Oityi Ovinepo Vimwe Vihatualelako?

“Ova faliseu veya ku [Jesus], nokuatokola okumulola, iya avati: ‘Tyitavela omulume okuhenga omukai wae mokonda ya kese tyimwe?’”—Mateus 19:3.

VAMWE vakaleleko kononthiki mba Jesus ankho velipula inkha otyinepo tyesukisa umwe okutualako apeho. Jesus evepopila okuti: “Kamunetange okuti una wevetunga tunde ponthyimbi, wevetungile omulume nomukai, iya ati: ‘Moluotyo omulume masipo he na ina, eliwaneka nomukai wae, iya ovo vevali avakala ohitu ike vala?’ Ngotyo, kavakala vali ovanthu vevali, anthi vakala ohitu ike vala. Moluotyo, etyi Huku apaka kokanga ike, omunthu ehetyiyapule.”a (Mateus 19:4-6) Tyimoneka nawa, okuti Huku wahandele ovinepo vitualeko.

Movilongo ovinyingi hono, ovalinepi ovanyingi “veliyapuka,” konyima avelihenge. Okuti omalondolo Ombimbiliya konthele yotyinepo etupu vali esilivilo? Okuti otyo tyilekesa okuti otyinepo katyiende nawa mokonda una wetyihinda kalingile nawa?

Tala ongeleka ei: Ovalume vevali novakai vavo valanda omatuku-tuku elifwa. Umwe nomukai wae vakuata nawa etuku-tuku liavo nokulitaha nonondunge. Etuku-tuku liavo alihapanguyuka. Omukuavo nomukai wae, kavakuate nawa etuku-tuku liavo, tupu velitaha omapita. Etuku-tuku olio alipanguyuka, iya aveliyekepo. Mongeleka yavali, olie una otyitateka, etuku-tuku ine ovahekulu yalio? Tyimoneka nawa okuti vena otyitateka ovahekulu.

Tupu, tyina ovinepo ovinyingi vihatualako, katyilekesa okuti una wahinda otyinepo oe wahalingile nawa. Otyo tyilekeswa nawa novinepo ovinyingi vitualako nehambu. Ovinepo ovio vietela ehambu nombembwa vokuelinepa, no nombunga, no potyilongo. Mahi, ngetyi etuku-tuku likuatwa nawa, notyinepo tyesukisa okukuatwa nawa opo tyitualeko.

Inkha otyinepo tyove otyipe ine otyikulu, omalondolo Ombimbiliya konthele yoñgeni otyinepo tyina okuyungwa nokupamekwa, akolela. Tala onongeleka mbumwe, pomafo alandulako.

[Onondaka Poutoi]