Ovilinga Viavilapo Vali
1. Ovilinga patyi vihambukiswa vikahi nokulingwa mononthiki mbetu?
1 Ovanthu vokuatalele Jesus okuvelula ovanthu pomuvo wo Vakristau votete vakalele nehambu enene. (Luc. 5:24-26) Mononthiki mbetu, tuhambukwa unene novilinga viokukuatesako vakuetu okunoñgonoka Jeova. (Rev. 22:1, 2, 17) Tyihambukiswa unene okutanga onongeleka mbulekesa okuti Ondaka ya Jeova nospilitu sandu ikahi nokupilulula omuenyo wovanthu! Nkhele tyituhambukiswa vali unene, okuundapa movilinga ovio viokulongesa ovanthu avekulu mopaspilitu.
2. Ehambu patyi tupondola okukala nalio tyina tulongesa omunthu otyili?
2 Enyina lia Huku olipi? Omokonda yatyi Huku ayekelako ononkhumbi? Oityi Ouhamba wa Huku mauya okulingila ovanthu? Onthue katuhambukwa vala pokukumbulula omapulo oo, mahi tupu pokutala ehambu enene liomulongwa tyina anoñgonoka otyili. (Pro. 15:23; Luc. 24:32) Tyina omulongwa ekula mopaspilitu, oe upondola okuhimbika okuundapesa enyina lia Jeova, nokuvala nawa nokulifiwisa, nokuyekapo ovituwa ovivi, nokuava oumbangi vakuavo. Inkha elipakula nokumbatisalwa, oe makala omukuatate wetu nokuundapela kumwe nonthue. Ovipuka ovio vituavela ehunga pala okuhambukwa.—1 Tes. 2:19, 20.
3. Oityi tupondola okulinga opo tuhimbike okulongesa omunthu Ombimbiliya?
3 Upondola Okuundapa Movilinga Ovio? Inkha uhanda okuundapa movilinga ovio viavilapo, ita ku Jeova ekuvatele okulongesa omunthu Ombimbiliya, iya oundapa monkhalelo yelikuata nomalikuambelo ove. (1 João 5:14) Ivisa apa pena ovanthu. Himbika okulilongesa nomunthu Ombimbiliya ovikando aviho. (Ecl. 11:6) Tyina uvasa omunthu walekesa esuko iya okunu ombuto yotyili, kondoka opo ukeitapelele.—1 Cor. 3:6-9.
4. Omokonda yatyi tuesukisa okuhimbika okulilongesa novanthu Ombimbiliya nondyanga?
4 Ovanthu ovanyingi nkhele vena ondyala nohunga youviuki. Olie mevekuatesako okunoñgonoka Jeova pokulilongesa navo Ombimbiliya? (Mat. 5:3, 6) Tukalei tyafuapo pala okufuisapo ovilinga viokuivisa nokulinga ovalongwa tyina nkhele ovilinga viokuteya vihenehike konthyulilo.—Isa. 6:8.