OUYE UNO KAUKAHI NAWA

3 | Kuata Nawa Omapanga Ove

OITYI TYESUKISILA?

Mokonda ouye weyula ovivi, ovanthu vena otyiho. Mokonda yotyo ovanthu ovanyingi tyehetyii vayapuka umwe komapanga avo.

Kavakala vali nomapanga avo.
Vokuelinepa pamwe pahe kavatomphola vali.
Ovohe kavesukile-ale novana vavo.

Etyi Wesukisa Okunoñgonoka

Okukala nomapanga tyikahi nawa mokonda vetukuatesako, haunene umwe tyina tuna ovitateka.
Ovipuka ovivi vikahi nokumoneka mouye uno, vipondola okuetela ovitateka ombunga yove.
Ovipuka vipopiwa motelevisau vipondola okutilisa owoma ovana vove.

Oityi Upondola Okulinga?

Ombimbiliya yati: “Epanga liotyotyili una oluembia omuvo watyo auho, ukala omunthu ukuvatela pomuvo wononkhumbi.” — Provérbios 17:17.

Omapanga apondola okukukuatesako nokukulingilako ovipuka oviwa. Okunoñgonoka okuti pena umwe ukuhole tyipondola okukukuatesako okuluisa ovitateka vya nthiki-na-nthiki.

OITYI OVE UNA OKULINGA—Ovipuka Vimwe Vikuatesako

Tyina wamatumbukilua notyiponga, kuata nawa omapanga ove mokulinga ovipuka evi:

PAMEKA OTYINEPO TYOVE

Pameka Otyinepo Tyove

Ombimbiliya yati: “Hahe vevali tyipona wike . . . Mokonda, inkha umwe puvo atoka, mukuavo upondola okumukatula.” (Eclesiastes 4:9, 10) Ovanthu vokuelipa vena okuundapela kumwe, kavapondola okulilinga okalolela.

Ovolei okuhanyapo ovipuka vimusoyesa. Mahi mwesukisa okupua-elundo nokulipolelapo oviponyo.
Monthiki ike yosimanu, ovolei okunthomphola ovipuka vimwe mwesukisa okuviukisa. Mahi tyina mutyilinga hinangelei okuti etyi muhanda okutelula otyitateka hakutala olie wapengesa.
Ovelei omuwo wokulingila kumwe ovipuka muhole.
Hinangelei ovipuka vimwe oviwa mualingilile kumwe, mokutala onofoto mbotyinepo tyenyi aa ovipuka ovikuavo.

Umwe utiwa o David, wati: “Ovalinepi vapondola kamavelitavela movipuka aviho, mahi otyo katyilekesa okuti kamevetyivile okuundapela kumwe. Ovalinepi vapondola okukoya okulinga otyipuka tyimwe mahi pahe aveho avalingi ononkhono opo otyipuka otyo tyeende nawa.”

KUATA NAWA OMAPANGA OVE

Kuata Nawa Omapanga Ove

Tyehekukuateswa-ko vala nomapanga ove, nove soka oñgeni upondola okukuatesako vakuenyi. Tyina upameka vakuenyi, nove ukala tyapama.
Nthiki-na-nthiki, popia na umwe pomapanga ove, otehela oñgeni ekahi.
Pula omapanga ove oityi tyivekuatesako okulambela movitateka ngevi ove unavio.

Nicole wati: “Ovitateka pamwe vikahi ngombila yeya nomphepo. Tyina wamatumbukilwa nombila yeya nomphepo, oku wenda nako kukumono. Omapanga maekukuatesako okukupopila apa uli, onoñgonoka oku wenda nako.”

KUATESAKO OVANA VOVE

Kuatesako Ovana Vove

Ombimbiliya yati: “Kese munthu, una okukanyauka okutehelela, mahi asete okupopia.” (Tiaku 1:19) Ponthyimbi, ovana vove vapondola okuehekupopila liwa ovipuka vivesukalalesa, mahi ine uvetehelela noumphwa-lundo, matyivekuatesako avekupopila etyi vasoka.

Wahakuluminye ovana vekupopile ovitateka viavo. Muene ovana vetyihole tyokupopila ovohe ovitateka viavo tyina vekahi vala meumbo nokuyola-yola iya natyina vaenda-enda novohe.
Kuatesako ovana vove vahatehelele ovipuka ovivi.
Yeka ovana vove vanoñgonoke etyi ulinga opo uyakulile ombunga yove.
Popila ovana vove etyi mupondola okulinga, tyina muamatumbukilwa notyiponga.

Umwe utiwa o Bethany wati: “Popia novana vove oveyeke vapopie oñgeni velitehelela. Pamwe vapondola okukuholeka oñgeni velitehelela. Vepopila okuti nove ulwa-vo novitateka ngo viavo, iya ovepopila oityi tyihole okukukuatesako.”