Yesu Uvelula Ovavei

YESU waendaenda otyilongo atyiho, wavelula ovavei. Ovanthu avahimbika okupopia kombinga yomahuviso oo, mo mapundaumbo aeho. Moluotyo, ovanthu vaetela Yesu ovilema, novamphoki, no nompholo, novanthu ovakuavo vali vavela. Iya Yesu evevelula aveho.

Ankho pahe papita omanima etatu tunde apa João ambatisala Yesu. Iya Yesu atolela ono apostolu mbae okuti apa katutu maende ko Jelusalei, oko makaipaelwa konyima atutiliswa. Mahi, mokamuvo oko kehehi Yesu watualako nokuvelula ovavei.

Onthiki imue, Yesu ankho ukahi nokulongesa mo tyasapalo. Pala ova Judeu, otyasapalo ankho onthiki imue yokupululukuapo. Omukai ou uluete apa, ankho uvela unene. Omanima 18 omukai oo, ankho wenda vala tyapetama, ankho ketyivili okutalama. Moluotyo, Yesu wapaka omaoko ae komukai oo, iya omukai akala nawa.

Otyo tyanumanesa unene ononkhalamutue mbo nongeleya. Umue puvo wakalulukila ovanthu okuti: ‘Tuna ononthiki epandu pala okuundapa. Ombo ononthiki pala okuiya okuhakulwa, hamo tyasapaloko.’

Mahi Yesu wakumbulula okuti: ‘Onue munondingavivi. Kese umue puonue ukutulula otyimbulu tyae eketyinuisa monthiki yo tyasapalo. Pahe omukai ou epongo wavela omanima 18, kapondola okuvelulwa mo tyasapalo?’ Ekumbululo lia Yesu liakundisa ovalume ovo onondingavivi.

Konyima, Yesu nono apostolu mbae vaya noko Jelusalei. Etyi vehika mepundaumbo lio Jeriko, ovamphoki vamue vevali ankho vaita osimola veiva okuti Yesu ukahi nokupita. Moluotyo, vapopila peulu okuti: ‘Yesu, tukuateseko.’

Yesu aihana ovalume ovo ovamphoki, evepulu okuti: ‘Onue muahanda ndyimulinge ñgeni?’ Ovo, avati: ‘Tatekulu, patulula omaiho etu.’ Yesu akuate komaiho avo, iya avahimbika okutala. Utyii omokonda yatyi Yesu alingila omahuviso oo aeho? Omokonda Yesu ankho uhole ovanthu. Ankho uhanda ovanthu vakale nekolelo mue. Ngotyo, tupondola okukala nonthumbi yokuti puetyi makatumina oohi ino ngo Hamba, nawike vali makavela.