Nanoñgonoka okuti Jeova una okankhenda, tupu omueveli

OMUENYO WANGE KOHALE:

Ame nekulila potyilongo tyimwe tyahepa mepundaumbo lio Montreal. Tate wanyima puetyi ndyina onohanyi epandu. Iya me esala notyilinga tyokutekula ombunga aiho. Mokulikuai kuetu, tukahi etyinana, iya ame ndyinkhelo.

Tunde poututu, nahimbika okupuena epangwe, nokuyumba omawela onombongo, nokulwa na vakuetu, nokulipaka kumwe nomakongombanda. Etyi natuukisa omanima ekwi, andyihimbika okuundapela omakunga, nokulevala onombongo ononyingi, mbuvandekwa tyina mbukondolwa. Apeho ankho ndyikemba, nokuvakela ovanthu mondando. Otyo ankho pahe tyikahi ngatyina okupuena epangwe, mokonda ankho netyityiliya unene.

Etyi natuula omanima 14, andyivilipo okuovola ononkhalelo mbokuvaka ovanthu. Mongeleka, ankho ndyilanda o nololoso, novinunga, no nonela mbayawa moolu, iya andyivipake otyito ngatyina vialingwa umwe noolu. Andyikevilandesa momatapalo no ponovenda ononene. Ankho tyinthyambukiswa okumonena onombongo ononyingi movipuka vihemphuilisile. Kumbi limwe, andyikuate onondolale 10.000 monthiki ike vala!

Nomanima 15, andyitewa mosikola ankho ndyikala yokulonga ovana onongangala, anahamono apa ndyikakala. Ankho ndyilala momatapalo, no ponopalasa, ine omomaumbo omapanga, pamwe vati tukalale atuho.

Mokonda yovilinga viange viokuvakela monondando, omakakunye ankho ehimama nokundinga omapulo. Iya mokonda ankho hilandesa ovipuka viavakwa, hineende mokaleya. Mahi, andyifeteswa onombongo ononyingi mokonda yokuvakela monondando, notyito tyomatutu ankho ndyiundapesa, nokulandesa tyihena elisesa. Tyihena owoma nomunthu nawike, andyilevala onombongo ononyingi opo pokumbukondola mbutyite ine ndyivandekeko. Iya otyo ankho otyiponga otyinene, iya pamwe ankho ndyityinda o pistola. Pamwe ankho ndyiundapa nomakongombanda.

OÑGENI OMBIMBILIYA YAPILULULA OMUENYO WANGE:

Otyikando tyo tete neiva ovanthu vapopia konthele Yombimbiliya, o puetyi ndyina omanima 17. Ankho ndyikala nomphunga yange. Ngwe ahimbika okulilongesa Ombimbiliya no Nombangi mba Jeova. Mahi ankho ndyiyele etyi Ombimbiliya ipopia konthele yovituwa. Moluotyo, omufikuena oo andyimuyekepo, andyikakala nomukuavo, ankho tupu omphunga yange.

Nahimbika okupiluluka etyi omphunga yange wa vali ahimbika okulilongesa no Nombangi mba Jeova! Ovituwa viae avipiluluka, iya andyihuvu unene okutala okuti pahe wapoleya, nokuapwa elundo. Etyi nakongwa opo ndyende Kondyuo Yomaliongiyo yo Nombangi mba Jeova andyitavela. Andyitambulwa nawa novanthu vavala nawa, vena oluembia. Ankho velikalela unene novanthu aveho ndyii! Nawike mombunga yange walekesile esuko na ame. Nkhele nekulile, kavenendekese oluembia nokankhenda. Oluembia namona pokati ko Nombangi mba Jeova, olo ankho ndyihanda. Etyi Onombangi veliava opo vandongese Ombimbiliya, andyitavela nehambu.

