“Onondaka Mbenyi Mbukale Apeho . . . Mbahingwa Nawa Omongwa”
1. Okupopia onondaka ‘mbahingwa nawa omongwa’ tyihangununa tyi?
1 “Onondaka mbenyi mbukale apeho onongwa mbahingwa nawa omongwa, opo mutyivile okukumbulula nawa kese munthu.” (Col. 4:6) Okuhinga onondaka mbetu omongwa, tyihangununa okutaindya onondaka onongwa nomupopio omuwa, uhambukisua ovateheleli vetu. Okulinga ngotyo tyina tukahi movilinga viokuivisa tyakolela unene.
2. Oñgeni Jesus aavelele oumbangi omukai omu Samalitana?
2 Ongeleka ya Jesus: Puetyi Jesus ankho ekahi nokupululukuapo ponthele yonyombo, omukai umue omu Samalitana weya okutapa omaande iya Jesus ahimbika okupopia nae. Mokueenda kuetompho, omukai oo, wapopia unene konthele youndyali ankho ukahi pokati kova Judeu nova Samalitanu. Oe wapopia konthele yetyi ankho etavela okuti ova Samalitanu vatuka ku Jako, namphila ova Judeu ankho vetavela unene okuti ova Samalitanu vatuka kuvana ankho veheva Judeu. Jesus kaanyene etyi omukai oo apopia, anthi watomphola nae monkhalelo imue yaviuka. Mokonda yotyo, Jesus waava oumbangi wakuatesako omukai oo novanthu ovakuavo vomepundaumbo olio.—João 4:7-15, 39.
3. Oñgeni tupondola okulandula ongeleka ya Jesus tyina tukahi movilinga viokuivisa?
3 Tyina tuivisa, tuna yokuhinangela okuti ovilinga vietu “okuivisa onondaka onongwa mbovipuka oviwa.” (Rom. 10:15) Onthue tuhanda okulekesa kovanthu okuti tukahi nokuivisa onondaka onongwa mbupameka mbuvasiwa Mombimbiliya. katuhande ovanthu vasoke okuti tukahi nokupenya onongeleya mbavo. Inkha vapopia otyipuka tyimwe tyahaviukile, tuhevekumbulule omapita. Okuti muetyi akumbulula muna otyipuka tyimue nonthue tutavela, ine tyituavela ondundo pala okumupanda? Hamue tupondola okutanga nae otestu imue Mombimbiliya, atumupulu okuti: ‘Ove onondaka ombu umbutavela?’
4. Oityi tuna okulinga inkha muene weumbo ukahi nokutulinga omukuele?
4 Inkha muene weumbo ukahi nokutulinga omukuele, ine tumuete okuti uhanda okutañguna, matulingi ñgeni? Onthue tuna yokutualako okulekesa onkhenda, nomutima wahiliya movituwa no monondaka mbetu. (2 Tim. 2:24, 25) Inkha omunthu kesukile nonondaka Mbouhamba, hahe tumuyekepo, atukaovola ovanthu ovakuavo.—Mat. 7:6; 10:11-14.
5. Omokonda yatyi tyakolela okupopia onondaka mbukahi ngatyina mbahingwa omongwa tyina tuivisa?
5 Tyina tuivisa onondaka onongwa Mbouhamba, tuna yokupopia onondaka mbukahi ngatyina mbahingwa omongwa. Namphila muene weumbo ahahandele okututehelela, hamwe nthiki imwe matehelela Ombangi onkhuavo ya Jeova maiya okupopia nae.