Ova Faliseu Vapula Omulume Ankho Omumphoki

Ova Faliseu kavetavelele okuti Sesusi wahakula omulume ankho watyitwa omumphoki, moluotyo avaihana ovohe. Ovohe ankho vetyii okuti inkha vapopia nawa vapondola ‘okutaatwa mongeleya.’ (Suau 9:22) Inkha vayekapo oupanga wavo nova Sundeu, ankho vapondola okukala novitateka na vakuavo, avakala noluhepo mombunga.

Ova Faliseu avevelingi omapulo evali avati: “Omona wenyi muti watyitwa omumphoki oyou? Iya oñgeni pahe eetepo?” Ovohe avakumbulula okuti: “Tutyii okuti ou omona wetu, iya ankho watyitwa omumphoki. Mahi oñgeni pahe eetepo, onthue katutyii; ine olie wapatula omaiho ae, katumwii.” Namphila tyafuile omona wavo evepopilile etyi tyaendapo, ovohe avakumbulula nowoma, avati: “Pulei kwe. Muene pahe omukulu. Muene oe una okupopia.” — Suau 9:19-21.

Moluotyo, ova Faliseu avaihana vali omulume oo, avemuhongo okuti Sesusi omunthu ondingavivi. Avati: “Tupopile otyili mokonda Huku ukueete, onthue tutyii okuti omulume oo ulinga ononkhali.” Omulume oo ahalingi ngetyi vapopia, ati: “Inkha ulinga ononkhali ame hityii.” Mahi, apopi okuti: “Etyi ndyii, otyokuti ame ankho ndyimumphoki, mahi pahe ndyietepo.” — Suau 9:24, 25.

Ova Faliseu avehemuyeke vala ngotyo, avati: “Wekulinga ñgeni? Oñgeni apatula omaiho ove?” Omulume alekesa okuti wakola omutima, etyi akumbulula okuti: “Ame nemupopila-tyo-ale, mahi onwe amuhenthavela. Omokonda yatyi muhandela vali okutyitehelela? Okuti no onwe muhanda okukala ovalongwa vae?” Ova Faliseu avanumana, avati: “Ove umulongwa womulume oo, mahi onthue tuvalongwa va Moisesi. Onthue tutyii okuti Huku wapopile na Moisesi, mahi omulume oo, oku atunda onthue katukwii.” — Suau 9:26-29.

Omulume oo otyo atyimuhuvisa, ati: “Otyo tyihuvisa, okuti onwe kamwii opi atunda, mahi ngwe waikula omaiho ange.” Apopi onondaka mbaviuka, mbulekesa omunthu patyi Huku etavela, ati: “Onthue tutyii okuti Huku katehelela ovanthu vokulinga onkhali, mahi inkha omunthu umwe una onthilo nae, alingi ehando liae, Huku umutehelela. Tunde kohale, nalumwe kueivalele nawike wapatulile omaiho omunthu watyitwa omumphoki.” Amanuhula nonondaka ombu: “Inkha omunthu oo ha wa Huku-ko, ñgeno kevili okulinga natyike.” — Suau 9:30-33.

Ova Faliseu avehetyivili okuanya onondaka mbomulume oo, avemupopila okuti: “Watyitilwa mononkhali, pahe uhanda okutulongesa?” Avemutaatela pondye! — Suau 9:34.

Etyi Sesusi eiva etyi tyaenda-po, aovola omulume oo emupulu okuti: “Ove una ekolelo Momona womulume?” Omulume wokuavelulwa akumbulula okuti: “Olie tatekulu, opo ndyikale nekolelo mwe?” Sesusi emupopila umwe nawa okuti: “Ove umueete, oe ukahi nokupopia no ove.” — Suau 9:35-37.

Omulume ati: “Ndyina ekolelo mwe Tatekulu.” Opo alekese okuti una ekolelo mu Sesusi nonthilo, omulume oo aikila konongolo iya Sesusi emupopila okuti: “Ame neya opo ouye ukoyeswe iya vana vahamonopo vamonepo iya vana vamonapo avakala ovamphoki.” — Suau 9:38, 39.

Ova Faliseu ovo ankho vetyii okuti ngwe havamphoki-ko. Mahi okuti otyilinga tyavo tyokulongesa ovanthu konthele ya Huku ankho tyaviuka? Opo veliamene, avapulu okuti: “Okuti no onthue tuvamphoki?” Sesusi ati: “Inkha muali ovamphoki ñgeno kamuvelwa onombei mokonda yonkhali. Mahi onwe muti: ‘Tueetepo.’ Iya onkhali yenyi itualako.” (Suau 9:40, 41) Inkha kavakalele ovalongesi mo Isilayeli, etyi vaanya okuti Sesusi oe Mesiya ñgeno hahe. Mahi mokonda ankho valongesa Ovitumino, etyi vemuanya valinga onkhali onene.