Ovanthu Mavatutiliswa Mokonda Yotyilikutila Tyeyovo

Okuhinangela Ononkhia Mba Tatekulu, tyitukuatesako okusoka kovipuka oviwa matukakala navio mokonda yofeto yeyovo. Otyipuka tyimwe otyiwa tupondola okusoka etutilo. Jeova nalumwe ahandele onthue tunkhie. Otyo tumonena okuti tyina omunthu umwe amankhi, ovanthu tyiveihama unene avalili. (1 Cor. 15:26) Jesus tyemuihamene unene etyi amuene ovalongwa vae ankho vekahi nokulila Lazaru wankhia. (João 11:33-35) Ngetyi Jesus tyemuihamene, ngwe otyifuika tya Tate yae, tupondola okukala nonthumbi yokuti tyina Jeova atala ovanthu valila wavo wanyima, nae tyimuihama unene. (João 14:7) Tyina Jeova asoka komuvo makapindulapo ovanthu vokuankhia, uhanda ñgeno uhikapo liwa-liwa iya nonthue otyo tuhanda.—Jó 14:14, 15.

Mokonda Jeova o Huku omuonganeki wovipuka, tupondola okukala nonthumbi yokuti, no pokututilisa ovanthu meketyilinga monkhalelo yaonganekwa. (1 Cor. 14:33, 40) Kamakukala vali omitambo ine omikoti, mahi makukakala ovilinga viokuliepesa ovanthu mavakatutiliswa. Okuti tyina ove ukahi momuvo umwe wovitateka usoka ketutilo? (2 Cor. 4:17, 18) Okuti upandula Jeova waava ofeto yeyovo, netyi Ombimbiliya ipopia okuti vokuankhia mavakakala vali nomuenyo?—Col. 3:15.

• Okuti una omapanga ukevela ine hamwe o umwe mombunga yove uhanda nthiki imwe mulimone vali?

• Olie wapopiwa Mombimbiliya ove uhanda mulivase, amutomphola nae?