Otyimphulu mo Isilayeli

TALA etyi omulume ou ekahi nokuheyela pohi motyikaka tyae. Otyikutu tyimue otyiwa, no olu, no nombongo mbumue mbo palata. Wevipola mepundaumbo lio Jerikoo. Uhinangela, oityi ankho tyina yokulingwa ovipuka viomo Jerikoo?

Ankho vina yokuhanyaunwa, iya o olu nopalata ankho vina yokutualwa kondyuo ya Yehova. Mahi, ovanthu ava kavatavelele ku Huku. Vavaka ovipuka via Huku. Enyina liomulume wokuavaka o Akã, iya aveho ovo vekahi nae ombunga yae. Tutalei oityi tyapitapo.

Konyima yetyi Akã avaka ovipuka evi, Josue atumu ovalume vamue okukaluisa ovanthu vepundaumbo lio Ai. Mahi, ovo kavetyivilile okulwa. Vamue vaipawa, iya ovakuavo avatunduko nokuhateka. Josue anumana unene. Waika otyipala tyae pohi elikuambela ku Yehova ati: ‘Omokonda yatyi wayekela otyipuka etyi okupita nonthue?’

Yehova akumbulula okuti: ‘Katuka, ova Isilayeli valinga onkhali. Vapola ovipuka vimue ankho vina yokuyokwa ine okutualwa kondyuo ya Yehova. Vavaka otyikutu tyimue otyiwa iya avetyiholeka. Ame himemuavela ononkhaneno onongwa alo muyokapo otyikutu otyo, nokuipaa ou wapola ovipuka ovio.’ Yehova apopi okuti malekesa Josue olie omulume ondingavivi.

Josue waongiya ovanthu aveho, iya Yehova ayulika omulume ondingavivi Akã. Akã ati: ‘Nalinga onkhali. Namona otyikutu otyiwa, no olu, no nombongo mbo palata. Nakala noluiho navio iya andyivityindipo. Neviheyela pohi mekaka liange.’

Etyi vavasa ovipuka ovio vevieta ku Josue. Iya Josue apopila Akã okuti: ‘Omokonda yatyi wetuetela ononkhumbi? Pahe, Yehova mekuetela ononkhumbi.’ Iya ovanthu aveho avahimbika okuveta Akã nomamanya nombunga yae alo vankhia. Otyo katyilekesa okuti katupondola okupola ovipuka vihevietu?

Konyima yovipuka ovio aviho, ova Isilayeli vakaluisa vali ovanthu voko Ai. Monthiki oyo, Yehova akuatesako ovanthu vae iya avafindi.