Etyi ankho ndyikahi nokulilongesa mo Mbimbiliya, tyayovola omuenyo wange. Ame nomapanga ange evali, ankho tuapanga okukavaka opo ndyifete onongele mbange, mbulamba po nondolale 50.000. Mahi, nahambukwa mokonda halingile etyi tuapangele! Omapanga ange oo evali, avakavaka umwe. Umwe akuatwa, omukuavo aipawa.

Putyina ankho ndyitualako okulilongesa Ombimbiliya, andyiimbuka okuti nesukisa okuyekapo ovipuka ovinyingi. Mongeleka, nanoñgonoka etyi Ombimbiliya ipopia mu 1 Coríntios 6:10 etyi yati: “Vokuvaka, ine vokuna elungavi, no nonkholwa, na vana vokupunda ovipuka viavakuavo, kavakapiñgana Ouhamba wa Huku.” Etyi natanga otestu oyo, andyisoko kotyitateka tyange, andyitokesa ononkhuka. Ankho naimbuka okuti nesukisa okulinga omapiluluko omanene momuenyo wange. (Romanos 12:2) Ankho ndyingangala, ndyimukalavi, iya ankho ndyikalela vala okukemba.

Tupu, pokulilongesa Ombimbiliya, nanoñgonoka okuti Jeova una okankhenda, tupu omueveli. (Isaías 1:18) Andyilikuambela unene, okuita ku Jeova opo ankhuateseko okusapo ovituwa viange ovivi. Nombatelo yae, katutu-katutu netyivila okuyekapo ovituwa ovio. Otyipuka tyakolela vali ame nomphunga yange tualinga, okuhonekesa otyinepo tyetu ku kaputu.

Ankho ndyina omanima 24, iya ankho ndyina ovana vetatu. Pahe, ankho ndyina okuvasa ovilinga vikahi nawa. Mahi, ankho hatangele unene mosikola, tupu ankho ndyitupu nawike upondola okunkhuatesako. Moluotyo, andyilikuambela vali unene ku Jeova. Iya andyikaovola ovilinga. Andyipopila ovahona ovanyingi ankho ndyivasa, okuti nahanda okupilulula onkhalelo yomuenyo wange, nokuundapa nawa ononthiki ambuho, anahavake natyike. Pamwe ankho ndyipopia okuti ndyikahi nokulilongesa Ombimbiliya, iya nahanda okukala omunthu omuwa motyilongo. Ovahona ovanyingi ankho kaventhavela. Okuhulililako, etyi napopila omuhona umwe evi nalingaile, ngwe apopi okuti: “Ame hityii omokonda yatyi, mahi pena otyipuka tyimphopila okuti ndyina okukutavela.” Ame ndyitavela okuti olio, ankho ekumbululo liomalikuambelo ange. Mokueenda kuomuvo, ame nomukai wange, atumbatisalwa iya atukala Onombangi mba Jeova.

OUWA PATYI NAPOLAKO:

Hono ndyina omuenyo mokonda yokuendela monondonga mbo Mbimbiliya, nokutyinda omuenyo monkhalelo Youkristau. Pahe ndyina ombunga ikahi nawa nokuna ehambu. Mokonda ndyina onthumbi yokuti Jeova wandyevela, ndyina omutima wasukuka.

Momanima 14, naundapa movilinga viokuivisa omuvo auho, okukuatesako vakuetu okunoñgonoka etyi Ombimbiliya ilongesa. Iya pahe, nomukai wange wahimbika okuundapa movilinga viokuivisa omuvo auho. Momanima 30 okuahulako, nakala nehambu liokukuatesako ovanthu 22 tuundapa navo ku kaputu, avahimbika okufenda Jeova. Nkhele ndyenda po novenda ononene, mahi ha pala okukavakela ovanthu monondando, ngetyi ankho ndyilinga. Pahe tyina ndyenda-po, ndyipopila apeho vakuetu etyi nelilongesa mo Mbimbiliya. Ndyihanda okukevepopila otyipuka tyimwe: ekevelelo liokukakala mouye omupe muhakakala vali ovimphulu.​—Salmo 37:10, 11.