Oñgeni Mopongiya Nawa Onondaka Mbokuhimbika Etompho
1. Otyiwa okuhimbika nonondaka mbuava ondundo mokonda yatyi?
1 Ngetyi omuniko omuwa wokulia utulunda okukumakela, tyina tuholovona onondaka onongwa pokuhimbika okupopia, tyavela ovanthu ondundo yokutehelela Ovihonekwa. Onondaka mbulunda ovanthu mbupondola okulikalaila, mahi apeho mbesukisa okupongiyua nawa, ngetyi tyilingwa okulia kuapepa nawa. (Pro. 15:28) Oityi tyimbukalesa ngotyo?
2. Oñgeni tupondola okulipongiya opo tupopie etyi ovanthu vesuka vali natyo?
2 Popia Ovipuka Ovanthu Vesuka Vali Navio: Onondaka mbetu mbokuhimbika mbupondola okulunda ovanthu okututehelela ine okuhetutehelela. Tyina ulipongiya soka kuetyi ovanthu vesuka vali natyo. Okuti ovanthu vo potyilongo vesuka vali noutumini omuwa, nomuenyo omuwa mombunga ine onthyulilo yovita? Ovanthu ovanyingi vahanda okupopia etyi vasoka, ngotyo pongiya epulo malivelundu okupopia etyi vasoka. Okuti upondola okuholovona omalekeso ehepuiya ekahi mo Vilinga Vietu Viouhamba oepilulula okutala komasuka-suka opotyilongo tyenyi? Omokonda tyatyi ovikando vimwe Mefendelo Liombunga muhahetekela oñgeni mamupopi?
3. Oñgeni onondaka mbetu mbokuhimbika mambulikuate nomatavelo nonkhalelo yovanthu vopotyilongo?
3 Soka Komatavelo Nonkhalelo Yavo: Kovilongo vimwe, omunthu uhika apopi etyi aendela. Kovikuavo, tete una okupula oñgeni ava avasa vekahi, nokupopia ovipuka ovikuavo tyina ehenepopie etyi aendela. Kovilongo oku ovanthu ovanyingi vena onongeleya, tyitavela okuhimbika okupopia navo konthele Yombimbiliya. (Atos 2: 14-17) Kovilongo viovanthu vonongeleya mbehetavela Kristu ine vetupu ongeleya, otyiwa okupopia Ombimbiliya monthiki onkhuavo tyipona onthiki yotete.—Atos 17:22-31.
4. Oityi tuna okulinga opo onondaka mbetu mbokuhimbika mbuavele ovanthu ondundo?
4 Onondaka Mbokuhimbika: Pongiya nawa onondaka mbove mbokuhimbika. Otyiwa okupopia onondaka mbehehi, nokuapepuka okunoñgonokwa. Onkhalelo tupopia onondaka mbetu mbokuhimbika tupu yakolela. Popia noundyandyi. Popia nehambu, okulekesa okuti wesuka nomunthu upopia nae. Okulandula onondonga ombo, matyitukuatesako okupongiya onondaka mbuavela ovanthu ondundo yokulia “komesa ya Jeova.”—1 Cor. 10:21.