Sesusi Ututiliswa

Etyi Sesusi anyima, omulume umwe omuhona utiwa o Susee akaita ku Pilatu olutu lwa Sesusi opo ekemupake. Susee awingila olutu motyinyanga tyimwe otyiwa, elupake melangalo. Pombundi yelangalo apake-ko emanya limwe enene. Ononkhalamutwe mbovanakwa avapopila Pilatu okuti: ‘Twalinga otyiho tyokuti ovalongwa vae maveya okumupola-po, avapopila ovanthu okuti watutiliswa.’ Pilatu evepopila okuti: ‘Hitikei-po, amuyungu-po.’

Etyi pakala ononthiki ononthatu, ovakai vamwe avelimeneka kelangalo, avavasi emanya liapolwa-po. Tyina vakati ñgaa mokati kelangalo muna oandyu, aipopila ovakai ovo okuti: ‘Mwahatilei owoma. Sesusi watutiliswa. Endei ketyipopilei ovalongwa vae, vekelivase nae ko Ngalileya.’

Maliya Mandalena akaovola ovo Petulu na Swau. Etyi evevasa, evepopila okuti: ‘Pena ou wapola-mo olutu lwa Sesusi!’ Petulu na Swau avakahatekela kelangalo. Etyi vehika-ko, avavasi melangalo mutupu natyike, avakondoka komaumbo avo.

Maliya akondoka vali kelangalo, avasa-mo onoandyu onombali, embupopila okuti: ‘Ame hityii ovalie vatyinda-po olutu lwa Tatekulu.’ Tyina akati ñgaa, omulume umwe ati hamwe owokuundapa mepia lili ponthele yelangalo ati: ‘Ine ove wemupola-mo, mphopile-vo vala apa wemupaka.’ Omulume oo emwihana ati, “Maliya!” Etyimono okuti o Sesusi. Maliya ati: “Mulongesi!” Emuhumbakana. Sesusi emupopila okuti: ‘Enda kapopile ovalongwa vange okuti ove wamona.’ Maliya aende kovalongwa evepopila okuti ame namona Sesusi.

Monthiki oyo, ovalongwa vevali ankho vekahi nokutunda ko Selusalei okwenda noko Emau. Omulume aende no kuvo, evepulu oityi vekahi nokupopia. Ngwe avati: ‘Ove kwetyiivile? Ononthiki ononthatu konyima oku, ononkhalamutwe mbovanakwa vaipaele Sesusi. Pahe ovakai vamwe vapopia okuti Sesusi una omwenyo!’ Omulume oo, evepulu okuti: ‘Onwe kamutavela etyi ovauli vapopile? Vatile Kilisitu maipawa atutiliswa.’ Evehangununina Ovihonekwa. Etyi vehika ko Emau, ovalongwa avapopila omulume oo okuti twende atuho keumbo lietu. Avaende, pokulia omulume oo ngae ulikwambela, avetyimono okuti o Sesusi. Vakati ñgaa kepo vali.

Ovalongwa ovo vevali avaende ko Selusalei mondywo omu muna ovatumwa, avevepopila etyi vamona. Etyi veli mondywo omo, Sesusi eya aveho avemumono. Potete, ovatumwa kavetyitavelele okuti o Sesusi. Sesusi eveti: ‘Talei omankhanya ange, ndyamei. Tyapopilwe okuti Kilisitu mapindulwa-po kononkhia.’