Hetekelei Ongeleka Yovauli—Oseia
1. Epulo patyi ove hamwe upondola okulilinga?
1 ‘Otyilinga patyi ndyipondola okulingila Jeova?’ Hamwe upondola okulipula ngotyo tyina usokolola kokankhenda okanene ka Jeova nouwa-tima wae. (Sal. 103:2-4; 116:12) Oseia walingile etyi Jeova ankho ahanda, alo umwe tyina ankho etyii okuti matyisukisa okuyekapo ovipuka vimwe. Oñgeni tupondola okuhetekela Oseia?
2. Oñgeni tupondola okuhetekela ongeleka ongwa ya Oseia opo tutualeko novilinga viokuivisa?
2 Okuivisa Momuvo Watyo: Onondaka mba Oseia ankho opala omihoko ekwi vio Isilayeli, etyi ankho vahanda okunyimako efendelo liotyotyili. Ohamba Jeroboau II walingile ovipuka ovivi komaiho a Jeova, nokutualako nefendelo lionthane liahimbikwa na Jeroboau I. (2 Reis 14:23, 24) Onohamba mbalandulako mbatuaileko nonkhalelo oyo ombi youhamba womihoko ekwi alo vahanyaunuako mo 740 P.K.E. Mahi, mokuayala efendelo liomatutu, Oseia watuaileko okuula nekolelo mokueenda kuomanima 59. Okuti nonthwe tuatokola okutualako okuivisa nima na nima, alo umwe tyina ovanthu vehetavela ine vetuyele?—2 Tim. 4:2.
3. Oñgeni omuenyo wa Oseia walekesa okankhenda ka Jeova?
3 Soka Kokankhenda ka Jeova: Jeova wapopilile Oseia opo anepe “omukai woundalelapo”. (Osé. 1:2) Namphila omukai wae Gomer, ankho ena nae omona, mahi konyima Gomer watyitile ovana vevali vehe va Oseia. Ehando lia Oseia liokuevela omukai wae lialekesa nawa okankhenda okanene ka Jeova kokuevela ova Isilayeli etyi velivela. (Osé. 3:1; Rom. 9:22-26) Okuti nonthwe tuyekapo omahando etu, atunoñgonokesa okankhenda okanene ka Jeova kovanthu aveho?—1 Cor. 9:19-23.
4. Ovipuka patyi vimwe tuayekepo opo tuundapele Jeova?
4 Ovaumbili ovanyingi va Jeova vayekapo ovilinga ankho vivepa onombongo opo vaundape unene movilinga viokuivisa. Ovakuavo vatualako tyihanepele ine okuhakala novana opo vatualeko okulinga Ovilinga Viouhamba. Tyina tusoka komuenyo wa Oseia, tupondola okusoka kuonthwe atuti, ‘Ame hipondola okulinga etyi Oseia alinga.’ Mahi, tyina tunoñgonoka nawa okankhenda okanene ka Jeova nokuyumba onthumbi mononkhono mbae opo mbutupameke, tupondola okuundapeswa nae monkhalelo imwe ankho tuhakevela, ngetyi alingile na Oseia.—Mat. 19:26; Fil. 2:13.