi nokukoya onomphangu mbukahi vali nawa komesa, nomphitilo oyo alongesa okuliola omutima.

Sesusi ati: “Tyina wamakongua motyipito tyotyinepo, uhapumphame pomphangu ikahi vali nawa. Hamwe pena ou wakongua omunene vali tyipona ove. Pahe una wemukonga eya ekupopila okuti, ‘Katuka-po, omphangu ei oyou.’ Matyikukundisa tyina pahe ukapumphama pomphangu yo konyima.” — Luka 14:8, 9.

Konyima, Sesusi ati: “Tyina wamakongua, kapumphame pomphangu yo konyima opo tyina wokuekukonga ameya ekupopila okuti, ‘Panga liange, endyu upumphame apa pekahi vali nawa.’ Ngotyo monkhimana pokati ka aveho vakongwa.” Sesusi ankho kekahi nokulongesa vala okukala nonondunge. Wahangununa okuti: “Mokonda vana velipaka-ko mavakapakwa pombuelo, iya vana velipaka pombuelo mavakapakwa kounene.” (Luka 14:10, 11) Ankho ukahi nokuavela ondundo ovateheleli vae vakale notyituwa tyokuliola omutima.

Konyima, Sesusi alongesa omu Faliseu wemukonga oñgeni ankho apondola okukonga ovanthu veye okulia, monkhalelo ihambukiswa umwe Huku. Ati: “Tyina uteleka okulia kwo komutenya ine ondalelo, uhakonge omapanga ove ine ovakuatate vove ine ombunga yove ine ovahona vakuenyi. Mokonda navo vapondola okukukonga, iya atyikala ngatyina vekukondolela. Mahi tyina ulinga otyipito, konga ovahepi, novilema novamphoki. Iya mokala nehambu, mokonda vetupu natyike mavekuavela.” — Luka 14:12-14.

Katyapengele okukonga omapanga, nombunga ine vomunthele yetu veye okulia, iya Sesusi ankho kekahi nokupopia okuti otyo tyapenga. Mahi, walekesa okuti okuavela okulia ovanthu vesukisa, ngetyi ovahepi, novilema, novamphoki tyipondola okueta ononkhano onongwa. Sesusi ahangununina omulume wemukonga okuti: “Ove mokapewa ondyambi petutilo liovaviuki.” Umwe po vokuakongwa etavela onondaka ombo, ati: “Omunthu makalia Mouhamba wa Huku, una ehambu.” (Luka 14:15) Omulume oo waimbuka okuti olio elao limwe enene. Ngetyi Sesusi apopia, ha aveho ankho vasoka ngotyo.

Wati: “Omulume umwe wapongiya otyipito otyinene, akongo ovanthu ovanyingi. Atumu omupika wae . . . opo akapopile vokuakongwa okuti: ‘Endyuei, mokonda ovipuka aviho viapia-le.’ Mahi aveho avahimbika okutatesa. Wo tete emupopila okuti: ‘Ame nalanda epia iya nahanda okukelitala. Otyiponyo, kamatyitavela okuya.’ Omukuavo ati: ‘Ame nalanda onongombe ekwi mbokunana, ndyienda-ko ndyikembutale; otyiponyo, kamatyitavela okuya.’ Nkhele omukuavo ati: ‘Ame himeya mokonda nanepa pehepano.’” — Luka 14:16-20.

Ovipuka vatatesila kavisilivila! Omunthu utala epia ine otyipako pokulanda, ankho katyilumbanesa vali okukevitala ngwe vialandwa-le. Omulume wa tatu ankho kekahi nokulipongiya pala okunepa. Ankho wanepa-le, ngotyo ankho katyimutyilika okuenda oku akongwa. Etyi eiva ovipuka ovalume ovo vatatesila, omuhona anumana, apopila omupika wae okuti:

“Kanyauka enda momatapalo omanene, no monondyila mbepunda-umbo, kapole ovahepi, novilema, novamphoki.” Etyi omupika akondoka, nkhele ankho muna omphangu. Omuhona apopila omupika okuti: “Enda momatapalo no monondyila vekuluminya veye okunyingila, opo ondyuo yange iyule. Ndyimupopila okuti, povanthu vana ankho vokuakongwa nawike meya okumakela kokulia kuange.” — Luka 14:21-24.

Etyi Sesusi apopia tyilekesa nawa onkhalelo Siovaa Huku atumine Sesusi Kilisitu opo akonge ovanthu vakakale Mouhamba wo keulu. Ova Sundeu, haunene ononkhalamutwe mbonongeleya, ovanthu votete vakongelwe. Mahi ovanyingi puvo etyi vakongwa mokueenda kuovilinga vya Sesusi avaanye. Mahi ankho pena ovanthu ovakuavo mavakongwa. Sesusi wayandyulula nawa okuti komutwe wandyila ankho makakonga ova Sundeu veliola omutima, novanthu ovakuavo. Konyima, otyikando tya tatu tyahulililako, ankho makakonga ovanthu vana ova Sundeu ankho vasoka okuti vetupu esilivilo komaiho a Huku. — Ovilinga 10:28-48.

Etyi Sesusi apopia tyelikuata nonondaka mbomulume una wokuakongelwe wati: “Omunthu makalia Mouhamba wa Huku, una ehambu.”