Okuti Ankho Utyii-ale?

Omu Etiopia wokwatompholele na Filipi ankho waendela kokalosa kekahi ñgeni?

Ondaka yatiwa ‘okalosa’ m’Ombimbiliya Ikola Yaava Ekevelelo Liouye Omupe, melaka liokonthuko ankho ipopia vala atyiho oku omunthu apondola okweendela. (Ovil. 8:​28, 29, 38) Mahi mokutala, omu Etiopia oo, ankho waendela umwe kokalosa okanene, ha katutu-ko nga aka ovanthu ankho venda nako movilwa, no pokukelilolela. Pahe matutale oityi tupopila ngootyo.

Omu Etiopia oo wali omulume wankhimana, ya ankho watunda kokule. Ankho “uundapela Kandase, tembwa otyilongo tyo mo Etiopia, oe uyunga olumono lwa tembwa otyilongo.” (Ovil. 8:27) O Etiopia oyo yo kohale, yali pokati kokuti no Sudão yo pehepano no Isitu. Mokutala, omulume oo tyemweendesilile nokalosa, hatyokweendela-ko vala, mahi opala atie nokutyinda-ko ovityuma mesuku navio mondyila. Omakalosa amwe ankho ovanthu vaenda nao pomuvo opo, ena omalola ekwana, okamutemba katyo kayambelwa. Omukanda umwe wapopia omakalosa oo, wati: ‘Omakalosa atyo ngoo ankho akola, atyinda ovityuma ovinyingi, novanthu pokweendela-ko vapumphama umwe nawa.’ — Acts—An Exegetical Commentary.

Filipi etyi ehika pomu Etiopia, wemuvasa utanga. Ombimbiliya yati: “Filipi ahateka aende no kokalosa, utehela uli nokutanga omuuli Isaiya.” (Ovil. 8:30) Omakalosa atyo ngoo, ankho kaahateka. Mokonda ankho kelipulukwa vala, omu Etiopia etyivili okweenda nokutanga, ou Filipi evevasi, namphila ankho aenda vala konomphai.

Omu Etiopia, “aiti Filipi nae alonde, alondo avapumphama aveho.” (Ovil. 8:31) Kohale, vokulilolela nomakalosa, pokuhatekesa ankho vaenda lutai. Mahi kokalosa nga aka kaendele nomu Etiopia, ankho kuna umwe onomphangu mbutavela okupumphama.

Etyi twatala nawa etyi tyipopia Ombimbiliya momukanda Ovilinga okapitulu 8, no momikanda omikwavo vipopia etyi ankho tyilingwa omakalosa atyo oo, pahe momikanda vietu apa paeta olutalatu lulekesa okalosa kaendelele omu Etiopia, palekesa umwe okalosa okanene, hanga aka-ko ankho kaenda no vovita, no vokulilolela.