OkutI Ankho Utyiyale?
Ove utavela okuti kohale omunthu upola evu akakuna mepia liamukuavo?
Ou, oumwe pomikanda vitiwa Digest wahonekwa Nomutumini Justinian mo 1468 upopia konthele yovitumino viokohale
NGETYI tyipopia Mateus 13:24-26, Jesus wati: “Ouhamba wo keulu ukahi ngomulume umwe wakuna ombuto ongwa mepia liae. Puetyi ovanthu velele, ondyale yae aiya aikunu evu motiluku, iya ayeende. Etyi yekula iya aviave onoñgima, tupu nevu alimoneka.” Ovahoneki vamwe kavetavela okuti ongeleka oyo ipopia otyipuka ankho tyilingwa kohale, mahi ngetyi tyipopia ovitumino viokohale vio Roma, otyipuka ngotyo ankho tyipondola okumoneka.
Library of Congress, LC-USZ62-65381
Omukanda umwe uhangununa Ombimbiliya, wati ovitumino vio Roma, ankho viilika okukuna evu mepia liaamuene, otyo ankho tyilekesa okuti omunthu una onkhongo. Mahi otyitumino otyo tyilekesa okuti otyipuka otyo ankho tyipondola okumoneka. Omunongo umwe utiwa Alastair Kerr wahangununa okuti menima 533 Pomuvo wa Kristu, Omutumini wo Roma Justinian wahoneka omukanda utiwa Digest. Upopia ovitumino vio Roma tupu upopia ovitumino viapopiwa novanongo vakalele momanima 100 alo 250 pomuvo wa Kristu. Ngetyi ankho tyipopia omukanda Digest, umwe povanongo ovo o Ulpian, wapopia otyitateka tyimwe tyaendele motyita tyavali. Evu liakuninwe mepia liomunthu umwe alinyono ovikuna viae. Omukanda Digest una otyitumino tyipopia okuti epia lilingwa ngotyo, hekulu una okufetwa onombongo nomunthu wetyilinga mokonda yetyi anyona.