PETULU UPOPIA OKUTI KEI SESUSI

Etyi Sesusi akuatwa mo Getesemani, ono apositolu avatili owoma avakahateka, avemusi-po. Mahi vevali puvo, Petulu “nomulongwa omukuavo,” mokutala apositolu Suau, avatalama. (Suau 18:15; 19:35; 21:24) Petulu na Suau tyipondola vamuene etyi Sesusi ankho ekahi nokutualwa keumbo lya Anasi. Etyi Anasi atuma opo Sesusi atualwe keumbo lya Kaifaa Omunene-nakwa Wavilapo, Petulu na Suau, avakalela kokule, otyo vemulandula. Ankho vatila owoma, mahi tupu ankho vasukalala netyi Tatekulu yavo malingwa.

Mokonda Suau ankho wiiwe na Kaifaa, omunene-nakwa, avemuyeke anyingile mepata. Petulu esala kondye alo Suau akondoka, apopi nomuhikuena ankho ukahi nokuyunga kombundi. Pahe Petulu nae anyingila.

Mokonda ankho kuatenda, vana ankho vekahi mepata liomunene-nakwa avanthiakana otupia. Petulu akala pokati kavo aunguluka, otyo akevelela ‘atale etyi Sesusi malingwa.’ (Mateusi 26:58) Pahe, omuyungi wo kombundi wokuayeka Petulu anyingile, emuimbuka mokonda yotyimimi tyotupia. Ati: “No ove kumulongwa womulume oo?” (Suau 18:17) Iya hae-ko vala, ankho pena vali ovanthu ovakuavo vemuimbuka, avati vemumuene ankho vena Sesusi. — Mateusi 26:69, 71-73; Maluku 14:70.

Otyo atyinumanesa Petulu. Ankho kahandele okuimbukwa, atundu-po aende no kombundi. Petulu ehetavela okuti ankho vena Sesusi, ati: “Ame himwii, tupu etyi ukahi nokupopia hityii.” (Maluku 14:67, 68) Ahimbika ‘okulihingana, nokuaana,’ ngatyina etyi apopia otyili, alo umwe ankho upondola okunkhila-po. — Mateusi 26:74.

Mokueenda kuomuvo oo, Sesusi ankho ukahi nokukoyeswa mondyuo ya Kaifaa. Momphangu vekahi tyipondola ankho ikahi peulu liepata. Petulu novanthu ovakuavo ankho vekahi nokukevelela mombuelo iya ankho veete ovanthu velipinga-pinga, okukaava oumbangi konthele ya Sesusi.

Petulu omu Ngalileya iya onkhalelo apopia ankho ilekesa okuti wakemba, etyi ati Sesusi himwii. Tupu, ankho pena omunthu umwe ombunga ya Maluku, una Petulu atetele okutwi. Omunthu oo, apulu Petulu okuti: ‘Ove hekumuene ko Getesemani kumwe nae?’ Etyi Petulu apopia otyikando tya tatu okuti Sesusi himwii, ngetyi Sesusi apopile, ekuandambolo alipopi. — Suau 13:38; 18:26, 27.

Pomuvo opo, tyipondola Sesusi ankho ukahi keulu liondyuo. Apiluluka, atale ku Petulu iya Petulu elitehelela unene omapita. Ahinangela etyi Sesusi emupopilile, pu etyi vekahi kondyuo valila Opasikwa. Soka oñgeni Petulu akalele etyi aimbuka otyipuka alinga! Petulu alupuka kondye, alili unene. — Luka 22:61, 62.

Oñgeni Petulu akalinga otyipuka ngotyo? Oñgeni Petulu apopile okuti kei Tatekulu yae, ngwe ankho omukuatyili, una oupanga wapama na Huku? Onondaka mba Sesusi ankho mbukahi nokupililikwa iya ankho vemutala ngatyina ongangala. Pomuvo opo, Petulu ñgeno ankho ukuatesako Sesusi, mahi wayekele-po Una ankho “una onondaka mbomuenyo wahapu.” — Suau 6:68.

Etyi tyaendele na Petulu tyilekesa okuti alo umwe omunthu una ekolelo liapama, nonthilo na Huku, wesukisa okulipongiya opo ahaponyo tyina atumbukilwa novitateka vilola ekolelo liae. Ovaumbili aveho va Huku vesukisa okulilongesila kuetyi tyaendele na Petulu!!