Omapulo Ovatangi

Okuti Onombangi mba Siovaa vaovolela mo Internete ovahikuena ine ovakuendye mavelinepe navo?

Siovaa uhanda ovanthu vokuelinepa vakale nehambu, avatualako noupanga omuwa. (Mat. 19:4-6) Inkha wahanda okunepa ine okunepwa, oityi tyipondola okukukuatesako okuvasa omunthu ukahi nawa? Mokonda Siovaa Omutungi wetu wii etyi tuesukisa opo tukale nehambu motyinepo. Mokala vala nehambu inkha weendela monondongwa ekuavela. Tutalei onondongwa mbumwe.

Tete, tuesukisa okunoñgonoka okuti: “Omutima omukengeleli unene upona kese tyipuka, nokuhena ekevelelo.” (Jer. 17:9) Tyina omunthu umwe ahanda okunepa ine okunepwa, ahasoko nawa ponthyimbi upondola okulinga etokolo liapenga. Inkha umunthu umwe unepwa ine unepa mokonda vala yokueliteketela vala, konyima upondola okuliveva. (Pro. 28:26) Mokonda yotyo hatyiwako okupopila mukuenyi okuti umuhole mahi otyo muhelinoñgonoke nawa.

Provérbios 22:3 yati: “Omunthu wokualunguka oyou utala otyivi iya akaholama, mahi, omunthu uhena onondunge wenda vala iya akamona ononkhumbi.” Ovitateka patyi tupondola okukala navio inkha tuovola mo Internet omunthu tuhanda okulinepa nae? Ovanthu ovanyingi vatokelale meliva olio. Okulihanda nomunthu mo Internet mahi ngwe kekahi nawa. Tupu ovanthu ovo mo Internet velilekesa ngoti vekahi umwe nawa, iya vamwe velilekesa ngatyina vena onombongo. Iya pamwe vapopia okuti Onombangi mba Siovaa.

Soka kotyitateka otyikuavo. Mo internete, ovanthu ovo valinga onokonda mbo Matematika opo vatale inkha muelitokala nou uhanda. Mahi onokonda ombo kambukuatesako, omatutu vala. Outyova okuyumba onthumbi movipuka vialingwa novanthu (programas de computador) opo ulinge etokolo liakolela vali momuenyo wove, okunepa ine okunepwa. Okonda patyi yo Matematika ipondola okupinga ine yeelekwa nonondongwa mba Huku? — Pro. 1:7; 3:5-7.

Ondongwa onkhuavo ivasiwa mu Provérbios 14:15 yati: “Omunthu uhena onondunge utavela kese ndaka ipopiwa, mahi una walunguka unoñgonoka nawa apa maliate.” Opo umone okuti omunthu ukahi nawa mulinepe, wesukisa okumunoñgonoka nawa-nawa. Mahi okulilikalela vala mo Internete kamulinoñgonoka nawa. Okuti inkha mukala omuvo omunyingi nokutomphola, nokulituma onomesasi nomunthu mo Internet, ngotyo upondola okupopia okuti ndyii nawa omunthu oo? Mongeleka vamwe ankho vasoka okuti vavasa umwe omunthu ukahi nawa mo internete, mahi pahe etyi vati pokulivasa, avelivele unene.

Daviti wapopile okuti: “Hilingi oupanga novanthu vokukemba iya ndyilityilika okukala navana vaholeka etyi vatuwa.” (Sal. 26:4) Ovanthu ovanyingi vapopia omatutu mo Internet, opo vahumbwe vali na vakuavo. Mahi tyina vatuma onomesasi katyimoneka okuti vena ovituwa ovivi. Mahi otyiwa okusoka komapulo aa: Namphila ovanyingi vapopia okuti Onombangi, mahi okuti vambatisalwa umwe? Okuti vena oupanga wapama na Siovaa? Okuti valingwa umwe onthilo mewaneno liavo? Ine vena vala “omapanga omavi”? (1 Kol. 15:33; 2 Tim. 2:20, 21) Okuti vapondola umwe okunepa ine okunepwa? Tuesukisa okunoñgonoka omakumbululo omapulo oo. Mahi okutomphola nomunthu tuhei katuenoñgonoka. (Pro. 15:22) Ovaumbili va Huku vahinangela okuti kavapondola okulipaka “kokanga ike na vana vehetavela.” — 2 Kol. 6:14; 1 Kol. 7:39.

Mokonda okuovolela mo internete omunthu mamulinepa nae, tyieta ovitateka ovinyingi, otyiwa okuovola okunoñgonoka nawa omunthu uhanda okunepa. Oityi upondola okulinga opo unoñgonoke nawa ou uhanda okulinepa nae? Tyina Onombangi mba Siovaa mbamehimbika okulingila omaliongiyo mo Mondyuo Mbomaliongiyo, tupondola okunoñgonoka nawa vakuetu, momaliongiyo nomovionge.

Momuvo uno womukihi COVID-19, katukahi nokuliongiyila mondyuo yomaliongiyo, mahi tukahi nokulingila omaliongiyo mo Zoom. No ngotyo tupondola okunoñgonoka ovakuatate nonomphange vahanepelwe. Tupondola okuvetala tyina valinga ononthele mbavo na tyina vakumbulula. (1 Tim. 6:11, 12) Tupu, tupondola okutomphola navo tyina eliongiyo liamapu. Tupu tupondola okulinga ovikundyi viokutomphola novakuatate nonomphange, otyo tutala oñgeni vatekula vakuavo, nokutala ovituwa viavo. (1 Pet. 3:4) Konyima pahe tyina wamemunoñgonoka nawa, otale ovipuka patyi ahanda okulinga, novituwa muna vielifwa, mavimukuatesako okulikuatapo.

Tyina wamamono okuti omunthu ukahi nawa opo mulinepe mokala ngetyi tyipopia Ombimbiliya okuti: “Una uvasa omukai ukahi nawa [ine omulume] uvasa otyipuka otyiwa iya upandwa na Siovaa.” — Pro. 18:22.