Okuoko Kuhoneka Motyimato

OITYI tyikahi nokupita polutalatu apa? Ovanthu vekahi motyipito otyinene. Ohamba yo Mbambilonia ankho yakonga ovanthu ovanyingi vokuakolela. Ankho vekahi nokuundapesa onokopo mbo olu, nombo palata, no nombasiya mbapolelwe mondyuo ya Yehova ko Jelusalei. Mahi, liwa liwa, vamona okuoko kuomunthu kuhoneka motyimato. Ovanthu aveho avatili ouoma.

Ohamba, ankho o Belsazar omutekula wa Nambukondonosole. Atumu okuihana liwa ovanongo vae, ati: ‘Omunthu wetyivila okutanga onondaka ombu, no kumbuhangununa, mapewa ovipuka ovinyingi. Tupu makala omutumini watatu mouhamba.’ Anthi, nawike povanongo vae wetyivilile okutanga onondaka ombo mbahonekwa motyimato, ni okumbuhangununa.

Etyi me yohamba etyiiva, anyingila mondyuo ankho vekahi iya atolela ohamba okuti: ‘Wahatile ouoma. Mouhamba wove muna omulume umue, wii ono huku mbukola. Etyi ankho ho mbuale Nambukondonosole ohamba, wemulingile omutumini wovanongo vae aveho. Enyina liae o Daniele. Tuma vekemuihane, opo eye okukupopila oityi tyihangununa ovipuka evi aviho.

Daniele avemueta liwa liwa. Daniele waanya okupewa oviawa. Iya ahimbika okuhangununa omokonda yatyi Yehova apolele kouhamba he mbuale ya Belsazar, Nambukondonosole. Daniel ati: ‘Nambukondonosole ankho una omalityindailo unene. Moluotyo, Yehova emuhitisa.’

Daniele atolela Belsazar okuti: ‘Mahi, ove atyiho tyapita naho mbuale utyii. Nongotyo, ove nkhele walinga omalityindailo ngetyi Nambukondonosole alingile. Wapola onokopo mbatunda kondyuo ya Yehova, opo unuinemo. Ukahi nokunkhimaneka ono huku mbalingwa novimuti, nomamanya. Kukahi nokunkhimaneka Omutungi wetu Omunene. Otyo Huku atumina okuoko kuhoneke onondaka ombu.

Daniele ati: ‘Onondaka ombu mbati: MENE, MENE, TEQUEL PARSIM.’

‘MENE, ihangununa okuti, Huku wavalula ononthiki mbouhamba wove, iya pahe mbapuako. TEQUEL, ihangununa okuti, Huku wekupaka kotyipesalo, atale okuti kukahi nawa. PARSIM, ihangununa okuti, ouhamba wove mewavela ova Medo nova Persia.’

Daniele ankho kenemane okupopia, omafualali o Medo no Persia, ahimbika okunyingila Mombambilonia. Epundaumbo avelitambula, Belsazar avemuipaa. Onondaka ombo mbahonekwa nokuoko, mbafuisuapo motyinthiki tyatyo otyo. Iya pahe, oityi matyipiti nova Isilayeli? Matuketyivasa komutue. Mahi nkhele, tutalei oityi tyapita na Daniele.