Ouye Omupe Pano Pohi

TALA omiti ovio omile, no nonthemo onongwa, no nomphunda ononde. Kapehiwilue apa? Tala ombambi ikahi nokulia peke liokamona aka. Tupu tala ononkhiyama, no nonkhambe mbatalama ngotyo. Kutyihole okukala meumbo ine opomphangu ngei?

Huku uhanda ove ukakale apeho mouye omupe pano pohi. Mahi, kahande ukakale no nongembia mbukahi nokumonesa ovanthu ononkhumbi hono. Ombimbiliya ilaa vana mavakakala mouye omupe okuti; ‘Huku makakala navo. Kamukakala vali ononkhia, ni okulila, ni omauvela. Ovipuka ovio mavikapita.’

O Yesu makalinga ovipuka ovio aviho oviwa. Ove utyii onalupi? O putyina amanyimiko onondingavivi ambuho novipuka ovivi kombanda yoohi. Hinangela, okuti etyi Yesu ali pano pohi, wavelulile ovavei, no kupindulapo alo umue vana vokuankhia. Yesu walingile ngotyo, opo alekese etyi makalinga kombanda yoohi aiho, putyina makakala Ohamba youhamba wa Huku.

Pahe nkhele sokolola oñgeni ovipuka mavikakala oviwa, mouye omupe pano pohi! Yesu kumue navana aholovona, mavakaviala keulu. Ovatumini ovo mavakatekula nawa kese umue pano pohi, opo ovanthu aveho vakakale nehambu. Pahe tutalei etyi onthue tuna yokulinga, opo Huku eketuavele omuenyo wahapu mouye wae omupe.