Onopalata Onombali Mbuna Esilivilo Lihehi

Onkhalelo imwe yokukuatesako ovilinga Viouhamba wa Huku, okuava onombongo pala ovilinga viokuivisa ouye auho. Iya inkha ove utupu onombongo ononyingi?

Onthiki imwe Jesus wamuene omuhepe umwe upaka motyikasa tyondyuo ya Huku, onombongo onombali mbovivela mbuhena esilivilo enene. Ohole na Jeova yalunda omukai oo okuava, ‘mouhepi wae ayumbumo atyiho ankho ena, olumono lwae aluho.’ (Mar. 12:41-44) Jesus wapopia ngotyo, okulekesa okuti etyi omuhepe aava, tyina esilivilo enene komaiho a Huku. Tupu, Ovakristau votete ankho kavasoko okuti okuava onombongo pala okukuatesako ovilinga viokuivisa, otyilinga tyo Vakristau ovahona vala. Apostolu Paulu wapopia ongeleka yo va Masedonia ankho ‘vahepa unene . . . vatuaileko okuita unene opo navo vaave neholelo.’—2 Cor. 8:1-4.

Moluotyo, inkha tuvila vala okuava ‘onopalata onombali mbuna esilivilo lihehi,’ tuesukisa okuhinangela okuti oviawa ovitutu mahi ovinyingi, vipondola okuyawisa kovinene. Tyina tuava nomutima auho, matyihambukiswa Tate yetu keulu wotyali, mokonda “Huku uhole una waava nehambu.”—2 Cor. 9:7.