Elongeso 7
Fwenaina ku Huku Melikwambelo
Omokonda yatyi otyokwakolela okulikwambela kese nthiki? (1)
Okulye tuna yokulikwambela, ya ñgeni? (2, 3)
Ovipuka patyi tuna okwita melikwambelo? (4)
Onalupi ove una yokulikwambela? (5, 6)
Okuti Huku utehelela umwe omalikwambelo aeho? (7)
1. Okulikwambela tyihangununa okupopia na Huku nomutima weliola. Ove una yokulikwambela ku Huku olunyingi kese nthiki. Ngotyo ove upondola okulihikiya kwoe ngepanga limwe onthyolwe. Yehova omunanene nokuna epondolo, nongotyo oe utehelela omalikwambelo etu! Ove ulikwambela ku Huku olunyingi kese nthiki? — Salmo 65:2; 1 Tessalonicenses 5:17.
2. Elikwambelo lina onthele mefendelo lyetu. Ngotyo, tuna yokulikwambela vala ku Yehova Huku. Etyi ankho Yesu ali kombanda yoohi, oe apeho welikwambela ku Tate yae, hakuumweko welikalela. Nonthwe otyo tuna okulinga. (Mateus 4:10; 6:9) Anthi, omalikwambelo etu aeho ena okulingilwa menyina lya Yesu. Otyo tyilekesa okuti tuna onthilo nomphangu ya Yesu, nokuti tuna ekolelo motyilikutila tyae tyeyovolo. — João 14:6; 1 João 2:1, 2.
3. Putyino tulikwambela tuna yokupopia ku Huku etyi tyikahi momutima wetu. Katupondola okulinga omalikwambelo etu twapaka momutwe, ine okwetanga momukanda womalikwambelo. (Mateus 6:7, 8) Tupondola okulikwambela mukese onkhalo ilekesa onthilo, kese oola, nopukese mphangu. Huku upondola aló umwe okutehelela omalikwambelo etu okutotovola tulingila momutima. (1 Samuel 1:12, 13) Otyiwa okutaindya omphangu imwe yokwati filú, kokule novanthu opo tulinge omalikwambelo etu mwene. — Marcos 1:35.
4. Okombinga yovipuka patyi upondola okulikwambela? Kombinga yatyiho tyipondola okunyona oupanga wove nae. (Filipenses 4:6, 7) Elikwambelo Yesu alongesa lilekesa okuti tuna okulikwambela kombinga yenyina nevangelo lya Yehova. Tupu tupondola okwita tuavelwe eteku lyetu lyasukisa, okuevelwa ononkhali mbetu, nekwateso opo tutamanane nomahetaiko. (Mateus 6:9-13) Omalikwambelo etu kaapondola okukala elulu. Tuna okulikwambela vala pala ovipuka vina vikahi kumwe nevangelo lya Huku. — 1 João 5:14.
5. Upondola okulikwambela kese omuvo omutima wove ukuhindila okupandula ine okupanda Huku. (1 Crônicas 29:10-13) Una okulikwambela putyino una ovitateka noputyino ekolelo lyove likahi nokuhetaikwa. (Salmo 55:22; 120:1) Otyiwa okulikwambela tyina nkhele uhenelye. (Mateus 14:19) Yehova utukonga opo tulikwambele “omivo aviho.” — Efésios 6:18.
6. Onthwe haunene tuasukila okulikwambela inkha twalinga onkhali imwe onene. Momivo vyatyo ovyo tuna okwita okankhenda neevelo lya Yehova. Inkha tumwendehila ononkhali mbetu ya atulingi ononkhono opo tuhakondoke vali okumbulinga, Huku “ukahi tyafwapo opo etwevele.” — Salmo 86:5; Provérbios 28:13.
7. Yehova utehelela vala omalikwambelo ovanthu ovavyuki. Opo omalikwambelo ove atehelelwe na Huku, una yokulinga ononkhono mbokwendela movitumino vyae. (Provérbios 15:29; 28:9) Una yokukala weliola omutima putyino ulikwambela. (Lucas 18:9-14) Wasukila okulinga ononkhono kombinga yetyi ulikwambelela. Ngotyo mokalekesa okuti ove una ekolelo, nokuti etyi upopia otyotyili. Ongotyo vala Yehova makakumbulula omalikwambelo ove. — Hebreus 11:6.