Oityi Vakuenyi Velilongesila Kuove?
1. Oityi ovalongwa va Jesus velilongesile kwe?
1 Jesus wati: “Lipakei mokanga yange amulilongesila kuame.” (Mat. 11:29) Tyotyili, oe kalongesile vala vakuavo nonondaka, mahi tupu waava ongeleka ongwa. Soka kuetyi ovalongwa velilongesila ku Jesus. Oe ankho omutendi, nokuna omutima omuwa, nohole. (Mat. 8:1-3; Mar. 6:30-34) Ankho una omutima weliola. (João 13:2-5) Putyina ankho valandula Jesus movilinga viokuivisa, ovalongwa vamuene okuti Jesus ankho omuundapi omuwa una ounongo wokulongesa vakuavo otyili. (Luc. 8:1; 21:37, 38) Oñgeni vakuetu velilongesila kuonthue tyina vetutala movilinga viokuivisa?
2. Oñgeni onkhalelo yetu yokuvala, novituwa vietu oviwa movilinga viokuivisa vikalesa ovanthu?
2 Ovanthu Tuvasa: Onkhalelo yetu yokuvala, novituwa oviwa, nesuko enene novanthu, tyipondola okuvatela unene ovanthu. (2 Cor. 6:3; Fil. 1:27) Ovo vatala okuti tuundapesa apeho Ombimbiliya. Vakuavo vahuva tyina vapopia onthue atuvetehelela. Okuava ongeleka ongwa kononthele ombo, tyipondola okulunda ovanthu okutehelela onondaka Mbouhamba.
3. Oñgeni tupondola okuvatela ovakuatate vetu?
3 Ovakuatate Vetu: Soka tupu, oñgeni tupondola okuvatela ovakuatate vetu. Ombili yetu movilinga viokuivisa ipondola okuhongiliya vakuetu. Ngetyi otyivela tyilipika otyivela otyikuavo, noonthue tyina tupongiya nawa etyi matukapopia movilinga viokuivisa, tyipondola okulunda vakuetu opo vakale ovanongo tyina vaivisa. (Pro. 27:17) Okuhoneka enyina liovanthu vokualekesa esuko, nokukondoka pala okuvekuatesako matyiavela ondundo vakuetu opo navo vetuhetekele. Tuna ombatelo ongwa yovakuatate vetu no nomphange opo tufwisepo nawa ovilinga vietu viokuivisa.—2 Tim. 4:5.
4. Omokonda yatyi tuesukisa apeho okutala ongeleka yetu?
4 Omokonda yatyi uhatale oñgeni ovituwa viove, netyi upopia, nongeleka yove ikalesa vakuenyi? Ongeleka yetu ongwa maihambukiswa Jeova nokutukuatesako okulitehelela nga apostolu Paulu etyi ati: “Kalei ovahetekeli vange, ngetyi ame ndyimuhetekeli wa Kristu.”—1 Cor. 11:1.