Jesus Kristu

Olie Tyilityili?

“Etyi pahe anyingila mo Jelusalei, ovanthu aveho mepundaumbo vahimbika okuyangalala otyo vati: ‘Ou olie?’ Ounyingi wovanthu autualako okuti: ‘Ou omuuli Jesus, wo ko Nazare yo ko Galileia!’” —MATEUS 21:10, 11.

OITYI tyayangalalesile ovanthu etyi Jesus Kristua ehika mo Jelusalei monthiki oyo yondyovo yo 33 P. K.? Ovanyingi mepundaumbo veivile okupopia konthele ya Jesus novipuka ovinene alinga. Avatualako okupopila vakuavo konthele yae. (João 12:17-19) Anthi, kavehi ankho vei okuti pokati kavo pena omunthu umwe wakolela, walinga etyi matyiyandyana ouye auho alo kononthiki mbetu!

Tala onongeleka mbuhehi mbulekesa oñgeni etyi Jesus alinga tyayandyana ouye auho.

▪ Ovikalendaliu vimwe movilongo ovinyingi vihimbikila menima vati omo Jesus atyitwa.

▪ Otyinyingi tyovanthu movilongo ovinyingi mouye veliihana ovo muene okuti Ovakristau.

▪ Ova Isilamiku valamba pombiliau ouye auho, valongesa okuti Jesus “omuuli omunene tyipona Abraiau na Noe na Moisesi.”

▪ Onondaka ononyingi Jesus apopia nounongo, hono mbupopiwa kese nthiki mononkhalelo ononyingi. Mbumwe ombombu:

‘Muavela olupanda olukuavo.’—MATEUS 5:39.

‘Ove linga ononthambo ovityita omakui evali.’—MATEUS 5:41.

‘Nawike omunthu upondola okuumbila ovahona vevali.’—MATEUS 6:24.

‘Muhayumbei kovingulu omalumono enyi.’ —MATEUS 7:6.

‘Ovipuka aviho muhanda ovanthu vemulingile, tupu nonwe ovio muvelingila.’—MATEUS 7:12.

‘Tala inkha una etyi tyituuka.’—LUCAS 14:28.

Tyotyili etyi Jesus alinga tyayandyana ouye auho. Nkhele no ngotyo, ovanthu vena omalusoke nomatavelo elikalaila konthele ya Jesus. Moluotyo ove upondola okulipula okuti, ‘Jesus Kristu olie tyilityili?’ Ombimbiliya itupopila opi Jesus atundile, oñgeni atyindile omuenyo wae, no mokonda yatyi ankhila. Okunoñgonoka otyili otyo konthele ya Jesus, matyikukuatesako momuenyo wove hono, no komutwe.

[Onondaka Poutoi]