Tala Otyipi Otyiwa Movilinga Viove Ovinene
1. Oityi tyipondola okutepulula ombili yetu movilinga viokuivisa?
1 Ovanthu vatumwa “okutala ouwa wovilinga viavo vialema.” (Ecl. 2:24) Mahi, tyina tuhetyivili okutala ouwa utundilila kovilinga vietu viokuivisa, tyipondola okutusoyesa, atuhakala nehambu nombili. Oityi tyipondola okutukuatesako okukala nombili?
2. Omokonda yatyi tuesukisila okukala notyituwa tyapola pokati konthele yovilinga vietu viokuivisa?
2 Kala Notyituwa Tyapola: Pokati Hinangela okuti namphila vana vetavelele Jesus kavehi, mahi ovilinga viae viaendele nawa. (João 17:4) Monthengele-popia yae konthele yombuto, Jesus wamanuhula okupopia okuti omitima viovanthu vamwe kavitavela ondaka Youhamba yaelekwa nombuto. (Mat. 13:3-8, 18-22) Anthi, ononkhono tulinga mbakolela unene.
3. Oñgeni tupondola “okuava ovinyango” alo umwe inkha kavehi vetavela tyina tuivisa?
3 Oñgeni Matuave Unene Ovinyango: Ngetyi tyipopia onthengele-popia ya Jesus, vana vetavela ondaka “vaava ovinyango.” (Mat. 13:23) Tyina otiliku yamatyiti aiyele kayeta vala omakunkhu, mahi yeta onoñgima onomphe. Ngotyo, ovinyango Ovakristau vaava, havalongwa vala ovape, mahi okuyawisa unene ombuto Youhamba—okupopia konthele Youhamba. Otyo tyeeta unene “oviwa” vituetela ehambu, alo umwe tyina ovanthu vehetavela. Onthue tuyawisa komunkhima wenyina lia Jeova. (Isa. 43:10-12; Mat. 6:9) Tuhambukilwa elao tuna liokuundapela kumwe na Huku. (1 Cor. 3:9) Iya ngotyo “ovinyango viomulungu” vihambukiswa Jeova.—Heb. 13:15, 16.
4. Oityi tuhamono, ovilinga vietu viokuivisa vipondola okueta?
4 Tupu, ovilinga vietu ovinene vieta ouwa onthue tuhamono. Alo umwe vamwe ankho vatehelela Jesus, kavakalele ovalongwa vae alo amana ovilinga viae pano pohi. Tupu, ombuto Youhamba tukahi nokukuna ipondola okuhakala nomii, aikekula vala konyima, omunthu eya motyili otyo onthwe tuhetyii. Ngotyo, ovilinga vietu viokuivisa vieta unene oviwa. Moluotyo, tupondola “okuava unene ovinyango” nokulekesa okuti tuvalongwa va Jesus.—João 15:8.