Ngambiliyeli Upopia na Maliya

Elisambete ankho una wavo utiwa o Maliya, ukala kepunda-umbo lyo Nasalee mo Ngalileya. Maliya ankho una omukwendye utiwa o Susee, omuhongi womavai. Pweetyi eimo lya Elisambete lina onohanyi epandu, oandyu Ngambiliyeli aikapopia na Maliya. Aiti: ‘Okamene Maliya. Siovaa wekupanda unene.’ Maliya ahanoñgonoka etyi Ngambiliyeli ahanda okupopia. Oandyu aimuti: ‘Ove mokala omulemi okutula omona, omuluku okuti o Sesusi. Omona oo makala Ohamba. Ouhamba wae maukala-ko apeho.’

Maliya ati: ‘Ame hinelale nomukwendye nawike. Oñgeni mandyikala nomona?’ Ngambiliyeli ati: ‘Siovaa petupu etyi tyimupona. Kononkhono mba Huku mokala nomona. Wenyi Elisambete nae walinga omulemi.’ Maliya ati: ‘Ame ndyimupika wa Siovaa, alinge etyi ahanda.’

Maliya aende ku Elisambete. Etyi Maliya emukukunya, Elisambete eivi olukembe lwahomboka meimo liae lwahambukwa. Elisambete ati: ‘Maliya Siovaa wekuyamba. Eli elao enene okweendelwa na ina ya Tatekulu yange.’ Maliya ati: ‘Ndyipandula unene Siovaa.’ Maliya akala onohanyi ononthatu meumbo lya Elisambete, pahe aende nokeumbo liae ko Nasalee.

Etyi Susee eiva okuti Maliya omulemi ahande okumuyeka-po. Mahi oandyu ya Siovaa aipopi na Susee mondyoi aiti: ‘Wahatile owoma okunepa Maliya. Kalingile natyike tyapenga.’ Susee avelinepe na Maliya emutwala keumbo liae.