OMAPULO OMBIMBILIYA AKUMBULULWA
Okuti onoandyu mbupondola okutuvatela?
Ngetyi onoandyu mbakuatesileko Daniele omuumbili wekolelo wa Huku kohale, hono mbukuatesako ovanthu okupola ouwa konondaka onongwa
Jeova watunga onoandyu ononyingi keulu kohale etyi ehenetunge ovanthu. (Jó 38:4, 7) Onoandyu ombo mbuna epondolo enene movilinga via Huku. Pamwe ankho umbutuma opo mbuhongolele ovaumbili vae pano pohi, nokuveamena. (Salmo 91:10, 11) Hono, onoandyu mbukahi nokukuatesako ovanthu okupola ouwa konondaka onongwa mbuiviswa novalanduli va Jesus.—Tanga Revelação [Apocalipse] 14:6, 7.
Okuti tupondola okulikuambela konoandyu opo mbutukuatesako? Au. Elikuambelo okufenda, iya efendelo lipewa vala Huku. (Revelação 19:10) Mokonda, onoandyu ovaumbili va Huku, mbulandula onondonga mbae kambutehelela ovanthu. Ngotyo, tuna okulikuambela vala apeho ku Huku menyina lia Jesus.—Tanga Salmo 103:20, 21; Mateus 26:53.
Okuti kuna onoandyu onombi?
Ngetyi tyatungwa ovanthu, no noandyu mbatungwa nepondolo liokuholovona otyiwa notyivi. Mahi, onoandyu ononyingi mbatyitukilapo Huku. (2 Pedro 2:4) Oandyu yatetekela okulinga ngotyo o Satanasi, ononkhuavo ambulandula-ko iya ambukala ovilulu ine onondele. Hono, Satanasi novilulu viae vapolwa keulu avatahelwa pano pohi.—Tanga Revelação [Apocalipse] 12:7-9.
Okuliipaa, novivi vikahi nokuliyawisa tunde mo 1914, vilekesa okuti apa katutu Huku mahanyeko Satanasi novilulu. Huku makapilulula ohi aikala ngetyi yali ponthyimbi.—Tanga Revelação 12:12; 21:3, 4.