Ovimato Vio Jerikoo

OITYI tyikahi nokutokesa ovimato evi vio Jerikoo? Ngoti muayumbwa etenda enene. Mahi kononthiki mbuna ankho kutupu omatenda ine omauta. Ankho ehuviso ekuavo lia Yehova. Matulilongesa oñgeni tyaenda.

Tehelela etyi Yehova atolela Josue. Wati: ‘Ove nomasualali ove, lisetei nepundaumbo lio Jerikoo. Lisetei otyikando tyike kese nthiki. Tyilingei ononthiki epandu. Tyindei otyikasa tyomphango. Ono saserdote epanduvali vapite komutwe otyo vahika ononkhwino mbavo.

‘Monthiki yapanduvali lisetei-setei nepundaumbo ovikando epanduvali. Konyima amuhiki peulu ononkhwino, iya amuho kumue ululei onkhwo yovita. Iya ovimato mavitokela pohi.’

Josue novanthu vae valinga etyi Yehova evetuma. Puetyi ankho vaenda, vati filú. Ankho nawike upopia. Etyi ankho tyiivala vala ononkhwino no nomphai. Onondyale mbovanthu va Huku mo Jerikoo ankho vatila ouoma. Uluete epanda eli enkhuhu likahi pondyanena? Ondyanena ei oyalie? Oya Raabe. Raabe walingila atyiho ovalavi vevali vemutuma. Ombunga yae aiho ikahi nae mokati nokutala.

Konyima, monthiki yepandu-​vali, etyi veliseta nepundaumbo ovikando epanduvali, vahika ononkhwino, omasualali aulula onkhwo, iya ovimato avitokela pohi. Josue apopi okuti: ‘Ipaei ovanthu aveho vekahi mepundaumbo amuliyoko. Yokei atyiho. Poleimo vala opalata, no olu, notyivela otyinkhuhu, iya amuvituale mekaka lia Yehova.’

Josue wapopila ovalavi vevali okuti: ‘Endei mondyuo ya Raabe, iya amuetako Raabe nombunga yae aiho.’ Ngotyo, Raabe nombunga yae vayovolwa, ngetyi ovalavi vemulaele.