Ovatangi Vapula . . .

Okuti Huku una omuhoko apanda vali tyipona omikuavo?

▪ Au, kutupu. Ombimbiliya ipopia nawa okuti: “Huku utupu okapungulula, mahi, oe utavela kese munthu una onthilo nae nokulinga etyi tyaviuka, momalongo aeho.”—Atos 10:34, 35.

Olusoke lwa Huku konthele oyo, luavilapo unene tyipona luovanthu ovakuankhali. Ovanthu ovanyingi vetavela okuti omuhoko umwe wavilapo (haunene wavo muene) wavilapo vali wavakuavo. Okapungulula katyo oko, kelifwa nolusoke lwa Charles Darwin, wahoneka okuti: “Omuvo umwe komutwe, . . . omihoko viovanthu vokuatanga nokuamona, mavikanyimako nokupingako omihoko aviho via vana vehena enoñgonoko.” Tyihahambukiswa, ovanyingi vehole okumonesa vakuavo emone, mokonda vasoka okuti vavilapo vali.

Okuti omalusoke oo okuhanda okuvilapo ena esilivilo? Nkhele soka, ngetyi tyipopia ovanongo, okuti kuna ohonde yomunthu yavilapo vali konkhuavo? Anthi, Oxford na Bryan Sykes vati: Kutupu natyike tyipondola okulekesa okuti ohonde yovanthu yelikalela unene. Ame ndyihole okupula apeho inkha kuna ohonde yo va Gregu ine ohonde yo va Italia, mahi tyotyili kutupu. Atuho tumbunga ike.”

Onondaka ombo mbelifwa netyi tyipopia Ovihonekwa. Ombimbiliya ilongesa okuti Huku watunga vala omulume wike nomukai wike, kuatuka ovanthu aveho. (Gênesis 3:20; Atos 17:26) Ku Huku, omuhoko wovanthu wike vala.

Jeova katale kotyivala tyomunthu ine o kolupe. Anthi, oe upanda otyipuka tyakolela unene, omutima wetu ine otyetyi tuatuwa mokati. Oe wati: “Ovanthu vakoyesa vakuavo mokonda yetyi veete, mahi ame ndyikoyesa ovanthu muetyi tyikahi momutima.”(1 Samuel 16:7, Contemporary English Version) Okuhinangela otyili otyo, tyitupameka unene. Ñgeni ngotyo?

Momihoko aviho, ovanyingi puonthue katuhambukwa nolupe luetu, mahi katutyivili okupilulula unene ovipuka ovio. Anthi, tupondola okuviukisa nawa etyi tyakolela vali, omalusoke etu nonkhalelo yomutima wetu. (Colossenses 3:9-11) Inkha tulinoñgonoka nawa, tupondola okuimbuka okuti tuna eyembelo liokulipaka kounene ine o pombuelo tyipona ovanthu vomuhoko omukuavo. Inkha tuna olusoke luelikuata no lwa Huku, matulingi ononkhono mbokupola momutima wetu kese lusoke luapenga.—Salmo 139:23, 24.

Okulinga ononkhono mbokulitala onthue muene navakuetu monkhalelo Jeova etutala, matyitukuatesako. Ondaka yae ituhinangelesa okuti: “Omaiho a Jeova ekahi nokutala kombanda yoohi aiho, opo alekese ononkhono mbae ku vana vemuumbila nomutima auho.” (2 Crônicas 16:9) Tyotyili, wesuka nonthue tyihatale komuhoko wetu.