Kala Epanga Liovanthu Aveho

Omokonda Yatyi Ovanthu Valingila Okapungulula?

Ankho tulityilika okukala novanthu vomuhoko umwe tuyele, matukala vali unene nokapungulula. Tupu ankho tukala vala omapanga ovanthu vekahi ngo onthue, matuhimbika okusoka okuti, evi tusoka ne evi tulinga ovio vala viaviuka.

Oñgeni Ombimbiliya Ipondola Okutukuatesako?

“Ikulei omitima vienyi.” — 2 KOLINDU 6:13.

Otyo tyitulongesa-tyi? Motesitu oyo, ondaka “omutima” ipopia omalusoko etu, novipuka tuhole. Ine tuhumba vala ovanthu vekahi ngo onthue, omutima wetu maukala ngatyina wapatwa, ngatyina waikwa. Opo tuhakale notyitateka otyo, tuna okukala omapanga ovanthu aveho, atee umwe vana velikalela no onthue.

Okukala Epanga Liovanthu Aveho Tyitukwatesako

Ine tunoñgonoka nawa onontheto mba vakuetu, matunoñgonoka omokonda yatyi vasokela monkhalelo yelikalela. Tyina tukala vali unene omapanga avo, matunoñgonoka okuti naina tukahi vala otyipuka tyike. Matuhimbika okuvehumba vali, iya evi vivehambukiswa no onthue mavituhambukiswa, evi vivenumanesa no onthue avitunumanesa.

Tala ongeleka ya Nazaré. Ovanthu vokuilukila motyilongo tyavo ankho kevehande. Nazaré wapopia etyi tyemukuatesako, wati: “Andyiovola omuvo wokukala navo, nokuundapa navo. Andyinoñgonoka ovanthu velikalela unene netyi ankho ndyiiva. Tyina ukala epanga liovanthu vomihoko vielikalaila, uvenoñgonoka vali nawa, ovehumbu.”

Linga Ñgaa

Ovola okuhipulula novanthu vovilongo ovikuavo, vomihoko omikuavo, vomalaka omakuavo.

Upondola okuvepula evi valinga komaumbo avo.
Veihana muye okulia navo.
Tehelela nawa tyina vekuhipululila-po evi valinga, opo unoñgonoke etyi vesuka vali natyo.

Ine wovola okunoñgonoka ovitateka vakalaile navio, motyivili okunoñgonoka omokonda yatyi vakalela ngetyi vekahi. Otyo matyikukwatesako okuhumba ovanthu aveho vomuhoko oo.

Tala Etyi Tyalingile Vmwe: Kandasamy na Sookammah (CANADA)

Kandasamy na Sookammah vati: “Onthwe tuekulila ko Africa do Sul puetyi ankho motyilongo omo muna otyitumino tyokuti ovindele kavipondola okuhonya novanthikovei. Ovindele novanthikovei ankho kavahonyo, ankho tyiti ava vakala oku ava vakala oku, otyo atyivilisa-po vali okapungulula. Onthue katuvindele-ko, mahi ankho tuyele ovindele mokonda ankho vietutomba. Mahi onthue ankho katusoko okuti ngotyo okapungulula, mokonda ankho onthue tulingwa onya.

“Opo tupilulule olusoko olo, atuhimbika okulinga oupanga novanthu vomihoko aviho. Etyi tuahimbika okulinga oupanga novindele, atunoñgonoka okuti naina tuelikalela vala koupuka wehehi-ale. Kuna ovipuka ovinyingi tulinga vielifwa, iya atuho tuna vala ovitateka vike.

“Atee umwe atukala novalinepi vamwe ovindele meumbo lietu, atukala navo ehimbwe. Atuvenoñgonoka umwe nawa. Pakala vala katutu, atukala omapanga, iya tyina tulitala, naina tukahi vala otyipuka tyike. Otyo atyitukuatesako okuhatale vali ovindele ngetyi ankho tuvitala kohale.”