Onthilo Novanthu Yaya Napi?

OITYI TUSUKISILA OKULINGA ONTHILO VAKWETU

Okulilinga onthilo tyiondweya ovipuka, katyivivilisapo.

Omuhe umwe uli m’Ombimbiliya wati: “Okukumbulula nomapole onyengo itula, mahi ondaka itoma inkhindula onyengo.” (Omihe 15:1) Okuhalingi vakwetu onthilo, nokupopia vala tyihena onthilo, tyafwa okupaka ononkhwii potupia, tyinyona.
Sesusi wati: “Mwene omulungu upopia vala etyi tyeyula momutima.” (Mateusi 12:34) Pamwe omunthu nga apopia tyihena onthilo, ngootyo otyo umwe tyili momutima wae. Omu tupopila na vakwetu, otyo tyilekesa oñgeni tutala ovanthu vomuhoko omukwavo, no votyivala otyikwavo, no votyilongo otyikwavo.

Ovanthu valamba po 32.000 vakala movilongo vina 28, vapopia okuti nkhele twali katunetyimone tyovanthu vehelilingi onthilo ñgana.

OITYI UNA OKULINGA

Tyilinge kosikola tyilinge kovilinga, linga onthilo ovanthu vatyo aveho, na tyina umwe etyi veli nokusoka tyelikalela neetyi ove usoka. Tala omovipuka patyi mupondola okulivila. Otyo matyikukwatesako ohapolo-po vala omapita vakwenyi.

“Talamei, mwahakoyesei vali vakwenyi opo noonwe mwahakoyeswe.” — Mateusi 7:1.

Etyi uhanda ñgeno otyo ulingwa, noove otyo ulinga vakwenyi. Ine ulinga onthilo vakwenyi, tupu kulingi okapungulula, navo otyo mavekulingi.

“Etyi mwahanda vakwenyi vemulinge, noonwe otyo muvelinga.” — Luka 6:31.

Linga omunthu wokweevela. Tyina umwe amekupopi ondaka yahaviukile, aa una tyimwe ekulinga tyekunumanesa, liatela-ko vala, wahatie ngootyo walingila wina.

“Omunthu wokukungunyika ovipuka kanumana liwa, tyihiwa tyina ati ngalewa-ñgo, ngwe ehesuku.” — Omihe 19:11.

Omondywo Yomaliongiyo Onombangi mba Siovaa, eliongiyo kalinehimbike. Ovanthu vomihoko vielikalaila, ovakulu novana veli nokulikukunya nawa, otyo vatomphola.

OITYI ONTHWE ONOMBANGI MBA SIOVAA TULI NOKULINGA

Pomaumbo tukala, no kovilinga, Onombangi mba Siovaa valinga etyi tyieta ombembwa pokati kavo na vakwavo.

Tulongesa ovanthu aveho Ombimbiliya, mahi katuveti ngaliti pano muna vala okulandula etyi onthwe tulongesa. Tuvelongesa vala onondunge mbuli m’Ombimbiliya. Mahi pokuvelongesa tutyilinga “nomapole nonthilo onene.” — 1 Petulu 3:15; 2 Timotiu 2:24.

Onthwe katulingi okapungulula, tuyakula nawa ovanthu vatyo aveho veya komaliongiyo etu, vahanda okunoñgonoka Ombimbiliya. Tulikwatehila tukale nawa novanthu aveho, atulingi “onthilo ovanthu vatyo aveho.” — 1 Petulu 2:17.

Tulinga onthilo ovatumini vatumina otyilongo. (Ova Loma 13:1) Tutavela etyi ovitumino viotyilongo vipopia, tufeta omalilimu. Namphila twehelipake po viovatumini, mahi ava velipaka-po, tuvelinga onthilo, katuvepolo-po omapita.