Omukai Uli Ponyombo

Etyi ovo Sesusi novalongwa vae vamana okulinga o Pasikwa, avakwate ko Samaliya avaende noko Ngalileya. Etyi vehika konthele kepunda-umbo lyo Sikale, avatalama ponyombo imwe ya Sakoo. Sesusi ngapo esala, ovalongwa vae avaende nomepunda-umbo vakalande okulia.

Apeya omukai weya okutapela omeva. Sesusi apopila omukai oo okuti: “Mphevo omeva.” Omukai ati: “Ñgeni ngootyo, ove mu Sundaa ukaita kwaame omeva, ame ndyimu Samaliya, ova Sundaa vehelihande nova Samaliya?” Sesusi apopila omukai okuti: ‘Omokonda kutyii ame-lie, ine wanoñgonokele, ñgeno wandyita omeva, ame ankhwavela omeva omwenyo.’ Omukai emupulu okuti: ‘Otyo okuti-wi? Ove utupu ombaliti yokuyendya omeva.’ Sesusi emupopila okuti: ‘Ou unwa omeva ame mandyimupe, kakaliwa-liwa vali nohunga.’ Omukai ati: “Tatekulu, mphevo omeva atyo oo.”

Sesusi apopila omukai okuti: ‘Kaihane omulume wove.’ Omukai ati: ‘Ame ndyitupu omulume.’ Sesusi ati: ‘Wapopia otyili. Ove wakalele-ale na vetano, pahe omulume una-e ha wove-ko.’ Omukai ati: ‘Ndyityeete okuti umuuli. Ovanthu ovanyingi vati tupondola okufendela Huku komphunda ei, mahi ova Sundaa vati tuna vala okumufendela ko Selusalei. Ame ndyityii okuti tyina Mesiya ameya, metulongesa oñgeni tuna okufenda.’ Etyi omukai oo apopia ngootyo, Sesusi apopi otyipuka ehenepopile omunthu nawike ati: ‘Ame Mesiya.’

Omukai aende kepunda-umbo, akapopila ova Samaliya okuti: ‘Napopia nomulume umwe wamphopila ovipuka aviho nalinga-linga, mokutala ngoti o Mesiya. Twendei mukemutale!’ Avemulandula atee ponyombo, vakatehelele etyi Sesusi eli nokulongesa.

Ova Samaliya avaiti Sesusi akale mepunda-umbo liavo. Akala mepunda-umbo ononthiki onombali nokulongesa ovanthu ovanyingi, avetyitavela okuti o Mesiya. Etyi vatehelela ovipuka Sesusi apopia, avapopila omukai oo omu Samaliya okuti: ‘Pahe twetyimona okuti omulume ou, oe omuyovoli wouye.’