Job Wali Nekolelo Mu Huku

OKUTI ove una okankhenda nomulume ou ukahi nokuvela? Enyina liae o Job. Ou ekahi nae omukai wae. Utyii oityi ekahi nokupopila Job? Ukahi nokuti: ‘Hingana Huku opo unkhie.’ Tutalei omokonda yatyi apopila ngotyo, netyi Job amonena emone enene.

Job ankho wali omulume wekolelo, utavela ku Yeho-​va. Ankho ukala motyilongo tyo Uz, popepi no Kanaa. Yehova ankho uhole unene Job. Mahi, ankho kuna omunthu umue umuyele. Utyii olie?

O Satanasi Eliapu. Hinangela okuti, Satanasi oandyu imue ombi iyele Yehova. Satanasi wetyivilile okuyondya Andau na Eva opo vehetavele ku Yehova. Ankho usoka okuti upondola okuhongiliya ovanthu aveho opo vehetavele ku Yehova. Okuti wetyivila? Au, ketyivilile. Soka kovalume novakai ovanyingi vekolelo tuelilongesa. Upondola okupopia omanyina a vamue?

Konyima yononkhia mba Jako na Jose mo Egitu, Job akala omunthu umue wekolelo enene komaiho a Yehova pano pohi. Yehova wahandele Satanasi anoñgonoke okuti kapondola okuhongiliya ovanthu aveho vakale onondingavivi. Ngotyo Huku atolela Satanasi okuti: ‘Tala nkhele Job etyi akolela muame.’

Satanasi akumbulula Huku okuti; Job una ekolelo muove mokonda wemupa ononkhano onongwa. Una ovipuka ovinyingi oviwa. Inkha umupolavio, mekuyale.’

Ngotyo, Yehova ati: ‘Enda, kemupolevio. Kalinge Job ovipuka aviho ovivi uhanda. Atutale inkha Job mandyale. Mahi, kupondola okumuipaa.

Tete, Satanasi wavakesa onongombe no vikamelu via Job, iya onongi mbae ambuipawa. Tupu waipaa ovana vae 10 notyipepe. Konyima Satanasi avete Job nouvela umwe omunene. Job amono ononkhumbi ononene. Otyo omukai wae atila: ‘Hingana Huku opo unkhia.’ Anthi Job ketavelele okulinga ngotyo. Akuiya vali omapanga ae etatu omatutu, aemupopila okuti: wavela tupu omokonda walinga ovivi ku Huku. Mahi, Job watualeleko nekolelo liae mu Huku.

Otyo tyahambukiswa unene Yehova. Aavela Job ononkhano onongwa, ngetyi weete polutalatu olu. Wahakula ouvela wae. Emupe vali ovana 10 ovawa unene. Kovipako viae emuyawisilako tyipona kohale.

Okuti nove mokala apeho nekolelo mu Yehova nga Job? Inkha utualako, tupu Huku mekekupa ononkhaneno onongwa. Upondola okukakala apeho nomuenyo, putyina oohi ino aiho maikakala ongwa ngo tyikunino tyo Endene.