Jesus Omokonda Yatyi Ankhila

“Omona womulume weiya . . . opo aave ohande yae [ine omuenyo] wae ngofeto pala okuyovola ovanthu ovanyingi.”—MARCOS 10:45.

JESUS ankho wii oityi akevela. Oe ankho utyii okuti kamakala nombembwa momuenyo wae, nokunkhia vala tyina amakulupa. Anthi, ankho utyii nawa okuti maipawa omapita tyina nkhele omukuendye, iya ankho oe welipongiya pala ononkhia ombo.

Ombimbiliya ipopia konthele yesilivilo enene liononkhia mba Jesus. Omukanda umwe wati ononkhia mba Jesus mbapopiwa ovikando 175 Movihonekwa vio Vakristau mo Gregu, ine o Testamendu Omphe. Iya oityi Jesus ankho ena okumonena ononkhumbi nokunkhia tyihakulupile? Tuesukisa okutyinoñgonoka, tyetyi ononkhia mba Jesus mbupondola okueta ouwa omunene momuenyo wetu.

▪ Oityi Jesus ankho akevela Mokueenda kuenima liahulililako liomuenyo wae, Jesus walondola ovalongwa vae ovikando ovinyingi, konthele yononkhumbi no nonkhia ankho akevelela. Etyi ankho vaya no ko Jelusalei kotyipito tyo Pasikwa yae yahulililako, wapopila ono apostolu mbae 12 okuti: “Omona womulume makapakulwa pomaoko ovanene-nakwa, novanongo vovihonekwa, iya avemuhitisa kononkhia nokumupakula kovanthu vouye. Iya mavakanyanena kwe, nokumunthila omate, nokumuveta, iya avemuipaa.”a (Marcos 10:33, 34) Jesus ankho wii nawa atyiho matyikapita nae mokonda yatyi?

Jesus ankho wii nawa omaulo omanyingi Ovihonekwa vio Hebreu apopia oñgeni omuenyo wae ankho maukavituka. (Lucas 18:31-33) Tala omaulo amwe kumwe no Vihonekwa vilekesa oñgeni afuiswapo.

Mesiya . . .

▪ Malandeswa 30 onombongo mbovivela.—ZACARIAS 11:12; MATEUS 26:14-16.

▪ Mavetwa nokunthilwa omate.—ISAÍAS 50:6; MATEUS 26:67; 27:26, 30.

▪ Mapapelwa momuti.—SALMO 22:16, okatoi; MARCOS 15:24, 25.

▪ Makalingwa omukuele putyina ekahi momuti.—SALMO 22:7, 8; MATEUS 27:39-43.

▪ Maipawa, mahi omankhipa ae kamaateyua.—SALMO 34:20; JOÃO 19:33, 36.

Jesus wafuisapo omaulo oo nomakuavo vali omanyingi. Oe ankho kapondola okutyilinga oe muene. Omaulo oo aeho afuiswapo mu Jesus, alekesa okuti tyotyili oe ankho watumua na Huku.b

Oityi Jesus ankho esukisila okumona ononkhumbi nokunkhia?

▪ Jesus wankhia opo atetulule ovitateka vimwe viakolela Jesus ankho wii nawa otyitateka tyakolela tyakatulwa kohale mo Endene konthele youye auho. Andau na Eva vahongiliyua noandyu imwe omphuki avaholovona okuanya Huku. Oumphuki wovalinepi ovo waihanua okuti otyitateka konthele youhamba waviuka wa Huku, ine yonkhalelo yae yokutumina. Onkhali yavo tupu yakatula epulo konthele yovanthu, inkha vapondola okutualako okukolela mu Huku tyina vamona ononkhumbi.—Gênesis 3:1-6; Jó 2:1-5.

Jesus waava ekumbululo liafuapo konthele youhamba wavilapo wa Jeova, no yekolelo liovanthu. Mokonda wetavela umwe “alo pononkhia . . . momuti wemone,” Jesus waamena ouhamba wa Huku. (Filipenses 2:8) Jesus tupu walekesa okuti omunthu upondola okutualako okukolela mu Jeova namphila apita mononkhumbi ononene.

▪ Jesus wankhia opo ayavole ovanthu Omuuli Isaia waulile okuti Mesiya wokualaua makamoneswa ononkhumbi aipawa opo ayovole ovanthu mononkhali. (Isaías 53:5, 10) Jesus ankho utyii nawa, iya ankho uhanda okuava “omuenyo wae ngofeto pala okuyovola ovanthu ovanyingi.” (Mateus 20:28) Otyilikutila tyononkhia mbae, tyaikula ondyila opo ovanthu ovakuankhali vakale noupanga omuwa na Jeova, nokuyovolwa monkhali no mononkhia. Ononkhia mba Jesus mbutuavela omphitilo yokukamona etyi Andau na Eva vapumbwa—ekevelo liomuenyo uhapu monkhalelo ongwa unene pano pohi.c—Revelação [Apocalipse] 21:3, 4.

▪ Oityi ove upondola okulinga Mononthele ombu mbelilandula, tuelilongesa etyi Ombimbiliya ipopia konthele ya Jesus, opi atundile, nomuenyo atyindile, no mokonda yatyi ankhila. Okunoñgonoka otyili otyo konthele ya Jesus, tyituvatela unene okulityilika omalongeso ahaviukile konthele yae. Okuendela muetyi tuelilongesa matyituetela omuenyo omuwa pahetyino, nomuenyo uhapu komutwe. Ombimbiliya itupopila oityi tuesukisa okulinga inkha tuhanda okukamona omuenyo oo omuwa.

▪ Lilongesa vali konthele ya Jesus Kristu no yotyilinga tyae mevangelo lia Jeova.—JOÃO 17:3.

▪ Kala nekolelo mu Jesus, okulekesa nonkhalelo utyinda omuenyo wove okuti wemutavela okuti Omuyovoli wove.—JOÃO 3:36; ATOS 5:31.

Onombangi mba Jeova vena ehambu liokukukuatesako opo ulilongese vali konthele ya Jesus Kristu, “Omona wongunga” wa Huku, una waikula ondyila opo tutambule otyali “tyomuenyo uhapu.”—João 3:16.

[Onondaka Poutoi]