Ovilinga Viokukonga Ovanthu pala Ehinangelo lia Tatekulu Mavihimbika mu 1 ya Tyitalale
1. Onalupi ovilinga viokukonga ovanthu mavihimbika, iya omokonda yatyi enima lino maviende ehimbwe?
1 Mutano 1 ya Tyitalale, matuhimbika okukonga vakuetu opo veye okulinga nonthwe Ehinangelo liononkhia mba Tatekulu. Ehinangelo malilingwa mu 26 iya Tyitalale, otyo tyilekesa okuti ovilinga viokukonga maviende vali omuvo omule tyipona omanima okualamba. Otyo tyiavela ovanthu ovanyingi omphitilo yokukongwa, haunene inkha otelitoliu yewaneno lietu onene.
2. Oityi matyilingwa konthele yomikanda viokukonga nokuviava motelitoliu yetu aiho?
2 Okuonganeka Nawa: Ovakulu vomawaneno mavapopi oñgeni tupondola okuivisa motelitoliu aiho, alo umwe vana vahavasiwa momaumbo. Inkha omikanda viokukonga viahupapo, vipondola okuundapeswa tyina tuivisa umbo-na-umbo, movilinga viokuava oumbangi. Omukulu wovilinga una okutala nawa inkha omikanda viokukonga viahonekwa omphangu, viapakwa komutala womikanda opo ovaivisi vevityinde, mahi kavipondola okukalako apeho. Tuna okutyinda vala vina tuesukisa mosimano ike.
3. Oityi tuna okuhinangela tyina tuava omukanda wokukonga?
3 Oityi Matupopi? Tyesukisa okuhasete opo tutyivile okupopia novanthu ovanyingi. Pefo 4 pena onondaka mbehehi tupondola okupopia tyina tukonga ovanthu. Tyotyili, katusukisa okukahateka nokeumbo ekuavo inkha omunthu uhanda okupopia vali nonthwe ine walinga epulo. Tyina tuava omukanda wokukonga konthyulilo yosimano, tupu tupondola okuava Omutala Womulavi no Despertai! inkha tyitavela. Mu 2 ya Tyitalale, matuave omukanda wokukonga nehando liokuhimbika okulongesa ovanthu Ombimbiliya.
4. Omokonda yatyi matukala nombili yokukonga ovanthu?
4 Tukevela ovanthu ovanyingi veliongiye nonthwe Pehinangelo. Elongomona malihangununa olie Jesus. (1 Cor. 11:26) Malipopi oñgeni ononkhia mbae mbutukuatesako. (Rom. 6:23) Tupu malitoneka okupopia omokonda yatyi tyakolela okumuhinangela. (João 17:3) Matukala nombili yokukonga ovanthu!