Ononkhalelo Ononthano Mbokuvasa Omunthu Matulongesa Ombimbiliya
1. Inkha tyitupuilisa okuvasa omunthu matulongesa Ombimbiliya, oityi tuna okulinga, iya omokonda yatyi?
1 Okuti tyikupuiya okuvasa omunthu uhanda okulilongesa Ombimbiliya? Tualako okulinga ononkhono. Jeova uyamba vana vatualako okulinga ehando liae avahayekeko. (Gal. 6:9) Pombuelo pena ononkhalelo ononthano mambukuvatela.
2. Oñgeni tupondola okuhimbika okulongesa omunthu Ombimbiliya?
2 Pula Omunthu Inkha Uhanda Okulilongesa Ombimbiliya: Ovanthu ovanyingi vetyii okuti onthue tuava Omikanda, mahi pamwe kavetyii okuti tulongesa ovanthu Ombimbiliya. Omokonda yatyi uhevepulila tyina wenda movilinga viokuivisa umbo na umbo? Tupu upondola okuita vana vesuka ukataleluapo inkha vahanda okulilongesa Ombimbiliya. Inkha kavetavelele, upondola okutualako okuveavela omikanda nokuvekuatesako. Omukuatate umwe ankho utuaila ovalinepi vamwe Omutala Womulavi no Despertai! momanima omanyingi. Nthiki imwe etyi evetuaila omikanda, wevepula okuti: “Kamuhande okulilongesa Ombimbiliya?” Atyimuhuvisa unene etyi vakumbulula okuti tuhanda. Pahe vambatisalwa.
3. Okuti tupondola okulilongesa Ombimbiliya na vana veya komaliongiyo? Hangununa.
3 Vana Veya Komaliongiyo: Uhasoke okuti vana veya komaliongiyo velilongesale Ombimbiliya. Omukuatate umwe wahoneka okuti: “Ovanthu ndyililongesa navo, otyinyingi ankho veyale komaliongiyo.” Omphange umwe watokola okutomphola nomukai umwe ankho una ohonyi una ovana wambatisalua mewaneno. Omukai ankho uya komaliongiyo momanima alamba 15 iya apeho uhika Mondyuo Yomaliongiyo tyina eliongiyo lihenehimbike atundumo vala tyina liamapu. Omukai etavela okulilongesa Ombimbiliya anyingila motyili. Omphange ahoneka okuti: “Otyiponyo etyi nakevela omanima 15 opo ndyikupule inkha uhanda okulilongesa Ombimbiliya!”
4. Oñgeni tupondola okuvasa una uhanda okulilongesa Ombimbiliya?
4 Pula Vana Vahanda: Omphange umwe ankho wenda novakuavo kovalongwa vavo Vombimbiliya. Tyina vamana okulilongesa wiita kumukuavo opo apule kovalongwa vae inkha vei omunthu umwe uhanda okulilongesa Ombimbiliya. Tyina waavela omunthu umwe omukanda Ombimbiliya Ilongesa upondola okumupula okuti: “Wii vali omunthu omukuavo uhanda omukanda ou?” Pamwe, hamwe pena tyimwe tyitateka ovaivisi novakokoli-ndyila okulongesa Ombimbiliya omunthu umwe vavasa potyilongo. Ngotyo, popila vakuenyi okuti ove wafuapo opo ulongese omunthu Ombimbiliya.
5. Omokonda yatyi tupondola okuita vana velinepa na vana vehelilongesa, inkha tupondola okulilongesa navo?
5 Vana Velinepa na Una Uhelilongesa: Okuti mewaneno lienyi muna ovaivisi velinepa na una uhelilongesa? Ovanthu vamwe kavetavela okutomphola konthele Yombimbiliya no Mukristau velinepa nae, mahi vetavela okulilongesa na una uhembunga. Mahi otyiwa upopie nomulume ine omukai ulilongesa opo unoñgonoke inkha upondola okulilongesa nae.
6. Olipi esilivilo liomalikuambelo tyina tuhanda okuvasa omulongwa Wombimbiliya?
6 Elikuambelo: Tuhatombe epondolo liomalikuambelo. (Tia. 5:16) Jeova walaa okuti metutehelela tyina tuita etyi tyelikuata nehando liae. (1 João 5:14) Omukuatate umwe ankho una ovilinga ovinyingi welikuambela opo avase omulongwa Wombimbiliya. Omukai wae emupulu inkha una omuvo wokulongesa omunthu Ombimbiliya, haunene inkha omulongwa una ovitateka ovinyingi. Ngotyo omukai wae aiti ku Jeova konthele yetyi omulume wae elikuambela, opo avase omulongwa Wombimbiliya. Moluotyo, omalikuambelo avo akumbululwa konyima yonosimano onombali etyi omukokoli-ndyila umwe meuaneno avasa omulume umwe uhanda okulilongesa Ombimbiliya emuavela omukuatate oo elilongese nae. Omukai wae wahoneka okuti: “Kese umwe uhanda okulongesa omunthu Ombimbiliya elitehela ngetyi tukahi, ndyimupopila okuti: Likuambela okuita omulongwa, ohatalama tualako nokulikuambela konthele yotyo. Onthue tuna ehambu limwe enene ankho tuhakevela.” Likuatehila, noove upondola okuvasa omulongwa Wombimbiliya nokukala nehambu liokukuatesako umwe okunyingi “mondyila yahita ituala komuenyo.”—Mat. 7:13, 14.