Omokonda Yatyi David Atilila

ETYI David aipaa Goliya, Abner onkhalamutue yomasualali ova Isilayeli emutuala ku Saulu. Saulu ahambukwa unene na David. Alingi David onkhalamutue yomasualali ae. Iya aende nae opo akakale kombala yae.

Onthiki imue, etyi omasualali akondoka kokuluisa ova Filisteu, ovakai vahimbika okuimba okuti: ‘Saulu waipaa omakwi ovityita. Mahi, David waipaa omakwi nomakwi ovityita.’ Otyo tyaetesa Saulu onkhi, mokonda David ankho ukahi nokuhivilikwa vali tyipona Saulu. Anthi, omona wa Saulu Jonatã ankho utupu onkhi. Jonatã ankho uhole unene David. Iya David ankho nae uhole unene Jonatã. Moluotyo, Jonatã na David valinga omphango yokuti mava-​kala omapanga apeho.

David ankho omuhiki omuwa wo harpa. Iya Saulu ankho uhole oviimbo viae. Mahi, onthiki imue onkhi ya Saulu yemulingisa otyipuka tyimue otyivi unene. Puetyi ankho David ahika o harpa, Saulu wapola eonga liae, eliyumbu David ati: ‘Mandyimupapela motyimato.’ Anthi, David wayepa, iya eonga alimuponyo. Onthiki onkhuavo, Saulu waponya vali David neonga liae. Ngotyo, David anoñgonoka okuti una yokulunguka unene.

Uhinangela omulao Saulu alingile? Saulu watile omulume maipaa Goliya, memupe omona wae opo akale omukai wae. Ngotyo, Saulu watolela David okuti memuavela omona wae Mikal. Mahi, tete una yokuipaa vali ova Filisteu 100. Nkhele tyisokolola vala otyo! Tyotyili Saulu ankho wahandele David akaipawe nova Filisteu. Anthi, kavemuipaele, iya Saulu aave omona wae ku David opo alinge omukai wae.

Onthiki imue Saulu wapopila Jonatã novaundapi vae aveho okuti mahande okuipaa David. Mahi, Jonatã atolela tate yae okuti: ‘Wahaipae David, kekulingile natyimue otyivi. Mahi, ovipuka aviho David alinga viekukuatesako unene. David watuaile omuenyo wae motyiponga, opo akaipae Goliya. Etyi emuipaa ove ohambukwa.’

Saulu etavela komona wae Jonatã, alae okuti kamaipaa David. Iya David akondoka okuundapela vali Saulu mondyuo yae. Mahi, onthiki imue, etyi David ankho ahika o harpa, Saulu ayumbu vali David eonga. David wayepa, iya eonga alikatoma motyimato. Otyo otyikando tya tatu. David anoñgonoka okuti pahe una yokutila.

Otyinthiki otyo David aende nokeumbo liae. Mahi, Saulu atumu ovalume vamue opo vekemuipae. Mikal ankho utyii okuti tate yae mahande okumuipaa. Moluotyo, wapopila omulume wae okuti: ‘Inkha kutili otyinthiki tyino, muhuka moipawa.’ Iya kounthiki watyo oo, Mikal akuatesako omulume wae okutila, emupitisa pondyanena. Mokuenda kuomanima epanduvali David ankho uhimama vala nokuholama, opo Saulu ehemuvase.