Utavela Okuti Kouye Kuna Omutungi?
“Ouye petupu ou weutunga, weyako vala awike.” — Tyapopiwa na Stephen Hawking na Leonard Mlodinow, vokuatanga unene.
“Ponthyimbi Huku watunga eulu nohi.” — Gén. 1:1.
Tyina utala ouye novipuka vina omuenyo kombanda yeheke, usoka okuti viatungwa na Huku, ine vieyako vala avike? Etyi tyapopia ovanthu vapopiwa pombanda apa, netyi tyapopia Ombimbiliya mu Génesis 1:1, tyelikalela unene. Ovanthu vamwe vetavela etyi tyapopia Ombimbiliya, mahi ovakuavo vasoka okuti etyi tyapopia ovanthu ovo otyili. Ovanthu pahe vanguanguana vala, mokonda tyiti vala omikanda vipopia etyi, ovanthu vapopia otyikuavo.
Ovalongesi vove pamwe vapopia okuti ouye, na atyiho tyili kouye, vieyako vala avike, kutupu-ale ou wevitunga. Mahi okuti ovalongesi vove vena umwe ovipuka vekulekesa, vilekesa okuti tyili kouye kutupu Omutungi? Mahi tyelikalela notyo, pamwe muene noove uhole okumona ovanthu vonongeleya valongesa ovanthu okuti kouye kuna Omutungi. Mahi okuti pena umwe evi vekulekesa, vikukalesa nonthumbi yokuti kuna Omutungi? Ine vekupopila vala utyitavele mokonda tyatunda mondaka ya Huku?
Ove hamwe tyipondola wasoka umwe kuotyo, iya tupu hamwe usoka okuti kutupuale ou utyivila okupopia nawa okuti kouye kuna Omutungi. Tupu hamwe ulipula okuti: Okuti tyesukisa umwe okutyinoñgonoka?
Omukanda ou o Pahukei! haunene maupopi ovipuka viakalesa ovanthu ovanyingi nonthumbi yokuti kouye kuna Omutungi. Konyima, aupopi omokonda yatyi okunoñgonoka okuti kouye kuna Omutungi tyipondola okukuatesako.